Tèmel keeya 8

Njon̰n̰a ge nda ge ho fareba ma way

1Sol vḭḭ hunna ge Etiyen nee ne. A ge dwam mbe go gaw, àa ɗege njon̰ ɓase ge Krist ne ge Jerusalem diŋ-ge ma gḛḛ no. Ɓase ge Krist ne mbe ma peɗ mbo ya ɓasare se no ge Jude mage Samari sok ma go sasar, nda ge temeya ma gaa ne ɗeŋew ge suwal diŋ. 2Yahuɗ ge no ge voo ge Dok ne ge maa zì ma mbul Etiyen, àa kee ne kiimi gḛḛ me. 3Ge sok mbe go, Sol ka ɓyare vin̰a ge burmi ɓase ge Krist ne ma gezi, ka mbo zok wa ge zok wa, wan nda soɗob mage nda zaab mbe ma, mbo kan num ge daŋay zì.

Filib ge suwa ge Samari ne go

4Num mbe ge ho fareba ge ɓasare se ma, àa ka mbo ge sok ma go peɗ oy Fare ge Kwaɗa ge Zeso ne. 5Filib sḛ me, mbo ge suwal ga̰a̰l a̰me ɗu ge Samari ne diŋ, jan num fare ge Krist, ndu ge Dok taa nee ne. 6Ɓase ma ee maa dwaɗɗa ma jwab za̰a̰ fare ge ne ka jan maa num ma, àa ka kuwa kaŋ ajab ge ne kee num ma me. 7Ago nda a̰me ma gḛḛ, ge kaa ge on̰om ge sone ma, on̰om mbe ma, sok ndage zum go, àa ka ee num poɗ luuluu. Nda ge looɗeya mage nda ge giɗi ma gḛḛ, àa seɗ zonna waɗme. 8Nda ge suwal ga̰a̰l mbe diŋ ma mbo ya kee laa saal gḛḛ.

9Zḛḛ ge go Filib dee ge suwal ga̰a̰l Samari mbe diŋ yà, ndu a̰me ɗu ge àa ka tol ne Simo̰, kaa ndu ge ka kee mbole ne ge suwal mbe diŋ, ne kaŋ keeya mbe ma ka ee pe rusu ge suwal mbe diŋ-ge ma kee ajab. Go mbe no, ka ndil tene ndu a̰me ge ciciliŋ. 10Nda peɗ, ge jiyale se ɗiŋ mbo ga̰a̰l digi, àa ee maa dwaɗɗa ma jwab za̰a̰ ne, àa ka janna go: Ndu mbe no, a ge pool ge Dok ne, ndwa go pool ge waɗe-waɗe. 11Ajo̰o̰ na kee ja kaal swag, sok ee nda kee ajab ge na kaŋ keeya ge mbole mbe ma ta ɗe, a ge pe, nda ka ee dwaɗɗa jwab za̰a̰ ne no. 12Ɗaŋɗe, sok ge àa za̰a̰ fare janna ge Filib ne ma go, àa hoɗ fareba, sok oy num Fare ge Kwaɗa ge Zeso Krist ne mage fare ge muluk ge Dok ne go, nda soɗob mage nda zaab mbo ya kee baptem. 13Simo̰ sḛ waɗme, mbo ya hoɗ fareba, àa kee ne baptem. Sok ndil kaŋ ajab mage kaŋ haŋle ge Filib ka kee num ma go, kee ajab, daa gwan n̰a ne pe to.

14Sok ge nda ge temeya ge suwal Jerusalem diŋ-ge ma za̰a̰ go, nda ge suwal Samari diŋ-ge ma ame fare ge Dok ne ya go, àa teme Piyer mage Yohana mbo ge num ta yà. 15Sok ge àa dee yà, àa kee kaɗeya ge nda ge ho fareba ma pe, ndwa go num see On̰om ge Harcal. 16Num sḛ mbe ge ho fareba ma mɔɗwag be seɗ On̰om ge Harcal to, ge dape, àa kee num baptem ɗeŋew ge dḭḭl ge Bagezok Zeso ne. 17Ge sok mbe go, Piyer mage Yohana ee maa tok ma ge num pagal sok kee kaɗeya go, àa mbo ya seɗ On̰om ge Harcal.

18Sok ge Simo̰ kuwa go, nda ame On̰om ge Harcal mbe ge tok eeya ge nda ge temeya ma way ma ta, gene num bware ya, 19jan num go: Ɓyare go, mbi see pool mbe ge ḛ ta waɗme, ndwa go ndu ge mbi mbo ee mbi tok ma ya ge ne pagal sok kee kaɗeya go ɗe, ne see On̰om ge Harcal. 20Ɗaŋɗe, Piyer gwan ge ne janna go: Ajo̰o̰ mo ee mo pagal zì go, nda seɗ bobo ge Dok ne ge bware ta, n̰a ḛ ge mo bware vḛḛne gezi. 21Mo vaaya a̰me koo mo mam ndwa go fyalag ge fare mbe zì to, ago mo dul wa temel ge Dok ndwa se to. 22Kuwa mo sone ma, mo seŋe ya se, kaɗɗa vin̰a go, mo kaɗe Bagezok ne pore mo, ge dwaɗɗa ge sone ge no mo dul wa zì pe, 23ago mbi kuwa kuwa go, mo laa zwala babag, mo kaɗ moor ge sone keeya ne me. 24Simo̰ gwan jan Piyer mage Yohana go: Ḛ sḛ ma ke kaɗeya ne ge Bagezok ta ge mbi pe. Ne kaa ge fare ge ḛ jin̰a ne mbe no, ne dee mbi pagal to. 25Guwa̰ ge àa ke sayda mage oy fare ge Bagezok ne go ge suwal Samari diŋ, àa gwan-na ge suwal Jerusalem diŋ. Sok gwanna ge num way go, àa ka oy Fare ge Kwaɗa ya ge maa ndwa zḛḛ, ge suwal van ge jiyale ge Samari ne ma diŋ.

Seɗ ta ge Filib mage ndu ge suwal Etiyopi ne

26 Malayka ge Bagezok ne mbo ya ge Filib ta jan ne go: Ɗege digi, mo mbo ndwa ham, ge babur pul yà, mo hee vin̰a ge ɗege ge suwal Jerusalem go mbo suwal Gaza. 27Ɗege, mbo ge sok mbe yà, seɗ ndu a̰me ɗu ge suwa Etiyopi ne. Ne sḛ ajibaŋ ne, ndu ga̰a̰l ge kee tèmel koy bware, ge gan ga̰a̰l ge ndu gwale ge àa tol ne Kandas ge suwa Etiyopi ne. Mbo ya ge suwal Jerusalem diŋ ndwa uware Dok. 28Sok gwan mbo dii go, kaa ge na pus go, ka isi maktub ge ndu ge zwagre Dok wa Ezay ne. 29On̰om jan Filib go: Guwa̰ tene ge ne ta zì, mo ɓan mboya dagre ge ne. 30Filib chiya ya ne ta zì, ka za̰a̰ ne isi maktub ge ndu ge zwagre Dok wa Ezay ne. Jan ne go: Mo wan kaŋ ge mo isi ne pe wan de? 31Gwan ge ne janna go: Mbi mà mbyaɗ wan ne pe gyana, kaɗɗa ndu be wan mbi ne pe ne to. Jan Filib go: Ndee ya kaɗ ge mbi ziya go.

32Njaŋeya ge Dok ne pul ge ka isi ne, a sok ge jan go:

«Àa ka gene ne dinna ge àa gene tame

Mbo ge sok ge àa hun kaŋ kogor ma ne yà go,

Ge mojo̰o̰ ge tame van ge fii wa daal,

Ge ndu ge koɗ na susu tok go go, ago be fyal to me.

33Ge pagal gwanna se lɔlɔgwaɗ ge ne ne ta puy,

Àa be ndil ne ndu ge temel sok mbe zì to,

A huɗi ne, ge wa mbo wan laa pisil

Ge nda ge ne doŋ pe ma way ne de?

Ago àa burmi kàɗɗa ge ne ne ge suwa pagal go ge ya gezi.»#Eza 53.7-8.

34 Ajibaŋ kaɗe Filib go: Mbi kaɗe mo kaɗe, wa̰a̰ mbi ne pe gale, fare ge ndu ge zwagre Dok wa jan ne no, jan ne ge tene pe koo ge ndu ge ɗogle pe de?

35Ge sok mbe go, Njaŋeya ge Dok ne pul ge ne isi ne ta, Filib ee pe wuwage ne Fare ge Kwaɗa ge Zeso ne no. 36Ge sok mboya go, àa deɗ-ɗa ge mam a̰me wa go. Ajibaŋ jan ne go! O̰o̰ mam no, a ma̰ kaŋ tele ne go, àa kê mbi baptem to de? 37[Filib jan ne go: Kaɗɗa mo hoɗ fareba ya ge dul wa ɗu, a̰me ge tele mo to. Ajibaŋ jan ne go, mbi hoɗ fareba ya go, Zeso Krist ne Dok Van ne.]

38Ge sok mbe go gaw, ajibaŋ hoɗ na wa go, àa yabe pus se. Àa kan maa ko ya se jwàg, àa mbo mam se yà, Filib kee ne baptem. 39Sok ge àa ndee ge mam se ya, On̰om ge Bagezok ne fwaɗ Filib sok, ajibaŋ daa gwan kuwa sok ge ne mbo go to, guwa̰, gaa mboya ge laa saal fafan̰. 40Filib sḛ tan tene deɗ ja ge suwal Azoɗ diŋ, ge sok mbe go, hee vin̰a mbo suwal Sezare. Ge ne sok mboya go, ka oy Fare ge Kwaɗa ge na ndwa zḛḛ ge suwal ga̰a̰l ge diige diŋ peɗ, ɗiŋ deɗ ge ne yà.

Iliyochaguliwa sasa

Tèmel keeya 8: kiaGRB

Kuonyesha

Shirikisha

Nakili