San Mateu 16
16
CAP. XVI.
1VINIERON encontrálu aquí los fariseos y saduceos; y pa tientálu, pidieron-i que yos fexés ver dalgun prodixu nel cielu.
2Mas elli arrespuendióyos: Cuando va ’tapeciendo decís delles de veces: Va fer bon tiempu, pos está ’l cielu bermeyu.
3Y pe’ la mañanica: Hoi va fer tormenta, pos está ’l cielu sele, y relluma.
4¿Conqué sabéis adivinar pe’ la facha del cielu, y non podéis conocer le’ siñales clares d’ istos tiempos del avenimientu del Mesíes? Aquista raza ó castra mala y adúltera pide un prodixu: mas non se i dará isi que pide, sinon el prodixu del profeta Xonás. Y dexándolos, fose.
5Escaeciéraseyos tomar pan á sos descípulos, que habín venío de la vera d’allá del llagu.
6Y díxoyos Xesús: Arrecaldái y guardáivos del formientu de los fariseos y saduceos.
7Mas illos pensatibles afalucaben pa con sí: Diz isto porque non truximos pan.
8Y conociéndolo Xesús, dixo: Homes de poca fe, ¿q’ andáis afalucando pa con vosotros, porque non tenéis pan?
9¿Entovía non tenéis entendimientu, y escaeciósevos ya lo de los cinco panes repartíos ente cinco mil homes, y cuántos copinos de garitos apañucasteis?
10¿Y lo de lo’ siete panes pa cuatro millaráes, y cuántes maniegues acorrompinasteis de lo que sobró?
11¿Como non conocéis que non fo per morde del pan pe’ lo que vos dixe: Guardáivos del formientu de los fariseos y saduceos?
12Entós cayeron en que non yos dixera que se guardasen del formientu que s’ entromete nel pan, sinon de la dotrina de los fariseos y saduceos.
13Viniendo dempués Xesús pa la rodiáa de Cesarea de Filipo, entrugó á sos descípulos: ¿Quién ruxen los homes per ahí que ye ’l Fiu del home?
14Arrespuendieron-i illos: Dalgunos dicen que Xuan Bautista, utros Elíes, utros, en fin, Xeremíes, ó dalgun de los profetas.
15Dizyos Xesús: ¿Y vosotros quién dicís que só yo?
16Tomando la palabra Simon Pedru dixo: Tu yes el Cristu ó Mesíes, el fiu de Dios vivu.
17Y arrespuendiendo Xesús, díxoi: Dichosu tu, Simon fiu de Xoná: porque non te reveló iso la carne nin la sangre ó dalgun, home, sinon mió Pá, q’ está nos cielos.
18Y yo dígote que tu yes Pedru, y que so ista piedra faré mió iglesia, y les puertes ó ’l poderíu tóu del infiernu non podrán con illa.
19Y daréte á ti les llaves del reinu de los cielos. Y tóo lo q’ arreyares so la tierra, arreyáo será al empar en ’os cielos: y tóo lo que desarreyares so la tierra, desarreyáo será al empar en ’os cielos.
20Entós mandó á sos descípulos q’ á naide dixesen que yera elli Xesús el Cristu ó Mesíes.
21Y nel intre empezó á dicer á sos descípulos que yera bono q’ elli fora á Xerusalen, y que padeciés allí muncho de parte de lo’ xueces, y de los escribas, y de los príncepes de lo’ sacerdotes, y que fues muertu, y que resuscitás al tercer día.
22Y tomándolu pa una vera Pedru, entamó á ’ldiricái diciendo: ¡Ah Señor’ Lloñe de ti tal cosa: quiá, non ha ser contigo ansina.
23Pero Xesús encarándose ’n elli, díxoi: Quítateme de delantre satanás, que me ’scandalices: porque non tienes entendimientu nin gustu de les coses que son de Dios, sinon de les de los homes.
24Entós dixo Xesús á sos descípulos: Si dalgun quier ensartáse co’ mió, niéguese á se mesmu, y arrecostine con so cruz, y entame tras de min.
25Pues quien quixés salvar so vida obrando contra min, perderála: mas quien perdiés so vida per morde de min, afallarála.
26Porque ¿qué i sirve al home atropar tóu ’l mundu, si pierde so alma? Ó ¿con qué cambiu podrá ’l home rescatála una vez perdía?
27Ello ye q’ el Fiu del home ha venir guarníu de la gloria de so Pá con sos ánxeles al empar á xuzgar los homes; y entós dará ’l pagu á cad’ un segun sos obres.
28Miániques vos digo, q’ están aquí dalgunos que non han morrer fasta que vean al Fiu del home aparecése nel arrullu del so reinu.
Nu markerat:
San Mateu 16: AST1861
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Asturian Gospel of Matthew Portion published 1861.
