EXODUS 13
13
Fater Pathian Sin Pekchanhnak
1 Bawipa nih Moses cu a thawh i, 2“Fater, pa vialte cu keimah sinah nan ka pekchanh hna lai. Israel mi fater paohpaoh cu, minung an si ah, saram an si ah, keimah ta an si,” a ti. #Nam 3.13; Luk 2.23
Thilnu Phulh Lo Changreu Puai
3Mi zapi kha Moses nih cun a thawh hna i, “Sal ah nan cannak inn, Izipt ram in nan chuah ni hi philh hrimhrim hlah u, zeicahtiah hi ni ah hin Bawipa nih ṭhawnnak a liannganmi he an chuahpi hna. Thilnu phulhmi changreu nan ei hrimhrim lai lo. 4Abib#13.4 Abib thla cu March thla canceo in April thla canceo tiang hrawng hi a si. thla chung nihin ni ah hin Izipt ram in nan chuak lai. 5Kanaan mi le Hit mi le Amor mi le Hiv mi le Jabus mi an umnak ram kha nanmah pek awkah Bawipa nih nan pupa cu fek tein bia a rak kamh hna. Cu ram cu ram rum le ram ṭha a si. Cu ram chung an phakpi hna tikah hi thla ṭhiamṭhiam ah hin hi phunglam hi nan ulh lai. 6Ni sarih chung thilnu phulh lo changreu nan ei lai i a ni sarihnak ni ah Bawipa caah puai nan tuah lai. 7Thilnu telh lo changreu kha ni sarih chung nan ei lai; thilnu phulhmi changreu siseh, thilnu siseh, nan ram chungah nan umter hrimhrim lai lo. 8Cu ni ah cun nan fapa kha nan thawh hna lai i, ‘Hi ti kan tuahmi vialte hi Izipt ram in kan rak chuah tikah khan Bawipa nih kan ca i a tuahmi philh lonak caah a si,’ tiah nan chimh hna lai. 9Bawipa nih ṭhawnnak nganpi in Izipt ram in an chuahpi hna caah Bawipa phungbia cu nan chim zungzal awk a si lai, cu bantukin nan chim zungzal khawh nakhnga hi phunglam cu nan ban i nan i khihmi hmelchunhnak le nan cal i nan i ṭem chihmi ruah nolhtertu bantukin, thil an theih ṭhantertu hna a si lai. 10Cucaah hi phung cu amahle a caan te ah khan kum khat ah voi khat lengmang nan tuah lai,” a ti hna.
Fater
11“Bawipa nih nan pupa hna le nanmah kha fek tein a rak in kamhmi hna ram ah khan an luhpi hna lai. Cu ram cu an pek hna tikah. 12Kha nan hrin hmasa bik fapa paohpaoh kha nan pek lai; nan saṭil nih a hrin hmasa bik fa a pa paohpaoh cu Bawipa ta an si. #Exo 34.19-20; Luk 2.23 13Asinain la fa hmasa bik cu tuufa in nan tlanh hna lai. Tlanh nan duh lo ahcun a hngawng nan khiah hna lai. Cun nan fater pa paohpaoh cu nan tlanh hna lai. 14-15Hmailei ah nan fale nih, ‘Hihi a sullam zeidah a si?’ tiah an in hal hna ahcun, ‘Sal i kan cannak inn, Izipt ram chung i fater vialte kha, minung he saram he, Bawipa nih a rak thah dih hna. Cu ruangah cun fater paohpaoh Bawipa sinah raithawinak i kan pekchanh hna hi a si i kan fater hna kan tlanh hna hi a si,’ tiah nan leh hna lai. 16Bawipa nih Izipt ram in ṭhawnnak lianngan in a kan chuahpi caah hi phunglam cu nan caah, nan ban i nan i khihmi hmelchunhnak le nan cal i nan i ṭem chihmi hmelchunhnak bantukin, thil an hngalhter ṭhantu hna a si lai,” a ti.
Minmei Tom le Mei Tom
17An tuk awk a herhmi ral kha an hmuh hna tikah an lung i let in maw Izipt ram ah khan kir ṭhan hna lai, ti kha Pathian nih a phan caah, Faro nih Israel mi cu a kalter hna tikah khan, rili kam zulh in Filistia ram ah a hung kalmi lam kha a tawi bik a si ko nain, cu lam cu Pathian nih cun a zulhter hna lo. 18Phihlik kheng tlang vel in a velter deuh hna i thetse ram in Rili Sen lei tu ah khan a kalpi hna. Israel mi cu ral hriamnam tling tein an ngei. 19Josef nih Israel mi cu fek tein bia a kamter hna bantuk khan, Moses nih Josef ruh cu a kalpi. Josef nih khan zeitindah a rak ti tiah, “Pathian nih an bawmh hrimhrim hna lai; cu tikah ka ruh cu hika hmun hin nan sinah nan i kalpi lai,” a rak ti. #Gen 50.25; Jos 24.32
20Sukkoth khua cun an i thawh i thetse ram a ramri i a ummi Etham khua ah khan an riak. 21Chun ah Bawipa cu an hmaiah minmei tom in annih kha lam hmuhsak awkah a kal i zan ah an hmaiah mei tom in annih kha ceunak pek awkah a kal, cucaah cun zan zongah chun zongah an kal kho. 22Minmei tom cu Israel mi hna hmaiah khan chun ah a um zungzal i mei tom cu zan ah a um zungzal ve.
Nu markerat:
EXODUS 13: HCL06
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Lai (Hakha) Common Language Bible © Bible Society of Myanmar 2006