Yohan 16
16
1“Masi mlɔ lɛ ya, tɔ mlakíyurɔ mlɔ kuziŋaa. 2Biakpikpini mlɔ ní Yudanɛ ma itsaklɔ; sugba ɛ, lipoe le litrába gi ɔnɔ kakaa gi aaye mlo e, aabu si gi yɛ abitɛ nite e, yɛ awa Aya lisumuxwɛ. 3Banima biabitɛ eboa la yurɔ mlɔ lɛ ese linu si béte Kaka Aya loo mɛ ɛ. 4Pɔ̀ masi mlɔ lɛ ya, tɔ xe lipoe le lina kí ba si babitɛ eboa la ya ɛ, mlaaplɛ aŋu si masi mlɔ. Mási mlɔ akpɛ ɔtɔ lɛ ese linu si meze ní mlɔ su u.
Ɔfuɛfuɛ Dradra lɔ axwɛwawa la
5“Pɔ̀ abla ɛ, mɛɛsɛ ɛtrɛ ní ɔniliɛ gi yɛ akpɛ mɛ klɔ ɔ, pɔ̀ mlɔmɛ ɔtɔtɔ óʋi me si ‘nifɔ wɔɛtrɛ ɛ.’ 6Lɛ gi masi mlɔ eboa la ya ɛ, mlɔ ina nɛ iku kunyipu. 7Pɔ̀ mɛɛsi mlɔ anukwarɛɛ si, lipɛ kimlɔ si misɛ̀, lɛ ese linu si xe másɛ ɛ, Ɔpɔnɔpɔnɔɛ ɔ́traba mlɔ klɔ ɔ. Pɔ̀ xe masɛ ɛ, kɔlɔ maatsisi yɛ mlɔ klɔ. 8Xegi aba ɛ, aabu basɛ banima ní kelea mɛ si, bɛta kese xe gi bɛpani si béte liboe ni eboe zimizi, kude gyɔgyɔ, nì Aya litsi xwaxwa nɛ su u. 9Ní kuzimizi su i, bɛta kese lɛ ese linu si bázɛ mɛ aʋa aŋa a; 10lɛ ní ba kude gyɔgyɔ aʋa mezemeze su i, bɛta kese lɛ ese linu si Mɛɛtrɛ ní Kakaa Aya klɔ, lɛ mlatrámɔ mɛ tɔ ɔ; 11lɛ ní litsixwaxwa lɛ su i, bɛta kese lɛ ese linu si bɛxwa litsi nì kelea mɛ ɔʋaŋaɛ kooko.
12“Eboe alɛ mɛ awla sanɔ gi maasi mlɔ ɛ, pɔ̀ asásrɛ ki mlɔ la ese kununu abla a. 13Xegi Ɔfuɛfuɛ dradra lɔ ɛɛba ɛ, gi yɛ izɛɛbasɛ anukwarɛɛ ɛ, aabu anukwarɛɛ basɛ ní Aya su, aagbani mlɔ tsini anukwarɛɛ mɛ. Ɔ́trapani ní yɛ ɔtutɔ yɛ kigagla mɛ ɛ, pɔ̀ aapani ní liboe lɛ gi enu su u, lɛ aasi mlɔ eboa la gi ɛtrába ɛ. 14Aaki si banima biaki mɛ kukɔkɔ, lɛ ese linu si aazi eboa la gi maapani i, aakɔ̀ la si mlɔ. 15Kidɔ kakaa gi kilɛ ní Mɔka Aya awla ɛ, mɛ kinɛ kinu; lɛ loso mapani si Ɔfuɛfuɛ nɔ aazi kidiliɛ gi kinu mɛ kinɛ ɛ, tɔ aabasɛ mlɔ kɛ.
Badɔkpasi ba asigaga la adzi isami
16“Ligɔ taʋɛ ko mlatrámɔ mɛ tɔ ɔ, lɛ ní lipoe sisami itɔ kede e, mlamɔ mɛ.”
17Yɛ badɔkpasi ba batɔ beʋi ní batsali kusi si, “Kitɛ liboe lɛ ya ese e? ‘Ɛɛsi blɔ si ligɔ taʋɛ kútramɔ yɛ tɔ ɔ, lɛ lipoe sisami itɔ kede e, kwiamɔ yɛ ɛ;’ lɛ apani kyɛ si, ‘Lɛ ese linu si mɛɛtrɛ ní Kaka Aya klɔ ɔ.’ ” 18“Bɛtrɛ lɛ aʋa zeeʋi si, ‘Ligɔ taʋɛ ese si kitɛ ɛ’? Kúnu liboe lɛ gi ɛɛpani ese e!”
19Yesu etè si bɛɛpɛ si beeʋi ye liboe lɛ ya, loso asi ba si, “Mapani si, ‘Ligɔ taʋɛ ko mlátramɔ mɛ tɔ ɔ, lɛ lipoe sisami itɔ kede e, mlamɔ mɛ’. Liboe lɛ ya mleeʋi ní mlɔ atsali kusi na a? 20Mɛɛsi mlɔ anukwarɛɛ: mlɛtrabemi lɛ mlawa awowoe la, pɔ̀ kelea mɛ banima biamɔ isami; mlɔ kɔ ɛ, mlaaze ni asigaga mɛ, pɔ̀ mlɔ asigaga la aadzi isami i. 21Xe ɔmɛdzɛ si yipɔ ɛ, izeeze ní asigaga mɛ lɛ ese linu si yɛ lipɔ̀poe le lina, pɔ̀ xe apɔ obi ye e, izeedze yɛ kupepeo, lɛ ese linu si isami iiku ye si yɛ apɔ obi akpɛ ní kelea mɛ ɛ. 22Nite lilɛ ki mlɔ: abla ɛ, mlalɛ ní asigaga mɛ, pɔ̀ maamɔ mlɔ dzɛ ɛ, lɛ mlɔ ina nɛ iayi ni isami, isami i nɛ klɔ elu gi ɔnɔnɔ ɔ́tratani kuzɛ ní mlɔ awla ɛ.
23“Xe liwe lɛ klɔ lina ɛ, mlátraʋi me kididɔ tɔ ɔ. Mɛɛsi mlɔ anukwarɛɛ: Kaka Aya aaki mlɔ kidɔ kakaa gi mlaʋi ye ní mɛ linyi ne me e. 24Gakɔna ni abla ɛ, mleʋíʋi kididɔ ní mɛ linyi ne me e, mleʋi tɔ mlaazɛ, atɔ mlɔ isami nɛ iana.
25“Mapani eboa la ya aki mlɔ ní abee ʋa mɛ, Pɔ̀ lipoe le litrába gi mátrapani ni abee ʋa mɛ tɔ ɔ, pɔ̀ lipoe le litrába a, gi maadra Kaka Aya su si mlɔ ɔ. 26Xe liwe lɛ klɔ lina ɛ, mlaaʋi ye ní mɛ linyi ne me; lɛ maʋípani si maaʋi Kaka Aya ní mlɔ onu u. 27lɛ ese linu si Kaka Aya ɔtutɔ lɔ alɔ mlɔ ɔ. Alɔ mlɔ lɛ ese linu si mlɛlɔ mɛ lɛ mlɛziŋa si madɔ Aya kɔ ɔ. 28Madɔ Kaka Aya klɔ, xe maba kelea mɛ ɛ; lɛ abla ɛ, mɛɛsɛ ní kelea mɛ medzi itrɛ ní yɛ klɔ.”
29Lɛ yɛ badɔkpasi ba bɛsi yɛ si, “Ableke wɔɛdra wɔ eboe la mɛ, gi wɔʋípani ní abee ʋa me tɔ ɔ. 30Kwite ablɔ kɔ si wote liboe kakaa, wɔ́zia ɔnɔnɔ si oʋi wo beʋiʋi i. Lɛ ya liki si kwiziŋa si wɔnyadɔ Aya kɔ ɔ.”
31Lɛ Yesu eʋi ba si, “Mlɛziŋa ablɔ kɔ na a? 32Lipoe le litrába, lɛ lina kooko o, gi mlɔ pɔ́ mlɛtrahle, mlɔ mɛ ɔnɔ kakaa aatrɛ ní yɛ ɔtutɔ yɛ kepea mɛ, lɛ mɛ tètè ko maagɔ ɔ. Pɔ̀ aní mɛ tètè maagɔ ɔ, lɛ ese linu si Kaka Aya ɔlɛ ni mɛ ɛ. 33Masi mlɔ eboa la ya tɔ mlamɔ kusuyɔ ní likpɔ kpɛkpɛ mɛ ni mɛ. Kelea mɛ kiaki si mlaamɔ kini. Pɔ̀ mlalɛɛ gaglaa! Maŋa kelea mɛ kinie aʋa!”
Iliyochaguliwa sasa
Yohan 16: avn
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
