Jǒn 18
18
Ba/kám Jisos
(Mátyuu 26:47-56; Mâk 14:43-50; Lûk 22:47-53)
1Ké nkéré mú Jisos oo/fé nshwam mún, nyǐ ne bǎmgbán emen ba/dim ba-nyáng kaǎwán-kace ńké badakó Kyídoron. Kyifát kyi/mû ké kyikit ánkyi, ne Jisos ne bǎmgbán emen ba-da-nung ké nkyí. 2Júdas mú mu o-chi i ba-kám Jisos o/mû o-nyît ng kyikit ńkyí kyifát ánkyi nkyi. Ké ebóng, Jisos ne bǎmgbán emen baa/kâm barî ányi kampén chwóó. 3Júdas kâng o-kúng dyizu-basúja ne kyicê-bambâm kiǐtí-kyise-kyifen-Osówo echi ḿbé batu-banchi kyifen-Osówo ne banet-ncibi mú badakó Fárasyî ba/twóm, ba-da-nung ké kafâ-kyifát ánkyi. Banet ámbe ba/mû ba/kám byěm-byití, ne ba/níbî to etyuryíkáng ne baka. 4Jisos o/mû mu o-nyît ng kángkáng byěm ḿbyí mbyi byi-bâ ǎ ebachi. Ne o-king kâng o-ca kashú, o-bí kámbé o/fu, ben bamu ba-kyé ng yeě.
5Mbé ba-faa ba/fu, Jisos mú o/fím Názáret.
Nyǐ o-faa kámbé o/fu, dǐi me něen i.
Júdas mú mu o-chi i ba-kám Jisos o/mû ányi cip ne mbé. 6Ké nkéré mú Jisos o/faa kámbé o/fu, dǐi me něen i, mbé ba/bwa kyikû esim ésim ba-da-myii kyísí. 7Jisos o-chîbí kámbé o/fu, ben bamu ba-kyé ng yeě.
Mbé ba-faa ba/fu, Jisos mú o/fím Názáret.
8Jisos o-faa o/fu, me nn/sét běn n/fu, dǐi me něen i. Â me nké bamu ba-kyé ng mě, mîng n̂g banet ḿbén ba-dim. 9Nyǐ o/raa chwǒm ńkyín, eringe ńkyí nyǐ o/mû o/raa kyidakyú ntûntû, ńkyí o/fu, Kyítá, me onet nang obónge o*da mě etánê ké burwám-banet ḿbé wo a/kye mě*.
10Sámon Pyíta o/mû ne kashwám. O-zú kánké o-kpet ósóng mú otu-nchi kyifen-Osówo ké butông ḿbú bubwô-etyebéng, o-két. Dyizîn ńdyí ósóng ámu dyi/mû dyi-bángê e Mákus. 11Jisos o-raa ne Pyíta o/fu, bwa ne kashwám eyên a-fé ké nkwóp. Wo amu a-kabe ng a/fu, me mm*ba/chi n-jwáp ké mmîk mú busông eri*? mú Bonchí ejí oo/kye mě*?
Jisos o/bwom ké Bushú-Ánas
12Dyizu-basúja ándyi ne onet-dyishí ebe ne banet-mbâm ḿbé Jûs ba-kám Jisos ba-bwá ǎ, 13ne ba-yip ǎ ba-dim ne nyǐ kpá kyikit-Ánas. Ánas o/mû bonchí-onyi-Káfas mú o/mû otu-nchi kyifen-Osówo ké dyije ándyi. 14Káfas nké o/mû o/kye banet-esuk nyí eryên nyí banet-Jûs bacê o/fu, kyi/mû kyi/nwa kyi-shwôm ńkyí onet obónge odakpú ké bubwô ḿbú kángkáng banet.
Pyíta o/né Jisos
(Mátyuu 26:69-70; Mâk 14:66-68; Lûk 22:55-57)
15Sámon-Pyíta ne ḿgbán-Jisos okíri ba/dim ne Jisos ké kyikû. Otu-nchi kyifen-Osówo o/mû mu o-nyît ng ḿgbán-Jisos ámu kanong kanong. Ké bubwô ámbu, nyǐ o/nung ne Jisos ké kyikû, ké kafâ-kabám ńké otu-nchi kyifen-Osówo ámu. 16Pyíta o/waa kyíjí ké ocím-dyifyi. Ḿgbán-Jisos ámu mú otu-nchi kyifen-Osówo o/mû mu o-nyît ng ǎ kanong kanong o-bwa esim kyíjí, o-da-pem ne wǎn-onyinyi mú o/mû o-bám m ocím-dyifyi, ne o-kpî Pyíta o-nung ne nyǐ ké kafâ-kabám. 17Wǎn-onyinyi ámu mú o/mû o-bám m ocím-dyifyi o-bí Pyíta o/fu, wo a*fí ké burwám-bǎmgbán-onyinchéng ámu*?
Pyíta o-faa o/fu, aa*wááng*. Me n*fí*.
18Dyibyi dyi/mû ndyi dyi-nwa ng. Básóng-otu-nchi kyifen-Osówo ámu ne bambâm kiǐtí-kyise-kyifen-Osówo echi ba/mû ba/wóngê okwâ, ba-bwom ba-wáp kámú ba-fé ké kafâ mbe ba-jwaa ng. Pyíta o-shwôm o-da-bwom ányi ne mbé, o-kpet ejwaa to okwâ.
Otu-Nchi Kyifen-Osówo o/bí Jisos Bǎmbím
(Mátyuu 26:59-66; Mâk 14:55-64; Lûk 22:66-71)
19Otu-nchi kyifen-Osówo o/bí Jisos bǎmbím kyi-kim ne bǎmgbán emen ne byěm ḿbyí nyǐ mu o-tángê e. 20Jisos o-faa o/fu, me kángkáng nkéré m/mû n-sét ng kángkáng banet byiraa kyíjí gbúúl ké kafâ-byise-ékwâbashi ne ké kiǐtí-kyise-kyifen-Osówo echi, byikit ḿbyí kángkáng banet-Jûs mbe ba-cibi ng nké me m/mû n-tángê e kángkáng byěm ejí. Me n*da/raa ne chwǒm nang kyibónge ké kadip*. 21Ebóng kâng ńkyí wo amu a-bí ng mě bǎmbím. Bí banet ḿbé ba/jwo byiraa ejí. Bí kámbé ńkyí me n/sét kámbé. Mbé mbe ba-nyît ng ńkyí me n/fu.
22Ké nkéré mú Jisos o/raa ńkyín, onet-mbâm obónge o-díp ǎ dyikwâ. O-bí Jisos o/fu, ebóng amu a-raa ng éné ne otu-nchi kyifen-Osówo.
23Jisos o-faa ǎ o/fu, â me n*da/man eraa* sét nang yeě nang yeě mú mu nyín ńkyí me n/raa. Nké â m/man eraa, ebóng ńkyí wo a/díp mě dyikwâ.
24Ánas o-twóm kâng Jisos mú o/tôong ne erí bwábwá o-dim kyikit-Káfas mú o/mû otu-nchi kyifen-Osówo.
Pyíta o/chîné Jisos
(Mátyuu 26:71-75; Mâk 14:69-72; Lûk 22:58-62)
25Pyíta o/mû o/tôong ányi cip o-jwaa ng okwâ. Banet ḿbé áku ba-bí ǎ kâng ba/fu, wo a*fí ké burwám-bǎmgbán-onyinchéng ámu*?
Nké Pyíta o/né kánkyí. O-raa o/fu, aa*wááng*. Me n*fí*.
26Ósóng obónge mú otu-nchi kyifen-Osówo, mú ba/fím ne onyinchéng mú Pyíta o/mû o/két ǎ butông, o-raa o/fu, me n*da ǒ eri ne nyǐ ké kyifát ánkyi*?
27Pyíta o-chîné o/fu, aa*wááng*. Ne ké abe ányi, otúkwa o-waa o-kó.
Jisos o/bwom ké Bushú ḿbú Pálet
(Mátyuu 27:1-2, 11-14; Mâk 15:1-5; Lûk 23:1-5)
28Ba-kpî Jisos o-byí ké kyise ńkyí Káfas, ba-dim ne nyǐ ké kyibám ńkyí otu-dyishí-oshê. Kyi/mû ké dyicófóróng pirípirí. Banet-Jûs ba*da/nung ké kafâ-kyise* ké ebóng, mbé mbe ba-ryuu ng ba/fu, chwǒm-ociring kyi*data kámbé ké byiko* eringe nyí mbé badaman eryí byiryíng ḿbyí dyijî-kyifen ńkyí Shwôm. 29Pálet o-byí kâng o-kâm kámbé kyíjí, o-bí kámbé o/fu, ben ba/fu, onyinchéng mún něen o/chi ebóng dyizong-kyibî.
30Mbé ba-faa ǎ ba/fu, be byi/mû bii*ba/chi byi-bâ ne nyǐ kyikit eyên* â o/mû o*da/chi kyibî-chwǒm*.
31Pálet o-sét kámbé o/fu, ben bayén kúng n̂g ǎ ba-dim ne nyǐ ba-da-pan ǎ mpan wǎ eringe nyí byije ḿbyí enen byi/fu.
Ḿbé banet-Jûs ámbe ba-faa ba/fu, be byi*fí ne busa ḿbú byidafu, baju onet nang obónge*. 32Chwǒm ńkyín něen kyi/chi, eringe ńkyí Jisos o/mû o/sét dyizong-bukyû ḿbú nyǐ o/chi o-kpú kyidakyú ntûntû.
33Pálet o-bwa esim ké kafâ-kyise emen o-da-kó Jisos. Ne o-bí ǎ o/fu, wo a-chi i otu mú banet-Jûs?
34Jisos o-waa ányi o-bí Pálet o/fu, ḿbím mún o/fím ne wo oyén aa, aa banet bakíri nké ba/sét ǒ kyi-kim ne me.
35Pálet o-faa ǎ o/fu, wo a/kabe a/fu, me n-chi i onet-Jûs dí. Banet-oshê eyên ne batu-banchi kyifen-Osówo enen nké ba/bê ne wo ké bushú ejí. Wo a/chi ebóng.
36Jisos o-sét ǎ o/fu, Butu ḿbú ejí bu*fí ké ejíí ńnyín*. Â Butu ḿbú ejí bu/mû ké ejíí ńnyín, banet ḿbé mbe ne me ké kyikû ba/mû ba-nwa ng eringe nyí baa*kúng mě ba-kye banet-Jûs*. Aa*wááng*. Butu ḿbú ejí bu*fí ńnyín*.
37Ne Pálet o-waa ányi o-bí ǎ o/fu, î, wo kántîk a-chi i otu? Jisos o-faa ǎ o/fu, wo nké a/fu, me n-chi i otu. Me ba/fwon mě, ne m-bâ ké ejíí, ké chwǒm něen kyibónge. N/fu, m-bâ ng esét kyi-kim ne ntûntû. Nang yeě nké o/bwom ké ntûntû, o-jwo ng mě.
38Pálet o-bí ǎ o/fu, ntûntû ányi ebóng.
Ba/két Mpan ba/fu, baju Jisos
(Mátyuu 27:15-31; Mâk 15:6-20; Lûk 23:13-25)
Pálet o-bwa kâng esim kyíjí o-kâm ḿbé Jûs, o-sét kámbé o/fu, me n*da/ri ne dyishí-chwǒm ńdyí ndakét mpan n/fu, baju ǎ*. 39Nké wǎ eringe nyí édúú enen e/fu, me n-fwam m ezú onet-mgbokobá obónge abwô ké nkéré mú dyijî-kyifen ńkyí Shwôm. Ben bamu ba-ryuu ng ba/fu, nzú ben otu mú banet-Jûs abwô dí.
40Mbé ba-wonge ba/fu, aa*wááng*. *Chí nyǐ*. Be byimu byi-ryuu ng Barábas. Barábas o/mû onet-kajii.
Nu markerat:
Jǒn 18: BKY
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Published by the Bible Society of Nigeria @ 1985
