O KISAH RASUL-RASUL 5
5
O Ananias deʼ o ngo Safira
1Mä naga o nauru womatëngo airomanga o Ananias. Unanga de ngoi hekata amiromanga o ngo Safira, onangö yahukunoka manga tonaka utu. 2Matiwi maijaino gënanga mahononga ünanga watumungu mangale aidiri mahirete deʼ mahomoa ünanga wohilapahi o rasul-rasulika. Unanga wodiai gënanga imahiöriki de ngoihekata. 3O Petrus witemo unangika, ”Ananias, yadodoa ngona nomahigumal̄aika o Ibilihi yakuaha anihininga, hiädono ngona naeluku ma Jou Madutu ai Womaha, de noma hibongonika natumungu matiwi mahononga maijaino ani tonaka gënanga mangale ani diri mahirete? 4O tonaka gënanga ngona nahukunuahi ma kato ngonamadutu. Deʼ o tonaka gënanga nahukunokaö, matiwiö katongonahi dika madutu. Hoʼ yadodoa naga anihininga magoronaka o dibanga mangale nodiai hokogënanga? O nyawaikaua ngona näeluku mä ma Jou Madutuika!” 5Hokogënanga woihene o Ananias o demo gënanga, ünanga woruba, gila-gila wohonenge. O nyawa mata-mata yoihene okia idadioka gënanga dadi yohawana duru. 6O gogoduru yoböa yahawo o Ananias aimayeti, daha yao ihihupu yoiki yalungunu.
7Done ho jam hange ipahaika ngoihekata mowohama. Münanga mohiorikua okia ipahaino idadi. 8O Petrus womitemo munangika, ”Abeika nohihingahu ngohino: O tonaka ngona deʼ anirokata niahuku-hukunoka gënanga, nenangö ma amoko maija?” O Ananias ngoihekata mohaluhu, ”Igoungu, genangö maija.”
9Daha o Petrus womitemo munangika, ”Yadodoa ngona de anirokata nimahininga moi mangale niataili ma Jou ai Womaha? Noihene! O nyawa iwilolungu-lungunu anirokata yoböa inoka. Onanga aha iniao ngona inihihupuoli.” 10Oraha gënanga dika o Ananias ngoihekata gënanga moruba deʼ mohonenge o Petrus aihimangoka. Deʼ oraha o gogoduru gënanga yowohama, önanga imimäke münanga mohonengoka. Daha önanga yao amimayeti ihihupu deʼ imilungunu amirokata aidatekuku. 11O nyawa yongaku-ngaku mata-mata gënanga deʼ o nyawa mahomoahi, yoihene mangale okia idadi gënanga, yodadi yohawana.
I hohëra-hëranga deʼ o hali kabiahaua
12Karana o rasul-rasul manga leleani, mangöe ihëra-hëranga deʼ o hali kabiahaua idadi o kawaha manga hidogoronaka. O nyawa yongaku-ngaku mata-mata de o hininga moi imatöomu o Löa Salomo ma Jou ai Tauoka. 13Deʼ o nyawa maporetino koiwa yobarani yoböa imatöomu de o nyawa yongaku-ngaku gënanga. Mä o nyawa yongaku-ngaku gënanga duru yahoromati o kawahaino. 14Deʼ iholoi itedekana iholoi idogo manga ngöe o nyawa yongaku-ngaku ma Jouika – yaoa o nauru yaoa o ngoheka. 15De mangale imadadi hokogënanga marupa, hiädono o nyawa yopopanyake yakelenga manga ngidu-ngidu mangï mal̄okuoka ekola o tikara, daha yaao o ngekomika, hupaya önanga mangale mahuhutulu yakunu yadäene o Petrus aigurumini, nako o Petrus wakaino genangino. 16O nyawa mangangöe, kayotuo-tuono yoböa o kota-kotaino o Yerusalem magilolitino. Onanga yaao manga nyawa yopopanyake deʼ yapopootekika o womaha madorou. Deʼ o nyawa yowöe-wöe gënanga wahitogumu mata-mata.
O rasul-rasul ya aniaya
17Mabaha o imam womomulia deʼ mata-mata iwinöninïki, enagënanga o Sadukioka manyawa mangadöomu, yomuläenge yä aniaya, hababu önanga manga hininga yohiri. 18O rasul-rasul gënanga yätagoko daha yahingohama o nyawa yowöe-wöe manga bui magoronaika. 19Mä yohutuku, ma Jou aimalaekat womatëngo wahelenga o bui mangora-ngorana, daha o rasul-rasul gënanga waao wahihupu. O malaekat gënanga yatemo o rasul-rasulika gënanga, 20”Nioiki nimaoko ma Jou ai Tauoka deʼ niahingahu o nyawa yowöe-wöeika mangale o ngango mahungi nënanga.” 21O rasul-rasulö gënanga yamoteke o malaekat mabehehongo gënanga. Kao ngoru-ngoruminohi duru, önanga yoiki ma Jou ai Tauika deʼ muläenge yodotoko genangoka.
Itedekanua gënanga maimam womomulia deʼ iwinöninïki yoböa, daha yodiai o doomu juruhakimi de o Yahudioka manga tutuda-tutuda. Ahao önanga yähuloko o nyawa yoiki yal̄ë o rasul-rasul gënanga o buino yaao yahimanga önanga. 22Mä oraha o nyawa yahulo-huloko gënanga imahiädono o buika, önanga yamäkeua o rasul-rasul gënanga dokengoka. Hoʼ onanga yolio, daha ihingahu o hali gënanga o juruhakimika. 23”Maöraha ngomi mimahiädono o buika,” önanga yato o juruhakimika, ”ngomi mia mäke o bui mangorana gënanga ikusi ihidodiaino, deʼ yogo göa-göana mangagogiria yogöana o ngoranoka. Mä maöraha ngomi miahelenga o ngorana gënanga, o nyawa moiö de miamäkeua magoronaka.” 24Maöraha ma Jou ai Tau magogöana manga baluhu deʼ o imam-imam manga häeke yoihene manga hingahu gënanga, önanga imahiorikokaua mangale o rasul-rasul gënanga deʼ yohawana aha okia yakunu idadi. 25Ahaino woböa womatëngo o nauru woao o abari nënanga, ”Niihene! O nyawa Tua-tuanga niatumu-tumunguku o buioka gënanga, öraha nënanga magogiria yadotoko o nyawa yowöe-wöeika ma Jou ai Tauoka!” 26Ma Jou ai Tau magogöana manga baluhu gënanga imakinïki de yogogöa-göana, yoiki yal̄ë o rasul-rasul gënanga ihigalioli. Mä onanga yal̄ë kayahidodiai, hababu önanga yamodongo o nyawa yowöe-wöeika; uha-uha o nyawa yowöe-wöe gënanga done yakaweli önanga de o helewo.
27O rasul-rasul gënanga yaao yahingohama yahimanga o juruhakimi. Daha ma imam womomulia watailako önanga. 28#Mat. 27:25 Unanga watemo, ”Ngomi miniduhunoka ngini miagou-goungu, hupaya uha nidotoko mangale o nyawa gënanga. Mä orahanënanga abeika niamäke okia ngini niadiaioka! Ngini nihibarihoko niadodötoko gënanga o Yerusalem niamodeke, deʼ ngini iholoi nimau nimikalaki, ngomi midadi o hababu wohonenge o nyawa gënanga.”
29O Petrus deʼ o rasul-rasul mahomoa yohaluhu, ”Ngomi kiani miwihimoteke ma Jou Madutu deʼ miahimotekua o nyawa. 30O Yesus ngini niwisaliboka, nangaete de nangatohora manga Jou Madutu wihiwangokali o honengino. 31Deʼ ma Jou Madutu wihidoakoka Unangika aigogere irorete-rete deʼ aikuaha ikokurutil̄e hokä o Tutuda deʼ Wohihöhohalamati; hupaya o Israeloka yahidöaka öraha mangale imatoba manga baradoha deʼ yamäke o apongo. 32Ngomilä o hakihi-hakihi mangale mata-mata gënanga – ngomi deʼ ma Jou Madutu ai Womahö ma Jou Madutu wohidöaka hagala o nyawaika yamö mote-moteke Ai pareta.”
33Maöraha o Agama ma Juru Hakimi yoihene gënanga, önanga yongamo duru, hiädono önanga imakaturu mangale yätoma o rasul-rasul gënanga. 34Mä o juruhakimi manga hidogoronaka gënanga naga o Farisioka manyawa womatëngo ai romanga o Gamaliel. Unanga wodoto-dotoko o agama, de duru iwihoromati o nyawa mata-mata. Unanga womaoko daha wähuloko o nyawa ya ao yahihupu o rasul-rasul gënanga öraha mahuhutulu. 35Ahao ünanga wätemo o Agama ma Juru Hakimika gënanga, ”Roriadodoto o Israeloka manyawa! Niatibanga nihidodiai mangale okia aha Roriadodoto niadiai o nyawaika nënanga. 36Hababu mahira idadioka o Teudas, womamäo aidiri o nyawa yolago-agomo, hiädono ngadeke done ho yaratuhu iata o nyawa iwinïki ünanga. Mä unanga iwitoma deʼ mata-mata iwinöninïki imakitingaka hohahi bari-barihi, de toünangö aihigaro ma ihihangoka. 37Iböto de gënanga, maöraha naga o gegetongo o nyawa, ipudali enagënanga o Yudas, o Galileaino manyawa. Hababu aibobaja, o nyawa manga ngöe iwinïki ünanga. Mä unangö iwitomaka deʼ mata-mata iwinöninïki imakitingaka hohahi bari-barihi. 38Hoʼ orahanënanga de okia idadi nënanga, ahihidaaere ëna hokonënanga: uha nidiai okia naga o nyawaika nënanga, hamal̄aika dika önanga. Hababu nako manga dodötoko deʼ manga manarama önanga nënanga naga o nyawaino, done mangadodötoko deʼ mangamanarama gënanga aha ihihanga. 39Mä nako gënanga ma Jou Madutuino iböa, done Roriadodoto aha niakunua niautumu önanga. Ma mudukua inyata aha Roriadodoto niwilawani ma Jou Madutu.”
Ai hidaaere o Gamaliel gënanga o juruhakimi yatarima. 40O rasul-rasul gënanga yä ahoko, daha yägohara, aha ino yäduhunu yodotokoli mangale o Yesus. Iböto de gënanga, daha önanga yapidili. 41O rasul-rasul gënanga kade yaporete o Agamaka ma Juru Hakimi gënanga de manga mörene, hababu ma Jou Madutu wo hitatapu iböto önanga kiani yamäke o hangihara mangale hababu o Yesus. 42Deʼ o wange higetongo ma Jou ai Tauoka deʼ o nyawa manga tau-tauika, önanga imatogu-togumua yodotoko deʼ ihiade-ade o Abari ma Oa mangale o Yesus, Unanga o Koano Wohihohalamati ihijajioka gënanga.
Nu markerat:
O KISAH RASUL-RASUL 5: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
