Marcos 1

Juan kuu mtsowleyy

(Mt. 3:1‑12; Lc. 3:1‑9, 15‑17; Jn.1 :19‑28)

1Tenzhee mod mndelo Diiz Chul chaan Jesucrist Xgann Diox. 2Taxal nke lo xkeets Diox kuu mkee profet Isaí, or nzhab profet:

Na taal thib zha kuu tener loʼa,

tsa to list zha leettsoo re men, par kayaa men lu.

3Ne dib gan zha kwez zha thib ta yubiz ne gab zha:

“Nali bloo goo leettsoo goo par kayaa goo Zha Nabee,

ne nali gok goo lo re kuu ntsow goo”. [Is. 40:3]

4Tata mrolo kuu nzhab Isaí, or lee Juan kuu mtsowleyy re men mzin mndaa kwent xkiiz Diox thib ta yubiz, ne nzhab Juan lo re men, ndoblo tsee zha re mod kuu went kuu nak zha ne tob yek zha xkiiz Diox, tsa tuyy Diox re falt kuu mtsow zha. 5Reta zha Jerusalén yez naro, ne re yez bzhizh chaan yezlyu Judea, mzin re zha tsa gon zha xkiiz Juan. Ne mndaa zha kwent re falt kuu mtsow zha, tsa mtsowleyy Juan zha leen yoo Jordán.

6Juan mdok lar kuu natexkwaa kon yits lad kamey, ne naliib thib sinch yid leeyy Juan, ne kuu nzhow Juan nak ngebeez ne kuu nzhuu Juan nak mzin wan. 7Or mndaa Juan kwent xkiiz Diox, nzhab Juan:

―Mera yaad thib zha kuu mas nataak nake na, ne neeka ndoblotʼn xakʼn korre dits labyid zha, tak mas nataak zha nake na. 8Na mtsowleyy goo kon nit, per lee mbyiʼa tsowleyy goo, or kuu taa zha Mbi Nayon chaan Diox lo goo.

Jesús ngokleyy

(Mt. 3:13‑17; Lc. 3:21‑22)

9Thib wiz mroo Jesús yez Nazaret yezlyu Galilea, ne mzin Jesús ta ngetsowleyy Juan re men, tsa mtsowleyy Juan Jesús leen yoo Jordán. 10Or mroo Jesús leen nit mwii Jesús lee lobee mzhaal, ne lee Mbi Nayon mla dits Jesús taxal thib palom. 11Oraaka mbin Jesús thib bos kuu mroo lobee kuu nzhab:

―Lu nak xgann na kuu kwathoz nke leettsoon, ne kwathoz wen nzo leettsoon nen lu.

Maxuuy ngwalaaz gakedi Jesús

(Mt. 4:1‑11; Lc. 4:1‑13)

12Tsa lee Mbi Nayon chaan Diox mndeno Jesús thib ta yubiz. 13Tya ngoo Jesús chop gal wiz, ne chop gal yaal xid re maa nayii. Tsa lee Maxuuy ngwalaaz gakedi Jesús tyen welt, tsaraa lee re mandad chaan Diox mkenap Jesús.

Jesús mndaa kwent xkiiz Diox yezlyu Galilea

(Mt. 4:12‑17; Lc. 4:14‑15)

14Leettsa ngoo Juan tsib lee Jesús ngwa yezlyu Galilea, ne mndaa Jesús kwent Diiz Chul chaan Diox. 15Ne nzhab Jesús:

―Mzin gaxa wiz kuu lee Diox nabee lo goo. Btsee goo mod went kuu nak goo, ne gwalaaz goo Diiz Chul chaan Diox.

Jesús mrez thap zha kuu niit mbel

(Mt. 4:18‑22; Lc. 5:1‑11)

16Leettsa ndiy Jesús roo nitdoo yezlyu Galilea, tsa mwii Jesús Simún ne wets Simún kuu le Ndres, lee rop zha ngegobi yex zha leen nitdoo, tak zha niit mbel nak zha rop zha. 17Ora nzhab Jesús lo rop zha:

―Bteke goo ditsʼn, tsa tsowʼn gak goo zha kuu niit men par Diox.

18Oraaka mlaa rop zha yex zha ne mndeke zha dits Jesús.

19Ne nda Jesús mas kwat, tsa mwii Jesús Santiag ne Juan kuu nak rop xgann Zebedeo, re zha nzo leen kano ngeyib yex. 20Tsa mrez Jesús rop zhaʼa, ne oraaka mlaa zha xut zha Zebedeo kuu nzo leen kano kon re mos, ne mndeke rop zha dits Jesús.

Thib mbyi kuu nzo mbi fyer leettsoo

(Lc. 4:31‑37)

21Ne mndaab Jesús kon re zha yez Capernaúm wiz kuu nzhool re zha Israel lo Diox, ne ngwa re zha ta nkaltaa re men nteed xkiiz Diox, tsa mndelo Jesús mloo lo re men kuu nzi tya. 22Kwathoz mzegey leettsoo re zha naa xomod mloo Jesús lo re zha, tak kon yalnabee mloo Jesús lo re zha, ne mloot Jesús taxal nloo re maestr chaan ley. 23Ne tya ndo thib mbyi kuu nzo mbi fyer leettsoo, ne lee zhaʼa mretsyath, ne nzhab:

24―¿Kwan nlaaza kon nee Jesús zha Nazaret? ¿Chu ndyaada luuzha nee? Nen cho naka. Lu nak Zha kuu Nayon lo Diox.

25Oraaka mkox mbi fyer lo Jesús, ne nzhab Jesús:

―¡Btow rooʼa, ne broo leettsoo mbyi ree!

26Tsa lee mbi fyer mtsow mlen zhaʼa yizguthye ne mretsyath mroo leettsoo zha. 27Ne reta zha kuu nzi tya kwathoz mzegey leettsoo zha, ne mnaabdiz zha lo altaa zha, ne nzhab zha:

―¡Neeka mas ter wiiʼaa koree! ¿Kwan koree? Zha ree nloo pur kuu kub, ne nabee zha lo re mbi fyer ne nzhone diiz lo zha.

28Tsa kwathoz ney mraats diiz re kuu mtsow Jesús dita yezlyu Galilea.

Jesús mtegwe xnaatsaap Pey

(Mt. 8:14‑15; Lc. 4:38‑39)

29Leettsa mroo re zha Jesús leen yuu ta nkaltaa re zha Israel, tsa ngwa Jesús kon Santiag ne Juan liz Simún rop Ndres. 30Tsa nzhab re zha lo Jesús lee xnaatsaap Simún, nax lo luun ndak xlee. 31Ora mbig Jesús ne mzhen Jesús yaa zha ne mlit Jesús zha, oraaka mroo xlee zha, ne mndaa zha kuu mdow re zha.

Jesús mtegwe kwathoz zha or ndebix wiz

(Mt. 8:16‑17; Lc. 4:40‑41)

32Or ndekowa yezlyu, tsa lee re men myaadno re mbyiz ne re zha kuu nzo mbi fyer leettsoo lo Jesús. 33Ne dita yez mkaltaa roo yuu ta ndo Jesús. 34Tsa mtegwe Jesús re mbyiz, ne mloo Jesús kwathoz re mbi fyer kuu nzo leettsoo re men. Ne mndaat Jesús diiz gatediz re mbi fyera, tak neʼa re mbi fyera naa cho nak Jesús.

Jesús mndaa kwent xkiiz Diox ta nkaltaa re men

(Lc.4:42‑44)

35Ne zhaaraa na ngwache Jesús, ne ngwa Jesús thib ta wan ta nagan, ta nlaaz Jesús to thita Jesús, tsa tediz Jesús kon Diox. 36Tsa lee re altaa Simún ngwakwaan Jesús. 37Ne or mzal Jesús lo re zha, tsa nzhab zha lo Jesús:

―¡Reta men ngekwaana!

38Per lee Jesús nzhab lo re zha:

―Nda goo reʼaa re yez kuu nzi gaxta nzhee, tsa tan kwent xkiiz Diox lo re zha kuu nzo tya, tak par kona ndyalʼn.

39Ne mndaa Jesús kwent xkiiz Diox ta nkaltaa re zha Israel dita yezlyu Galilea, ne mloo Jesús re mbi fyer kuu nzo leettsoo re zha.

Jesús mtegwe thib mbyi kuu ndeye kwerp

(Mt. 8:1‑4; Lc. 5:12‑16)

40Tsa myaad thib zha kuu ndeye kwerp lo Jesús, ne mtobxub zha lo Jesús, ne dib ndroo leettsoo zha nzhab zha lo Jesús:

―Os leeʼa nlaaza tegweʼa na, btegwen lo yiz ree.

41Tsa mlat leettsoo Jesús mne Jesús zhaʼa, ne kon yaa Jesús mdiinn Jesús cho zha. Tsa nzhab Jesús lo zha:

―Nlazʼn weʼa.

42Leeka or kuu mni Jesús lo zha, oraaka mgwe zha, ne myaan nambi zha. 43Tsa mteni Jesús zha, ne mtaal Jesús zha liz zha, 44ne nzhab Jesús lo zha:

―Yent cho lo gaba koree, gwa lo ngwleyy ne be gon kuu ndoblo taa thib mbyi kuu mgweʼa taxal mnabee Moisés, tsa ne reta zha leeʼa mgweʼa.

45Per lee mbyiʼa ndya ne nzhabe lo reta men, kona ngogt raa gataab Jesús re yeza, sinke roo re yeza mlet Jesús, ne lee re men reta yez ndyaad lo Jesús.

Nu markerat:

Marcos 1: zao

Märk

Dela

Kopiera