Halloo 6
6
Ashi Gonde Shuunoo
1Asheenaꞌo showee toommooch shiijjee boonoshi meettiyooba, maache bushiisheenaꞌo boonoshich shiijjeheete. 2Yeerichi bushiisheenaꞌo,#6:2 Ikkikke wonnee Yaafe Macaafooch, maraakeenaꞌo getaa biichetone. asheenaꞌochi maache bushiisheenaꞌo mallet gaaweenaꞌo boonoshi tunoon beeggiꞌi, boonoshi shunnii shunnitinaꞌon daammii shaaggiyeete. 3Arooba Doono Yeeri “Asho qitemmo bi tunetoyich, ta Ayaano ashoona tookki bulli yemeenoon beetaachemmone. Asho ebiyee bekk bi beeyemmo balli hiye natoniye” iye.
4Arooba, aroyee gubboo genjeenaꞌonaa giidechinaꞌona tuneti Nefiliimeenaꞌo#Had. 13:33 showee toommooch beeheete; eboshi Yeerichi bushiisheenaꞌo asheenaꞌochi maache bushiisheenaꞌon shaaggiꞌi, boonoshi shiyiti bushiisheenaꞌone. Eboshiyoo wonna aricheti ginee anaaminaꞌone.
5Doono Yeeri asheenaꞌochi gondo showee toommo bulliich bi woddoon, ashi mullee gaboonaa qaatoona bulli aaboon gondo baach bi tunoonoo beeggiꞌi, 6ashoon showee toommooch bi hallitoyich ayiniye; bi mulloonoo tuummiye. 7Ebich Doono Yeeri “Ta halliti ashoochee tiijji, gijjeenaꞌonaa cooxinaꞌonooch beddaahaa, yuummere halleenaꞌooch beddaahaa, shimaayoona yoobbiibeeti yoobbereenaꞌooch beddaahaanoo, showee toommo bulliichee ciroona boonoshin hidi aalliyemmo taane. Boonoshin ta hallitoyich ayinito taane” iye. 8Tunebaani Noohi Doono Yeeri aafooch gidoon danehe.
Noohi Mooyo
9-10Noohi mooyo ebine: Noohi Sheemi, Kaaminaa Yafeetina getteebeeti keejje anaami bushiishoon shiyihe. Biyoo bi yemeeneexi shiijjeree daggoochee cadiqe ashoonaa Yeerich deꞌa ii beetonane. Noohi Yeerina tookkii ikkotteꞌi beehe.
11Tunebaani showee toommooch beeti asheenaꞌo bulli Yeeri aafooch duubeheete; showoo xuꞌoona ceenniye. 12Yeeriyoo showoon ciinniꞌi, ebiyoche showoo duubeton, showee toommo bulliich beeti asho bulliyoo bi qocoo oogeton gondeton, beeggiye. 13Ebich Yeeri Noohich ishichiye: “Ashi yaroo bullin showee toommo bulliichee ciroona aalliyoyich maacceto taane; boonoshi naboona xuꞌo showee toommo bulliich ceennitone. Tawoo ebiyoche, boonoshinaa showee toommooch beeto bullinon aalliyemmo taane. 14Ebich yigee mixoochee markaboon neennaa ne kechi asheenaꞌonon wodiyoyich shuunebe. Ebi markabooch gateenaꞌon kuxi kuxiree shuunebe. Maacinaa maachinon reenjoona dikkebe. 15Ebi markabee gidoo keejje balle hiroo, bi maaco aache hiroo, bi neexoo shaashe hiroo tunebe. 16Markabee toommooch kechi aafoon shife. Ebi markabee tookkaa, bi guudoona ikke hira bede aahoon echiibe. Markabee kelloonoo naaboochaa kichibe. Deshee kaama keejje kuxon tuniibe. 17Tawoo ebiyoche, shimaayoyee desh beeti, meenon taheti, kashechi halloo bulli qoocheree bi aallemmoyich, showoo bulliich aalliyee aacon deejjemmo taane. Showee toommooch beeto bulliyoo qiti ciiremmone. 18Tunebaani ta neenna tookki wogoon giyemmo taane; ne mecheen, ne bushiishoonaa boonoshi mecheenaꞌonon yeshiree markabooch giyemmo neene. 19Neenna tookki kashoona boonoshi beeyemmoyich, meenon taheti, kashechi halleenaꞌo bulliichee boonoshi shaahi shaahoona gutti guttoon, anaamaa maacheen markabooch giijjibe. 20Kashoona boonoshi beeyemmoyich, yoobbereenaꞌo boonoshi shaahi shaahoona, gijjeenaꞌonaa cooxinaꞌona boonoshi shaahi shaahoona, showee toommona yuummiibeeti halleenaꞌoo boonoshi shaahi shaahoona, gutti gutteree ne waan gibeete. 21Ne wotta neennaa eboshinoyich manjemmi mooyon bi shaahi shaahoona kiciree giijjibe” iye.
22Noohiyoo ebin tuniihe; Yeeri biich gettito bullin tuniihe.
Iliyochaguliwa sasa
Halloo 6: KBRC
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
SIM International, 2020.