Maɛ 9
9
1Wɛ̀ ɔ̍ la̍a̍ dě u̍h we̍, “Tìh-a taǐn ǎn sèàɛ̍ mɔ̀ wlùh, nyɔ̍ duuh nyna i̍ da̍a u̍h se̍ mɛ̌ mu̍ te̍e̍ wɛ̀ u̍h iě Nyɔsoa-a kmɔ̌ wlu̍ i̍ kɔn-ɛa ji̍ la̍ jě dǒ gbǐh we̍.”
Jusu-a sàɛ̀-ɛ
(Matio 17.1-13; Luu 9.28-36)
2Wǐh mɛ̀o̍ sì-aɛ, wɛ̀ Jusu dǔ Pitɛ ke, Chiin ke Chɔɔn, iě ɔ̍ gba̍ u̍h dě tlu̍h tɔ̀ɔ̀n due kɛ̍n. Dě u̍h-a sǔh nɛ, wɛ̀ ɔ̍ sàɛ̀ dǒ u̍h jlǐhwai. 3Nɛ̀ ɔ̍ jlii̍ nɛ pɔ̀ɔ̀, wɛ̀ i̍h-a po̍ slaɛn. Ɛ̀ i̍h nu̍-a plǔ-ɛɛ, nyɔ̍ se̍ ɛ̍ we̍ dɛ̍ wɔ̍lɔ-ɛ bɛ̌ɛ da̍a kmɔ̌ la we̍. 4Dǒ u̍h jě-e Ilaɛja ke Mose, nɛ̀ u̍h ke Jusu-a chɛ̍n sɔ̀ìn. 5Wɛ̀ Pitɛ la̍a̍ dě Jusu we̍, “Dlǔtu, ɛ̍ nmɔ jii̍ wɛ̀ à nɛ da̍a. Bɔ̌ à po̍ wɛ̀ɛ̀ sɔ̍n wlù ta̍a̍n, ìn kɔn due, Mose kɔn due, nɛ̀ Ilaɛja kɔn due.” 6Ɛ̍ wa̍ u̍h dɛ̍we̍ kaa̍, sɔ dɛ̍ ɔ̍ iě-a bla̍-ɛ, ɔ̍ se̍ ɛ̍ juo.
7Wɛ̀ nǐgban ji̍ iě ɛ̍ kaɛn dǒ u̍h dlǔwèàì. Dǒ wlu̍ sɔ-ɛ dě ɛ̍ di̍i̍, ɛ̍ la̍a̍, “Ɔ̀ la ǎn tìh kma Jǔ bo. Mɔ̀ tù ɔ̍ wlu̍ dounᵻ.” 8U̍h gbèɛ̀ɛ̍n-a i̍ u̍h iě-a kli dǎ-a, nɛ̀ u̍h-u jě nyɔ̍ dɔɔ dɛ dǒ u̍h we̍. Nɛ̀ Jusu nɛ due bo u̍h-a jě la̍.
9Ti̍ u̍h-a sɔ-a la̍ dě tlu̍h kɛ̍n-ɛ, wɛ̀ Jusu gbɛ̍n-ɛ u̍h wɔ̍i̍n, ɔ̍ la̍a̍, “Dɛ̍ mɔ̀ jě-a tiɔ-ɛ, mɔ̀ bɔ̌ nyɔ̍ dɔɔ wlùh sèàɛ̍ te̍e̍ wɛ̀ Nyi̍ɔ̍-a Jǔ iě-e wlǔh o.”
10U̍h nu̍ ɔ̍ wlu̍ laa̍, jɛ nɛ̀ u̍h-a pu̍e̍e ɛ̍ wlùh i̍, u̍h la̍a̍, “Dě-e wlǔh tìh ɔ̍ sà-aɛ, ɛ̍ gbɔ̀-a nynɛ̌ ɛ?” 11Wɛ̀ u̍h tèle ɔ̍ i̍, u̍h la̍a̍, “Dɛ̍nu̍ telě nǎ poe nyɔ̍ la̍ Ilaɛja bo ɔ̀ kɔn ɔ̀ iě ji̍ sàì ɛ?”
12Wɛ̀ Jusu sà u̍h-a wlu̍ pɔ̀n we̍, ɔ̍ la̍a̍, “Ilaɛja-a mu̍ ji̍ sàǐtòò wɛ̀ ɔ̍ iě dɛ̍ᵻ kli̍hgbɛ̍ gba̍a̍ po̍. Jɛ dɛ̍ bo ɛ̀ nu̍ ɛ̍ wɛ̀ Nyɔsoa-a wlu̍ la̍ Nyi̍ɔ̍-a Jǔ-a mu̍ jua̍i̍ sàɛ̀ dɛ̍ dɔu wɛ̀ ɔ̍ iě chla tba̍-ɛ ɛ? 13Jɛ ǎn sèàɛ̍ mɔ̀ wlùh, Ilaɛja ji̍ wɛ̀, iě u̍h nu̍ ɔ̍ kà i̍ ka u̍h-a pɔ̀n-a u̍h iě-a ɔ̍ kà i̍ nu̍-ɛ nu̍-ɛ. Kǎ ɛ̍ nu̍ chlǐh-ɛ gbɛɛ dě Nyɔsoa-a wlu̍ di̍i̍ dǒ ɔ̍ pùn.”
Jusu pǔh-i jǔwɛ jeědih nɛ-a de̍e̍-ɛ
(Matio 17.14-21; Luu 9.37-43)
14Ti̍ Jusu bei-a ji̍-a kòà juh laa̍ nynɛ̌ gbǎ la̍ dode̍-ɛ, dǒ u̍h jě-e nyɔ̍ tlùgbei̍ nɛ̀ u̍h dlɛ̌ u̍h. Nɛ̀ u̍h ke telě nǎ poe nyɔ̍-a sà wɔ̍ɔ̍n i̍. 15Dǒ u̍h nɛ wɛ̀ u̍h jě Jusu bei. Sɔ ɛ̍ kèle u̍h i̍ kaa̍. Iě u̍h gba̍ ple̍-ɛ, u̍h po̍ ɔ̍ wlu̍ i̍. 16Wɛ̀ Jusu tèle ɔ̍ kòà i̍, ɔ̍ la̍a̍, “Dɛ̍ɛ tìh u̍h ke mɔ̀-a sà wɔ̍ɔ̍n i̍ ɛ?”
17Jɔ̍gbau due nɛ-a dě nyɔ̍ tlùgbei̍ laa̍ nynɛ̌-ɛ, ɔ̍ la̍a̍, “Dlǔtu, ǎn jǔ jɔ̍gbau bo ǐn ja nɔ̌ ìn we̍. Jeědih nɛ ɔ̍ de̍e̍, ɛ̍ nu̍ ɛ̍ ɔ̍-ɔ wlu. 18Pò ɛ̍ sǐ ɔ̍ kɛ̍n-ɛ, nɛ̀ ɛ̍ kà ɔ̍ i̍ dǒ bloɔ̍. Nɛ̀ ɔ̍ slɛ̌ɛ tàɔn, wɛ̀ fùǔ-a tè ɔ̍ wɔ̍i̍n, iě ɔ̍ di̍ nynɛ̌ kìàǎnkìàǎn. Wɛ̀ ǐn ba̍le àn kòà u̍h iě ɔ̍ jeědih la de̍e̍ sà, jɛ u̍h se̍ ɛ̍ bɛ̌ɛ.”
19Wɛ̀ Jusu la̍a̍ dě u̍h we̍, “Mɔ̀ɔ̍ ti̍laa nyɔ̍ la, mɔ̀ se̍ wlùh gbaɛ blě. Ti̍ tìèwe̍ iě da̍a mɔ̀ we̍ nu̍ ke̍ gbɔ̀ɔ ɛ? Ka iě mɔ̀-a tìh nu̍ ɛ? Mɔ̀ ja jǔwɛ laa̍ nɔ̌ ǐn we̍.” 20Wɛ̀ u̍h gba̍ ɔ̍ dě ɔ̍ we̍.
Jeědih tba̍-a Jusu jlǐhɛ̍ ka-ɛ, sɔ ɛ̍ sǐ jǔ laa̍ sǔh. Wɛ̀ ɔ̍ kà i̍ dǒ bloɔ̍ ɔ̍ sue-e. Nɛ̀ fùǔ tè ɔ̍ wɔ̍i̍n bɔuu. 21Wɛ̀ Jusu la̍a̍ dě ɔ̍ baa we̍, “Ti̍ tìèwe̍ ɛ̍ nu̍ wɛ̀ dǒ ɔ̍ pùn ɛ?”
Ɔ̍ baa la̍a̍, “Ɛ̍ ke ɔ̍ sɔ dě jǔwɛ blǐ. 22Ɛ̍ pɔ̀n ǎn jǔ la dbǎ-a i̍, dɛ̍nu̍ɛ, ɛ̍ po̍ ɔ̍ dě jlǐh ke dě niɔ̍ chɛ̍chɛ̍. Pò ìn bɛ̌ɛ ɛ̍ nu̍-ɛɛ, nɛ̀ ìn jě à wɔɛ ìè à we̍ gbǎ.”
23Jusu la̍a̍, “Nàà pò ǐn bɛ̌ɛ ɛ̍ nu̍-ɛ ae? Nyɔ̍ ɔ̀ gbaɛ-a Nyɔsoa wlùh-ɛ, nɛ̀ dɛ̍-o-dɛ̍ se̍ kmu dǒ ɔ̍ we̍.”
24Jusu iě-a chlà-a, jɔ̍gbau wǐ-i kleǐn. Ɔ̍ la̍a̍, “Ǐn blě wlùh gbaɛ-ɛ, jɛ nu̍ ɛ̍, ɛ̍ iě kɛ̍n gbǎ.”
25Jusu gbɛ̀n-a ɛ̍ ja̍-ɛ, sɔ nyɔ̍ dɔu-a gboǎɛ kɛ̍n i̍ kaa̍. Wɛ̀ ɔ̍ wǐi jeědih laa̍ dlǔ i̍, ɔ̍ la̍a̍, “Mɔ̀ jeědih la ɛ̀ nu̍-a bo̍bo̍, ɛ̀ sǔn-aɛ, ǎn sèàɛ̍ ìn wlùh, sɔ dǒ jǔ la de̍e̍. Nɛ̀ ìn bɔ̌ dǒ ɔ̍ de̍e̍ gbǎ-a dɛ kleǐnklein.”
26Wɛ̀ jeědih wǐ, iě ɛ̍ sǐ jǔ laa̍ kàka̍, wɛ̀ ɛ̍ sɔ dǒ ɔ̍ de̍e̍. Sɔ pò ìn jě ɔ̍-ɛ, ka mɛ̌-ɛ kǔ-ɛ. Ɛ̍ kɔn nyɔ̍ dɔu la̍a̍, “Ɔ̍ mɛ̌-ɛ.” 27Jɛ Jusu gbɛ̍n ɔ̍ sɔ̍n i̍, wɛ̀ ɔ̍ dǔ ɔ̍ ja̍i̍, iě ɔ̍ nyna i̍.
28Ti̍ Jusu mu̍-a dě gbò-ɛ, wɛ̀ ɔ̍ kòà chɛn gbɔ̍i̍ iě u̍h tèle ɔ̍ i̍. U̍h la̍a̍, “Dɛ̍nu̍ àɔ̀ nɔ̀ɔ̍, wɛ̀ à se̍ jeědih i̍ nu̍-ɛ bɛ̌ɛ ɛ?”
29Wɛ̀ Jusu la̍a̍ dě u̍h we̍, “Jeědih kaɛn la, ba̍le-ɛ due gbài̍ bo ɛ̀ nu̍ ɛ̍ i̍, dɛ̍ dɛɛ se̍ ɛ̍ bɛ̌ɛ.”
Jusu sà ɔ̍ mɛ̌ɛ tìh i̍ dɛ
(Matio 17.22-23; Luu 9.43-45)
30Wɛ̀ Jusu ke ɔ̍ kòà wlǔh-i gbààn, iě u̍h jii Kaladii fɔɔ. Jɛ ɔ̍ se̍ pɔ̀n nyɔ̍ iě ɔ̍ tìh juo, 31dɛ̍nu̍ɛ, nɛ̀ ɔ̍ po̍ ɔ̍ kòà nǎ. Ɔ̍ la̍a̍, “Nyi̍ɔ̍-a Jǔ-a mu̍ kwlǎ sà-ɛ dě nyɔ̍ɔ kwa̍a̍, wɛ̀ u̍h iě ɔ̍ dbǎ. Nɛ̀ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”
32Jɛ dɛ̍ ɔ̍ bla̍-aɛ, u̍h se̍ ɛ̍ i̍ wɔ̌n, iě u̍h-a ple̍ faɔn u̍h iě ɔ̍ i̍ tèle.
Nyɔ̍ bo ɔ̀ ku̍ wɔ̍n ɛ?
(Matio 18.1-5; Luu 9.46-48)
33Wɛ̀ Jusu ke ɔ̍ kòà sǐ dǒ Kepanium i̍. Ti̍ u̍h pa̍-a dě gbò-ɛ, iě Jusu tèle u̍h i̍. Ɔ̍ la̍a̍, “Dɛ̍-ɛ tìh mɔ̀-a pu̍e̍e tiɔ dǒ wìè-i ɛ?”
34Jɛ u̍h nɛ tìi̍n, dɛ̍nu̍ɛ, nyɔ̍ ku̍ wɔ̍n dǒ ɔ̍ ba̍ᵻ kɛ̍n-ɛ tìh bo u̍h pu̍e̍e dǒ wìè-i. 35Wɛ̀ ɔ̍ tè i̍, iě ɔ̍ dǎ kòà-a pùè jɔ̌ sɔɔ̌n laa̍. Wɛ̀ ɔ̍ la̍a̍ dě u̍h we̍, “Pò mɔ̀-a nyɔ̍ ja pɔ̀n ɔ̍ iě nya̍ wɔ̀-ɛ, nɛ̀ ɔ̍ bo ɔ̀ iě nyɔ̍ kli̍hgbɛ̍-a de̍ gbɔ̀ ke pòi̍ju nu̍.” 36Wɛ̀ ɔ̍ dǔ jǔwɛ due-e, iě ɔ̍ gbà ɔ̍ wlì dě u̍h nynɛ̌ we̍. Wɛ̀ ɔ̍ la̍a̍ dě u̍h we̍, 37“Nyɔ̍-o-nyɔ̍ ɔ̀ gbɛ̍n-a jǔwɛ la ɔ̍ tìh i̍ dǒ ǎn nynɛ̌ kɛ̍n-ɛ, nɛ̀ ɔ̍ gbɛ̍n ǎn tìh i̍ wɛ̀ ke. Nɛ̀ nyɔ̍-o-nyɔ̍ ɔ̀ gbɛ̍n-a ǎn tìh i̍-ɛ, nɛ̀ ɛ̍ se̍ ǎn tìh ɔ̍ se̍ i̍ gbɛ̍n, jɛ nɛ̀ nyɔ̍ ɔ̀ dbo̍-a m-ɛ, ɔ̍ kɔn tìh bo ɔ̍ gbɛ̍n i̍ wɛ̀.”
Nyɔ̍ se̍-a àɔ̀ faɛn-ɛ, nɛ̀ ɔ̍ ke à nɛ due
(Luu 9.49-50)
38Wɛ̀ Chɔɔn la̍a̍ dě ɔ̍ we̍, “Dlǔtu, à jě jɔ̍gbau due nɛ̀ ɔ̍ gba̍ àn nynɛ̌, wɛ̀ ɔ̍ sà nyɔ̍ɔ jeědih de̍e̍ i̍. Iě à po̍ ɔ̍ bɔ̌ i̍, dɛ̍nu̍ɛ, ɔ̍ ke à se̍ due nɛ.”
39Wɛ̀ Jusu la̍a̍ dě u̍h we̍, “Mɔ̀ bɔ̌ ɔ̍ bɔ̌ i̍ po̍-ɛ, dɛ̍nu̍ɛ, nyɔ̍ se̍ jbaɛdih po̍-ɛ wɔ̀ mu̍ dǒ ǎn nynɛ̌ kɛ̍n wɛ̀ ɔ̍ iě ǎn tìh sɔ̀nᵻ sà. 40Dɛ̍nu̍ɛ, nyɔ̍ ɔ̀ se̍-a à bu̍hᵻ i̍ tbaɛ-ɛ, nɛ̀ ɔ̍ ke à dɛ nɛ due. 41Tìh-a taǐn ǎn sèàɛ̍ mɔ̀ wlùh, nyɔ̍-o-nyɔ̍ ɔ̀ mu̍-a mɔ̀ nǐ kàu̍n nyǐ mɔ̀-a Klai-a nynɛ̌ gba̍ tìh-ɛ, nɛ̀ ɔ̍ naɛ jě-dɛ̍ se̍ mǎ la̍ kɔn dɛ.
Bɔ̌ wɔ̌n-ɛ dɛ̍ bɔ̌ ìn blu̍ja̍a̍ po̍-ɛ
(Matio 18.6-9; Luu 17.1-2)
42“Jɛ ùh plìh la ùh gbaɛ-a ǐn wlùh-ɛ, nyɔ̍-o-nyɔ̍ ɔ̀ mu̍-a u̍h-a wlùh fèàɛ̀ dě gblɛ̍n sɔ̀ɛ̀n we̍-ɛ, nɛ̀ ɛ̍ mu̍ i̍ blaɛ u̍h iě nyɔ̍ kaɛn laa̍ dui-sɔɔ̌ dɔ̍ i̍ sa̍n-ɛ, wɛ̀ u̍h iě ɔ̍ jbǒ kɛ̍n po̍. 43Ɛ̍ tìh pò àn sɔ̍n ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn chɛ̍n ɛ̍ i̍. Ɛ̍ nmɔ jii̍ ìè àn dalǔh due mǎ-ɛ, wɛ̀ ìè kmɔ̌ sie feɛ jě, ɛ̍ sìì àn sɔ̍nᵻ kli̍hgbɛ̍ gbà i̍, wɛ̀ ìn mu̍ dě kàn nɛ̍ di̍i̍, [ 44tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ’]. 45Nɛ̀ pò àn bu̍h ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn chɛ̍n ɛ̍ i̍. Ɛ̍ nmɔ jii̍ ìè i̍ kɔ̌, wɛ̀ ìè kmɔ̌ sie feɛ jě, ɛ̍ sìì àn bu̍hᵻ gbà i̍, wɛ̀ ìn mu̍ dě kàn nɛ̍ di̍i̍, [ 46tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ’]. 47Nɛ̀ pò àn jlǐhɛ̍ ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn sà ɛ̍ kɔ̌n-ɔ. Ɛ̍ nmɔ jii̍ ìè jlǐhɛ̍ due blě, wɛ̀ ìè dě Nyɔsoa-a kmɔ̌ wlu̍ i̍ kɔn-ɛ di̍i̍ nɛ, ɛ̍ sìì àn jlǐh gbà i̍ wɛ̀ ìn gbǎ dě kàn nɛ̍ di̍i̍, 48tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ.’
49“Nɛ̍ bo ɛ̀ mu̍ nyɔ̍ kli̍hgbɛ̍ mlɔ̌ i̍ wɔ̀, ka tɔ̌n-a wɔ̀ slaǎ sà-ɛ dɛ̍ mlɔ̌ i̍-ɛ.
50“Tɔ̌n nmɔ jii̍, jɛ pò ɛ̍ wɛ̀ wɔ̍n-ɛ, nɛ̀ nyɔ̍ se̍ ɛ̍ wɔ̍n nmɔ-ɛ bɛ̌ɛ dɛ.
“Ɛ̍ tìh-ɛ, mɔ̀ blě tɔ̌n dě mɔ̀-a chɛ̀ ja̍a̍, iě wlùh-a i̍ tè-ɛ iě dǒ mɔ̀ nynɛ̌ nɛ.”
Iliyochaguliwa sasa
Maɛ 9: KDNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Western Krahn published as KU̍O̍ DELEE © The Bible Society in Liberia, 1999.
