THRÜNTAN 8
8
Keking Keamlokhi
1Judüki Thrünpuhnü Noa tüsho api lung sangkung ching rhangdung lakhi shiwüh alala lümkhit. Tüsho Thrünpuhnü alomi kumung apung yünshih tüsho kebo keamlo. 2Kenü asükbo tüsho thüning ayinripitbo rihdo, tüsho thüning chingnü tsüng tuklo. 3Tüsho ke ju alomi chingnü arünnü keamlo. Nimung chikheak thünim akheam ching kebo ngahde tso. 4Judüki khinu thüne, nimung thürükheak thünepü ching sangkung ju Ararat wung kheak keam. 5Tüsho ke ju khinu thürüpü khiungde ngahde yüzah. Khinu thürü, akhuhbe nimung, müzüng mujukbo ngüde kam.
6Nimung yirü dunglim Noanü anihbuhnü athsükhi sangkung ayinripit ju khimshuh, 7tüsho khüyak khülang thiyia yüshih, tüsho alomi kheak ke müngahyi khiungde yüla arüla de phinde tsah. 8Jushu apinü alomi kheak ke ngahkhi kheahpü müthrithrümpü khülang yüshih. 9Tüshe alomi alala kheak ke lakhinü müthrithrümpü keampung mülade sangkung ching Noa kilim alode arü. Apinü akhah chungkhit tüsho müthrithrümpü ju sangkung ching beyuka lu. 10Apinü nimung thüne aleang, tüsho kheaküshe apinü sangkung chingnü müthrithrümpü yüshih. 11Judüki müthrithrümpü arelim oliv yü khülang amün chingnü mukiua lubah arü; tüsho alomi kheaknü ke ngahdo de Noanü mükheah. 12Jumonü apinü nimung thüne aleang tüsho müthrithrümpü yüloshih, tüshe ju kheaküa malodarüdebah.
13Noa kam 601 lachoki, akhuhbe khinu atan nipü ke ju alomi chingnü ngahabah. Noanü sangkung yihdokhi ju lokhia bah tüsho alo kungde alakhi ngü. 14Tüsho khinu mahne, mukukheak thüne nipü alomi ju kungabah.
15Judüki Thrünpuhnü Noa ki tha, 16Nü le nü niube, tüsho nü tsührübo le arü niuberübo sangkung chingnü wukhiukang. 17Nü lung rhangdung lakhi alala: wuhnubo le shiwüh tüsho alo kheak abüde atsahbe bekhitang, junangde arübo wüh bude alomi alala ching labah. 18Jumonü Noa, api tsührübo tüsho aniube le atsührü niuberübo api lung wukhiuk. 19Shiwüh, loriloko, alo kheak abüde atsahbe alala arü buh mungji ayannü sangkung chingnü wukhiuk.
Noanü Kingaünkhi
20Judüki Noanü Atungpuh kilim kingaün sadam khülang thsü, tüsho amüsüh shiwüh le amüsüh wuhnu aban lubah kingaün sadam kheak taka kingaün jih. 21Atungpuhnü arhümthüneakhi münim tüsho api mulong chingnü tha: “Mihtsürü dünkheaknü, api azükinü mulong amütsü laa lalashe, kheaküa inü alo muthrumünean müthsü. Tüsho inü arhimokhi nangde rhangdung lakhi lorilokobo küyimkishe müdükheakshih. 22Alomi la khiungde mükheanpü kim tüsho yimlupü, athsak tüsho alam, tsüngkam tüsho muzhu, tüsho animung le are mükheamde alabah.”
Iliyochaguliwa sasa
THRÜNTAN 8: YIMCBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.