THRÜNTAN 7
7
Keking
1 Atungpuhnü Noa ki tha, “Nü tüsho nü yamkhün alala sangkung ching yüzahang, tümütüsho ha lün ching I miki nü lang thiyurolungki ah de inü ngüdo. 2Nünü amüsüh shiwüh mungji aban drepung thünene luang; tüsho mümüsühkhi shiwüh mungji aban drepung mahnene luang; 3kheaküshe wuhnu mungji aban drepung thünene alomi alala ching mungji aban lashihpü luang. 4Nimung thüne dunglim inü thrüna rhangdung lashihkhi alala alomi chingnü dükheakshihpü alomi kheak nimung yirü tüsho tsüngre yirü tsüng arüshihbah.” 5Tüsho Atungpuhnü api ki thiyukhüm jihkhi yande Noanü lüpdükhi rhimo.
6Alomi kheak keking arüchoki Noa kam 600 lakheah. 7Tüsho Noa le atsührübo tüsho aniube le atsührü niuberübo keking chingnü atsokhitpü sangkung ching yüzah. 8Amüsüh tüsho amümüsüh shiwüh, wuhnu tüsho alo kheak abüde atsahbe drepungbo, 9pung tüsho dre, Thrünpuhnü Noa ki thiyukhüm jihkhi nangde Noa kilim arü tüsho sangkung ching yüzah. 10Tüsho nimung thüne dunglim alomi kheak keking arü.
11Noa kam 600 lachoki, khinu mahnepü, thürükheak thüne nipü kenü asükbo alala jukphuk tüsho thüning ayinripitbo khimshuh. 12Tüsho tsüng ju alomi kheak nimung yirü tüsho tsüngre yirü arü. 13Ju nimungnü Noa le atsührübo Shem, Ham, Japheth, tüsho Noa niube le atsührü mahsam niuberübo sangkung ching yüzah. 14Arü lung shiwüh mungji aban, akam-shiwüh tüsho mütüm shiwüh, ato tüsho anini, tüsho wuhnu mungji aban lakheah. 15Rhangdung sheak lakhi loriloko drepung alala Noa kilim arü tüsho sangkung ching yüzah. 16Shiwühbo yüzahde alakhi ju Thrünpuhnü Noa ki thiyukhüm jihkhi nangde rhangdung lakhi aban pung tüsho dre lakheah; tüsho Atungpuhnü api alunglim khimdoabah.
17Kheakü keking ju alomi kheak nimung yirü tüsho tsüngre yirü lakheah. Kebo alü kam tüsho sangkung ju alomi kumung changde phungkih. 18Ke ju yükih tüsho alomi kheak tode alü kam, tüsho sangkung ju kemi kheak phung. 19Ke ju hodakde alomi kheak yükih, tüsho thüning bukkhüp awung achangbo alala kingdoabah. 20Ke yükih tüsho khahnap 15nü sükde awungbo kinghoa lakheah. 21Alomi ching rhangdung lakhi alala–wuhnubo, akam-shiwühbo, mütüm shiwühbo, alo kheak abübe loriloko alala sheabah. 22Alo akung kheak nupung ching sheak thsübe lüpdükhi sheabah. 23Junangde apinü alomi kheak rhangdung lakhi alala: mihtsürü tüsho shiwühbo, abüde atsahbe tüsho thüning wuhnu dükheakshih. Noa tüsho api lung sangkung ching larü lang aninga lakheah. 24Tüsho ke ju alomi kheak nimung chikheak thünim kingde alakheah.
Iliyochaguliwa sasa
THRÜNTAN 7: YIMCBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.