مزگینیا مەتتای 5
5
گۆتارا ل سەرێ چیای
(لوقا 6:20-23)
1دەمێ عیسای جەماوەرێ خڕڤەبووی دیتی، سەركەفتە چیای و روینشت. شاگردێن وی خۆ نێزیكی وی كر 2و وی دەست ب فێركرنا وان كر و گۆت:
3«خوزیكێن وان یێن ب گیانی د هەژار،
چنكو پاشایەتیا ئەسمانان یا وانە.
4خوزیكێن خەمباران،
چنكو دێ هێنە دلشادكرن.
5خوزیكێن دەروونبچویكان،
چنكو ئەو دێ بنە میراتگرێن ئەردی.
6خوزیكێن برسی و تێهنیێن راستداریێ،
چنكو ئەو دێ هێنە تێركرن.
7خوزیكێن دلۆڤانان،
چنكو دێ دلۆڤانی پێ هێتە برن.
8خوزیكێن دلپاقژان،
چنكو ئەو دێ خودێ بینن.
9خوزیكێن ئاشتیخوازان،
چنكو دێ بێژنە وان كوڕێن خودێ.
10خوزیكێن وان یێن ژ بەر راستداریێ تەپەسەر دبن،
چنكو پاشایەتیا ئەسمانان یا وانە.
11خوزیكێن هەوە، دەمێ ژ بەر من هەوە فهێت دكەن و تەپەسەر دكەن و ژ درەو ڤە هەمی جۆرێن پەیڤێن خراب دژی هەوە دبێژن. 12دلخۆش و دلشاد ببن! ژ بەر كو خەلاتێ هەوە ل ئەسمانان یێ مەزنە، چنكو وان بەری هەوە پێغەمبەر ژی هۆسا تەپەسەر دكرن.
خوێ و رۆناهی
(مەرقۆس 9:50؛ لوقا 14:34-35)
13هوین خوێیا ئەردینە. لێ ئەگەر خوێ سویراتیا خۆ بەردا، دێ جارەكا دی ب چ هێتە سویركرن؟ ئێدی ب كێر چ ناهێت ژبلی كو بۆ ژ دەرڤە بهێتە هاڤێتن و مرۆڤ پێ لێ دانن.
14هوین رۆناهیا جیهانێنە. ئەو باژێڕێ ل سەر چیای بیت ناهێتە ڤەشارتن، 15هەروەسا كەس چرایەكی هەلناكەت و ل بن ئامانەكی بنخێڤیت، لێ ددانیتە سەر چرادانكێ، دا رۆناهیێ بدەتە هەمی كەسێن د مالێ ڤە. 16بلا ب ڤی رەنگی رۆناهیا هەوە بەرامبەری خەلكی شەوقێ بدەت، دا كارێن چاك یێن هەوە ببینن و بابێ هەوە یێ ل ئەسمانان#5:16 بابێ هەوە یێ ل ئەسمانان: مەبەست پێ خودێیە. ل فەرهەنگۆكێ بنێڕە باب. مەزن بكەن.
عیسا فێركرنێ دەربارەی دەستووری دكەت
17هزر نەكەن ئەز یێ هاتیم دەستووری یان نڤیسارێن پێغەمبەران ژ كار بئێخم، نەخێر، ئەز یێ هاتیم دا تەمام كەم. 18ئەز راستیێ دبێژمە هەوە: هەتا ئەرد و ئەسمان ژ ناڤ نەچن، پیتەك یان خالەك ژ دەستووری ژ ناڤ ناچیت، هەتا هەمی ب ج‍‌ھ نەهێت. 19لەوما هەر كەسێ بچویكترین فەرمان ژ ڤان فەرمانان ب ج‍‌ھ نەئینیت و خەلك وەسا فێر كر، دێ ل پاشایەتیا ئەسمانان ب بچویكترین هێتە بناڤكرن، لێ ئەوێ ب ج‍‌ھ بینیت و خەلك فێر كریێ، دێ د پاشایەتیا ئەسمانان دا بێژنێ مەزن. 20ئەڤجا ئەز دبێژمە هەوە: ئەگەر راستداریا هەوە ژ یا فەریسیان و مامۆستایێن دەستووری پتر نەبیت، چ جاران هوین ناچنە د ناڤ پاشایەتیا ئەسمانان دا.
فێركرن دەربارەی تۆڕەیی و كوشتنێ
21هەوە یا بهیستی كو یا گۆتیە خەلكێ بەرێ: ‹كوشتنێ نەكە#5:21 دەركەفتن 20:13؛ گۆتارا مووسای 5:17 و هەر كەسێ كوشتنێ بكەت، دێ هێتە حوكمكرن،› 22لێ ئەز دبێژمە هەوە: هەر كەسێ ژ برایێ خۆ تۆڕە ببیت، هەژی حوكمكرنێیە و هەر كەسێ برایێ خۆ بێڕێز بكەت، هەژیە ل بەر جڤاتا بلند بهێتە دادگەهكرن و هەر كەسێ بێژیت ‹هەی دەبەنگ#5:22 دەبەنگ: ئەحمەق!› هەژی ئاگرێ دۆزەخێیە. 23ئەڤجا ئەگەر تە پێشكێشیێ خۆ ئینا قوربانگەهێ و ل وێرێ هاتە بیرا تە، كو برایێ تە تشتەكێ ل سەر تە هەی، 24پێشكێشیێ خۆ ل بەر قوربانگەهێ بهێلە و هەڕە برایێ خۆ ئاشت بكە و پاشی وەرە پێشكێشیێ خۆ بدە. 25لەزێ بكە هێشتا هوین د رێكا دادگەهێ دا ل گەل هەڤڕكێ خۆ پێك وەرە، نەكو ئەو تە رادەستی دادوەری بكەت و دادوەر تە رادەستی زێرەڤانی بكەت و ئەو تە بهاڤێتە د زیندانێ دا. 26ئەز راستیێ دبێژمە تە: تۆ چ جاران ژ وێرێ دەرناكەڤی، تاكو تۆ فلسێ دویماهیێ نەدەی.
فێركرن دەربارەی دەهمەنپیسی
27هەوە یا بهیستی كو یا گۆتی: ‹دەهمەنپیسیێ نەكە،›#5:27 دەركەفتن 20:14؛ گۆتارا مووسای 5:18 28لێ ئەز دبێژمە هەوە: هەر كەسێ ب چاڤەكێ خراب بەرێ خۆ بدەتە ژنكەكێ، ئەوی د دلێ خۆ دا دەهمەنپیسی ل گەل وێ كر. 29ئەگەر چاڤێ تە یێ راستێ ببیتە ئەگەرێ هەلنگفتنا تە، بینە دەرێ و بهاڤێژە. بۆ تە چێترە ئێك ژ ئەندامێن لەشێ تە ژ ناڤ بچیت، نەكو هەمی لەشێ تە بۆ دۆزەخێ بهێتە هاڤێتن. 30ئەگەر دەستێ تە یێ راستێ ببیتە ئەگەرێ هەلنگفتنا تە، ببڕە و بهاڤێژە. بۆ تە چێترە ئێك ژ ئەندامێن لەشێ تە ژ ناڤ بچیت، نەكو هەمی لەشێ تە بچیتە د دۆزەخێ دا.
فێركرن دەربارەی ژن بەردانێ
31یا هاتیە گۆتن: ‹هەر كەسێ ژنا خۆ بەردەت، پێدڤیە بەلگەنامەیا بەردانێ بدەتێ.›#5:31 گۆتارا مووسای 24:1 32لێ ئەز دبێژمە هەوە: هەر كەسێ نە ژ بەر دەهمەنپیسیێ ژنا خۆ بەردەت، دبیتە ئەگەرێ هندێ كو ئەو ژن ببیتە دەهمەنپیس#5:32 ژ بەر كو ئەو بۆ ژیارا خۆ نەچارە شوی ب ئێكێ دی بكەت، ئەڤە ب خۆ ژی، ل دویڤ فێركرنا مەسیحی، دەهمەنپیسیە.، هەروەسا هەر كەسێ ژنكەكا بەردای بۆ خۆ بینیت، دەهمەنپیسیێ دكەت.#5:32 مەتتا 19:9؛ مەرقۆس 10:11-12؛ لوقا 16:18
فێركرن دەربارەی سویندێ
33هەروەسا، هەوە یا بهیستی كو یا گۆتیە خەلكێ بەرێ: ‹سویندا خۆ نەشكێنە، لێ ئەو سۆزا تە بۆ خودانی دای، ب ج‍‌ھ بینە.›#5:33 پەرستن و پیرۆزی 19:12؛ سەرژمێری 30:2؛ گۆتارا مووسای 23:21 34لێ ئەز دبێژمە هەوە: قەت سویند نەخۆن، نە ب ئەسمانی، چنكو ئەو تەختێ خودێیە، 35نە ب ئەردی ژی، چنكو ئەو جهێ پێیێن ویە، نە ب ئورشەلیمێ ژی، چنكو ئەو باژێڕێ پاشایێ مەزنە. 36ب سەرێ خۆ ژی سویند نەخۆ، چنكو تۆ نەشێی مویەكێ ب تنێ، سپی بكەی یان رەش بكەی. 37بلا ‹بەلێ› یا هەوە ‹بەلێ› بیت و ‹نە› یا هەوە ‹نە› بیت و ژ ڤێ پێڤەتر، ژ خرابیێیە#5:37 ژ خرابیێیە: ئانكو ‹ژ یێ خراب دهێت›..
فێركرن دەربارەی تۆلڤەكرنێ
(لوقا 6:29-30)
38هەوە یا بهیستی، كو یا گۆتی: ‹چاڤ ب چاڤیە و ددان ب ددانی.›#5:38 دەركەفتن 21:24؛ پەرستن و پیرۆزی 24:20؛ گۆتارا مووسای 19:21 39لێ ئەز دبێژمە هەوە: بەرهنگاریا كەسەكێ خراب نەكەن. لێ ئەوێ شەقەك ل رویێ تە یێ راستێ دا، رویێ خۆ یێ دی ژی بدە بەر. 40ئەوێ بڤێت تە ببەتە دادگەهێ داكو كراسێ تە ژ تە بستینیت، كوركێ خۆ ژی بۆ بهێلە. 41ئەگەر ئێكی تۆ نەچار كری میلەكی ل گەل بچی#5:41 ل وی سەردەمی، ئەردێ ئیسرائیلێ ژ لایێ رۆماییان ڤە یێ داگیركری بوو. چەكدارێن رۆمایی ماف هەبوو خەلكی نەچار بكەن كو بارێ وان هەلگرن و هەتا میلەكی ل گەل بچن، ئانكو نێزیكی 1,5 كیلۆمەتران بوو.، تۆ دوو میلان ل گەل هەڕە. 42ئەوێ ژ تە بخوازیت تۆ بدێ و ئەوێ قەرەك ژ تە بڤێت بێ هیڤی ڤەنەگێڕە.
حەز ژ دوژمنێن خۆ بكەن
(لوقا 6:27-28، 32-36)
43هەوە یا بهیستی، كو یا گۆتی: ‹حەز ژ نێزیكێ خۆ بكە#5:43 پەرستن و پیرۆزی 19:18 و كەربێن خۆ ژ دوژمنێ خۆ ڤەكە.› 44لێ ئەز دبێژمە هەوە: حەز ژ دوژمنێن خۆ بكەن و نڤێژان بكەن بۆ ئەوێن هەوە تەپەسەر دكەن، 45دا ببنە كوڕێن بابێ خۆ ئەوێ ل ئەسمانی، ئەوێ رۆژا خۆ ل سەر باش و خرابان دهەلینیت و بارانێ ل سەر بێگونە‍‌ھ و گونەهباران دبارینیت. 46ما چ پاداشت#5:46 مەبەست پێ ئەو پاداشتە یێ خودێ ددەتە مرۆڤان. د هندێ دایە كو هوین حەز ژ وان بكەن یێن حەز ژ هەوە دكەن؟ ما باجگر ژی ڤێ چەندێ ناكەن؟ 47و ئەگەر هەوە ب تنێ سڵاڤی برایێن خۆ كر، ئەرێ ما هەوە قەنجیەك كر؟ ما پووتپەرێس#5:47 پووتپەرێس: صەنەمپەرێس ژی وێ ناكەن؟ 48ئەڤجا د بێكێماسی بن هەروەكو بابێ هەوە یێ ئەسمانی یێ بێكێماسیە.
Iliyochaguliwa sasa
مزگینیا مەتتای 5: BHD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
All rights reserved.
