Marcos 2

Jesús mtegwe thib zha mthans

(Mt. 9:1‑8; Lc. 5:17‑26)

1Leettsa mriida chop tson wiz, tsa mretab Jesús yez Capernaúm tedib welt, ne mbin re men lee Jesús nzo liz thib zha. 2Kwathoz ney mkaltaa kwaro re men tya, ne mgaat raa leen yuu gataab neeka tedib zha, tsa mndaa Jesús kwent xkiiz Diox lo re men. 3Tsaraa ndyaad thap mbyi kuu ndyaadno thib mbyi mthans lo Jesús. 4Ne ngogt gabig zha lo Jesús, tak kwaro men nzi, tsa mxaal re zha yek yuu, ne mla zha dib luun zha mthansa lo Jesús. 5Ne oraaka myeen Jesús lee re zhaʼa nyelaaz Diox. Tsa nzhab Jesús lo zha mthansa:

―Xgann na, mtuyya na re falta.

6Per tya nzi tyen maestr kuu nloo xkiiz Diox, re zhaʼa mtsow xgab ne nzhab: 7“¿Chebee tabaa ndediz mbyi ree? ¡Taxal Diox ndediz zha! Neeka thib men gagt kib falt beeta Diox tak kib falt.”

8Per lee Jesús myeen naa kwan ntsow re maestr chaan ley xgab, tsa nzhab Jesús lo re zha:

―¿Chebee tabaa ntsow goo xgab? 9¿Kwan ntsow goo xgab? ¿Kwan mas nagant gapʼn lo mbyiz: “Lee re falta myuyya”, o tegwen zha ne gapʼn lo zha: “Gwache bzhen luuna ne bte”? 10Tsowʼn koree lo re goo, tsa ne goo lee na, Kuu Mzin Ngok Men, napʼn yalnabee par tuyʼn re falt chaan re men.

Tsa nzhab Jesús lo mthans:

11―Loʼa nin gwache, bzhen luuna ne tyee liza.

12Oraaka lee mbyi mthansa ngwache, ne mzhen zha luun zha ne ndya zha, ne reta zha kuu mwii kuu ngok, kwathoz mzegey leettsoo zha, ne mndaa zha texkix lo Diox ne nzhab zha:

―¡Neeka mas ter wiiʼaa koree! ¡Re kuu thoz kuu ntsow Diox!

Jesús mrez Leví

(Mt. 9:9‑13; Lc. 5:27‑32)

13Tsa mre Jesús ngwa Jesús roo nitdoo tedib welt; ne lee re men ngwa lo Jesús, tsa mloo Jesús lo re zha. 14Ne nda Jesús tut kwat, tsa mwii Jesús Leví xgann Alfeo, thib zha kuu ntsow kobral temi chaan yezlyu, kuu nzhax lo zha Roma, tsa nzhab Jesús lo zha:

―Bteke ditsʼn.

Oraaka ngwateli Leví ne mndeke Leví dits Jesús.

15Ngwalo mriid koree, lee Jesús kon re zha kuu ngeteed lo Jesús ngwa liz Leví, ne or ndob Jesús ngeyow Jesús liz Leví, kon tyen zha kuu ntsow kobral temi chaan yezlyu ne kon re zha kuu ntsowt kuu wen, tak kwaro men mndeke dits Jesús. 16Tsa lee chop tson maestr chaan ley kuu nak fariseo, mne zha lee Jesús ndow kon re zha kuu ntsow kobral temi chaan yezlyu, tsa nzhab re zha lo re zha kuu ngeteed lo Jesús:

―¿Chebee nzhow zha baa, kon re zha kuu ntsow kobral temi chaan yezlyu, ne kon re zha kuu ntsowt kuu wen?

17Jesús mbin kona, tsa nzhab Jesús lo re zha:

―Re zha kuu ndolizt ndechet zha cho tegwe zha, per lee re zha kuu ndoliz ndeche zha cho tegwe zha, ndyaltʼn ndyaadchezʼn re zha wen, lee na ndyal ndyaadchez re zha kuu ndab falt.

Yalnaabdiz chaan ayun

(Mt. 9:14‑17; Lc. 5:33‑39)

18Re zha kuu mndeke dits Juan, ne re fariseo ntsow zha ayun, tsa mas wen tediz zha lo Diox. Tsa ngwa zha lo Jesús ne nzhab zha:

―Chebee lee re zha kuu mndeke dits Juan ne re fariseo, ntsow zha ayun, tsa mas wen tediz zha lo Diox, ne lee re zhaʼa ntsowt zha tata.

19Lee Jesús nzhab lo re zha:

―¿Chu tak wut re zha kuu nzi lo fandan, or lee zha kuu mtseya ndoka lo re zha? ¡Rebeete! Tak dita lo ndo zha kuu mtseyaʼa lo re zha, gagt tsow zha ayun. 20Per tetsin thib wiz yiib mbyi kuu mtseyaʼa lo re zha, tsasi lee re zha tsow ayun, tsa mas wen tediz zha lo Diox.

21’Neeka thib zha ngibt thib le lar kub cho lar gox, tak mbich lar kub ne masraa nchatte lar gox. 22Ne neeka thib zha ngot xit ub kuu kub leen gom yid gox; tak lee xit ub kuu kub tsow ratt gom gox, ne luuzhe gom ne lee xit ub zho, kona lee xit ub kuu kub ndoblo yo leen gom yid kub.

Re zha kuu ngeteed lo Jesús mthop ton nzob xtil, wiz kuu nzhool re zha Israel lo Diox

(Mt. 12:1‑8; Lc. 6:1‑5)

23Thib wiz sabd nda Jesús kon re zha kuu ngeteed lo Jesús thib ta ndab nzob xtil, ne lee re zha kuu ngeteed lo Jesús mndelo mthop ton nzob xtil. 24Tsa lee re fariseo nzhab lo Jesús:

―¿Chebee ntsow re zhaʼa, thib kuu ndoblot tsowaa wiz kuu nzhoolaa lo Diox?

25Lee Jesús nzhab lo re zha:

―¿Chu ter lab goo kuu mtsow rey David, leettsa mlann zha kon re zha kuu nda kon lee zha? 26Mndaab zha leen liz Diox, leettsa lee Abiatar ngok ngwleyy kuu mnabee lo reta ngwleyy, ne ndow zha pan kuu ndoblot zha wu zha, kuu beeta re ngwleyy ndoblo wu, ne noga mndaa zhay ndow re zha kuu nda kon lee zha.

27Ne noga nzhab Jesús lo re zha:

―Lee wiz kuu nzhoolaa lo Diox mndaa Diox par wen rid re men ne mndaat Diox wiz par nabee wiz lo mbyi. 28Kona na nabee lo wiz sabd, tak na nak xgann mbyi, Kuu Mzin Ngok Men.

Nu markerat:

Marcos 2: zao

Märk

Dela

Kopiera