Yohan 14

Yesu akpɛ ɔna Yɛ badɔkpasi ba lipo

1Yesu asi yɛ badɔkpasi ba si, “Mlamɔ ɔna lɛ mlakípisa a, mlazi Aya aʋa aŋa, lɛ mlazi mɛ fɛ aʋa aŋa. 2Bagbáke ʋa besrɛ ní Mɔka kepea mɛ, lɛ mɛɛtrɛ tɔ mizɛɛlulɔ ozekɔ ɛki mlɔ. Mátrado le ɛsi mlɔ ɔ, xe gi líma lɛ mɛ ɛ. 3Lɛ xe malulɔ oze klɔ aki mlɔ pɔ́ ɛ, maadziba ɛgbani mlɔ tsinɔ ní mɛ isu ya su, tɔ mlɔ fɛ mlaaze niklɔ gi malɛ ɛ. 4Mlete kudeo liɔ gi kwitrɛ ní niklɔ gi mɛɛtrɛ ɛ.”

Yesu Yɛ onu Aya klɔ kudeo

5Toma asi Yesu si, “Ɔkaɛ, kúte niklɔ gi wɔɛtrɛ ɛ; lɛ kitɛ kwiate kudeo gi kwitrɛ ní klɔ na a?”

6Yesu ebu le onu si, “Mɛ menu kudeo, anukwarɛɛ, ani ligbã́ nɛ: ɔnɔnɔ ɔʋítrɛ ní Kaka Aya kɔ ɔ, xe ɔ́ga mɛ aʋa a. 7Lɛ asi ba si, Abla gi mlete me e, mlate Mɔka fɛ, lɛ dɔni abla kɔtsinɔ ɛ mlete ye lɛ mlɛ mɔ yɛ.” 8Filipo asi Yesu si, “Ɔkaɛ liboe lɛ gi liziã blɔ ko linu si basɛ blɔ Kakaa” 9Yesu ebu le onu si, “Lipoe gblamadzaɛtɔ lɛ ya gi malɛ ní mlɔ kusi i; lɛ mléte me a Filipo o? Ɔniliɛ gi amɔ mɛ ɛ, amɔ Kakaa Aya. Ege lɛ loso, wɔɛpani si, ‘Basɛ blɔ Kakaa Aya a’? 10Kɔ wɔ́ziŋa si malɛ ní Kakaa Aya mɛ ɛ, xe Kakaa kyɛ ɔlɛ ní mɛ mɛ̀ na a? Yesu asi yɛ badɔkpasi ba si, Eboa la gi mapani aki mlɔ ɛ ádɔ mɔ kɔ ɔ.” Kakaa, gi yɛ ɔlɛ ní mɛ mɛ̀ ɛ, yɛ ɛɛwa yɛ ɔtutɔ yɛ axwɛ na. 11Zi mɛ aʋa ŋa xe mapani si malɛ ní Kakaa mɛ ɛ, lɛ Kakaa fɛ ɔlɛ ní mɛ mɛ̀ ɛ, xe líma te fɛ ɛ, zi lɛ aʋa ŋa kɔkpɛ axwɛ ana gi mɛɛwa loso o. 12Mɛɛsi mlɔ ní anukwarɛɛ mɛ si; ɔniliɛ gi azɛ mɛ aʋa aŋa ɛ, aabitɛ kidiliɛ gi mabitɛ ɛ, Ee, aabitɛ glegle sanɔ, lɛ ese linu si mɛɛtrɛ ní Kaka Aya klɔ. 13Lɛ maabitɛ kidɔ kakaa gi mlaʋi ní mɛ linyi ne me e, tɔ Obi ye aakpɛ kukɔkɔ ní Kaka Aya su. 14Xe mleʋi me kidɔ kakaa ni mɛ linyi ne me e, Maabitɛ kɛ.

Kakaplɛ ki Ɔfuɛfuɛ Dradra lɔ kukɔkɔ

15Xe mlɛlɔ mɛ ɛ, mlaabitɛ ni mɛ isã nɛ aʋa. 16Lɛ maaʋi Kaka, lɛ aaki mlɔ Ɔpɔnɔpɔnɔ dzedze e, gi aaze ní mlɔ su kɔtsinɔ kanɔmɛ anɔmɛ ɛ. 17Yɛ onu Ɔfuɛfuɛ nɔ gi izeebu anukwarɛɛ basɛ ní Aya su u. Kelea mɛ katrátani yɛ kuzɛ ɛ, lɛ ese linu si katrátani yɛ kumɔ loo yɛ kute e. Pɔ̀ mlete ye, lɛ ese linu si ɔlɛ nì mlɔ lɛ ɔkpasi ní mlɔ mɛ ɛ. 18Xegi masɛ ɛ, mátrayurɔ mlɔ ɖekyavi i; Maadziba mlɔ klɔ. 19Ligɔ taʋɛ kelea mɛ kátramɔ mɛ tɔ ɔ, pɔ̀ mlɔ kɔ mlamɔ mɛ; lɛ xegi medzi ligbã́ ɛ, mlɔ fɛ mlaaze ligbã́. 20Xe liwe lɛ klɔ lina ɛ, mlaate si malɛ ligbã́ ní Mɔka mɛ, lɛ mlalɛ ligbã́ ní mɛ mɛ̀ ɛ, kiliɛ ɖii gi malɛ ligbã́ ní mlɔ mɛ ɛ. 21“Banama gi bɛzi mɛ isã nɛ ɛ, xe bɛbitɛ ní lɛ aʋa ɛ, ba benu banama gi bɛlɔ mɛ ɛ. Mɔka aalɔ banama gi bɛlɔ mɛ ɛ. Mɛ fɛ maalɔ ba, lɛ maabu isu basɛ ba a.”

22Lɛ Yuda, pɔ̀ aní Yuda Iskariot, apani si, “Ɔkaɛ, kitɛ liaze si wɔabu isu basɛ blɔ pɔ̀ aní kelea banima na a?”

23Yesu ebu le onu aki yɛ si, “Ɔniliɛ gi alɔ mɛ ɛ, aazi mɛ bidɔbasɛbasɛ ʋɛ. Mɔka Aya aalɔ yɛ, lɛ Mɛ ni Mɔka kwiaba yɛ klɔ ɔ, lɛ kwiaze nì yɛ ɛ. 24Pɔ̀ ɔniliɛ gi ɔ́lɔ mɛ ɛ, ɔ́trazi mɛ bidɔbasɛbasɛ ʋɛ ɛ. Lɛ bidɔbasɛbasɛ bɛ klɔ ɔ gi mlenu i, aní mɛ ɔtutɔ binɛ ɛ, pɔ̀ bidɔ ní Kakaa Aya gi yɛ akpɛ mɛ ɛ kɔ.

25“Masi mlɔ la ya gi malɛ ni mlɔ su i. 26Pɔ̀ Ɔpɔnɔpɔnɔɛ, Ɔfuɛfuɛ Dradra lɔ, gi Kakaa Aya aatsisi ní mɛ linyi ne me e, aabasɛ mlɔ kidɔ kakaa, lɛ aaki mlaaplɛ aŋu ní eboa la pɔ́ gi masi mlɔ ɛ aʋa a. 27Kusuyɔ mɛ yurɔ ɛki mlɔ; linu mɛ ɔtutɔ mɛ kusuyɔ gi maki mlɔ ɛ. Máki mlɔ kɔ kiliɛ gi kelea mɛ kizɛɛki mlɔ ɔ. Mlamɔ ɔna tɔ mlakípisa; mlakíse lifu u. 28Mlenu gi masi mlɔ si, ‘Mɛɛsɛ ní mlɔsu u, pɔ̀ maadziba mlɔ klɔ ɔ.’ Xe mlɛlɔ mɛ ɛ, isami iaku mlo si mɛɛtrɛ ní Kakaa Aya klɔ; lɛ ese linu si yɛ ekeme a sani mɛ. 29Masi mlɔ lɛ ya abla, xe ableke liaba lɛ mɛ ɛ, tɔ xe liba lɛ mɛ ɛ, mlaazi lɛ aʋa ŋa. 30Mátratani kupani kimlɔ lipoe gblamadza tɔ ɔ, lɛ ese linu si kelea ya mɛ ɔʋaŋaɛ atrába. Ɔ́mɔ kigagla ní mɛ aʋa a, 31pɔ̀ lilɛ si kelea banima betè si malɔ Mɔka Aya; lɛ loso mizɛɛbitɛ liboe kakaa gi asi mɛ ɛ. “Mlayɔ tɔ kusɛ niya.”

Iliyochaguliwa sasa

Yohan 14: avn

Kuonyesha

Shirikisha

Nakili