Yohan 15

Yesu Yɛ onu wain yɛ lihuʋi le ɔtutɔ lɔ

1“Mɛ menu wain yɛ lihuʋi le ɔtutɔ lɔ, lɛ Mɔka Aya yɛ onu wain ɔnyrɔ nɔ onetee e. 2Izɛɛkple liya kakaa ní mɛ mɛ̀ gi liʋíyo e, lɛ izeebu aya la gi izeeyo e su, tɔ aya la mɛ adra tɔ eyo asanɔ. 3Kɔkpɛ eboa la gi masi mlɔ loso e, mlɔ isu idra kooko. 4Mlakɔ isu amìnì nì mɛ tɔ mɛ fɛ mímìnì nì mlɔ. Liseya ɛtɔtɔ lítratani kuyo ní lɛ tutɔ isu wla mɛ ɛ; liatani kuyo xe limìnì nì ose lo o. Nite ke mlatrátani esebi kuyo xe mlámìnì nì mɛ ɛ.

5“Mɛ menu wain yɛ lihuʋi le, lɛ mlɔ mlenu aya la a. Ɔniliɛ gi amìnì nì mɛ ɛ, xe Mɛ kyɛ mamìnì nì yɛ ɛ, aayo esebi glegle; lɛ ese linu si mláma kididɔ kubitɛ mɛ ɛ, xe máma ní mlɔ mɛ ɛ. 6Ɔniliɛ gi ɔ́mìnì nì mɛ ɛ, ɔlɛ ŋwisi liya gi bɛtsa a, xe bekɔ ɛŋwia eʋe e, xe liyurɔ kinɛ ɛ. Biakpɛ aya la klɔ likpɔ kɔ bɛŋwia la ɛkpɛ ní kifu mɛ kɔ ɛkani i. 7Xe mlakpasi ní mɛ mɛ̀ ɛ, gi mɛ eboe la alɛ ní mlɔ mɛ ɛ, kɔlɔ mlaaʋi kidɔ kakaa gi mlɛpɛ́ ɛ, lɛ biaki mlɔ kɛ ɛ. 8Xegi mleyo esebi glegle e, liaki si banima biaki Mɔka Aya kubùbù lɛ liabasɛ kyɛ si mlenu mɛ badɔkpasi i.

9“Malɔ mlɔ kiliɛ gi Kaka Aya alɔ mɛ ɛ; lɛ loso mleze mɛ kulɔlɔɔ mɛ ɛ. 10Xe mlɛga mɛ isã nɛ aʋa ɛ, mlaaze ní mɛ kulɔlɔɔ mɛ, ŋwisi kiliɛ gi maga ní Mɔka Aya yɛ isã nɛ aʋa a, xe malɛ ní yɛ kulɔlɔɔ mɛ ɛ.

11“Masi mlɔ liboe lɛ ya tɔ isami nɛ elu gi ilɛ ní mɛ mɛ̀ ɛ, iaze ní mlɔ mɛ̀, atɔ isami nɛ iayi mlo. 12Mɛ ɔsã nɔ lɔ ya si; mlalɔ mlɔ ahanuglɔ ba, kiliɛ gi malɔ mlɔ ɛ. 13Kulɔlɔ sanɔ gi ɔnɔ aaki yɛ baʋia nɛ ba kunu si, aakɔ̀ yɛ ligbã́ nɛ ɔkɔ ní ba litukpo. 14Lɛ mlɔ mlenu mɛ baʋia ba a, xe mlɛbitɛ ní mɛ ɔsã nɔ aʋa ɛ. 15Máʋixwa mlɔ si besumubi tɔ ɔ, lɛ ese linu si osumubi óʋite kidiliɛ gi yɛ ɔkaɛ ɛɛbitɛ ɛ. Boŋu i, maxwa mlɔ si baʋia, lɛ ese linu si kidɔ kakaa gi menu adɔ ni Mɔka Aya klɔ ɛ, kɛ masi mlɔ. 16Aní mlɔ mlɛkya mɛ ɛ; Mɛ makya mlɔ lɛ makpɛ mlɔ si mlazeeyo esebi glegle, esebi ala klɔ gi aaze tsini kanɔmɛ anɔmɛ ɛ. Atɔ Kaka Aya aaki mlɔ kidɔ kakaa gi mlaaʋi ye ní mɛ linyi ne me e. 17Liboe lɛ ya ɔsã maki mlɔ: Mlalɔ mlɔ ahanuglɔ ba.

Banima ní kelea mɛ bɛtrɔ badɔkpasi ba ahwafi

18“Xe kelea mɛ banima bɛtrɔ mlɔ ahwafi i, mlaplɛ aŋu si, betu mɛ ahwafi kutrɔ. 19Xe mlenu kelea mɛ banɛ ɛ, kelea mɛ kialɔ mlɔ ŋwisi ka ɔtutɔ banɛ kinɛ ɛ. Pɔ̀ makya mlɔ ebu ní kelea mɛ ɛ, lɛ mlénu kelea mɛ banɛ tɔ ɔ; lɛ loso kelea mɛ banima bɛtrɔ mlɔ ahwafi i. 20Mlaplɛ aŋu liboe lɛ gi masi mlɔ aʋa a si, ‘Osumubi ɔtɔtɔ óʋikeme sani yɛ ɔkaɛ ɛ.’ Xe bɛyɔ kedu ní mɛ su i, biayɔ kedu ní mlɔ fɛ su; xe bɛga ní mɛ bidɔ basɛbasɛ ʋɛ aʋa ɛ, biaga ni mlɔ binɛ mɛ fɛ aʋa. 21Biayɔ kedua lia ya ní mlɔ su kɔkpɛ mɛ linyi ne loso; agi béte ɔniliɛ gi akpɛ mɛ ɛ. 22Nya bátraŋa lipɔ ní ba kuzimizi yo me e, xe mába egu kunugu yo aki ba a, pɔ̀ abla ɛ, liboeboe líma ba awla gi biakɔŋwlɛ ba kuzimizi yo litukpo o. 23Ɔniliɛ gi atrɔ mɛ ahwafi i, atrɔ Mɔka Aya fɛ ahwafi. 24Nya bátrabu ba lipɔ ɛkpɛ ba eboe zimizi na a, xe mábitɛ kidiliɛ gi ɔnɔnɔ ɔ́bitɛ ni ba kusi oʋídi i; Pɔ̀ abla ɛ, bɛmɔ enugutseboe a la gi mabitɛ ɛ, pɔ̀ fɛ ɛ, bɛtrɔ mɛ ni Mɔka Aya pɔ́ ahwafi. 25Lɛ ya kɔ ɛ, lilɛ si liba lɛ mɛ atɔ liboe lɛ gi bɛŋwlimi kpɛ ní ba ɔsã nɔ mɛ ɛ, liba lɛ mɛ si, ‘Liboeboe mobamoba ɛ, bɛtrɔ mɛ ahwafi.’

26“Xegi Ɔpɔnɔpɔnɔɛ gi maatsisi mlɔ dɔni Kaka Aya klɔ aba ɛ, Yɛ adra mɛ su. Ɔfuɛfuɛ nɔ gi aabu anukwarɛɛ kubasɛ ní Aya su u, gi ɛdɔ ní Kaka Aya klɔ ɛ. 27Lɛ mlɔ fɛ ɛ, mlaadra mɛ su ki banima, lɛ ese linu si mleeze ní mɛ su dɔni okpese klɔ ke.

Iliyochaguliwa sasa

Yohan 15: avn

Kuonyesha

Shirikisha

Nakili