Axwɛ 4

Bevu Petro Ni Yohanes lɛ bɛmani ba ní Yudanɛ ma Kutsatsa ʋidi yo Aŋu mɛ

1Lɛ gi Petro ni Yohanes bɛlɛɛ zegu kunugu yo ɛki banima ɛ, kusumu yo baka ba, lisɔligba lɛ bepepe ba ɔkaɛ, ni Zadukianɛ ma bɛba ɛtsani ba. 2Isu iyeʋi ba koŋu, lɛ ese linu si banɔkpɛkpɛ tiaʋa ba ɛ, bɛzɛɛbasɛ banima si Yesu ayɔ adɔ ni bekpo ʋa mɛ, gi libasɛ si bekpo ʋa ɛ biayɔ dzi ligbã́. 3Lɛ loso e, bevu ba lɛ bɛkpɛ ba ligba kɔzɛna ni kele titia mɛ, gi kelea keeblo lɛ loso o. 4Pɔ̀ banɔ glegle gi benu liboe le e, bɛzi ŋa; lɛ benyime ba kisrɛsrɛ mɛ kiaze banɔ akpe tietsu u.

5Liba lɛ mɛ si gi kelea kɛti i, Yudanɛ baka ba; banɔtsitsi ba ni ɔsã nɔ badɔbasɛ ba bɛkpɛ likpɔ ní Yerusalem. 6Ba ni kusumu yo ɔka ʋidi ye Hana ni Kayafa, Yohanes, Aleksandro ani banɔ gɔgɔa ba gi bɛdɔ kusumu yo ɔka ʋidi ye yɛ oku no me e, ba petee bɛba ɛtsa. 7Bɛmani banɔkpɛkpɛ ba lɛ bɛki si balɛɛ ní ba aŋu mɛ lɛ beʋi si, “Kitɛ mɛ mlɛɛbitɛ nite e? Kigagla woli kiliɛ ní mlɔ awla loo nyaŋwɛ linyi me mlɛwa axwɛ a la ya a?”

8Lɛ Petro ayɔ ɔlɛɛ ní Aya yɛ Ɔfuɛfuɛ nɔ kigaglaɛ mɛ lɛ ebu ba onu si, “Blɔ baka ba ni banɔtsitsi ba, 9Xe mleeʋi blo si kuki akɔnta omono o, ní kidɔ gbã ɛ liɛ gi kwibitɛ ki bafa liɛ ɛ, ni kiliɛ gi kwiyɔni yɛ su i, 10kɔlɔ mlɔ ni Israelbanɛ ma petee mlete si, onyime liɛ ya gi ɔlɛɛ ni mlɔ aŋu mɛ ɛ, Yesu Kristo gi ádɔ Nazaret i, gi mleku ní ose lo su u, xe Aya ayɔni yɛ dɔni bekpo ʋa mɛ ɛ, yɛ linyi ne me bɛyɔ ni yɛ.

11“Yesu yɛ su Aya keplekpaa kɛpani si, ‘Likla ɛnɛ gi mlɔ bagbawa ba mlɛyurɔ ɛplɛ ɛ, lɛ lidzi limwa nɛ aʋa likla nɛ ɛ.’ 12Yɛ mɛ ko biamɔ kubúbú ní kelea petee me, linyi tɔtɔ líma gi Aya akɔ ɔ, gi liabu blɔ agbã́ na a.”

13Gi betsixwa ba bɛmɔ kiliɛ gi ɔna eze ní Petro ni Yohanes lipo e, xe benu si banɔ pluplu ko beze e, gi bádzɛ suku ɔtɔtɔ ɛ, ba inugu itse. Lɛ bɛmɔ egyesi si beze ni Yesu kude e. 14Lɛ liboeboe líze gi biapani i, lɛ ese linu si bɛmɔ onyimee gi bɛyɔnɔ ɛ, gi ɔlɛɛ ní Petro ni Yohanes su i. 15Lɛ bɛsi ba si, bedo ní Kutsatsaa mɛ, lɛ bekpese eboe la kugyodi ní batsali kusi i. 16Lɛ beʋi si ege kwiabitɛ benyime ba ya a? Ɔnɔ kakaa ní Yerusalem ete si linugutseboe ʋidi lɛ ya gi liba lɛ mɛ gani ba aʋa a, lɛ kútratani lɛ kunada a. 17Pɔ̀ tɔ kutsi kude tɔ likíhle eku ní banima mɛ ɛ, mlaki tɔ kukpɛ ɔsã aki banɔ ba ya tɔ bakígu kunugu ikí ɔnɔnɔ ní Yesu linyi ne me tɔ ɔ.

18Lɛ bedzini ba ɛxwa ɛmanɔ ɔ, lɛ bɛkpɛ ɔsã ɛki ba si, bakípani loo basɛ bidɔ liwewe ní Yesu linyi ne me tɔ ɔ. 19Pɔ̀ Petro ni Yohanes bebu le onu ɛki ba si, “Mlɔ tutɔ mlaxwa litsii lɛ klɔ xegi lipɛ ní Aya aŋu mɛ ɛ si, kunu mlɔ igbè loo tɔ kunu Aya yɛ igbè. 20Lɛ loso e, kútratani kunugu yo kumɔni ní kidiliɛ gi blɔ ɔtutɔ kwimɔ ɔ, xe kwinu u su.” 21Lɛ kutsatsaa baka ba bɛká ba aŋu mɛ gaglaa xe bɛyurɔ ba ɛ. Bɛmɔ si líma si behe kutu aki ba a, lɛ ese linu si banima petee bɛzɛkpɔ̀ Aya ní kidiliɛ gi kiba kɛ mɛ su u. 22Onyime liɛ gi yɛ bɛyɔnɔ ɛ, azɛ asani agɔ avitene.

Baʋaziŋa ba bɛxwa Aya lɛ beʋi si ɔki ba kigagla

23Gi bɛ yurɔ Petro ni Yohanes ko e, bedzitrɛ ní ɔha lɔ klɔ lɛ bɛsi ba a liboe lɛ gi kusumu yo baka ba ni banɔtsitsi ba bɛsi ba ɛ. 24Agi baʋaziŋa ba benu liboe le e, ba petee bɛkpɛ likpɔ ni ole tole lɛ bɛxwa Aya si, “Ɔka wɔ wɔbitɛ lifunu ne, kelea, axu la ni kidɔ kakaa gi kikpasi ní bɛ mɛ ɛ! 25Gani wɔ Ɔfuɛfuɛ nɔ mɛ ɛ, wɔpani gani blɔ ɔkatsitsie Dawid aʋa gi onu wɔ ɔnɔsumu i, gi apani si, ‘Ege lɛ loso banama gi bénu Yudanɛ ma ɛ, bɛmɔ kusuyeʋi, ege lɛ loso banima bizɛbitɛ banyánya pluplu ʋa a?#4:25 Aya Ɔfuɛfuɛ, Dawid yɛ Idzi nɛ Psalms. 26Kelea mɛ bekusi ba bɛbla ɛplɛ, lɛ baʋaŋa ba bɛkpɛ likpɔ si bɛta kigũ ni Ɔkaɛ ni yɛ Kristo ye.’ 27Lilɛ lɛ mɛ si Herodes ni Pontio Pilato bɛtsa ní ɔma ʋidi ɔ lɔ ya mɛ ni banama gi bénu Yudanɛ ɛ ani Israelbanɛ ma ní Yesu su, wɔ ɔnɔsumu dradra yɛ gi yɛ wɔkya ɛ. 28Bɛkpɛ likpɔ tɔ biabitɛ kidɔ kakaa gi gani wɔ kigaglaɛ ni kupɛ́pɛɔ onu i, wɔtrɔ si kiba kɛ mɛ ɛ. 29Lɛ abla ɛ, Ɔka vu aŋu ní ba adaa la gi bɛfia su u, tɔ ki tɔ blɔ wɔ besumubi ba kupani wɔ liboe le ni aŋu mɛ gagla. 30Ki banima bamɔ wɔ kigaglaɛ tɔ ki tɔ banyanya ba bayɔ, kitɔ kubitɛ enugutseboe ni eboe gi aʋíba la mɛ edi i, gani wɔ Ɔnɔ kpɛkpɛ dradra yɛ Yesu linyi ne me.”

31Gi bɛxwa Aya pɔ ɛ, niklɔ gi bɛtsa ɛ, niklɔ esugu. Aya yɛ Ɔfuɛfuɛ nɔ ɛba ba petee aʋa, lɛ bekpese Aya liboe le kudo ni aŋu mɛ gagla a.

Baʋaziŋa ba bɛlɛ ba bidɔmɔmɔ ʋɛ

32Banama gi bɛziŋa ɛ, ba likpɔkpɛkpɛ lɛ lize ni kugyodi tule ani ɔna tole. Ɔnɔnɔ ɔ́pani si yɛ bidɔmɔmɔ ʋɛ ɛ, yɛ tete binɛ, pɔ̀ ba petee bɛlɛ kidɔ kakaa gi bɛmɔ ɛ, ni ba ahanuglɔ ba. 33Lɛ ni kigagla glegle e, banɔkpɛkpɛ ba beze lɛ aʋa bɛzɛŋa katsalia ní Ɔkaɛ Yesu kuyɔyɔ su, lɛ Aya apɛ lipo me glegle aki ba petee. 34Ɔnɔnɔ óze ní ɔha lɔ mɛ ɛ, gi bidɔ biziã yɛ ɛ. Banama awla gi kuse loo kupé kwize e, bɛda ʋɛ lɛ bibɔɛ ʋɛ gi bɛmɔ ɛdɔni bɛ kudada mɛ ɛ, 35bɛkɔ ʋɛ kpɛ banɔkpɛkpɛ ba awla tɔ balɛ aki ba mɛ ɔnɔ kakaa kiliɛ gi aziã ɛ.

36Nite lize xe Yosef, gi onu Lewiɔnɛ ɛ, gi bɛpɔ ní Kipro e, xe banɔkpɛkpɛ ba bizɛxwa yɛ si Barnaba a, gi lɛ ese linu si i, “ɔniliɛ gi izɛkpɛ kifu ní banɔ mɛ ɛ,” 37ada yɛ kesea, lɛ akɔ kibɔɛ amanɔ ɔ xe akɔ kɛ akpɛ banɔkpɛkpɛ ba awla ɛ.

Iliyochaguliwa sasa

Axwɛ 4: avn

Kuonyesha

Shirikisha

Nakili