Halloo 7
7
Aalliyee Aachi Mooyo
1Doono Yeeri Noohich ishichiye: “Hini shiijjeree daggoochee ne ikkeeto baach ta aafooch cadiqe asho tunaꞌa daneto neene. Ebich ne kechi asheenaꞌo bullin yeshi markabooch gibe. 2-3Xalle gijjeenaꞌonaa#7:2-3 Xalle gijjeenaꞌo, bashaa manjeebeeti, deejjoyichoo giddeebeeti gijjeenaꞌone. cooxinaꞌo bullinoochee anaamaa maache yesheree shabaatti shabaattoon tuneree, xalloo tuneyaani gijjeenaꞌonaa#7:2-3 Xalloo tuneyaani gijjeenaꞌo, bashaa manjeyaani, deejjoyichoo giddoon hakkaani gijjeenaꞌone. cooxinaꞌo bullinoochee anaamaa maache yesheree gutti guttoon tuneree, shimaayoona yoobbiibeeti yoobbereenaꞌo bulliichee anaamaa maache yesheree shabaatti shabaattoon tuneree boonoshi waataa, neenna tookki markabooch giijjibe. Ebiyoo kashoona beeree, gubbich showee toommooch shiijje boonoshi meettemmoyichiye. 4Shabaatte qemoyee gubb, shaanaani amiyon aabbe areddoonaa aabbe xumoonon showee toommooch dichemmo taane; ta halliti halleenaꞌo bullinoo showee toommoochee hidi aalliyemmo taane” iye. 5Noohiyoo Doono Yeeri biich gettito bullin tuniihe.
6Noohi aalliyee aaco showee toommo bulliich tunehooba, shiritte balle nati ashoone. 7Arooba Noohi aalliyee aacoochee wodoyich bi mecheen, bi bushiishoonaa boonoshi mecheenaꞌonon yechiꞌi markabooch giyiye. 8Gijjeenaꞌonaa cooxinaꞌonoochee, yoobbereenaꞌoochee, yuummereenaꞌo bulliicheenoo, xalloo tunetinaꞌonaa xalloo tuneyaaneenaꞌona, 9Yeeri Noohich bi gettitoommon, gutti guttee yesheꞌi, anaamaa maachee tuneꞌi, Noohina tookkii markabooch giyiyeete. 10Shabaatte qemoyee gubb aalliyee aaco showee toommooch waahe.
11Noohi shiijjeti shiritte balle natooba, guttinnee agenee aaraa shabaattinnee qemooba, showee ducheexi, ooge aachi xuupho bulli borihehe; shimaajji kelloo qecheehe. 12Giidechi amiyo aabbe areddoonaa aabbe xumoonon kuxaanoon dihiye.
13Ebi arooba Noohinaa bi mecheena boonoshi bushiishoo, Sheemi, Kaaminaa Yafeetina boonoshi mecheenaꞌona tookkii markabooch giyiyeete. 14Boonoshina tookkii cooxinaꞌo bulli boonoshi shaahi shaahoona, gijjeenaꞌo bulli boonoshi shaahi shaahoona, showee toommona yuummiibeeti halleenaꞌo bulli boonoshi shaahi shaahoona, yoobbereenaꞌo bulliyoo boonoshi shaahi shaahoona giyiyeete. 15Ebina meenon taheti kashechinaꞌo bulli anaamaa maachee yesheꞌi, Noohina tookkii markabooch giyiyeete. 16Yeeri Noohich bi gettitoommon, meenon tahetinaꞌo bulliichee anaamaa maachee tuneꞌi giyiyeete. Boonoshi giyitoyee gubb, Doono Yeeri markabee kelloon gubbaa hicciye.
17Aalliyee aaco aabbe qemon showee toommo bullin tajjii ceennii hammiye; aacoo markaboon showoochee kaama tiijjiye. 18Aaco beshii beshii hammiꞌi showoon guuppiye; markaboo aachi toommona tegiye. 19Aaco showee toommooch oogichii bi ceennitoyich, aricheti ogooge guudinaꞌo bullin qooxxii guuppiꞌi qeriye. 20Aaco guudinaꞌon qooxxii guuppiichii, aaraa uuche hira bedoon kaama kechiye. 21Ebina showee toommooch beeti, meenon taheti kashechinaꞌo bulli, eboshiyoo yoobbereenaꞌo, gijjeenaꞌonaa cooxinaꞌona, yuummereenaꞌo, asheenaꞌo bulloshiyoo qitii ciireheete. 22Showee toommooch beeti, kachiibeeti halloo bulli qitii ciirehe. 23Yeeri showee toommooch beeti, kashechi halleenaꞌo bullin hidii aalliihe; ashoochee tiijjiꞌi gijjeenaꞌonaa cooxinaꞌonooch beddaahaa, yuummere halleenaꞌooch beddaahaa, shimaayoona yoobbiibeeti yoobbereenaꞌooch beddaahaa, showee toommoochee hidii aalliihe. Noohinaa biinna tookkii markabooch giyitinaꞌona baach wodiyeete.
24Aacoo balli aache qemi wottoon shappaanoon showoon qooxxiꞌi beehe.
Iliyochaguliwa sasa
Halloo 7: KBRC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
SIM International, 2020.