Lucas 8

Natiari'i'iware ena esenana títatianapa'i ema Jesús

1Te táekenepa eta juka, ema Jesús tiyanawarepa tipaika'i te awasareana tási'a te'epa awasarechichana, kametarairupaipa eta máechejiriruwa ema Viya akenuka te anuma. Náe'ikapa'i ena dósekeneana apútuleana, 2énerichuware náe'ikapa'i ena esenana máepachiaruana'i naye'e ena éreanana tiáwa'akanaini'i. Sutiari'ipa'i esu María Magdalena, máepachiaru'i naye'e ena siétekeneana éreanana tiáwa'akanaini'i esu. Natiari'i'iware ena apamuriana esenana makanararuana'i taye'e eta apánapanenejikeneana'i najumanaini'i; 3Sutiari'ipa'i esu Susana, ésupa esu Juana, mayena ema Cuza, ema maye'e'i empleado ema Aluresi, técha'i tamutu eta máima'akeneana ema Aluresi. Maverana'iware ena apamuriana esenana titatiana'i.

Eta máimikutichakene'i ema achane tewakara'i

(Mt 13.1-9; Mc 4.1-9)

4Tiuchujikanapa kamuriana, nási'anapa'i te awasareana naima'apani'i ema Jesús. Te máima'apa ema, ena kamurikeneana achaneana, máechejikawakapa, máimikutiarachinapa eta máimitusirawaka'i: 5“Matiari'i ema achane, tiyanapa téwapana'i te máesane, eta mapaisirapa'i témirikapa eta táki te achene. Tási'a eta nanukuirapa'i ena achaneana, nákatayayajikapa eta táki táemiriru'i te achene. Tási'a te táima'apa eta káyureana, tanikapa. 6Tási'a, eta apamuri témirikapa te máripa'i, tímarukainipa, tási'asera tájijikapa eta sache, taicha wa'i tananapa'i'ini eta apake'e. 7Tási'a eta apamuri témirikapa te tatarakukuji eta itapekiji, tiúrinaini'i eta táimarusira'i, étasera eta itape takachurikapa eta tajurusira'i táemuriachapa. 8Étasera eta apamuri témirikapa te tiúrina máteji, tási'a tiúrinapana'i eta tajurusira'i. Eta étajawa takaye'e'i cienki eta táki.”

Eta juka máechejiriruwa'i, ema Jesús, tási'a maka'epa:

–“¡Nákani tikakiñana'i nasamararaka!”

Ema Jesús máitametakawaka ena máimitureana eta juka máimiturapi'i

(Mt 13.10-17; Mc 4.10-12)

9Taka'e, ena máimitureana nayaserekapa ema Jesús tája'apuka takayema'i eta máimikutichakene'i maye'e ema téwakara'i. 10Taka'e máichawakapa: “Émasera ema Viya timimaticha'e eti, eta juka maeñaure'i te mawasa ema Viya akenuka te anuma, énasera ena apamuriana apana eta nimitusira nimikutichinayare'i, tayanapane naimararaka wa'i nakukaikutiara tási'a tayanapane nasamararaka wá'isera nakukaikutiara.

Ema Jesús maimikutichina ema achane tewakara'i

(Mt 13.18-23; Mc 4.13-20)

11“Étara eta juka takayemakene'i eta nímikutiarachakene'i: Ema tewakara'i takuti'i ema techeisi'a'i eta echéjirirukawa maye'e ema Viya, 12tási'a natiari'i'i ena achaneana nasamaipa'inéni eta echéjirirukawa, émasera ema wínaraji wa'i máisapa'ini tánasi'ini te nasamureana. Enewane'i makamitisikawaka eta nasamakene'i, mamawaraira'i nakasiñanu'ini, apaesa wa'i nukukuchuku'awaka. 13Natiari'iware ena apamuriana achaneana, nakuti'i eta máteji máripa'i, te nasamararaka eta echéjirirukawa, natupiruwane'i nasuapa, wá'isera nárata'a'ini yatupina'íni, wa'i nakuti'íni eta ewaraki tiúpare, ánipichu eta náe'isira'i, tínajikawanawane taicha eta natajiwaira'i. 14Eta ewaraki takaewakene'i te tatarakukuji eta itapekiji, nakuti ena tisamararakana'i eta echéjirirukawa. Ta'apapirikawaka'i eta nawaraira'i tirrikuchawana. Wá'iware náinajika'ini eta náichira'i eta tamaurikeneana. 15Natiari'isera ena apamuriana achaneana nakuti'i eta tiúrina máteji. Ena, nasamararaka'i eta nímiturapiana, náunaka'i yátupi te nasamureana. Tájinaware náichirawaina'ini eta náe'isiranu'i. Wa'i nayakujima'i.

Ema Jesús máimikutiarachawa eta lámpara eta máimituresira

(Mc 4.21-25)

16“Najinaware tiyustakaina eta namika'u, tási'asera, naji'apaikapapukaini, nanakawarepukaini te tápeku eta náetsatsame náimasirare, takamunu'i nanakayare'i te anuke'e, jé'esare tikaecherayarepa tamutu apaesa nákani tisiapanapa'i, tímairikanainapa. 17Tayanapanepuka tikayumurukiana'i, tamutuyare'isera tikaechera jákani tayumururewana'i. Tájina tépakuchaima'i eta jakani najajairu'i, tamutuyare'i téchakareya. 18“Eta taka'e yátupina esama, taicha ema tikaima'akene najanechinaya eta apana maima'akeneya, emasera mákani achane tajina maima'akenena naverejinaya tamutu eta maima'akeneanaini tayanapanepuka ánimurichichaichu.”

Esu maena ema Jesús, énapa ena maparapenaveana

(Mt 12.46-50; Mc 3.31-35)

19Su maena, énapa ena maparapenaveana ema Jesús, títekapanapa te mavi'a'i ema, wá'isera náitujikawa'ini nakachakaya'ini, taicha kamuriana'i ena achaneana. 20Natiari'i'i ena timetapanana'i ema Jesús:

–Esu pena, énapa ena piparapenaveana narari'i ani te aneka, nawara'a'i tíma'aviana.

21Émasera majikapapa:

–Esu meme énapa ena nuparapenaveana, ena némunaruana'iware, nuparapenaveana'i. Taicha tisuapajira'iana'i ena taye'e eta máechejiriruwana ema Viya.

Ema Jesús makaesamirika eta táepakusira'i eta une, étapa eta tékatikawa

(Mt 8.23-27; Mc 4.35-41)

22Jena sache, ema Jesús tiáwaku'apa te pakure makachanewakapa'i ena máimitureana, tási'a máichawakapa:

–Viyana te apachara eta kákiure. Taka'e tiánuekanapa, 23eta napaisirapa'i te pakure, ema Jesús tímakapaipa, taka'e, járajapainapa eta muraka tékatikawa, tépakukapa muraka eta kákiure, tasiapauchapa eta une te pakure, tipikanapa ena máimitureana, taicha tímatiakawanapa eta náecharisirawayare'i. 24Taka'e nakajamikapa ema Jesús, náichapa:

–¡Tata Maestro! ¡Tata Maestro! ¡Píma'a vécharikawainapa!

Enewanepa téchepukapa ema Jesús. Makamatinakapa eta tékatikawa étapa eta táepakusira'i eta une, tésamiriekawapa tamutu. 25Taka'e, máichawakapa ena máimitureana:

–¿Tája'a takayema wa'i ákasiñawa'ini eta nutiari'irapa'i eta eye'e?

Énasera eta naramesira'i naramine'i, tási'a tiyaserejirikakanapa:

–¿Nája'apuka ema maka? Taicha eta mawanairipi, tamutu tasuapa'i eta tékatikawa étapa eta une.

Ema achane náwa'aruana'i ena ichapemurikeneana éreanana

(Mt 8.28-34; Mc 5.1-20)

26Taka'e, títekapanapa te apachara taye'e'i apake'e eta Gerasa, takanaraipa'i eta Galilea. 27Te tiúkupaikapa ema Jesús te apake'e, máuchujiuchapa ema émana achane, ema maka achane máwasaichu'i taye'e eta juka awasare. Tájinapasera máimatiya'ini mayana'ini te peti, makapenajuechawaka'i eta ekariana. Mamuriare'i eta máitaresira. 28Te máima'apa ema Jesús, máepuyumirauchapa te mamira'u ema tipiararekapa:

–¡Wa'i pikuimisiapawa nuye'e, Jesús, Machichavi'i ema Viya! ¡Pájapanunu wícha'a pikuwanekanu ánaki te nukaikuñaiyayare! 29Maka'epa eta juka taicha ema Jesús, mawanekaipa'i ema machanewana ema éreanana nauchuka te make'e ema achane. Ánakiapaipa eta nawa'asira'i ema, naitiaka'ineni te ichapepi cadena étapa te enure, emasera mavenarukaichucha, tási'a tijunaware te mawapa'i wama'i. 30Ema Jesús mayaserekapa:

–¿Tája'a píjare piti?

Tási'a ema majikapapa:

–Nukaijare nasimutuwa.

Maka'e'i ema, taicha kamuriana'i ena éreanana tisiapa'akana'i maye'e ema. 31Énasera yaseuchawanapa maye'e ema Jesús, wa'i makuakijika te taupenakene pusu. 32Te tamiraike'e eta mari tatiari'iwaka'i, eta kamurikeneana kúchiana tini'ikana'i. Ena éreanana nayaseakapa ema Jesús máisapa'ini nasiapa'akawaka eta kúchiana. 33Ena éreanana tiuchukanapa te máke'e ema achane, nasiapa'akawaka eta kúchiana. Te tasamapa eta kúchiana eta nasiapa'asirawaka'i ena éreanana, tijunaparakanapa témiririjikanapa te tachausi eta kákiure, téririjikanapa.

34Ena tijaneakanaini'i eta kúchiana te náima'apa, eta taichawakenewa'i tijunanapa, tiyananapa timetajirikanapaipa te awasare te'epa te wama'i. 35Ena achaneana, tiuchukanapa tiyananapa náima'apana'i eta táichararakawa'i. Te títekapanapa, náima'apa ema achane náwa'aruini'i ena éreanana, téjakaipa'i te máiwapechakaya ema Jesús, tájinaipa'i máichirawaina'ini, tikamuiri'aipa'iware. Tási'asera, tipikanaine'i ena achaneana. 36Te náitametakapa ena tíma'ana'i eta táichawakenewa'i, eta manarasira'i ema achane nawa'aruanaini'i ena éreanana. 37Namutu ena achaneana tikawasana'i te Gerasa. Nayaseakapa ema Jesús machawa'ini te másine'i. Taka'e, tiáwaku'awarepa te pakure ema Jesús tichawawarepa. 38Ema achane, makamesapa ema Jesús máisapa'ini máe'ika. Émasera máewatakaichucha machawa te mapena. Ánipa maicha'i:

39–Piyanachucha te pipena pichawa naye'e ena pijaneanana te piáwasa. Pimetakaya eta makanarasiravi'i ema Viya taicha eta majapanuiravi'i.

Tiyanapa tichawa'i ema achane, mametakawakapaipa namutu eta makanarasira'i ema Jesús.

Esu amaperu tepana machicha ema Jairo, ésupa esu esena sukajumakene'i

(Mt 9.18-26; Mc 5.21-43)

40Te tichawapa ema Jesús te apachara eta kákiure, ena achaneana tiúrisamureana'i eta nakuchapira'i. Taicha namutu'i nakuchaparairikaipa'i ema. 41Taka'e titekapapa ema nakenumuri'i ena juriyuana, ema tikaijare Jairo. Ema, tuparairuka'i taye'e eta peti náurujisirarewa ena juriyuana. Ema Jesús, tiyanapa máe'ika'i ema achane, náe'ikawarepa ena kamurikeneana achaneana naenumu'uchapa tikapiti'ejikakanaipa ena, 42taicha ésunarakawa'i esu machicha'i, doce añuipa'i eta su'añura'i, esu téñamajirikawaipa'i. Eta mapaisirapa'i ema Jesús, ena kamurikeneana achaneana naenumu'uchapa nakapiti'ekapaipa ena te'ikanapa'i. 43Te nataraku ena achaneana, sutiari'ipa'iware esu esena, doce añuipa'i eta sukajumaira'i táichira'i eta suítine, kamurianaipa ena típuchana'i médikuana. Títa'aipa eta suíma'akeneanaini'i, tájinasera wa'i suátiware'ini. 44Esu suka esena témeña'awapa te makeku ema Jesús, suémamakapa eta tacheyarapi eta mamuiri'a. Enewaneine'i tícheka eta suítine. 45Taka'e ema Jesús, makayasesererupa:

–¿Nája'a témamajiakanu'i?

Nájina tísapawaina, ema Pedro maka'epa:

–Maestro, píma'aichu'i eta nasimutuwa'i ena achaneana. Tiyututukawana'i te pichakaya.

46Émasera ema Jesús maka'ewarepa:

–Nakañári'i, témamajiakanuana'i, taicha nusamawa'i nuti eta nukanarasira'i eta jumare táichavene'i eta nítupaijiasirawa'i.

47Ésusera esu esena, tímatiakawapa eta máimatira'i ema Jesús, tiyanapa supaucha'i. Tépuyukapa te máiwapechakaya. Tiyayakareipa eta supisira'i. Sutupiruwapa sumetaka eta ésuira'i témamajiaka'i, suwaraira'i tinaraka eta sujuma.

48Máichapa ema Jesús:

–Nuchicha pinarakapa puiti táichavene'i eta pikasiñawaira'i me Viya. Wa'i pikueñamawa, waipa tichawaima'i eta pijumaini'i.

49Wicha'a maitapirika'ini eta maéchejirisirawa'i ema Jesús, te títekapanecha ema achane tiási'a'i te mapena ema nákenumuri te peti naurujisirarewa ena juriyuana, mametakapa:

–Esu pichicha tépenaipa, waipa pikukamesa ema Maestro.

50Émasera ema Jesús, eta masamira'i tási'a maichapa:

–Wa'i pikueñamawa, pikasiñawachucha me Viya, esu pichicha titarekayare.

51Te títekapanapa te peti, waipa máisapa'ini nasiapa'ini. Nakarichu'i tisiapana ema Pedro, ema Santiago, ema Juan, ema suiya, ésupa esu suena esu amaperu. 52Namutu'i naíyaucha'i esu, émasera ema Jesús máichawakapa:

–Wa'i ekuiya'a, esu suka amaperu wa'i suépena'ini tímakaichucha.

53Namutupa tékawana'i, nakaeka'ipa ema, taicha náima'a'i eta suépenira'i. 54Taka'e ema Jesús makaratawauchapa esu, tási'a máichapa:

–¡Amuya, péchepuka!

55Tási'a esu tichawapa títareka, énewanepa téchepukapa, tási'a ema Jesús mawanekawakapa náijaraka eta sunika. 56Ichapeine'i eta náramira'i ena tikachichana, émasera ema Jesús matuparakawarepa muraka eta wa'i nakuechejisi'a eta náima'akene'i.

Iliyochaguliwa sasa

Lucas 8: IGB

Kuonyesha

Shirikisha

Nakili