SISIKON NU TO RASUL-RASUL 19
19
I Paulus kiijo' i Efesus
1Hau-haunyo i Apolos kiijo' i Korintus, i Paulus nambamo nolajangi to kampung-kampung anu ise' i tano' aijo' anu majo'on i Korintus, lantas tinoka i Efesus. Kiijo' mae ia nompahakabotmo tiba to pia-piangkuka na mian anu pinalesayamo hi Yesus. 2Ia nompokilawa hi aha, “Nontalimamo na to Utu-utus Roh nu Tumpu, salatan komiu pinalesayamo hi Yesus?”
Tinaaman nu aha, “Ma'isa. Ola o kami madi' toho' nohongo taalu' daagi' ko Roh nu Tumpu.”
3“Desumo aitu, tiba palamandian nu apaa na komiu pinalamandikanmo?” pinokilawa i Paulus.
“Tiba palamandian i Yohanes,” tinaaman nu aha. 4#Mat. 3:11, Mrk. 1:4,7-8, Luk. 3:4, 16, Yoh. 1:26-27 Lantas i Paulus notatae, “I Yohanes mompalamandikan mian da momponyata' saba' to mia-mian aijo' binalatobatmo madi'mo mombau dosa-dosa' nu aha. Panyo hau-haunyo aijo' mule' i Yohanes nompoto'imo hi to mia-mian Israel tukoonyo aha tionyo palesaya hi Mian anu tokaje mae lapas na ia, aijo'mo i Yesus.”
5Salatan aha nohongomo aijo', aha pinalamandikan hi sanggo nu Tumpu Yesus. 6Ka' tempo'nyo i Paulus nompotiik limanyo i buan nu ubak nu aha, Roh nu Tumpu nongkuasaimo aha, lantas aha mulaimo notatae i uno nu basa-basa' anu moko bangang ka' nompotoka lele lengkat mae hi Tumpu. 7Konjoo'nyo nu aha iwi-iwi' kila-kila sampulu' ka' ohua' na mian.
8I Paulus saja' notatae tinotolu' na bitu'on na kino pinnyo ka' baani na motatae hi to mia-mian i laigan pogalejaan ka' painggaga tiba aha mompohoson kapalesaya'an nu aha mongkona mosia na Tumpu mompalentah susumo Tomundo'. 9Panyo to pia-piangkuka na anu hi to mia-mian aijo' panggaga ka' madi' mongka'oho' palesaya. I ahop nu iwi-iwi' na mian anu binalagombu i kiijo' aha mongalu ajalan mongkona tanga'an nu Tumpu Allah da momposalamat mian hi Yesus. Mokonyo aijo' i Paulus nompala'i aha, lantas namba tiba anu saja' mombatuki Yesus nokiijo' i tampat pongajanannyo i Tiranus. I kiijo' mae toka nu sansina-sinaa ia paimpoki-pokilawan tiba to mia-mian. 10Ia saja' nombau han aijo' ingohua' na taun na ko pinnyo sampe iwi-iwi' na mian anu jojoong i Provinsi Asia, mau mian nu Yahudi, mau pe'e mian bansa sangga'at, iwi-iwi' mohongomo potatae nu Tumpu.
To ana-anak i Skewa
11Anu talalo hondo okabangangi lengkat mae hi Tumpu binaumo i Paulus. 12De lenso kabai hude pombutu' kompong anu toho'mo pinake i Paulus o boa hi to mia-mian masakit, panyakit nu aha ma'alin ka' roh nu setan pe'e mosabat lengkat hi aha. 13Daagi' ko to pia-piangkuka na sando nu Yahudi anu namba iyaya mae, molaa' roh ma'idek hi to mia-mian. To sando-sando haha aijo' monsoba-soba suele mompake sanggo nu Tumpu Yesus da molaa' roh nu setan aijo'. Aha notatae hi roh-roh nu setan aijo', “Tiba sanggo i Yesus anu pinolele i Paulus aijo', aku molaa' komiu!” 14Daagi' ko aha popitu' na to ana-anak mo'ane nu samian na kapala nu imam, sanggonyo i Skewa, anu nombau han sumo aijo'.
15Panyo roh nu setan aijo' notatae hi aha, “Ku sumbu' na i Yesus ka' i Paulus suele ku sumbu', panyo komiu aiya ihe?”
16Lantas mian anu sinoku'onmo nu setan aijo' nalalumpat ka' nongkakali aha binaani hondo sampe aha nopadeka' nompala'i laigan aijo' ka' binela-belaon, ka' i langgo'mo, kalana baju' nu aha binea-beakmo nu aha aijo' i butong nu aha. 17Iwi-iwi' mian nu Yahudi ka' mian bansa sangga'at anu jojoong i Efesus nohongo apaa na anu tinimbalimo aijo', lantas aha i nabuhukmo. Sahingga sanggo i Tumpu Yesus pinaka puji-puji'mo. 18Da'isan na mian anu pinalesayamo hi Yesus, tinoka mongakui i ahop nu mian da'isan apaa na anu binaumo nu aha u'utu mae. 19Ka' aha anu biasa mompake ilimuu' ponsumbu'an, nompolimu'mo to kita-kitab nu aha ka' pinapuannyomo i ahop nu mian da'isan. Oli nu kita-kitab haha aijo' de opotuang iwi-iwi'mo ugaat limampulu' na madala na doi salaka. 20Tiba jalan anu okabangangi sumo aijo', potatae nu Tumpu nompaka togilelemo ka' nompaka pahosonmo na kuasanyo.
Kahengge'an i Efesus
21Salatan haha aiya ilapasmo, i Paulus nompatantumo da mamba mokiijo' i Makedonia ka' i Akhaya, lantas lausmo mokiijo' i Yerusalem. “Ilapas nokiijo',” koonyo i Paulus, “aku mule' tionyo mamba mokiijo' i Roma.” 22Sahingga ia nonsai ua'aha na mian anu saja' montulungi ia, aitumo i Timotius ka' i Erastus da mamba mokiijo' i Makedonia, hau-haunyo ia daagi' jojoong to pia-piangkuka na ko pinnyo i Provinsi Asia.
23Ugaat tempo'nyomo aitu na kahengge'an anu talalo daka' tinimbali i Efesus kalana ajalan mongkona i Yesus. 24Kalana i kota' aijo' daagi' ko samian topo tutuk salaka, sanggonyo i Demetrius, anu mombau bonu-bonua nu pilogot da bau ponsombaan Pilogot boune i Artemis. Usaha nu mian aijo' nohasinakonmo anu daka' hondo hi topo kalajanyo. 25Mokonyo aijo' ia nompolimu' topo kalajanyo nohingga-hinggat tiba topo tutuk salaka sangga'atannyo, lantas notatae, “To Utu-utus! Kita utus monsumbu' saba' kita mohumpak hasinnyo lengkat i pakalaja'an aiya. 26Uuka kita Utus nontoamo ka' pinosi hongomo apaa na anu binau i Paulus aijo'. Ia notatae tukoonyo, to pilo-pilogot anu binau nu mian, misa' hondo-hondo pilogot. Ka' ia kino hasinnyomo, nompotimbali da'isan na mian palesaya i ajalannyo, misa' ola aiya i Efesus, panyo ohani songko-songkomo na tano' nu Asia suele. 27Bahayanyo aijo'mo, saba' usahanto aiya mohumpakmo sanggo ma'idek. Ka' misa' ola aijo', panyo mule' laigan nu Pilogot boune i Artemis suele o' anggapmo madi' talakana' tiba katalasanggoannyo o peja-peja'mo; padahan ia pilogot boune anu o puji' nu iwi-iwi' mian i songko-songko Asia, ka i songko-songko na dunia!”
28Salatan mian haha aijo' nohongo aijo', kinyonyoa nu aha na'idekanmo, lantas aha lewa' noloboo', “Tumuu' na i Artemis, pilogot boune mian nu Efesus!” 29Sahingga ka hengge'an aijo' tinogilelemo tinoka-toka i songko-songko na kota'. Lapas aijo' posa'angu'an anu mombau kahengge'an aijo' nohakop i Gayus ka' i Aristarkhus, aitumo' to mia-mian nu Makedonia anu monsangalui i Paulus mamba moyaya, lantas nohela' aha nokiijo' i totonga' nu kota aijo'. 30I Paulus mongka'oho' minsoop mombatuki aha, panyo to mia-mian anu palesaya hi Yesus kiijo' mae montewa' ia. 31To pia-piangkuka na anu ko pangkat daka' i Provinsi Asia aijo' suele anu mompaha sumbu' tiba i Paulus nompokau mian mompoto'iakon hi Paulus da ia boli manintoa i totonga' nu kota' aijo'. 32Hau-haunyo aijo' to mia-mian anu sinihuk i totonga' nu kota' aijo' kinalangkabutmo. Daagi' ko anu nolo ais sumo aiya, daagi' ko anu nolo ais sumo aijo', kalana kanjoo'annyo hi aha madi' monsumbu' apaa na sababnyo aha sinihuk i kiijo'. 33Sambagian na mian haha aijo' monsangka i Aleksander na nombau sabab, kalana iamo na anu pinunsuhakon i ahop nu to mia-mian Yahudi. Sahingga i Aleksander nombee'i tanda nu limanyo mompoita da obee'i kasampatan montalangkan butongnyo i ahop nu mian haha aijo'. 34Panyo salatan aha nontoa taalu' ia mian nu Yahudi, nohingga-hinggat na aha noloboo' hoso-hoson, “Tumuu' na i Artemis, pilogot boune mian nu Efesus!”
35Ahennyo gulu' tulis nu kota kino hasinnyo na nompo'aman mian da'isan aijo'. Ia notatae, “To mia-mian nu Efesus! Toto samian monsumbu'mo saba' Efesusmo na kota' anu monjagai laigan nu Pilogot boune Artemis ka' batu susi' anu nanabu' lengkat mae i langit. 36Madi' ko samian pe'e na moko ala monggagakon han aijo'. Kalana aijo' momohokot ka' boli mombau apa-apaa ka' ko sia-sia'. 37Mian haha aijo' binoamo miu mae aiya, misa' kalana aha nontomangmo laigan nu pilogot kabai kalana aha nompopo'ise'mo pilogot boune. 38De i Demetrius ka' anu topo kalajanyo aijo' kahanda' mongkalak toto samian, sahanyo aha momboa palakalanyo mokiijo' i anu momputusi. Anu momputusi aijo' saja' sasadia ka' to pangka-pangkat pamalentah aijo' pe'e saja' daagi'. 39Panyo de daagi' mule' ko anu sangga'at anu okahanda'i miu, aijo' tionyo o ulus i uno nu ulusan nu mian da'isan anu tantu. 40Kalana apaa na anu timbali sinaa aiya, timbali monsilakai kita. Kita timbali o sangka mombau kahengge'an, kalana kita madi' ko kahondoan sa'angu' pe'e bau mompototu'u kahengge'an aiya.” 41Noko taloakon iwi-iwi' aijo', gulu' tulis nu kota aijo' nonsaimo mian da'isan aijo' da minsusule'.
Iliyochaguliwa sasa
SISIKON NU TO RASUL-RASUL 19: LAILOE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
