Jǒn 17
17
Jisos o/fé Nshwam o-kye Osówo ké Bubwô-Bǎmgbán Emen
1Ké nkéré mú Jisos oo/raa byěm ḿbyín kpók, o-bêem achi o-tún kyíbóng, o-raa o/fu, Kyítá, nkéré oo/fyi. Kye Wǎn eyên akpee, eringe nyí Wǎn eyên to oda ǒ ekye akpee. 2Ké ebóng, wo aa/kye ǎ busa ḿbú kángkáng banet badakyú ké bubwô emen, eringe nyí nyǐ odakye banet ḿbé wo a/kye ǎ dyikpen ńdyí ne banyá. 3Ne nyín něen eringe nyí mbé badakyú ne dyikpen ńdyí ne banyá, â mbé mbe ba-nyît ng ǒ ba/fu, wo nké amu Osówo kǎnchí mú ntûntû, ne â mbé mbe ba-nyît ng to Jisos Karâs mú wo a/twóm. 4Me nn/tông busa eyên ké ejíí, ké nǎ, n/chi bǎmkpóngé eyên ba-man ḿbé a/kye mě. 5Kyítá, kye mě ofê ké bushú eyên kántîk, dyizong-ofê ámu mú wo a/kye mě, ne a-kûchi ejíí.
6Me nn/chi banet ḿbé wo a/fîm ké ejíí a-kye mě ba-nyît ǒ. Mbé ba/já ǒ wo, ne wo to nké a/kye mě kámbé. Mbé baa/chi eringe nyí wo a/sét, 7ne kántîk ba-kú ba-nyît ng ba/fu, kángkáng byěm ḿbyí wo a/kye mě mbyi byi-fím m ké abwô eyên. 8Ké ebóng, me nn/sét kámbé kyitwóm ńkyí wo a/twóm mě, ne mbé to ba/koo kánkyí. Ba-kú ba-nyît ng to ba/fu, ntûntû me n/fím ké abwô eyên, ne ba-kú ba-bángê e ne atyém ebe ba/fu, wo nké a/twóm mě.
9Me mu n-fâ nshwam n-kyâ ǒ ké bubwô ebe. Me n*fí n-fâ nshwam n-kyâ ǒ ké bubwô ḿbú banet ḿbé ké ejíí ńnyín* nké ké bubwô ḿbú banet ḿbé wo a/kye mě, ké ebóng, mbé ba/já ǒ wo. 10Kángkáng byěm ḿbyí me mu ne mbyí, ḿbyí eyên, ne kángkáng byěm ḿbyí wo amu ne mbyí, ḿbyí ejí, ne akpee ejí nyi a-rángê e ké bubwô ebe. 11Nké kántîk me n-kú m-bâ n-kâm ǒ. Me n*fí to ké ejíí* nké mbé mbe ké ejíí. Kyítá mú o/nwa o-shwôm, bám kámbé ké busa ḿbú dyizîn eyên, dyizîn ándyi ńdyí wo a/kye mě, eringe nyí mbé badakyú wǎ onet obónge, wǎ eringe nyí wo ne me byimu eringe ebónge. 12Ké nkéré mú me m/mû n/tôong ne mbé, m/bám kámbé ké busa ḿbú dyizîn eyên, dyizîn ándyi ńdyí wo a/kye mě. Me m/bám kámbé, onet nang obónge o*da/tánê* kyi*da/shwôm onet ámu mú o/fu, nyǐ o-man o-tánê* eringe ejá eyên nyí ba/sáng kyísí edakyú ntûntû. 13Kántîk, me n-kú m-bâ n-kâm ǒ. Ne mu n-raa ng byěm ḿbyín něen ké ejíí, eringe nyí mbé badakyú ne bunyîn-dyityém ejí bumúmú ké atyém ebe bu-kwárê kámbé kerededet. 14Me n/sét kámbé kyitwóm eyên ne ejíí e/sa kafâ ne mbé, ké ebóng, mbé ba*da/já ejíí* wǎ eringe nyí me to n*da/já kányí*. 15Me n*fí n-fâ nshwam n/fu, fîm kámbé ké ejíí* nké mu n-fâ n/fu, bám kámbé kyi-kim ne Otu-Byibî-Barím. 16Wǎ eringe nyí me n*da/já ejíí* éné to nké mbé ba*da/já kányí*. 17Kúng kámbé a-kye byiko eyên ké bukwóp ḿbú ntûntû. Ké nǎ, ejá eyên, ányi ntûntû. 18Me n/twóm kámbé ké ejíí, wǎ eringe nyí wo a/twóm mě ké ejíí. 19Ne ké bubwô ebe, nn/kúng byiko ejí n-kye ǒ, eringe nyí mbé to badakúng byiko ebe ntûntû ba-kye ǒ.
20Me n*fí n-fâ nshwam n-kyâ ǒ ké bubwô ḿbú bǎmgbán ejí nké nke* nké mu n-fâ to ké bubwô ḿbú banet ḿbé ba/bángê ne me ne atyém ebe ké bubwô ḿbú kyitwóm ebe ńkyí ba/jwo. 21Me mu n-fâ nshwam n/fu, kyi/bát mbé ashí amúmú bafiri wǎ onet obónge. Kyítá, kyi/bát mbé bakyú ké atyém eten wǎ eringe nyí wo amu ké dyityém ejí, me to ké ńdyí eyên. Kyi/bát mbé bafiri wǎ onet obónge, eringe nyí banet ḿbé ké ejíí ba/chi ba-bángê ba/fu, wo nké a/twóm mě. 22Me nn/kye kámbé ofê, wǎ eringe nyí wo a/kye mě, eringe nyí mbé badafiri wǎ onet obónge, wǎ eringe nyí me ne wo byimu. 23Me mu ké atyém ebe, ne wo amu ké ńdyí ejí, eringe nyí mbé badakyú kerededet wǎ onet obónge. Eringe nyí ejíí edanyît e/fu, wo nké a/twóm mě, ne eringe nyí edanyît to e/fu, mbé mbe ba-jê ng ǒ wǎ eringe nyí me mu n-jê ng ǒ.
24Kyítá, wo aa/kye mě me bǎmgbán ejí, ne me mu n-ryuu ng n/fu, mbé bakyú ne me ké kyikit ńkyí me ndakyú, eringe nyí mbé badari ofê mú wo a/kye mě. Ké ebóng, me m/kpet ǒ wo ejê kpá, ne a-kûchi ejíí. 25Kyítá mú odachi kanong, banet ḿbé ké ejíí ńnyín ba*fí ba-nyît ng ǒ* nké me mu n-nyît ng ǒ, ne bǎmgbán ejí ḿbén mbe ba-nyît ng to ba/fu, wo nké a/twóm mě. 26Me nn/chi kámbé ba-nyît ǒ, ne n/chi n-kûchi éné n-ca kashú, eringe nyí kyijé ńkyí me mu n-jê ng ǒ wo kyi/chi kyi-firi ké atyém ebe, ne me to ké atyém ebe.
Nu markerat:
Jǒn 17: BKY
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Published by the Bible Society of Nigeria @ 1985
