युहन्ना 3
3
निकोदेमस येसु चुप्सिॽ लेम्बॽआ
1फरिसिजिबेॽ निकोदेमस निङ ले़ःॽखुबा इक्को याॽमि टुसे़, खो यहुदिजि सुम्ढाम खिमबेॽहाजिबेॽए इक्को ले़टे़। 2इगो याॽमि इकसेङ येसु टुढामबेॽ लेन्नुङ लुसु, “गुरुज्यु, हे़न निवाहाङ्बाङ्नोॽ कानिङ इःॽसिॽ लेङ्इटे़, इगो खा कानिङे़ॽ लेन्डुङ्मा। निवाहाङ्डे़ॽ सक्ति मे़म्पिहोङ असे़ॽसो हे़ने़ॽ ले़ःॽपॽआडोक्हा खरिहा योम्बोक ले़ःॽहेसुजिने।”
3येसुडे़ॽ खो लुसु, “चइबानोॽ के़ॽ लुन्ने़, असासो चोङ लिनुङ मे़न्टोक्लो निवाहाङ्मि राज्य खाङ्डोक्हेसुजिने।”
4निकोदेमसडे़ॽ लुसु, “याॽमि ठाॽपा लिनुङ्सो फेरि टोक्हेये ? इमा खो फेरि मामामि रुङ्माबेॽ पे़खे़ॽनुङ टोक्हेये ?”
5येसुडे़ॽ खो लुसु, “चइबानोॽ हे़न लुन्ने़, असासो योङानुङ होङ्निवाबाङ मे़न्टोक्लो निवाहाङ्मि राज्यबेॽ पे़खे़ॽहेमिने। 6हिङाबाङ टोक्पॽआ हिङा ले़ये, होङ्निवाबाङ टोक्पॽआ होङ्निवा ले़ये। 7के़ॽ हे़न चोङ लिनुङ टोक्मा खे़ये लुमाबेॽ खरि ए़ॽमिन्ने। 8हिॽवाबा हाम्बेॽ खे़ॽमा मिङ्इये मिॽयुनोॽ खे़ॽए़ये, हे़निङे़ॽ हिॽवाबा मुॽइयेगो खेम्इन्डानुमे, तर मो हाम्बाङ लेङ्इयेनुङ हाम्बेॽ खे़ॽए़ये लेसानुम्ने। होङ्निवाबाङ टोक्पॽआ याॽमिसो चोप मोडोक्नोॽ लिम्मे।”
9निकोदेमसडे़ॽ लुसु, “इडोॽ इन्डोक्टे लिहेये ?”
10येसुडे़ॽ खो लुसु, “हे़न इस्राएलिजिमि गुरु लिनुङ्सो इघा खा लेसुने ? 11चइबानोॽ के़ॽ हे़न लुन्ने़, कानिङे़ॽ इमा लेन्डुङ्मा मो खानोॽ लुन्डुङ्मा, कानिङे़ॽ इमाङ खाङ्इटुङ्मे मोमि साक्छि पिन्डुङ्मा, तर कानिङे़ॽ पिबॽआ साक्छिबेॽ हे़निङे़ॽ बिस्वासनोॽ ले़टानुम्नि। 12के़ॽ मक्खाम्डेमबेॽ लिबॽआ खामि टुम्बेॽ इःमाबेॽनोक्सो हे़निङे़ॽ बिस्वास ले़टानुम्नि, छना थाङ्सिरिमि टुम्बेॽ इःमाबेॽ इन्डोक्टे बिस्वास ले़ःॽहेन्डानुमे ? 13थाङ्सिरिबाङ उङ्घुबा याॽमिमि पसाबाङ हाइखा असासो थाङ्सिरि मे़ङ्खे़ॽटिॽमि। 14इस्राएलिजि रे़क्रे़क्मा ठाउँबेॽ टुमाबेॽ निवाहाङ्डे़ॽ माहाजि हिङ्मेॽमामि मोसाडे़ॽ पितलमि पुसे़ॽ टोङ्नुङ सिङ्बुडे़ॽ मिन्डु ठेॽटिडोक्नोॽ, याॽमिमि पसासो मिन्डु ठेप्पोक्मा खे़ये। 15मोडोगे़ॽ असा असे़ॽ खोबेॽ बिस्वास ले़न्डुजे, मोसे़ॽ ए़स्सिमे हिङ्मवा चुप्मिन्डुए। 16इन्ढोङ्होङ निवाहाङ्डे़ॽ मक्खाम्डेमबेॽहा याॽमिजि इडोॽ बेॽलो नम्नम ले़ःॽपॽआसे़ॽ खोमि इक्कोमा पसासो खोजिमि लागि पाक्सु। मोडोगे़ॽ खोमि पसाबेॽ बिस्वास ले़ःॽखुबाजि असासो नासि मे़ल्लिमिरो, तर खोजि चोबे़ॽ ए़स्सिमे हिङ्मवा चुप्टुजिरो। 17इन्ढोङ्होङ निवाहाङ्डे़ॽ मक्खाम्डेमबेॽहा याॽमिजि आप्टिकनुङ्मा टोङ्मामि ने़ॽनि, तर माहाजि हिङ्माराप्सिॽ खोमि पसा पाक्सु। 18असे़ॽ खोबेॽ बिस्वास ले़न्डुए, खो आप्टिकनुङ्मा लिनिबा, तर खोबेॽ बिस्वास मे़ले़ःॽखुबाजि चोप आप्टिकनुङ्मा लिबेटामे, इन्ढोङ्होङ खोजिडे़ॽ निवाहाङ्मि पसाबेॽ बिस्वास मे़ले़ःॽटिॽटुजि। 19आप्टिकनुङ्मा इडोगे़ॽ लिम्मे, जोति मक्खाम्डेमबेॽ लेङ्इटे़, तर याॽमिजिडे़ॽ जोतिबाङ्सो बेॽलो सेन्जुगुप नेन्जोसुजि, इन्ढोङ्होङ खोजिमि योम्बोक दुस्ट ले़टा। 20इन्ढोङ्होङ दुस्ट योम्बोक ले़ःॽखुबाजि चोबे़ॽ जोति नेन्जोसुजिने, मोबा माहाजिमि मङे़हा योम्बोक खाङ्मुहा लुनुङ किस्सिम्मेनुङ जोतिबेॽ आप्मिनि। 21तर चाइबमा खाडे़ॽ लुबॽआडोॽ राम्खुबा याॽमिजि चाहिँ जोतिबेॽ आप्मिम्मे। इडोॽ खोजिडे़ॽ ले़ःॽपॽआ योम्बोक निवाहाङ्बाङ लिबॽआ लुनुङ खाङ्मुहा।”
येसुनुङ युहन्ना
22मोबा ए़क्साङ येसुनुङ खोमि चोङ्साजि यहुदिया ठाउँबेॽ खडामि, मोबेॽ खोजिनुङ इक्याक नियाक पेन्नुङ बप्तिस्मा लासु। 23मोडोक्पेॽनोॽ युहन्नाडे़ॽ सालिम लुमे ठाउँमि के़क्पेॽए एनोन लुमे ठाउँबेॽ बप्तिस्मा पिमे़ॽनिङ्सिडुए, इन्ढोङ्होङ मोबेॽ बेॽलो योङा टुसे़। मोबेॽ याॽमिजि बप्तिस्मा लासिॽ लेम्मे़ॽनिङ्सिडामे। 24(मोडोक्लो युहन्ना तिरिङ्गा खिमबेॽ मे़सिॽपॽआ ले़टा।) 25मोडोक्पेॽ युहन्नामि चोङ्साजि इक्को यहुदि याॽमिनुङ वासोक्नुङ चोखो लिमे चलनमि टुम्बेॽ काबोक्खडामि। 26युहन्नाबेॽ लेन्नुङ माहाजिडे़ॽ खो लुसुजि, “गुरु, यरदन होङ्मामि मेॽयरेङ हे़ननुङ इक्को याॽमि टुसे़न्डि, खोमि टुम्बेॽ हे़ने़ॽ साक्छि पिसुए, खाक्से, खोसे़ॽ बप्तिस्मा पिमे़ॽनिङ्सिन्डुए, चोप याॽमिजि खोबेॽरेॽ खे़ॽमे़ॽनिङ्सिम्मि।” 27युहन्नाडे़ॽ लुसुजि, “निवाहाङ्डे़ॽ मे़म्पिहोङ याॽमिडे़ॽ इमाङ्सो चुप्हेसुनिबा। 28‘का खिरिस्ट ने़ॽनिबा, तर का खोबाङ याक्लो पाङ्बॽआ याॽमिरेॽ ले़ङे़’ लुनुङ के़ॽ लुबॽआ खामि साक्छि हे़निङ टाङ्बे़ॽनोॽ खे़म्इटानुम। 29असानुङ नायोङ्मा टुये, मोनोॽ नायोङ्बा ले़ये। नायोङ्बानुङ येःप्खुबा लङ्गाम नायोङ्बामि सेम्ला खेम्नुङ साप्थाङ्इये। मो लङ्गाम कानोॽ ले़ङे मोडोगे़ॽ काङ्मि हाङ्हाङ हागो पुरा लिटाहा। 30येसु चाहिँ बेॽए लिमा खे़ये, का चाहिँ ए़डे़म्मा लिमा खे़ये।”
थाङ्सिरिबाङ लेङ्घुबा
31मिन्डुबाङ लेङ्घुबा चाहिँ चोप्पाङ एप्पा ले़ये। मक्खाम्डेमबाङ लेङ्घुबाडे़ॽ मक्खाम्डेममिन्नोॽ खा इःन्डुहा। थाङ्सिरिबाङ लेङ्घुबा चोप्पाङ महान ले़ये। 32खोसे़ॽ इमाङ खाङ्इटुहा, खेम्इटुहा माहा खामिन्नोॽ खोसे़ॽ गबाहि पिन्डुहा, तर खोमि गबाहि असे़ॽसो खेप्सुजिनि। 33असे़ॽ खोमि साक्छि खेम्नुङ बिस्वास ले़न्डुए, मोसे़ॽ निवाहाङ चाइबमा ले़ये लुनुङ लेन्डुए। 34निवाहाङ्डे़ॽ पाङ्बॽआ असा ले़ये, मोसे़ॽ निवाहाङ्मिन्नोॽ खा इःन्डुहा इन्ढोङ्होङ निवाहाङ्डे़ॽ खो खोमि होङ्निवा के़ॽलो पिन्डुए। 35पाबाडे़ॽ खोमपसा नम्नम ले़न्डुएनुङ खोसे़ॽ चोप थोक पसामि हुकपेॽ पिटुए। 36असे़ॽ निवाहाङ्मि पसाबेॽ बिस्वास ले़न्डुए खोसे़ॽ ए़ॽसिमे हिङ्मवा चुप्मिन्डुए, तर असे़ॽ पसामि खा खेप्सुने मोसे़ॽ ए़स्सिमे हिङ्मवा चुप्टुनेनुङ खोसोक्पेॽ निवाहाङ्मि दन्डा सानिङ सिॽइये।
Nu markerat:
युहन्ना 3: YAMP
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2023, Wycliffe Bible Translators, Inc. and Nepal Bible Society
