Mwanzo 49
49
Yakobo abariki wanawe
1Ndipo Yakobo akawaita wanawe na kusema: “Kusanyikeni, mnizunguke ili niweze kuwaambia yale yatakayowatokea siku zijazo.
2“Kusanyikeni na msikilize, enyi wana wa Yakobo;
msikilizeni baba yenu Israeli.
3“Reubeni, wewe ni mzaliwa wangu wa kwanza,
nguvu zangu, tunda la kwanza la nguvu zangu;
umepita kwa heshima, umepita kwa uwezo.
4Usiyezuiwa kama maji, basi hutakuwa mkuu tena,
kwa kuwa ulipanda kwenye kitanda cha baba yako,
kwenye kitanda changu na kukinajisi.
5“Simeoni na Lawi ni ndugu:
panga zao ni silaha za jeuri.
6Mimi na nisiingie katika baraza lao,
nami nisiunganike katika kusanyiko lao,
kwa kuwa wamewaua watu katika hasira yao,
na kukata mishipa ya miguu ya mafahali
kama walivyopenda.
7Hasira yao na ilaaniwe, kwa kuwa ni kali mno,
nayo ghadhabu yao ni ya ukatili!
Nitawatawanya katika Yakobo,
na kuwasambaza katika Israeli.
8“Yuda, ndugu zako watakusifu;
mkono wako utakuwa shingoni mwa adui zako;
wana wa baba yako watakusujudia.
9Ee Yuda, wewe ni mwana simba;
unarudi toka mawindoni, mwanangu.
Kama simba hunyemelea na kulala chini,
kama simba jike: nani athubutuye kumwamsha?
10Fimbo ya ufalme haitaondoka kwa Yuda,
wala fimbo ya mtawala kati ya miguu yake,
hadi aje yeye ambaye milki ni yake,
ambaye utii wa mataifa ni wake.
11Atamfunga punda wake katika mzabibu,
naye mwana-punda wake kwenye tawi lililo bora zaidi;
atafua mavazi yake katika divai,
majoho yake katika damu ya mizabibu.
12Macho yake yatakuwa mekundu kwa divai,
meno yake yatakuwa meupe kwa maziwa.
13“Zabuloni ataishi pwani ya bahari
na kuwa bandari za kuegesha meli;
mpaka wake utapanuka kuelekea Sidoni.
14“Isakari ni punda mwenye nguvu
ambaye amelala kati ya mizigo yake.
15Aonapo palivyo pazuri mahali pake pa kupumzika
na jinsi nchi yake inavyopendeza,
atainamisha bega lake kwenye mzigo
na kujitolea kwa ajili ya kazi ngumu.
16“Dani atahukumu watu wake kwa haki
kama mmoja wa makabila ya Israeli.
17Dani atakuwa nyoka kando ya barabara,
nyoka mwenye sumu kando ya njia,
yule aumaye visigino vya farasi
ili yule ampandaye aanguke chali.
18“Ee Mwenyezi Mungu, nautafuta wokovu wako.
19“Gadi atashambuliwa ghafula na kundi la washambuliaji,
lakini yeye atawageukia na kuwashinda kabisa.
20“Chakula cha Asheri kitakuwa kinono,
naye atatoa chakula kitamu kinachomfaa mfalme.
21“Naftali ni kulungu jike aliyeachiwa huru
azaaye watoto wazuri.
22“Yusufu ni mzabibu uzaao,
mzabibu uzaao ulio kando ya chemchemi,
ambao matawi yake hutanda ukutani.
23Kwa uchungu wapiga mshale walimshambulia,
wakampiga mshale kwa ukatili.
24Lakini upinde wake ulibaki imara,
mikono yake ikatiwa nguvu,
na mkono wa Mwenye Nguvu wa Yakobo,
kwa sababu ya Mchungaji, Mwamba wa Israeli,
25kwa sababu ya Mungu wa baba yako, anayekusaidia,
kwa sababu ya Mwenyezi#49:25 Mwenyezi hapa ina maana ya Shaddai kwa Kiebrania., yeye anayekubariki
kwa baraka za juu mbinguni,
baraka za kilindi kilichoko chini,
baraka za matitini na za tumbo la uzazi.
26Baraka za baba yako ni kubwa
kuliko baraka za milima ya kale,
nyingi kuliko vilima vya kale.
Baraka hizo zote na zikae juu ya kichwa cha Yusufu,
juu ya paji la yule mkuu miongoni mwa ndugu zake.
27“Benyamini ni mbwa-mwitu mwenye njaa kuu;
asubuhi hurarua mawindo yake,
jioni hugawa nyara.”
28Haya yote ndiyo makabila kumi na mawili ya Israeli, na hivi ndivyo baba yao alivyowaambia alipowabariki, akimpa kila mmoja baraka iliyomfaa.
Kifo cha Yakobo
29Ndipo alipowapa maelekezo haya: “Mimi niko karibu kukusanywa kwa watu wangu. Mnizike pamoja na baba zangu kwenye pango katika shamba la Efroni, Mhiti, 30pango lililoko katika shamba la Makpela, karibu na Mamre huko Kanaani, ambalo Ibrahimu alinunua liwe mahali pa kuzikia kutoka kwa Efroni, Mhiti, pamoja na shamba. 31Huko ndiko Ibrahimu na Sara mkewe walikozikwa, huko akazikwa Isaka na Rebeka mkewe, na huko nilimzika Lea. 32Shamba hilo na pango lililo ndani yake lilinunuliwa kutoka kwa Wahiti.”
33Baada ya Yakobo kumaliza kutoa maelekezo hayo kwa wanawe, akarudisha miguu yake kitandani, akapumua pumzi ya mwisho, na akakusanywa kwa watu wake.
Iliyochaguliwa sasa
Mwanzo 49: NENO
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Neno: Maandiko Matakatifu™ NMM™
Hakimiliki © 2018, 2024 na Biblica, Inc.
Imetumiwa kwa ruhusa.
Haki zote zimehifadhiwa duniani kote.
Kiswahili Contemporary Scriptures™
Copyright © 2018, 2024 by Biblica, Inc.
Used with permission. All rights reserved worldwide.