Maɛ 10
10
Jusu po̍ nǎ nynɔ̌ kwlǎ sà tìh
(Matio 19.1-12; Luu 16.18)
1Wɛ̀ Jusu wlǔh-i gbààn, iě ɔ̍ mu̍ dě Judia fɔɔ, wɛ̀ ɔ̍ tàn Jɔɔdɛn nǐ. Iě nyɔ̍ tlùgbei̍ gbòe dǒ ɔ̍ we̍ dɛ, iě ɔ̍ po̍ u̍h nǎ ka ɔ̍ nu̍-a se̍e̍-ɛ.
2Wɛ̀ Fɛlesii nyɔ̍ ji̍ dǒ ɔ̍ we̍, iě u̍h tèle ɔ̍ i̍, nɛ̀ u̍h-a tɛ̀n ɔ̍-ɛ. U̍h la̍a̍, “À telě sà jɔ̍gbau wlu̍ kɛ̍n ɔ̍ iě nynɔ̌ kwlǎ sà ae?”
3Wɛ̀ Jusu la̍a̍, “Telě we̍ bo Mose nyǐ mɔ̀ ɛ?”
4U̍h la̍a̍, “Mose sà jɔ̍gbau wlu̍ kɛ̍n ɔ̍ iě nynɔ̌-a kwlǎ sà chlǐh-dɛ̍ chlǐh, wɛ̀ ɔ̍ iě ɔ̍ kwlǎ sà-a dǔ.”
5Wɛ̀ Jusu la̍a̍ dě u̍h we̍, “Mɔ̀ ku̍ dlǔ dɛbo ɛ̍ kɔn Mose chlǐh-i mɔ̀ telě la i̍. 6Jɛ sɔ dě tɔ̀blɔ̍ɔ̍ wɛ̀ kmɔ̌ iě-a nui-ɛɛ, Nyɔsoa nu̍ nyi̍ɔ̍-a nynɔ̌ ke je̍ɔ̍. 7Ɛ̍ tìh-ɛ, jɔ̍gbau-a mu̍ dǒ ɔ̍ de̍ ke ɔ̍ baa we̍-e sɔ, wɛ̀ ɔ̍ ke ɔ̍ nynɔ̌ iě i̍ tùi. 8Nɛ̀ u̍h nɛ-a sɔɔ̌n-ɛ, u̍h-a mu̍ nyɔ̍ due nu̍. Sɔ nɛ̀ u̍h se̍ sɔɔ̌n nɛ dɛ, jɛ nɛ̀ u̍h nɛ due wɛ̀. 9Ɛ̍ tìh-ɛ, dɛ̍ Nyɔsoa tùi-a i̍-ɛ, nyɔ̍ dɔɔ bɔ̌ ɛ̍ i̍ sèàɛ̍.”
10Ti̍ u̍h mu̍-a dě gbò-ɛ, wɛ̀ ɔ̍ kòà tèle ɔ̍ i̍ dɛ nynɔ̌ kwlǎ sà tìh. 11Wɛ̀ ɔ̍ la̍a̍ dě u̍h we̍, “Nyɔ̍-o-nyɔ̍ ɔ̀ sà-a ɔ̍ nynɔ̌ kwlǎ iě ɔ̍ dǔ-a nynɔ̌ dɔɔ-ɛ, nɛ̀ nynɛ̌à bo ɔ̍ nu̍, nɛ̀ ɔ̍ pɔ̀n-ɛ ɔ̍ nynɔ̌ sàǎsà i̍. 12Nɛ̀ pò nynɔ̌gbaɔ tba̍ sɔ̍n ke wɛ̀ ɔ̍ iě jɔ̍gbau dɔɔ dǔ-ɛ, nɛ̀ nynɛ̌à bo ɔ̍ nu̍ ke.”
Jusu tè nynuu̍plìh sɔ̍n dlǔ
(Matio 19.13-15; Luu 18.15-17)
13Wɛ̀ nyɔ̍ɔ-a ja u̍h-a nynuu̍ dǒ Jusu we̍ ɔ̍ iě u̍h sɔ̍n dlǔ tè. Jɛ ɔ̍ kòà po̍ u̍h bɔ̌ i̍. 14Ti̍ Jusu juo-ao dɛ̍ i̍-ɛ, sɔ ɛ̍ se̍ ɔ̍ gbǐh po̍. Wɛ̀ ɔ̍ la̍a̍ dě u̍h we̍, “Mɔ̀ bɔ̌ nynuu̍plìh la u̍h iě nɔ̌ ǐn we̍ ji̍. Mɔ̀ bɔ̌ u̍h wìè-i sà-a. Dɛ̍nu̍ɛ, nyɔ̍ ùh nɛ-a ka-a, u̍h bo ùh kɔn dǒ Nyɔsoa-a kmɔ̌ wlu̍ i̍ kɔn-ɛ we̍. 15Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ jɔ se̍-a Nyɔsoa-a kmɔ̌ wlu̍ i̍ kɔn-ɛa tìh i̍ gbɛ̍n mu̍ ka jǔwɛ-ɛ, nɛ̀ ɔ̍ se̍-e i̍ sǐ mu̍.” 16Wɛ̀ ɔ̍ dǔ nynuu̍plìh laa̍, iě ɔ̍ tù u̍h wlì. Wɛ̀ ɔ̍ tè u̍h sɔ̍n dlǔ, iě ɔ̍ nyǐ u̍h pɔ̀ìě.
Pàn-a jǔgbèlà due-a sɔ̀ìn
(Matio 19.16-30; Luu 18.18-30)
17Jusu-a ji̍ la̍ mu̍ la̍ sǔh, wɛ̀ jɔ̍gbau due gba̍ ple̍-ɛ dǒ ɔ̍ we̍, ɔ̍ chlìi i̍ dǒ ɔ̍ jǔ. Iě ɔ̍ tèle ɔ̍ i̍, ɔ̍ la̍a̍, “Dlǔtu chɛ̀, dɛ̍we̍ iě nu̍ wɛ̀ iě kmɔ̌ sie feɛ blě ɛ?”
18Wɛ̀ Jusu la̍a̍ dě ɔ̍ we̍, “Dɛ̍nu̍ àn dǎɛ ǐn nyɔ̍ chɛ̀ ɛ? Nyɔ̍ chɛ̀ dɔɔ se̍ nɛ, Nyɔsoa due gbài̍ bo ɔ̀ nu̍ nyɔ̍ chɛ̀. 19Ìn juo ka telě dǎ-aɛ, ɛ̍ la̍a̍, ‘Bɔ̌ nyɔ̍ gbe̍ja̍a̍ po̍-ɛ, bɔ̌ nynɛ̌à nu̍-ɛ, bɔ̌ jlǐ-ɛ, bɔ̌ nyɔ̍ si̍h i̍ tùi-ɛ, bɔ̌ nyɔ̍ kanieǐ di̍-ɛ, nɛ̀ ìn jě ìn de̍ ke ìn baa dɛ̍ɛ̍.’ ”
20Wɛ̀ ɔ̍ la̍a̍, “Dlǔtu, sɔ dě ǎn jǔwɛ blǐ ǐn tè-o telě kli̍hgbɛ̍ la i̍ se̍e̍.”
21Wɛ̀ Jusu gbɛ̀n-ɛ ɔ̍ jbɛɛ jua̍a̍ ja̍, iě ɔ̍ la̍a̍ dě ɔ̍ we̍, “Dɛ̍ due sie-o ìè nu̍. Mu̍ ìè àn kɔn-dɛ̍ᵻ kli̍hgbɛ̍ ple̍, ìè i̍h-a wlǐ nyɔ̍gbà nyɔ̍ nyǐ, nɛ̀ àn mu̍ pàn dě ja̍i̍wlɔ̀. Nɛ̀ ìn ji̍ ìè dǒ ǐn de̍e̍ gbǎ.” 22Ti̍ jɔ̍gbau wɔ̌n-a wlu̍ la-ɛ, sɔ ɔ̍ jua̍a̍ sàɛ̀-ɛ, wɛ̀ ɔ̍ wlùh gbǎ seɔn-ɔ. Iě ɔ̍ mu̍, dɛ̍nu̍ɛ, ɔ̍ blě kɔn-dɛ̍ᵻ dɔu.
23Wɛ̀ Jusu gbèɛ̀ɛ̍n i̍, iě ɔ̍ la̍a̍ dě ɔ̍ kòà we̍, “Ɛ̍ mu̍ i̍ kma kaa̍ wɛ̀ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ.”
24Ɔ̍ wlu̍ la ɛ̍ wlǔh i̍ ɔ̍ kòà de̍e̍ kaa̍. Wɛ̀ Jusu gba̍ ɛ̍ kɛ̍n i̍ dɛ dě u̍h we̍, ɔ̍ la̍a̍, “Ǎn nynuu̍, dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ-a kma-a wɔ̍n sǔh-ɛ, ɛ̍ se̍ dɛ̍ka nɛ. 25Ɛ̍ kma i̍ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ, ɛ̍ sìì gbo̍ kɛ̍ɛ̍n bli-a dě mɛnɔ̍-a gbɔ̀ di̍i̍ jii-ɛ.”
26Sɔ ɛ̍ kèle u̍h i̍ kaa̍, iě u̍h tèle ɔ̍ i̍, u̍h la̍a̍, “Nɛ̀ nyɔ̍we̍ bo ɔ̀ mu̍-o pǔh ɛ?”
27Jusu gbɛ̀n u̍h ja̍, iě ɔ̍ la̍a̍, “Dǒ nyi̍ɔ̍ we̍ nɔ̀ɔ̍, nɛ̀ ɛ̍ kmu-i. Jɛ ɛ̍ se̍ laǎn nɛ dǒ Nyɔsoa nɔ̀ɔ̍ we̍, ɔ̍ bɛ̌ɛ dɛ̍ᵻ kli̍hgbɛ̍ nu̍-ɛ.”
28Wɛ̀ Pitɛ la̍a̍ dě ɔ̍ we̍, “Gbɛ̀n-e, à tǎli à dɛ̍ᵻ kli̍hgbɛ̍ i̍, wɛ̀ à gbǎ dǒ ìn de̍e̍.”
29Wɛ̀ Jusu la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ jɔ tǎli-a ɔ̍ gbò o, de̍di̍i̍ᵻ jɔ̍gbauᵻ o, de̍di̍i̍ᵻ nynɔ̌gbaɔᵻ o, de̍ o, baa o, nynuu̍ o, ɛ̍ ke ɔ̍ klèᵻ ke dǒ ǎn tìh ke pɔ̀n chɛ̀-a tìh we̍-ɛ, 30nɛ̀ ɔ̍ mu̍ i̍h-a kmɛ kmɛ jě kaka da̍a ti̍laa kmɔ̌ di̍i̍. Nɛ̀ ɔ̍ mu̍ gbòᵻ ke, de̍di̍i̍ᵻ jɔ̍gbauᵻ ke, de̍di̍i̍ᵻ nynɔ̌gbaɔᵻ ke, de̍ᵻ ke, nynuu̍ ke, klèᵻá kmɛ kmɛ jě, i̍h ke klě jě-ɛ iě na. Wɛ̀ ɔ̍ iě kmɔ̌ sie feɛ jě dě kmɔ̌ delee di̍i̍. 31Jɛ nyɔ̍ dɔu ùh wɔ̀-a ka nya̍-ɛ, u̍h-a mu̍ de̍ wɔ̀. Wɛ̀ juh wɔ̀-a ka de̍-ɛ, u̍h iě nya̍ wɔ̀.”
Jusu sà ɔ̍ mɛ̌ɛ tìh i̍ dɛ
(Matio 20.17-19; Luu 18.31-34)
32Ti̍ Jusu ke ɔ̍ kòà-a mu̍-a dǒ Juluslɛn wlɔ̀ di̍i̍-ɛ, nɛ̀ ɔ̍ wɔ̀ dǒ u̍h jǔ. Sɔ ɛ̍ kèle u̍h i̍, iě ɛ̍ po̍ nyɔ̍ wɔ̀-a dǒ u̍h de̍e̍-ɛ faɔn. Dǒ ɔ̍ gba̍-ɛ ɔ̍ kòà-a pùè jɔ̌ sɔɔ̌n laa̍ fɔ̌ i̍ dɛ, iě ɔ̍ sèàɛ̍ u̍h wlùh dɛ̍ ɛ̀ mu̍-a ɔ̍ jii̍ nɛ dǒ Juluslɛn-ɛ. 33Ɔ̍ la̍a̍, “Juluslɛn à mu̍-a ka-a, Nyi̍ɔ̍-a Jǔ-a mu̍ kwlǎ sà-ɛ dě Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kwa̍a̍. Wɛ̀ u̍h iě ɔ̍ dbǎ-a tìh dlǔ po̍, wɛ̀ u̍h iě ɔ̍ ùh se̍-a Juu nyɔ̍-ɛ kwlǎ sà-ɛ. 34Wɛ̀ u̍h iě ɔ̍ jlii̍h kɛ̍n i̍ nui, u̍h iě ɔ̍ tɔ̍n gbà, u̍h iě ɔ̍ bla̍, wɛ̀ u̍h iě ɔ̍ dbǎ. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”
Chiin ke Chɔɔn jbǎ-ɛ Jusu dɛ̍
(Matio 20.20-28)
35Wɛ̀ Sɛɛbedii-a nynuu̍, Chiin ke Chɔɔn ji̍ dǒ Jusu we̍. U̍h la̍a̍, “Dlǔtu, dɛ̍ due bo à pɔ̀n ìè nu̍ dǒ à we̍.”
36Wɛ̀ ɔ̍ tèle u̍h i̍, ɔ̍ la̍a̍, “Dɛ̍ mɔ̀-a pɔ̀n iě nu̍ dǒ mɔ̀ we̍ ɛ?”
37Iě u̍h la̍a̍, “Ti̍ àn mu̍-a dǒ àn nynɛ̌ gbalǎ kɛ̍n i̍ tè dǒ àn kmɔ̌ wlu̍ i̍ kɔn ti̍ we̍-ɛ, à due iě dǒ àn di̍na̍ we̍ i̍ tè, wɛ̀ due iě dǒ ìn kwe̍na̍ we̍ i̍ tè.”
38Wɛ̀ Jusu la̍a̍ dě u̍h we̍, “Dɛ̍ mɔ̀-a sà-aɛ, mɔ̀ se̍ ɛ̍ juo. Kàu̍n ǎn mu̍-a di̍i̍ nǎ-ɛɛ, mɔ̀ bɛ̌ɛ ɛ̍ di̍i̍ nǎ-ɛ ae? Nǐ ǎn mu̍-a dlǔ po̍-ɛ, mɔ̀ bɛ̌ɛ ɛ̍ dlǔ po̍-ɛ ae?”
39Iě u̍h la̍a̍, “À bɛ̌ɛ ɛ̍.”
Wɛ̀ Jusu la̍a̍ dě u̍h we̍, “Kàu̍n ǎn mu̍-a di̍i̍ nǎ-ɛɛ, mɔ̀-a mu̍ ɛ̍ di̍i̍ nǎ-ɛ. Iě nǐ ǎn mu̍-a dlǔ po̍-ɛ, mɔ̀ iě ɛ̍ dlǔ po̍. 40Jɛ dǒ mɔ̀-a ǎn di̍na̍ ke ǎn kwe̍na̍ we̍ i̍ tè-ɛ nɔ̀ɔ̍, ǐn se̍ ɛ̍ gbǐh blě. I̍h po̍-eɛ gba̍a̍ wɛ̀ se̍e̍ dǒ nyɔ̍ ùh-a mu̍-a doǒ i̍ tè-ɛ we̍.”
41Ti̍ kòà pùè sie-a dǒ de̍-ɛ, u̍h wɔ̌n-a Chiin ke Chɔɔn-a wlu̍ la-ɛ, sɔ ɛ̍ se̍ u̍h gbǐh po̍. 42Wɛ̀ Jusu dǎ u̍h dǒ ɔ̍ we̍, iě ɔ̍ la̍a̍, “Mɔ̀ juo ɛ̍-ɛ, nyɔ̍ ùh kɔn-a kmɔ̌ we̍ nyɔ̍ wlu̍ i̍ tìh u̍h-a wlu-ɛ, u̍h nɛ dǒ u̍h dlǔwèàì. Iě u̍h-a gbaɛ u̍h gbǐh. 43Jɛ ɛ̍ bɔ̌ laǎn nɛ-ɛ dě mɔ̀ nynɛ̌. Jɛ pò mɔ̀-a nyɔ̍ ja pɔ̀n ɔ̍ iě wɔ̍n ku̍ dě mɔ̀ nynɛ̌-ɛ, nɛ̀ ɔ̍ bo ɔ̀ iě pòi̍ju nu̍ dǒ ɔ̍ ba̍ᵻ we̍. 44Nɛ̀ pò mɔ̀-a nyɔ̍ ja pɔ̀n ɔ̍ iě nyɔ̍ kwa̍ blě-ɛ, nɛ̀ ɔ̍ bo ɔ̀ iě mɔ̀-a kèi̍ nu̍. 45Nyi̍ɔ̍-a Jǔ se̍ ji̍ nyɔ̍ iě ɔ̍ pòi̍ju nu̍. Jɛ ɔ̍ ji̍-i wɛ̀ ɔ̍ chɛ̀ iě pòi̍ju nu̍. Wɛ̀ ɔ̍ iě ɔ̍ feɛ i̍ pɛ̌n-ɛ, ɛ̍ iě nyɔ̍ dɔu kɛ̍ɛ̍n pùhbɔ.”
Jusu pɔ̀ni Batemio-a jlǐh
(Matio 20.29-34; Luu 18.35-43)
46Wɛ̀ Jusu ke ɔ̍ kòà mu̍ dǒ Jɛwlekoo wlɔ̀ di̍i̍. U̍h-a ji̍-a de̍-ɛ, nɛ̀ nyɔ̍ tlùgbei̍ wɔ̀ dǒ u̍h de̍e̍. Timeɔ-a jǔ Batemio ɔ̀ dɔ̌-aɛ, nɛ̀ ɔ̍ tè i̍ dǒ wìè gbàì ɔ̍ slɔ̀. 47Ti̍ ɔ̍ wɔ̌n-a pɔ̀n ka Jusu ɔ̀ sɔ-a dǒ Naaslɔɛ wlɔ̀ di̍i̍-ɛ bo ɔ̀ sì o-ɛ, sɔ ɔ̍ we̍le la̍-ɛ sǔh. Ɔ̍ la̍a̍, “Depe-a Jǔ Jusu, jě ǐn wɔɛ lě.”
48Iě nyɔ̍ dɔu-a po̍ ɔ̍ bɔ̌ i̍ ɔ̍ iě-o wɔ̍n po̍. Jɛ ɔ̍ gbǎ dě de̍i̍ dǒ we̍le la̍, ɔ̍ la̍a̍, “Depe-a Jǔ, jě ǐn wɔɛ lě o.”
49Wɛ̀ Jusu nyna i̍, iě ɔ̍ la̍a̍, “Mɔ̀ dǎ ɔ̍.”
Iě u̍h dǎ dɔ̌-nyɔ̍ laa̍, u̍h la̍a̍, “Dbǎ ku̍, ɔ̍ dǎ la̍ m̀, sɔ bloɔ̍.”
50Wɛ̀ ɔ̍ sà ɔ̍ dɛ̍wlo̍o̍ i̍, plɔ̀ù, ɔ̍ po̍ ɛ̍ i̍. Iě ɔ̍ wa̍n bloɔ̍, ɔ̍ mu̍ dě Jusu we̍.
51Wɛ̀ Jusu tèle ɔ̍ i̍, ɔ̍ la̍a̍, “Dɛ̍ àn pɔ̀n iě nu̍ dǒ ìn we̍ ɛ?”
Wɛ̀ Batemio la̍a̍, “Dlǔtu, ǎn pɔ̀n iě i̍ jě.”
52Iě Jusu la̍a̍, “Mu̍, àn wlùh gbaɛ bo ɛ̀ pǔh-i m̀.”
Dǒ ɔ̍ jlǐh nyna i̍h pɔ̀ni, iě ɔ̍ gbǎ dǒ Jusu de̍e̍.
Iliyochaguliwa sasa
Maɛ 10: KDNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Western Krahn published as KU̍O̍ DELEE © The Bible Society in Liberia, 1999.
