O KISAH RASUL-RASUL 6
6
O nyawa yatumidi yariwo-riwo
1O Yesus iwinöninïki iholoi itedekana iholoi yodogo yowöe. Maöraha gënanga yonöninïki o Yahudioka yanonäko-näko o Yunanioka mademo, yaigoua yonöninïki o Yahudi manyawa madutu okaika. Yanäko-näko o Yunanioka mademo gënanga yotemo, ”Mia ngongoheka ngomi yofäo-fäoka yamäkeua o roriwo mahidoku ima hibaajanga o wange ihigeto-getongo, maöraha yahikodoku o nyawa yowöe-wöeika.” 2Hababu gënanga, o rasul yangimoi de yahinoto gënanga yatoomu mata-mata yoninïki deʼ yatemo onangika, ”Itorou nako ngomi mimatogumu mihingahu ma Jou Madutu ai demo, hababu kiani mihidailakohi mangale o inomo. 3Hoʼ, koaho Roriadodoto niaïriki niahidogoronaka roriadodoto o nyawa yatumidi to önanga manga wowango iyaoa deʼ yakuaha ma Jou Madutu ai Womaha de yosawaro, ngomi iyakunu miahidöaka o manarama ihidailako o hali nënanga; 4hababu ngomi miamau mima niata deʼ mihingahu ma Jou Madutu aidemo dika.”
5O nyawa mata-mata gënanga ihigoungu o rasul-rasul manga gogahoko gënanga. Daha önanga iwiïriki o Stefanus, o nyawa womatëngo duru wïngaku o Yesusika deʼ iwikuaha ma Jou Madutu ai Womaha. Yahidi irikö: o Filipus, o Prokhorus, o Nikanor, o Timon, o Parmenas, deʼ o Nikolaus o Antiokhiaino; ünanga o Yahudi okaua manyawa, mä unanga wowohamoka o Yahudioka ma agamaika. 6Yatumidi o nyawa gënanga yaao o rasul-rasulika, daha o rasul-rasul gënanga imaniata deʼ yagähoko ma Jou aibarakati mangale önanga.
7Hokogënanga o abari ma Jou Madutuino iholoi yodogerewoto deʼ iwinöninïki o Yesus o Yerusalemokaö iholoi idogo yowöe. Deʼ manga ngöe o imam-imamö iwingaku o Yesusika.
O Stefanus iwitagoko
8Ma Jou Madutu duru wihibarakati o Stefanusika, hiädono ünanga wodiai mangöe ihëra-hëranga deʼ o hali kabiahaua o kawaha manga hidogoronaka. 9Mä naga o nyawa iwïdohata ünanga; önanga gënanga o puji matau magoronaka yomomanarama yahiromanga o Nyawa yo Lolapahioka manga Puji ma Tau. O puji matauoka gënanga yomomanarama ganga o Yahudioka manyawa o Kirene deʼ o Aleksandriaino. Onanga de o Yahudioka manyawa o Kilikia deʼ o Asiaino imatekeributu de o Stefanus. 10Mä onanga yakunua iwilawani okia o Stefanus wotemo, karana ma Jou Madutu ai Womaha iwihidöakoka unangika o sawaro mangale wotemo-temo. 11Hababu gënanga önanga yahewa o nyawa yamuruono naga la yotemo, ”Ngomi mi ihene o nyawa gënanga wahikauku o Musa deʼ ma Jou Madutu!” 12Hokogënanga önanga yahi ngohama o demo o nyawa yowöe-wöe, deʼ o Yahudioka manga tutuda, de o guru-guru agama. Daha önanga yoiki iwitagoko o Stefanus, ahao iwiao ünanga iwihihimanga o Agama ma Juru Hakimika. 13Deʼ onangaö yahihimangino o hakihi-hakihi ihidöaka o hitararono ielu-eluku mangale o Stefanus. O hakihi-hakihi gënanga yato, ”O nyawa neünanga woma togu-togumua watëmo itotorou ma Jou ai Tau itebi-tebini, deʼ watëmo itorou ma Jou Madutu ai Tita o Musa wohingo ngahu-ngahu. 14Ngomi mihenoka ünanga wotemo, o Yesus o Nazaretino gënanga aha wakilianga ma Jou ai Tau nënanga, daha watagali mata-mata nanga adati de nanga atoranga o Musa wohiguti-gutioka ngoneino!” 15Mata-mata o nyawa yoböa-böaino o Agama ma Juru Hakimi madöomu magöronaka gënanga ka iwipulono o Stefanus. Deʼ oraha gënanga o Stefanus aibiono yamäke hokä o malaekat mabiono.
Nu markerat:
O KISAH RASUL-RASUL 6: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
