Luka 10

Yesu anawatuma wafuasi sabini na wawili

1Baada ya hayo, Bwana aliwachagua wengine sabini na wawili,#10:1 Sabini na wawili: Baadhi ya hati za mkono zina zinasema sabini hapa na katika aya ya 17. Yamkini hiyo inagusia kwa kifano tu juu ya kuhubiri Injili ulimwenguni kote ambapo ilisemwa kijadi kwamba kuna mataifa 72 (au 70) katika ulimwengu uliojulikana wakati huo (yaani mataifa yaliyotajwa katika Mwa 10 ni 70 katika makala ya Kiebrania lakini 72 katika Septuajinta). akawatuma wawiliwawili, wamtangulie katika kila kijiji na mahali ambapo yeye mwenyewe alitaka kwenda. 2Akawaambia, “Mavuno ni mengi, lakini wavunaji ni wachache. Kwa hivyo, mwombeni mwenye shamba atume wavunaji shambani mwake. 3Sasa nendeni; fahamuni kwamba ninawatuma nyinyi kama kondoo wanaokwenda kati ya mbwamwitu. 4Msichukue mfuko wa fedha, mkoba, wala viatu; msimsalimu mtu yeyote njiani.#10:4 Msimsalimu mtu yeyote njiani: Ling na 2Fal 4:29. Shughuli za kusalimiana huko Mashariki ya Kati mara kwa mara zilichukua muda. Wanafunzi wanapaswa kujitolea muda wote kwa ajili ya mahubiri yao bila kupoteza wakati kwa mambo na desturi zisizohusika. 5Mkiingia katika nyumba yoyote, kwanza wasalimuni hivi: ‘Amani#10:5 Amani: Kwa desturi za Kiyahudi hiyo ilikuwa namna ya kawaida ya kusalimu. iwe katika nyumba hii!’ 6Kama akiwako mpenda amani, amani yenu itakaa naye, la sivyo, itawarudieni. 7Kaeni katika nyumba hiyo mkila na kunywa wanavyowapeni, maana mfanyakazi anastahili mshahara wake. Msiende mara nyumba hii mara nyumba ile. 8Kama mkifika mji fulani na watu wakiwakaribisha, kuleni wanavyowapeni. 9Ponyeni wagonjwa walioko huko, waambieni watu: ‘Ufalme wa Mungu umekaribia kwenu.’ 10Lakini mkiingia katika mji wowote, wasipowakaribisheni, tokeni; nanyi mpitapo katika barabara zao semeni: 11‘Hata mavumbi ya mji wenu yaliyoshikamana na miguu yetu tunayapangusa dhidi yenu. Lakini, jueni kwamba ufalme wa Mungu umekaribia.’ 12Hakika nawaambieni, siku ile mji huo utapata adhabu kubwa kuliko ile ya watu wa Sodoma.

Ole kwa miji isiyotubu

(Mat 11:20-24)

13“Ole wako Korazini! Ole wako Bethsaida!#10:13 Korazini …Bethsaida: Kama vile Kafernaumu (aya 15) inahusu watu wa Galilaya ambao Yesu alikuwa amewahubiria ujumbe wake. Tiro na Sidoni ilikuwa miji ya watu wasio Wayahudi, kaskazini mwa Galilaya (Isa 23; Eze 26—28; Amo 1:9-10). “Mavazi ya gunia na majivu”: alama au ishara ya masikitiko na kutubu. Maana, kama miujiza iliyofanyika kwenu ingalifanyika kule Tiro na Sidoni, watu wake wangalikwisha vaa mavazi ya gunia kitambo na kukaa katika majivu kutubu. 14Hata hivyo, siku ya hukumu nyinyi mtapata adhabu kubwa kuliko ya Tiro na Sidoni. 15Na wewe Kafarnaumu, je, utajikweza mpaka mbinguni? Utaporomoshwa mpaka kuzimu.”

16Halafu akasema, “Anayewasikiliza nyinyi, ananisikiliza mimi; na anayekataa kuwapokea nyinyi, anakataa kunipokea mimi. Na yeyote anayekataa kunipokea, anakataa kumpokea yule aliyenituma.”

Wale sabini na wawili wanarudi

17Baadaye, wale sabini na wawili walirudi wamejaa furaha, wakisema, “Bwana, hata pepo wametutii tulipolitaja jina lako.” 18Yeye akawaambia, “Nilimwona Shetani jinsi alivyokuwa anaporomoka kama umeme kutoka mbinguni. 19Naam, nimewapeni uwezo wa kukanyaga nyoka na nge,#10:19 Nge: Aina ya mdudu mwenye miguu minane aliye na sumu mkiani mwake. Sumu yake yaweza kusababisha maumivu makali au hata kifo. na uwezo juu ya nguvu zote za yule adui; hakuna chochote kitakachowadhuru. 20Hata hivyo, msifurahi kwa sababu pepo wamewatii, bali furahini kwa sababu majina yenu yameandikwa mbinguni.”

Furaha ya Yesu

(Mat 11:25-27; 13:16-17)

21Saa ileile, Yesu akafurahi kwa uwezo wa Roho Mtakatifu,#10:21 Kwa …Roho Mtakatifu: Baadhi ya hati za mkono zina: kwa Roho na nyingine: kwa roho yake. akasema, “Nakushukuru ee Baba, Bwana wa mbingu na dunia, maana umewaficha wenye hekima na wenye elimu mambo haya, ukawafumbulia wadogo. Naam, Baba, ndivyo ilivyokupendeza.”

22Kisha akasema, “Baba yangu amenikabidhi vitu vyote. Hakuna amjuaye Mwana ila Baba, wala amjuaye Baba ila Mwana, na yeyote yule ambaye Mwana atapenda kumfunulia.”

23Halafu akawaelekea wafuasi wake akawaambia, “Heri wanaoona yale mnayoyaona nyinyi! 24Hakika, manabii na wafalme walitamani kuona yale mnayoyaona nyinyi wasiyaone, na kusikia yale mnayoyasikia wasiyasikie.”

Mfano wa Msamaria mwema

25Baadaye mwanasheria mmoja alisimama, akamwuliza akitaka kumtega, “Mwalimu, nifanye nini ili nipate uhai wa milele?” 26Yeye akamwuliza, “Imeandikwa nini katika sheria? Unaelewaje?” 27Akamjibu, “Mpende Bwana Mungu wako kwa moyo wako wote, kwa roho yako yote, kwa nguvu zako zote na kwa akili yako yote. Na, mpende jirani yako kama unavyojipenda mwenyewe.” 28Yesu akamwambia, “Vema! Fanya hivyo, nawe utaishi.”

29Lakini yeye akitaka kujihakikishia kuwa mwema akamwuliza Yesu, “Na jirani yangu ni nani?”#10:29 Kulingana na Lawi 19:18,33-34 wajibu wa kumpenda jirani ulikuwa kwa wote: Waisraeli na wasio Waisraeli ambao walikuwa na makazi yao nchini Israeli. 30Yesu akamjibu, “Mtu mmoja alikuwa anashuka kutoka Yerusalemu kwenda Yeriko. Alipokuwa njiani, alivamiwa na majambazi, wakamnyang'anya mali yake na kumpiga, wakamwacha amelala pale nusu mfu.#10:30 Safari ya Yerusalemu mpaka Yeriko ambapo ni kilomita 25 tu kutoka bonde la Yordani hupitia sehemu za jangwa ambazo zilikuwa maarufu kwa majambazi. Wasikilizaji wa Yesu walifahamu kwamba huyo msafiri alikuwa Myahudi (taz aya ya 33). 31Kumbe, kuhani mmoja akawa anapita barabara ileile, akamwona, akapita kando. 32Hali kadhalika na Mlawi mmoja, alipofika mahali hapo akamwona, akapita kando. 33Lakini Msamaria mmoja aliyekuwa anasafiri, alifika pale yule mtu alipokuwa, naye alipomwona, alimwonea huruma.#10:33 Kwa namna ya kukebehi Yesu anatoa kisa cha Msamaria (taz 9:52-53) juu ya wale ambao Wayahudi walifikiri ni wageni, na hata watu wasiomjua Mungu, kama mfano wa kutimiza amri ya kumpenda jirani. Anayetimiza sheria ya upendo kwa jirani sio yule kuhani wala yule Mlawi ila Msamaria mmoja ambaye haikutazamiwa kwamba angemtendea wema Myahudi. 34Akamwendea, akamtibu majeraha yake kwa kumtia mafuta na divai#10:34 Mafuta na divai: Hiyo ilikuwa njia ya kawaida ya kupunguza maumivu. na kuyafunga; halafu akampandisha juu ya punda wake, akampeleka katika nyumba moja ya wageni akamwuguza. 35Kesho yake akatoa fedha dinari mbili#10:35 Fedha dinari mbili: Hizo zilikuwa na thamani ya mshahara wa siku mbili wa kibarua. akampa yule mwenye nyumba, akamwambia, ‘Mwuguze mtu huyu; na chochote utakachotumia zaidi, nitakulipa nitakaporudi.’” 36Kisha Yesu akauliza, “Kati ya hao watatu, ni yupi aliyeonesha kuwa jirani yake yule aliyevamiwa na majambazi?” 37Yule mwalimu wa sheria akamjibu, “Ni yule aliyemwonea huruma.” Yesu akamwambia, “Nenda ukafanye vivyo hivyo.”

Yesu nyumbani kwa Martha na Maria

38Walipokuwa safarini, waliingia katika kijiji kimoja na mwanamke mmoja aitwaye Martha, akamkaribisha nyumbani kwake. 39Martha alikuwa na dada yake aitwaye Maria; huyu aliketi karibu na Yesu akisikiliza mafundisho yake. 40Lakini Martha alikuwa anashughulika na mambo mengi. Basi, akamwendea Yesu, akamwambia, “Bwana, hivi hujali kwamba dada yangu ameniacha nishughulike peke yangu? Mwambie basi, anisaidie.” 41Lakini Bwana akamjibu, “Martha, Martha, unahangaika na kusumbuka kwa mambo mengi. 42Kitu kimoja tu ni muhimu. Maria amechagua kitu bora zaidi ambacho hakuna mtu atakayemnyang'anya.”

Iliyochaguliwa sasa

Luka 10: BHNTLK

Kuonyesha

Shirikisha

Nakili