Maka 8
8
Jisu ko niaemo ariku vuro maba madu
(Matiu 15:32-39)
1Ni komi quli ko tova inio matu kubo vaki ta mata ke olake Jisu kasi. Ni seta puliama sailao samu, so sole vota o nokaemake voko disaipeli madu ni eri kiolake, 2“Aṉata a matu roquema nia maba poso, ako seta lula zouke ṉaniu keta eva sole anime kasi ni vairutu seta puliama sailao samu. 3Ni aṉata pui aqa zaria vaitoemo se puliako niaemo, ako lekuleku ke ekale sole ke vaitou keru ke peuru poso kale, ako kake ta matu vaṉʼazo ke kuevini sole,” kiolake vo Jisu.
4Ni voko disaipeli madu ta eri kikelake vokasi, “Ta lai nio animeta me qovou ko sailao komia lealea kama zaekale nio me niaemou nia maba poso?” kikelake. 5Ni vo Jisu ta eri kiolake sekasi, “Latau bereti kio ikoana mekasi?” Ni seta ke vati tiorikake ni eri kikelake, “Sikeura bereti,” kikelake.
6Nio vo Jisu ta o bazuemake sea vaki tu ke papu miduku kale. Ni vota opa koake koa sikeura bereti, ni o kati vararaitake ni uriavo o kasekake Baṉara kasi, ni o palapalamukake ni vota o katimake o disaipeli madu, ni se disaipeli madu ta ke puarikake sea maba poso kasi.
7Ni seta mata kama kejuma niuniu samu. So sole vo Jisu ta mata uriavo o kasekake Baṉara kasi, ni vota o bazuemake voko disaipeli madu tu mata ke puariko. 8Nio sea kiadamu ta ke vuatake ni keta maqinake. Ni koko tova se disaipeli madu ta kekai sukatikake sikeura suakao koko palakiako sailao. 9Ni sea kiadamu ta ariku vuro madu inio koa taku keru, melai rekoreko ni meqora poso ta pui kepa ataeme.
Ni Jisu ta o soroemake sea maba poso ke peuru poso kale, 10ni raisiraisi vota ota zazuke vaka topi ni ota olake Dalamanuta peuru kale.
Se Parese madu ko paseko ko aqasiele ama iruruputo
(Matiu 16:1-4; Luke 12:54-56)
11Ni kake Parese madu ta ke olake Jisu kasi ni kekai zariake madoevo vo, tu keta va kelo kama saruilo. So sole seta ke soroevake vo tu oma ereko kama aqasiele ama iruruputo, tu seta tuvevo ke iko ta vo Baṉara ta ovai zoleiva vo Jisu kio. 12Melai Jisu ta ota voniu kozatake ni eri kiolake, “Noi sole inio mea maba poso mela komia taku kalea mela ta meqai zaria kelo ko aqasiele ama iruruputo? Tuvevo avole aṉata a bazuemela me, aṉata pui aba erekou ko aqasiele ama iruruputo tu meta me qelou,” kiolake vo Jisu. 13Nio Jisu ni voko disaipeli madu ta ke vaemake se ni keta zazuke vaka topi, ni keta pakeake Qalili toupa ko koa pake ṉaniu o peatakoi vasia rana.
Jisu ko balauvimo voko disaipeli madu tu pui ke lulueko se Parese madu ni Herodi ko kalo
(Matiu 16:5-12)
14Ni se disaipeli madu ta ukaka ke ike tu ke boriko kama bereti seko malezimo ama, so keru ke zazi keru vaka topi, melai omadeu bereti ko kiada ta ikoana sekasi koa vaka topi. 15Ni Jisu ta o balauvimake se ni eri kiolake, “Taka balauvomo se Parese madu ni Herodi#8:15 Ṉota kea Herodi Anitipasi dikisonare kale. ko isiti,” kiolake. 16Ni seta ke pesipesitake ke ṉavio kude ni eri kikelake, “Animeta pui meba borikala ko bereti nio nei so mela kiola,” kikelake.
17Melai vo Jisu ta obe kai nianiiake se kikelani, so sole vota eri ma kiolake, “Noi sole inio meta meqai pesipesita me ṉavio kude meko pui boriko ko bereti? Meta pui nio meqai nianiia ni pui nio me baqumuka kio? Meko kerukeru ta kutumana kobeta eva kio? 18Ni meta vilu samela melai pui me rovea kelokelozato? Ni taliṉa samela melai pui me rovea viqaviqazata? Ni lula ukaka me ika 19so keru aṉa a balamuke keru sike bereti se sike vuro maba kasi kio? Ni latau suakao kio meme jukatikema koko palakiovima sailao?” Ni seta ke vati tiorikake ni eri kikelake, “Toni omuqa suakao,” kikelake. 20Ni mata “Latau suakao kio me jukatikema koko palakiovima sailao so keru aṉa a niaeme keru ariku vuro maba madu sikeura bereti kale?” kiolake. Nio seta ke vati tiorikake ni eri kikelake, “Sikeura suakao,” kikelake. 21Nio Jisu ta mata eri ma kiolake, “Meta maba pui nio soikoni meqai nianiia, ma?” kiolake.
Jisu ko urikivo leqa kala maba Betiseida
22Ni so keru seke baroa keru Betiseida peuru kale, kake maba poso ta ke vati olake kala leqa kala maba Jisu kasi. Ni seta ke pasevake vo tu ovai iviko voko ṉase tu o urikivo.
23Nio Jisu ta ota va noqoekake voko ṉase ni o vati olake edolokoi koa peuru ko kupekupe, ni vota ota va supatake voko vilu ni ota va kamakake ni eri kiolake vo leqa kala maba kasi, “Noi nio, ṉobe kea kama quli kio?” kiolake. 24Nio nea maba ta ota keazata ni eri kiolake, “E, aṉata a mea maba poso kebeta talia, melai ore jaria melo,” kiolake. 25So sole Jisu ta mata ota va tova kamakake voko vilu. Ni koa taku inio nea maba ta ota keazatake, ni o roveake uria kelo kiadama quli. 26Ni Jisu ta o matu pasevake voa maba tu pui o vaitou koa peuru kale, melai tutumazi avole o ziovou o ṉaviko pade kasi.
Pita ko kasa ivo vo Jisu ta Baṉara o pitoevani Pakio inio
(Matiu 16:13-20; Luke 9:18-21)
27Ni Jisu ni voko disaipeli madu ta keta olake Sizaria Pilipai ko ketaketama peuru poso kale. Ni se kebeta talia keru keve tona inio Jisu ta o kuimaemake voko disaipeli madu ni eri kiolake, “Lala lala ta bela kikela se maba poso?” kiolake. 28Ni seta eri kikelake, “Kake ta Jone Bapitaiso ṉa ṉa kikela. Mata kake ta Ilaija ṉa ṉa kikela. Ni mata kake ta mata kala poropita ṉa ṉa kikela,” kikelake.
29Ni vota mata o kuimaemake se ni eri kiolake, “Ta meta lala lala inio bela kimela?” Nio vo Pita ta o vati tiorikake ni eri kiolake, “Ṉota vo Baṉara o pitoeṉeni Pakio ṉa,” kiolake. 30Ni Jisu ta o bazuemake se tu seta pui kekai bazutou ta vo inio vo Baṉara o pitoeveni Pakio.
Jisu kai bazuto voko tolailo ni voko vou ni seke luluevo amu ko tolailo
(Matiu 16:21-28; Luke 9:22-27)
31Ni vo Jisu ta o taniekake nianiiekimo voko disaipeli madu, ni eri kiolake, “Aṉa maba a eveni lala ta ke tolaelou ni kelai keduvou se lotu tanatanamu ni se raura kama siama madu ni Mosese ko Bazu kekai nianiiekatani. Ni seta ke vouvaelou aṉa, melai zouke ala ṉaniu kale inio mata a jaevou,” kiolake. 32Ni ko quli vo Jisu o mati nianiiekikake ta matu zakaremu o ika sekasi. Nio vo Pita ta o vati edoliake vo Jisu ni o riqaevake vo. 33Melai vo Jisu ta oma lilitake voko disaipeli madu ni ova ririzake vo Pita ni eri va kiolake, “Ose Setani, ako koa kerukeru ta pui vo Baṉara kasi azo ko kuevako sole, melai maba kasi azo,” kiolake vo Jisu.
34Ni Jisu ta o nokaemake sea vaki ni voko disaipeli madu o ṉavi kasi ni eri kiolake, “Vo oka zariani luluelo aṉa ta vota pui o kerukeruilou o ṉavi o kiada melai vota o tolailou aṉa ko luluelo kale omadeuvo vo maba vo o borikani jari o ṉaviko korosi, vo okai vouvo ama. 35Ako kala vo oka zariani pakieko voko tupu kale ama saevo, ta vota o niumaeka inio voko saevo tovama saevo kale ama. Melai vo o ṉamuko ala voko tupu kale ama saevo aṉa ni aṉako Uri ama Bazu ko lulueko ko kio kale ta o kovou noqola kama saevo. 36Noi nio? Kala maba o ṉeamukani komia peuru ma peuru kale ama batiro melai okai suatani ko noqola kama saevo ta obe tauveziovo ala inio komia peuru ma peuru ama quli kale, kio? Maba pui! 37Pulia quli ta opa katikou tu o kovo ko noqola kama saevo. 38Ako voa maba vo ota la qurato ala aṉa ni aṉako nianiiekato se oqu pide amu ni boutare sama maba poso kasi komia taku kale amu, ta aṉa maba a eveni lala melai ada va zoliovou voa maba so keru aṉa a vaitou keru aṉavo Mama ko ṉaṉaidara kale ni voko mateana madu sase.”
Nu markerat:
Maka 8: BLBNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in the Bilua language, Solomon Islands © The Bible Society of the South Pacific, 1995.
