EXODUS 12
12
Lanhtak Puai
1Izipt ram ah khan Bawipa nih Moses le Aaron cu a chawnh hna i, #Lev 23.5; Nam 9.1-5; 28.16; Deu 16.1-2 2“Atu thla hi nan caah kum khat chung thla hmasa bik#12.2 thla hmasa bik: March thla canceo in April thla canceo tiang hrawng hi a ti. a si lai. 3Atu thla a ni hra ni ah hin, pa pakhat nih mahle innchungkhar ca cio ah tuufa pakhat maw mehehfa pakhat dik, nan i thim lai. 4Cun innchungkhar pakhatkhat cu, kha sa kha a pum in a ei khotu dingah mi nan tlawm tuk ahcun nan innpa nanmah an changtu hna he khan, a minung zat tuak in, cu sa cu nan i hrawm lai. Pakhat nih zeizat dah ei khawh a si ti tuak in cu sa a ei dingmi cu, cu zat cu si u sih ti khan nan khaan lai. 5Cu sa cu a bei lomi, hma zeihmanh a ngei lomi, kum khat a timi a si lai; tuu zong a si ah, meheh zong a si ah, a zeipaoh kha nan i thim khawh lai. 6Atu thla ni hleili ni tiang hi, nan i chiah hna lai i cu ni zanlei ah cun Israel mi vialte nih cu sa cu nan thah cio hna lai. 7Cun an thi kha tlawmpal in nan lak lai i nan innka tung le nan innkaba ah khan nan nalh hna lai i inn chungah khan sa cu nan ei lai. 8Cu zan ah cun sa cu a em in nan em lai i thilnu phulh lo changreu le ankha he nan ei lai. 9A hring in nan ei hna lai lo, chumh zongin nan ei hna lai lo, a pumning in nan em hna lai, an lu he an ke he an chungril he nan em hna lai i cuticun nan ei hna lai. 10An zeihmanh kha zinglei tiang nan tanter hna lai lo, a tangmi a um ahcun mei in nan khangh hrimhrim hna lai. 11Cun nan eining cu hi ti hin a si lai: nan puan kha nan i sawihnawt lai i nan kedan kha nan i danh lai i nan ṭhiangṭhunh kha nan i put lai, cuticun khulrang in nan ei lai. Cu puai cu Bawipa ca i Lanhtak Puai a si. 12Cu zan ah cun Izipt ram ah khan kaa chawk lai i fater vialte kha minung si hna seh, saram si hna seh, ka thah dih hna lai. Izipt ram pathian vialte kha dan ka tat dih hna lai; keimah hi Bawipa cu ka si. 13Thisen hi nannih nan umnak inn hmelchunhnak a si lai. Thisen kha ka hmuh tikah nannih cu kan lanhtak hna lai i Izipt ram ka hrem tikah dantatnak nih a chuahtermi rawhralnak cu nan cungah a tlung lai lo. 14Hi ni hi nan caah philh khawh lomi ni a si lai; Bawipa biaknak puai ah nan hman lai. A hmunmi puai ah nan ser lai i chan khat hnu chan khat in nan hman zungzal lai. #Exo 23.1; 34.18; Lev 23.6-8; Nam 28.17-25; Deu 16.3-8
15“ ‘Ni sarih chung thilnu phulh lo changreu kha nan ei lai. A hmasa bik ni ah, nan inn chung khan thilnu kha nan thianh dih hna lai, a ni hmasa bik ni in a ni sarihnak ni tiang thilnu phulhmi changreu a eimi cu Israel mi chung khan thlei an si lai. 16A ni hmasa bik ni le a ni sarihnak ni ah khan biaknak pumhnak nan ngei lai. Cu ni hnih chung cu rian zeihmanh nan ṭuan lai lo, nan ei awk rawl tuahto lawng kha onh nan si. 17Hi thilnu phulh lo changreu puai cu nannih nih nan ulh lai, zeicahtiah hi ni hi nan ralkapbu Izipt ram in ka chuahpi hna ni kha a si. Hi ni cu a hmunmi puai ni ah chan khat hnu chan khat in nan ulh lai. 18Thla hmasa bik thla, a ni hlei li ni zanlei in a ni kul le ni khat ni zanlei tiang, thilnu phulh lo changreu kha nan ei lai. 19Ni sarih chung, nan inn chungah thilnu nan chia hrimhrim lai lo, thilnu phulhmi changreu a eimi cu nanmah miphun chung mi a si ah, ramdang mi a si ah, Israel mi bu chungin thlei a si lai. 20Thilnu phulhmi changreu kha nan ei hrimhrim lai lo; nan inn cio ah thilnu phulh lo changreu kha nan rak ei cio lai,’ tiah Israel mi vialte kha nan thanh hna lai,” tiah a ti.
21Moses nih Israel mi hruaitu pawl vialte kha a auh hna i, “Va kal u law nan innchungkhar cio caah tuufa maw meheh fa maw vaa thim u law Lanhtak sa kha va that hna u. 22Hissop nge kha i khiah hna u law nan innleng i a ummi sathi ah khan nok hna u law nan innka tung le nan innkaba ah khan nalh hna u. Zinglei tiang, ahohmanh nan inn chungin nan chuak hrimhrim lai lo. 23Bawipa cu Izipt mi hna kha thah awkah Izipt ram i aa chawh tikah nan innkaba cung thi le nan innka tung cung thi kha a hmuh hna lai i cuticun hrawktu kha nanmah thah awkah nan inn chungah khan lut loin a umter lai. #Heb 11.28 24Hi phung hi nanmah le nan tefa hna caah a hmunmi phung nan zulh zungzal dingmi a si lai. 25Cun Bawipa nih, kan pek hna lai, tiah bia an kamhmi hna ram chung i nan luh tikah, hi phung hi nan zulh zungzal lai. 26Nan fale nih, ‘Hi phung hi a sullam zeidah a si?” tiah an in hal hna tikah, 27nannih nih, ‘Bawipa sinah pekmi lanhtak thawinak a si, zeicahtiah Izipt mi hna a rak thah hna ah khan Izipt ram i a um vemi Israel mi hna cu kan inn kha a lanhtak hna i kan inn cu a zuah hna,’ tiah nan leh hna lai,’ tiah a chimh hna. Mi zapi cu an khuk an i bil i Bawipa kha an biak. 28Israel mi cu an kal i mahticun an tuah; Bawipa nih Moses le Aaron a fial hna ning khan an tuah.
Fater Thihnak
29Zanṭim ah Bawipa nih Izipt ram fater vialte cu a thah hna; bawiṭhutdan cungah a ṭhu ding Faro fater thawk in thong chung i a ummi thongtla fater tiang an thi; saṭil fater vialte zong an thi. #Exo 4.22-23 30Faro le a bawi vialte hna le a mi vialte hna cu zan ah cun an tho i fak piin an ṭap, zeicahtiah mithi a um lonak inn pakhat hmanh a um lo. 31Cu zan ṭhiamṭhiam ah cun Faro nih khan Moses le Aaron cu a auh hna i, “Nanmah le Israel mi hna cu khulrang in chuak u. Ka mi kha kaltak hna u law nan ti bangin nan Pathian cu va bia u. 32Nan ka hal bangin nan tuu le nan meheh le nan caw kha i kalpi hna u law, chuak u. Cun thluachuahnak ka hmuh nakhnga thla ka campiak u,” a ti hna. 33Izipt mi nih khan, khulrang in chuak ko u, nan chuah lo ahcun kan thi dih ko lai, tiah heh tiah an nawl hna. 34Cucaah Israel mi nih cun thilnu phulh lo changnawn cu a kheng in an puan in an fun hna i an liang in an put hna. 35Israel mi nih cun Moses nih a chimh hna bang khan, Izipt mi cu sui hlawn le ngun hlawn le hnipuan kha an hal hna. #Exo 3.21-22 36Bawipa nih Izipt mi cu Israel mi cungah khan hmaizahnak a ngeihter hna i an halmi hna paoh kha an pek hna. Israel mi nih Izipt mi cu an ṭheh ṭipṭiap ko hna.
Israel Mi Izipt Ram In An Chuak
37Israel mi cu Rameses in an i thawh i Sukkoth ah an kal. Nu nau chim loin ke in a kalmipa thong za ruk tluk an si. 38Midang tampi le tuu le meheh le caw tampi zong an sinah cun an kal ve. 39Izipt ram in an i chuahpimi thilnu telh lo changnawn kha changreu ah an ser. Izipt ram in khulrang tuk in an ṭhawl hna caah khan thilnu cu an phulh lo. Rawl i timhlamhnak caan zeihmanh an ngei lo.
40Israel mi cu Izipt ram ah khan kum za li le kum sawm thum an um. #Gen 15.13; Gal 3.17 41Kum za li le sawm thum a tlin nite ah khan Bawipa ralkapbu vialte hna cu Izipt ram cun an chuak. 42Cu zan cu Bawipa nih Izipt ram chungin chuahpi awkah hngilh loin a congh hna zan kha a si. Cu zan cu Bawipa sin i pekchanhmi zan a si i Israel mi nih chan khat hnu chan khat in hngilh loin an um awk hnga zan cu a si.
Lanhtak Puai Tuah Ningcang
43 Bawipa nih Moses le Aaron cu a thawh hna i, “Lanhtak Puai tuah ningcang cu hi bantukin a si lai: Ramdangmi ahohmanh nih an ei lai lo, 44asinain nan cawkmi hna sal nih cun, an cuarpar tan an si hnuah an ei lai. 45A hung um tami nih si hna seh, nan hlan tami rianṭuantu si hna seh, cu hna nih cun an ei lai lo. 46Sa pum pum khat kha inn pakhat chungah ei a si lai i a zeihmanh kha lengah nan chuahpi lai lo; a ruh pakhat hmanh nan khiak lai lo. #Nam 9.12; Jhn 19.36 47Israel mi nih nan bu ning tein hi puai cu nan tuah awk a si lai. 48Ramdangmi pakhatkhat nan sinah a um i Bawipa sinah lanhtak puai kha tuah a duh ve ahcun a sin i a ummi pa vialte kha an cuarpar nan tan hmasa hna lai i cu hnuah cun puai ah cun aa tel kho lai; amah cu Israel mi taktak bantukin nan zoh lai. Sihmanhsehlaw cuarpar tan lomi nih cun an ei hrimhrim lai lo. 49Cu phunglam nih cun Israel mi taktak zong kha a nenh hna i nan sin i khua a sami ramdangmi zong kha a nenh hna,” tiah a ti. 50Israel mi vialte nih khan Moses le Aaron chimmi cu an ngaih i Bawipa nih Moses le Aaron a fialmi hna ning khan an tuah. 51Cu ni hrimhrim ah cun Bawipa nih Israel mi hna cu an bu an bu cio in Izipt ram khan a chuahpi hna.
Nu markerat:
EXODUS 12: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006