युहन्ना 4
4
येसुनुङ सामरि मेॽनामिॽ
1युहन्नाबाङ्सो बेॽलो येसुडे़ॽ चोङ्सा टोङ्मे़ॽनिङ्सिन्डुए, मोबा माहाजि बप्तिस्मा पिमे़ॽनिङ्सिन्डुजे लुमे खा फरिसिजिडे़ॽ खेम्डोक्टुजि। 2(चाइबमा खा चाहिँ येसु खोमदाङ्बे़ॽ बप्तिस्मा मे़म्पिसुजे, इगो योम्बोक खोमि चोङ्साजिडे़ॽ ले़टुजे।) 3येसुडे़ॽ इडोक्हा खा लेडोक्नुङ, यहुदिया ठाउँ याःॽयानुङ फेरि गालिलबेॽ टेसा। 4इडोॽ गालिल खे़ॽमाबेॽ सामरिया ठाउँमि मराम लिसाङ खे़ॽमा खडे़। 5इडोॽ येसु सामरिया ठाउँमि सुखार लुमे खिम्डेमबेॽ लेस्सा, इगो खिम्डेममि के़क्पेॽनोॽ याकुबडे़ॽ खोमि पसा योसेफ पिबॽआ जग्गा टुसे़। 6मोबेॽ याकुबडे़ॽ टोबॽआ इनार टुसे़। येसु राम्माबेॽ याःक्चाघे़ॽपॽआसे़ॽ मो इनारमि के़क्पेॽ नाजासा। मोडोक्पेॽ लेन्डामि बारोबोङ कासिॽपोरोक्पॽआ ले़टा।
7मोडोक्पेॽनोॽ मो इनारबेॽ योङा टे़ःॽसिॽ इक्को सामरि जातिमा मेॽनामिॽ लेस्सा। येसुडे़ॽ मो लुसु, “का योङा उङ्मा पिमाना।” 8मोडोक्पेॽ येसुरेॽ मोबेॽ टुसे़ इन्ढोङ्होङ खोमि चोङ्साजि चाहिँ चामे खा इन्सिॽ सहरबेॽ खे़ॽपॽआ ले़टामे। 9मो सामरि मेॽनामिॽडे़ॽ येसु लुसु, “हे़न यहुदि जातिडे़ॽ का सामरि मेॽनामिॽमि हुकबाङ इन्डोक्टे योङा उङ्इन्डुए ?” (इन्ढोङ्होङ मोडोक्पेॽ यहुदिजिडे़ॽ सामरिजिमि हुकबाङ इमाङ खासो मे़न्चोसुजे।)
10येसुडे़ॽ मो मेॽनामिॽ लुसु, “हे़ने़ॽ निवाहाङ्मि बरदाननुङ हे़न्नुङ योङा ङाःक्खुबा लेबॽआ ले़टाहोङ हे़ने़ॽ खोनुङ ङाःगुए, मोबा खोसे़ॽ हे़न हिङ्मवा पिघु योङा पिसे़।”
11मो सामरि मेॽनामिॽडे़ॽ येसु लुसु, “हजुर, हे़न्नुङ योङा पाक्ठामसो माॽआ, इनारसो बेॽलोनोॽ होङ्डुम्बा ले़ये, मोबा हे़ने़ॽ हाम्बाङ्डे मो हिङ्मवा पिघुबा योङा लाजे़न्डुए ? 12इमा हे़न कानिङ्मि टुबालाबा याकुबबाङ्सो बेॽएम्माडे ? खोसे़ॽ कानिङ इगो इनार टोङ्बेॽपॽआ, मोबा खोसे़ॽ, खोमि पसाजिडे़ॽनुङ खोमि जिवातजिडे़ॽसो इगो इनारमि योङा उक्सुजि।”
13येसुडे़ॽ मो मेॽनामिॽ लुसु, “इगो योङा उङ्घुबा चोप याॽमिजि फेरि वाइॽमे़ॽ सिन्डुजे, 14तर असे़ॽ के़ॽ पिबॽआ योङा उङ्इन्डुजे खो फेरि इन्डोक्पेॽसो वाइमे़ॽ सिसुनिबा। इन्ढोङ्होङ के़ॽ पिमे योङा चाहिँ मो याॽमि होङ्सिॽयु सानिङ्नोॽ पिॽइये, खो योङा पिॽठाम मुहान लिये, मोसे़ॽ खो ए़स्सिमे हिङ्मवा पिन्डुए!”
15मो सामरि मेॽनामिॽडे़ॽ लुसु, “हजुर, कासो आक्कोनोॽ योङा पिमाना, मोबा का इन्डोक्पेॽसो वाइॽमे़ॽसिङानि मोबा इगोबेॽ योङा टे़ॽसिॽ सानिङ आप्मा पाप्नि।”
16येसुडे़ॽ खो लुसु, “खडे, हे़ने़ए़ बनिबा के़आप्टे।”
17मो सामरि मेॽनामिॽडे़ॽ लुसु, “काङ्मि बनिबा माॽआये।”
येसुडे़ॽ खो लुसु, “काङ्मि बनिबा माॽआये लुनुङ हे़ने़ॽ ठिकै लुसु, 18इन्ढोङ्होङ हे़ने़ए़ बनिबाजि ङाबाङ टुसामे, तर आयु हेन्नुङ टुघुबासो हे़ने़ए़ बनिबा ने़ॽनि। हे़ने़ॽ इगो चाइबमा खा लुटुए।”
19मो सामरि मेॽनामिॽडे़ॽ लुसु, “होउ वावा, हे़न गो अगमबक्ता ले़येले़। 20कानिङ्मि टुबालाबाजिडे़ॽ इगो सुम्लाखाबेॽ ओहाङ ले़टुजे, तर हे़निङ यहुदिजिडे़ॽ लुन्डानुम ओहाङ ले़ठाम ठाउँगो यरुसलेमगोरे ले़ये।”
21येसुडे़ॽ खो लुसु, “होउ मेॽनामि, का बिस्वास ले़ःॽमे, मो याक लेम्मे़ॽनिङ्सिये मोडोक्पेॽ हे़निङे़ॽ निवाहाङ पाबामि ओहाङ चाहिँ ना इगो सुम्लाखाबेॽ ना यरुसलेमबेॽ ले़न्डानुमे। 22हे़निङ सामरिजिडे़ॽ ओहाङ ले़न्डानुमे तर मो निवाहाङ्नोॽ लेसानुम्नि। कानिङे़ॽको खो लेनुङ ओहाङ ले़न्डुङ्मा, इन्ढोङ्होङ मुक्ति चाहिँ यहुदिजिबाङ लेङ्इये। 23तर बेला लेम्मे़ॽनिङ्सिये, मो बेला आयुनोॽ ले़ये, चइबानोॽ ओहाङ ले़ःॽखुबाजिडे़ॽ निवाहाङ पाबा होङ्निवानुङ चइबमा ओहाङ पिन्डुजे। चाइबमा ओहाङ ले़ःॽखुबाजिनोॽ पाबाडे़ॽ योॽइन्डुजे। 24निवाहाङ होङ्निवा ले़ये, मोडोगे़ॽ खोमि ओहाङ ले़ःॽखुबाजिडे़ॽ चाइबमानुङ होङ्निवाबाङ आराधना ले़ःॽमा खे़ये।”
25मो सामरि मेॽनामिॽडे़ॽ येसु लुसु, “के़ॽ लेनुङे़, मुक्ति पिघुबा मसिह लेङ्इये, (खो खिरिस्ट लुन्डुजे) खो लेङ्येम्बाङ खोसे़ॽ कानिङ चोप खा इःबेॽये।”
26येसुडे़ॽ मो मेॽनामिॽ लुसु, “हे़न्नुङ यामुघुबा, कानोॽ मो खिरिस्ट ले़ङे।”
27मोडोक्पेॽनोॽ येसुमि चोङ्साजि टेजामाबेॽ येसु इक्को मेॽनामिॽनुङ यामुमे़ॽनिङ्सिबॽआ खाङ्नुङ खरि मिनामि, तर असे़ॽसो “हे़न इमाङ मिङ्इये ? हे़न इन्ढोङ आक्को मेॽनामिॽनुङ यामुये लुनुङ मे़सिप्सुजि।” 28मोडोक्पेॽनोॽ मो मेॽनामिॽ खोमि गाग्रि मोबेॽनोॽ याःॽयानुङ सहरबेॽ खे़ॽनुङ याॽमिजि लुसुजि, 29“आप्नुङ खाक्सानुमे, इक्को याॽमि इगोबेॽ लेङ्इटे़, खोसे़ॽको के़ॽ ले़ःॽपॽआ चोप योम्बोकमि टुम्बेॽ लुबेॽटा। खोनोॽ मुक्ति पिघुबा हाङ्बा खिरिस्टगो ने़ॽनेन्डे ?” 30इगो खा खेम्नुङ सहरबेॽहा याॽमिजि येसु खाङ्सिॽ खो टुढामबेॽ पिङ्आबामि।
31मोडोक्पेॽनोॽ चोङ्साजिडे़ॽ येसु चामे खा पिसाङ लुसुजि, “गुरु, चामा चोसे।”
32तर येसुडे़ॽ चोङ्साजि लुसुजि, “कानुङ हे़निङे़ॽ लेनोॽ मे़लेबॽआ चामे खा टुहा।”
33मोडोगे़ॽ चोङ्साजि कासामि, “असे़ॽ खो चामे खा लाघिॽटुजे ?”
34येसुडे़ॽ माहाजि लुसुजि, “काङ्मि चामे खा लुबॽआ चाहिँ का पाङ्घुबाडे़ॽ मिॽपॽआडोॽ ले़ःॽमानुङ खोमि योम्बोक पुरा ले़ःॽमानोॽ ले़ये। 35हे़निङे़ॽ लुन्डानुम ‘हागो रिउम महिना ए़क्साङ बालि हे़क्मा बेला लिये’ तर के़ॽ हे़निङ लुनिम्ने़, हे़निङे़ॽ खाक्सानुमे, बालि हे़क्मा बेला लिबेटे़। 36असे़ॽ बालि हे़ॽइन्डुहा मोसे़ॽ निमयाक चुप्मिन्डुए, ए़ॽसिमे हिङ्मवामि लागि सुम्इन्डुए, मोडोगे़ॽ रिःॽखुबानुङ हे़क्खुबा निप्पाङ्नोॽ सोरि साप्थाङ्इन्जे। 37मोडोगे़ॽ ‘इक्कोसे़ॽ रिःॽइन्डुए, हाइकोसे़ॽ हे़ॽइन्डुए’ लुमे बचन इगोबेॽ टोङ्इये। 38के़ॽ हे़निङे़ॽ बालि मे़न्टिबॽआ ठाउँबेॽ हे़क्सिॽ पाङ्इनिम्ने़। हाइखाजिडे़ॽ बालि टिसुजि मोबा खोजिमि बालिबाङ हे़निङे़ॽ फाइदा चुप्टानुम।”
39मो सामरि मेॽनामिॽडे़ॽ “के़हा याक्लोहा चोप खा के़ॽ मे़इःरेॽनोॽ खोसे़ॽ लुबेॽटिङ” लुनुङ लुबॽआसे़ॽ मो सहरबेॽहा बेॽलो सामरिजिडे़ॽ येसुबेॽ बिस्वास ले़टुजि। 40मोडोगे़ॽ सामरिजि येसु चुप्सिॽ लेन्नुङ “कानिङ्नुङ्नोॽ पेनेना” लुसाङ बिन्ति ले़टुजि। मोबा येसु नियाक मोबेॽ खोजिनुङ पेना। 41मोबा खोमि बचन खेम्नुङ हाइखा बेॽलो याॽमिजिडे़ॽ खोबेॽ बिस्वास ले़टुजि। 42माहा याॽमिजिडे़ॽ मो मेॽनामिॽ लुसुजि, “हागो हे़ने़ॽ लुबॽआ खा खेम्नुङ्रेॽ कानिङे़ॽ बिस्वास ले़ःॽपॽआ ने़ॽनि, तर कानिङ टाङ्बे़ॽ खोमि बचन खेम्नुङ बिस्वास ले़ए़टुङ्मे़। चइबानोॽ खो मक्खाम्डेमबेॽए मुक्तिदाङ्बा ले़ये लेः लुनुङ कानिङे़ॽ लेसुङ्मा।”
येसुडे़ॽ गालिलबेॽ हाइको खरिमा योम्बोक ले़ःॽपॽआ
43नियाक ए़क्साङ येसु सामरियाबाङ गालिलबेॽ खडा। 44(येसु खोमटाङ्बे़ॽ गबाहि पिबॽआ ले़टे़, “टाङ्बामि देसबेॽ अगमबक्ता आदर ले़टुजिनि।”) 45मोबा येसु गालिलबेॽ लेस्सा मोबेॽहा याॽमिजिडे़ॽ खो नुरोॽ स्वागत ले़टुजि, इन्ढोङ्होङ छुट्कारामि चाडमि याकपेॽ यरुसलेम खे़ॽमाबेॽ येसुडे़ॽ ले़ःॽपॽआ खरिहा योम्बोक माहाजिडे़ॽ खाङ्बॽआ ले़टे़। 46फेरि येसु गालिलमि काना सहरबेॽ लेस्सा। इगोबेॽनोॽ खोसे़ॽ योङा अङ्गुरमि मद्य टोङ्बॽआ ले़टा। येसु इगोबेॽ टुमाबेॽ कफनरहुम सहरबेॽए इक्को सरकारि मायोङ्बामि पसा टुक्पॽआ ले़टे़। 47येसु यहुदियाबाङ गालिलबेॽ लेङ्इटे़ लुमे खा खेम्डोक्नुङ मो मायोङ्बा येसुबेॽ खडा। मोबा खोसे़ॽ इडोॽ लुनुङ बिन्ति ले़टु, कफरनहुमबेॽ लेन्नुङ सिघे़ॽसिॽ पोरोक्पॽआ काङ्मि पसा नुबोक्पेॽमाना।
48येसुडे़ॽ खो लुसु, “हे़निङ खरिहा खामि चिङ्गा मे़ङ्खाङ्डोक्रो बिस्वासनोॽ ले़टानुम्नि।”
49मो मायोङ्बाडे़ॽ लुसु, “परभु, काङ्मि पसा सिमा याक्लोनोॽ आप्पेॽमायो।”
50येसुडे़ॽ खो लुसु, “खडे, हे़ने़ए़ पसा नुबोॽइये।” येसुडे़ॽ लुबॽआ बचनबेॽ मो टुक्खुबा पिच्छामि पाबे़ॽ बिस्वास ले़ःॽनुङ खोमि खिम खडा। 51मोबा खो खे़ॽमे़ॽनिसिमाबेॽ खोमि सेउतेजिडे़ॽ रामबेॽनोॽ चुप्नुङ लुबेॽटुजि, “हे़ने़ए़ पसा नुबोगा।” 52मो मायोङ्बाडे़ॽ सेउतेजि सिप्सुजि इन्डोक बोङ्राजि के़ए़ पसा नुबोगे़ ? माहाजिडे़ॽ लुसुजि, “असेॽङा लेन्डा इकबोङ ए़क्साङ खो ए़चे़ॽमाडे़ॽ लेडु।” 53येसुडे़ॽ खो “हे़ने़ए़ पसा नुबोॽइये” लुबॽआ बेलाबेॽनोॽ के़ए़ पसा नुबोक्इटा लुनुङ लेसु। मोबा खोनुङ खोमि खिमबेॽहा चोबे़ॽ येसुबेॽ बिस्वास ले़टुजि। 54इगो चाहिँ येसु यहुदियाबाङ गालिलबेॽ आप्नुङ ले़ःपॽआ हाइकोमा खरिमा योम्बोक ले़टे़।
Nu markerat:
युहन्ना 4: YAMP
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© 2023, Wycliffe Bible Translators, Inc. and Nepal Bible Society
