SISIKON NU TO RASUL-RASUL 18
18
I Korintus
1Lapas aitu, i Paulus nompala'imo Atena ka' namba nokiijo' i Korintus. 2I kiijo' ia nompahakabot tiba samian na Yahudi sanggonyo i Akwila, nolengkat mae i lipu' Pontus. I Akwila sala'je tinoka lengkat i Italia tiba bengkele'nyo i Priskila. Aha tinoka i Korintus kalana i Tomundo' Klaudius nonsaimo iwi-iwi' na mian nu Yahudi mosabatmo pala'imo na Roma. I Paulus namba nolenga aha ua-ua'aha, 3lantas jinojoong i kiijo' tiba aha ka' nokalaja hingga-hinggat aha, kalana bau polio nu aha pokakana tiba i Paulus, aitumo mongka'ut kemah. 4Panyo toka i sinaa nu Sabat i Paulus mamba basisik i laigan pogalejaan da to mia-mian nu Yahudi mau pe'e to mia-mian nu Yunani palesaya hi Yesus.
5Salatan i Silas ka' i Timotius tinokamo lengkat mae i Makedonia, i Paulus nonggunaakon iwi-iwi' na kasampatannyo da mompolele lele lengkat mae hi Tumpu toka hi to mia-mian Yahudi tukoonyo i Yesus aijo'mo na Tomundo' anu Momposalamat anu jinanjimo nu Tumpu. 6Panyo kalana to mia-mian saja' monggagakon ka' mompisala'i, sahingga i Paulus nonsapui abu' i baju'nyo salaku tanda da mompo'ingat aha i kasala'an nu aha. Ia notatae, “De komiu silaka, posi sala' miu! Aku madi' monsumbu'! Mulai uuka aku mambamo hi to mia-mian anu misa' Yahudi.” 7Lantas i Paulus nompala'i aha ka' namba jinojoong i laigan anu i sambiha' nu laigan pogalejaan aijo'. Laigan aijo' laigan nu samian anu misa' Yahudi, panyo ia monsombah Tumpu. Sanggo nu mian aijo' i Titius Yustus. 8Panyo i Krispus anu mongkapalai laigan pogalejaan aijo' tiba iwi-iwi' na potoutusannyo pinalesayamo hi Tumpu Yesus. Ka' da'isan suele na to mia-mian nu Korintus sangga'atannyo nohongomo lele anu pinotokakon i Paulus, ka' aha pinalesayamo hi Yesus lantas pinalamandikanmo.
9Daagi' kino sampahuan, i uno nu anu tinoa, Tumpu notatae hi Paulus, “Boli mabuhuk! Sampamo potatae boli momohokot. 10Kalana Aku monsangalui beleyum. Madi' ko samian pe'e na anu moko ala mombau anu ma'idek hi beleyum kalana da'isan na mian i kota' aiya, te to mia-mian-Ku.” 11Mokonyo aijo' i Paulus jinojoong i Korintus sinataun mintonga' na ko pinnyo ka' nongajanakon potatae nu Tumpu hi aha.
12Salatan i Galio tinimbalimo gubernur nu Akhaya, to mia-mian Yahudi nosa'angu'mo mongewa i Paulus ka' nomboamo ia mokiijo' hi anu momputusi. 13Aha namba nongkalaak, “Mian aiya monsale'i mian da'isan da monsombah Tumpu panyo bau-baunyo madi' pokakana tiba atulan i Musa!”
14Salatan i Paulus kahanda'mo montaami, i Galio notataemo hi to mia-mian Yahudi, “O, to mia-mian Yahudi! De anu pongkalaakan aiya sa'angu' na kasala'an kabai sa'angu' na ka'idekan, memang konanyomo na aku sabaan na mohongo komiu mongkalak aiya. 15Panyo aiya te pahanggagan mongkona potatae ka' to sanggo-sanggo tiba posi to atu-atulan miu! Jadi komiu na tionyo momputusi hahan aiya. Aku madi' kona na momputusi hahan anu sumo aiya!” 16Lantas i Galio nolaa' aha nosabat. 17Sahingga aha nohakop i Sostenes, anu mongkapalai laigan pogalejaan aijo', ka' nomboboti ia i ahop nu meja' pomputusian. Panyo i Galio madi' hondo-hondo mompajuli aha aitu.
I Paulus ninsusule'mo nokiijo' i Antiokhia
18 #
Bil. 6:18
Lapas aitu i Paulus daagi' jinojoong pinin i Korintus. Lantas ia nontaloakon pia mae na komiu to mia-mian anu palesayamo anu jojoong i kiijo', lantas tinalabutmo tiba i Priskila ka' i Akwila nokiijo' i Siria. Kiijo' i Kengkrea, i Paulus nongkismo ubaknyo anu pinojohoknyomo da i nantan kalana niatnyo hi Tumpu. 19Salatan tinokamo i Efesus, i Paulus nompala'imo i Priskila ka' i Akwila, lantas ninsoopmo nokiijo' i laigan pogalejaan ka' binasisik tiba to mia-mian nu Yahudi i kiijo'. 20Aha nompoita da ia jojoong gagaana' pin tiba aha, panyo ia madi' mongka'oho'. 21Mau pe'e sumo aitu, panyo tempo'nyo kahanda'mo mamba, ia notatae, “De Tumpu mompoloas, aku po'ule'je minsusule' mae i aiya.” Noko potatae sumo aitu, ia nambamo nompala'i Efesus.
22Salatan nintatau' i Kaisarea, ia nambamo nokiijo' i Yerusalem da montabea'i jama'at i kiijo', lantas lau-laus nokiijo' i Antiokhia. 23Salatan jinojoong i kiijo' tino pia-piamangamo na kinopinnyo, ia namba mule' nolenga tano' nu Galatia ka' Frigia da mompokododo kapalesaya'an anu totu-totu'u nu to mia-mian anu palesayamo.
I Apolos kiijo' i Efesus ka' i Korintus
24Hau-haunyo aijo', tinokamo nokiijo' i Efesus samian na Yahudi kinahampeannyo i Aleksanderia, sanggonyo i Apolos. Ia pande na motatae ka' mangalati' hondo mongkona isi nu Kitab nu Tumpu, 25tiba ingajanmo da monsumbu' ajalan mongkona i Yesus. Sahingga bikas hondo na ia mongajan ma'i-ma'ima' mongkona i Yesus, mau pe'e sala'je palamandian i Yohanes na anu sinumbu'nyo. 26Baani hondo na i Apolos nomulaimo notatae i laigan pogalejaan ka' tempo'nyo i Priskila ka' i Akwila nohongo pangajalannyo, aha nomboamo ia nokiijo' i laigannyo. I kiijo' mae aha nontalangkan hi ia lebe talaang mule' mongkona tanga'an nu Tumpu da momposalamat mian kalana i Yesus. 27Lapas aitu i Apolos batanga'mo mamba mokiijo' i Akhaya. Sahingga to mia-mian anu palesaya hi Yesus anu i kiijo' i Efesus nontulis sulat toka hi to utu-utus anu palesaya kiijo' i Akhaya da aha mongka'oho' montalima i Apolos. Ka' tempo'nyo i Apolos tinokamo i Akhaya, ia nontulungi' aijo' kino gunanyo hondo hi to mia-mian, anu kalana balakat nu Tumpu pinalesayamo hi Yesus. 28Kalana kapandean i Apolos motatae sahingga i hungku'annyo na to mia-mian Yahudi i uno nu painggagaan i ahop nu mian da'isan. Ka' ia nompobukuti' nu to ayat-ayat nu Kitab nu Tumpu Allah onyi'nyo i Yesusmo na Tomundo' anu Momposalamat anu jina-jinanji'mo.
Iliyochaguliwa sasa
SISIKON NU TO RASUL-RASUL 18: LAILOE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
