Tèmel keeya 9

Tolla ge Zeso too Sol

Tkt 22.3-16; 26.9-20; Gal 1.1-16

1Ajo̰o̰, ge sok mbe ya day, Sol kaa ge dwaɗɗa ge sone ge na zì, ge kee nda ge ame hateya ge Bagezok ne ma yal mage hun num, dwam a̰me go ɗu, mbo ge ga̰a̰l ge nda ge kee tuwaleya ma way ge waɗe ta, 2ele ne go, ne ho̰ na lawayta, ge hon na vin̰a mbo ge ga̰a̰l ge zok kee kaɗeya ge Yahuɗ ma way, ge no suwal ga̰a̰l Damas diŋ-ge ma ta, ndwa go, sok ge na seɗ nda soɗob koo nda zaab ge hee ko pul ge Bagezok ne ma, na wa̰a̰ num, na vuwa num, na wa gene num ya ge suwal ga̰a̰l Jerusalem diŋ.

3Sok ge ame na lawayta mbe go, zuɗ mbo suwal ga̰a̰l Damas. Sok ge yin̰a ya guwa ge ne, tugcug, kɔn̰al a̰me see ge pḭḭ zì ya ge ne pagal ge mam see go, mbo ya vee ne se. 4Deɗ suwa se, za̰a̰ ka̰a̰l a̰me janna go: Sol, Sol ge dape mo wa ka kee mbi yal go de? 5Ele ne go: Bagezok-goo a mo huɗi ne de? Bagezok gwan ge ne janna go: A mbi Zeso ge mo kee ne yal ne: [Mo mbo za̰a̰ tene yal sok n̰aɗe ɔwara wa zwabal ge mo ko go. Ge sok mbe go voo wan ne, ɗege ndaɗɗa, jan ne go: Bagezok, mo sḛ ɓyare go, mbi kee da de? Sok mbe go Bagezok jan ne go]: 6Ɗege digi, mbo ge suwal ga̰a̰l diŋ, ge sok mbe yà, àa mà mbo jan mo kaŋ ge mo mbiya kee ne.

7Ne ka̰a̰m ge àa ge num mbo ya dagre ma, àa mḛḛ se, àa zane wa daal cub, àa kee ajab. Àa ka za̰a̰ ndu a̰me ka̰a̰l faaya, ɗaŋɗe, àa kuwa ndu mbe sḛ to. 8Sol ɗege digi ge suwa se, kan na ndwa zum ndil sok, ɗaŋɗe, ne ndwa kaɗ laaya. Àa wan ne tok, àa ɗeme ne mbo suwal ga̰a̰l Damas diŋ yà. 9Gaa kàɗɗa dàma ɗiŋ dwam taa, zam kaŋ to, njoɗ a̰me to me.

10Ago, ndu ge ame hateya a̰me ɗu ge àa tol ne Ananiyas wa ya ge suwal ga̰a̰l Damas mbe diŋ. Bagezok dyan tene ge ne ta, ge fare taaya zì, tol ne go: Ananiyas! Ne sḛ gwan ge ne vinna go: Mbi no, Bagezok! 11Bagezok jan ne go: Ɗege digi, mo mbo ge vin̰a ge àa tol ne go, vin̰a ge temel yà, mo mbo ge zok ge Yudas ne diŋ, mo ele ndu a̰me ge suwal ga̰a̰l Tars ne ge àa tol ne Sol pe. 12Ago, ne sḛ ge sok kee kaɗeya go, see fare taaya no. Ge ne fare taaya mbe zì, kuwa ndu a̰me ge àa tol ne Ananiyas waɗ-ɗa ge na pagal zì no, ka ee na tok ma ge ne pagal, ndwa go ne ndwa ma tin̰a. 13Ananiyas gwan ge ne janna go: Bagezok, mbi za̰a̰ nda ya gḛḛ faa fare ge ndu mbe ne, ge yal ge a kee nda ge ho fareba mo ta ge suwal ga̰a̰l Jerusalem diŋ-ge ma. 14Mbo ya go go bàŋ to, ago ga̰a̰l ge nda ge kee tuwaleya ma way ma ho̰ ne pool ya ne go, ne wa̰a̰ nda ge ho fareba ge no suwal Damas diŋ-ge ma peɗ.

15Ɗaŋɗe, Bagezok jan ne go: Mbo, ago ndu mbe kaŋ tèmel ge mbi taa nee ne, ndwa go ne mbo oy fare ge ambi ge rusu ge ɗogle ma ta peɗ, ge num ga̰a̰l ma ta, ge Izrayel van ma ta me. 16Mbi mbo ngay ne yal ge ne sḛ mbo njoɗ num ya ma peɗ ge mbi pe.

17Ananiyas ɗege mbo, sok ge dee ge Sol ta diŋ yà, ee na tok ma ge ne pagal jan ne go: Sol, mbi na̰ van, Bagezok Zeso ge din̰a tene ge mo ta, ge vin̰a mbo Damas go, teme mbi ya ne ge mo ta, ndwa go mo ndwa ne tin̰a gezi, mo kuwa sok, mo see On̰om ge Harcal mbyaɗɗa tab me. 18Ge sok mbe go waɗ, kaŋ a̰me ma, dinna ge sini ɔswa ma go fwage ge Sol ndwa zì ya, ge sok mbe go, ee pe kuwa sok. Ɗege digi, àa kee ne baptem. 19Guwa̰, zam kaŋ zam, seɗ pool me.

Pol, ndu ge sayda ge Zeso ne

Sol gaa kàɗɗa ge Damas diŋ, dwam ma kwaɗa lag ge nda ge ame hateya ma ta. 20Ge sok mbe go gaw, ɗege oy fare ge zok kee kaɗeya ge Yahuɗ ma way ma zì, ka janna go: Zeso ne Dok Van ne. 21Nda peɗ ge ka za̰a̰ ne ma ka kee ajab, àa ka janna go: A be ndu ge ka kee nda ge ka tol dḭḭl mbe ma yal ne ge suwal Jerusalem diŋ to de? Daa be mbo ya ndwa wan num, gene num mbo hon ga̰a̰l ge nda ge kee tuwaleya ma way ma to de? 22Ge sok mbe go, Sol ka jan fare ndaa kaka ndwa ngayya go: Zeso ne Krist, ndu ge Dok taa nee ne, Yahuɗ ge Damas diŋ-ge ma seɗ sok ge ee maa ko to.

23Dwam ma guwa̰ kaal nde, Yahuɗ ma tol ta kwateya ge ne fare pe, àa vin ta go maa hṵṵ ne gezi. 24Ɗaŋɗe, num fare mbe mbo ya ɓul ge Sol tɔgwa zì. Àa za̰a̰ ta koy gulum ga̰a̰l wa ge waɗɗa ge suwal ne ma, ɗaal mage gyala ndwa ban ne gezi. 25Ge ɗaal a̰me zì ɗu, Sol nda ge ame hateya ma ee ne ge gwal ga̰a̰l a̰me zì, àa siri ne ge gulum pagal digi ya se, ge ne lee ge zum-ge pe yà.

Sol ge suwal ga̰a̰l Jerusalem diŋ

26Sok ge Sol dee ya ge Jerusalem diŋ, ɓyare vin̰a ge go na ɓa̰a̰ dagre ge nda ge ame hateya ge Zeso Krist ne ma, ɗaŋɗe, num sḛ ma peɗ ka chiya ne voo, àa be hoɗ fareba go ne seŋe ya ndu ge ame hateya dinna ge maa sḛ ma go to. 27Ge sok mbe go, Barnabas wan ne, gene ne mbo ge Zeso nda ge temeya ma ta yà. Wan num fare pe ge Bagezok din̰a tene ge ne ta, sok mbo suwal Damas go, ge fare ge Bagezok jin̰a ne ma, ge pool ge ne sḛ see ne ndwa oy Fare ge Kwaɗa ge Zeso dḭḭl ne ge suwal ga̰a̰l mbe diŋ. 28Ge sok mbe ya day, Sol mage num gaa kee tèmel dagre, àa ka waɗ zum mage gwan-na ge suwal ga̰a̰l Jerusalem diŋ, ge fare ge Bagezok Zeso dḭḭl ne oyya be voo. 29Ne sḛ ka jan Yahuɗ ge mbo ge suwa ge Grek ma way ya ma Fare ge Kwaɗa ge Zeso ne waɗme, àa ge num ka pee ta fare gḛḛ, num sḛ ma ka ɓyare vin̰a ge ban ne gezi. 30Sok ge na̰ van ge ho fareba ma za̰a̰ fare mbe go, àa ɗeme ne mbo suwal Sezare yà, àa ee ne ge baaburi ge mam se ge go, mbo ge suwal Tars yà.

31Guwa̰, ɓase ge Krist ne ge no suwa Jude go ma, ge Galile go ma, ge Samari go ma dul wa mbo ya ee se. Àa ka don zḛḛ ge hoɗ fareba zì, àa ka gwan maa pagal ge Bagezok pe se, àa ka zuli se ge mbaaya ge On̰om ge Harcal ne ta.

Zonna ge Ene ne

32Ajo̰o̰, Piyer ka luwaɗe ndil nda ge ho fareba ge no ge suwa ge Jude ne go ma peɗ, dwam a̰me go ɗu, deɗ-ɗa ge num ge suwal Lida diŋ-ge ma ta. 33Mbo ya seɗ ndu ge looɗeya a̰me ɗu ge àa tol ne Ene, fiiya ge saŋal pul go. Ne sḛ kee tuguɗi ya del wa gezi zi. 34Piyer tol ne Ene, jan ne go: Zeso Krist zon mo ya go! Ɗege digi, mo pwage mo saŋal. Ne sḛ za̰a̰me digi avun cab me. 35Nda ge kaa ge suwal Lida diŋ mage ful pul ge Charon ne go ma peɗ, àa kuwa Ene, àa seŋe ta ya se ge Bagezok ta.

Tanna ge Dorkas ne

36Ndu gwale a̰me ɗu ge suwal Yafa diŋ-ge, kaa ndu ge ame hateya ne, àa ka tol ne ge wa hebre go Tabita, ne wa Grek Dorkas, ndwa go Maaɗe. Ka kee tèmel ge kwaɗa ma gḛḛ, ka mbaa nda ge hoɗegeya ma gḛḛ me. 37Ge dwam mbe ma zì, tuguɗi wan ne, suu. Guwa̰, àa son ne gezi, àa mbo ee ne ge zok ge no kon pagal digi ya-ge zì. 38Ajo̰o̰ suwal Lida mage suwal Yafa buwal kaal to, nda ge ame hateya ma za̰a̰ go Piyer go ge suwal Lida diŋ. Àa teme nda zi mbo ge ne ta yà, ndwa kaɗe ne go, ne ha tene ya avun cab, mbo ya ge maa ta. 39Sok ge àa mbo ya jan Piyer tèmel mbe, ne sḛ ɗege digi mbo ɓanna ge num gaw. Sok ge àa dee ya, àa ɗeme ne mbo ge zok ge kon pagal digi yà. Nda ge kumu ma peɗ, àa mbo ya ge ne ta zì ge fiyaso, àa ka ngay ne maa rob mage ba̰a̰ ge ɗogle ge Dorkas zô maa num ma, sok ge ne sḛ gale wa ya ge na ndwa. 40Ge sok mbe go, Piyer yan nda zum peɗ, guu na ko se kee kaɗeya. Guwa̰, seŋe tene ge duul swày ta, jan go: Tabita ɗege digi, ge sok mbe go, hage na ndwa gezi, kuwa Piyer, ɗege digi kàɗɗa ge na pe. 41Tare ne na tok, wan ne digi mḛḛya, guwa̰, tol nda ge ho fareba mage nda zaab ge kumu ma ya, ngay num ne ge na ndwa. 42Fare mbe deɗ ge nda ge Yafa ma ta peɗ, ee nda gḛḛ hoɗ fareba ge Bagezok ta me. 43Piyer kee dwam ma kaal swag ge Yafa diŋ, ge ndu a̰me ɗu ge àa tol ne Simo̰, ndu ge wan gwabal kwalte diŋ.

Iliyochaguliwa sasa

Tèmel keeya 9: kiaGRB

Kuonyesha

Shirikisha

Nakili