O KISAH RASUL-RASUL 13
13
O Barnabas deʼ o Saulus yäiriki deʼ yähuloko
1O jemaat Antiokhia mahidogoronaka naga o nabi-nabi deʼ o guru-guru, enagënanga o Barnabas, o Simeon iwihiaho-ahoko o Taromo, o Lukius o Kireneino, o Menahem yohero yolamoko imakinïki de ma Koano Herodes, deʼ o Saulus. 2Maöraha önanga magogiriaka yopuji ma Jouika deʼ yopuaha, ma Jou Madutu ai Womaha itemo onangika, ”Niairiki o Barnabas deʼ o Saulus niatingaka mangale Ngohi, hupaya önanga yomanarama o manarama Ngohi tohitatapuoka mangale önanga.”
3Yopuaha deʼ imaniata iböto, önanga yakelenga manga giama o Barnabas deʼ o Saulus mangal̄okuoka, daha yähuloko önanga yahinoto.
O Siprusoka
4Karana ma Jou Madutu ai Womaha yähuloko, o Barnabas deʼ o Saulus imagoraka o Seleukiaika. Dokengino önanga yohidete o Siprus manuhika. 5Maöraha imahiädono o Salamisika, önanga ihingahu ma Jou Madutu aidemo o Yahudioka mangapuji matau-tauoka. O Yohanis Markus wariwo önanga toönanga mangadodagi magoronaka.
6O nühu gënanga önanga yodagi yakiloliti hiädono o Pafosika. Dokengoka önanga imakamäke de womatëngo o Yahudioka manyawa, airomanga o Bar Yesus. Unanga wogogumatere womangaku aidiri o nabi. 7O Sergius Paulus, ma gubernur o nühoka gënanga nagala aidodiawo itigi de wogogumatere gënanga. Ma gubernur gënanga nagala o nyawa moi wobarija deʼ wosawaro. Unanga wa ahoko o Barnabas deʼ o Saulus hababu ünanga woigo woihene ma Jou Madutu aidemo. 8Mä o Barnabas deʼ o Saulus walawani o Elimas o gumatere masiho gënanga, karana o Elimas (gënanga airomanga de o Yunanioka manga demo) wohidailako hupaya magubernur gënanga uha hiädono wingaku o Yesusika. 9Mä o Saulus – iwihiromangö o Paulus – iwikuahaka ma Jou Madutu ai Womaha, hiädono ünanga wipulono o gumatere masiho gënanga, 10daha witemo, ”Hei o tipu mal̄okuoka, o dorou mangohaka! Ngona hagala ma oa-oa mahaturu. Yadodoa ngona nöluku nomatogumu nakilianga ma Jou Madutu aidätoro mangale wohihalamati o nyawa? 11Orahanënanga namäke, ma Jou aha wonihukumu ngona! Ngona aha nodadi nopiloko, hiädono ngona öraha utu nakunokauaoli namäke o wange madararono.”
Oraha gënanga dika o Elimas wamäo naga o lobi itaro-taromo yatamunu ailako, hiädono ünanga woma dagi kawomahihöhabal̄anga wälingiri o nyawa la iwituda. 12Maöraha magubernur gënanga wamäke okia idadioka, ünanga wingaku o Yesusika; hababu ünanga duru wohëranga o dodötoko mangale o Jou.
O Antiokhia o Pisidiaka
13O Pafos de yaino, o Paulus deʼ aidodiawo yohidete o Pergaika o Pamfiliaka. Genangoka o Yohanis Markus wamal̄a önanga, daha womaidulu o Yerusalemika. 14O Pergaoka, de önanga ihigila-gila mangadodagi o Antiokhiaika o Pisidiaka, o Yahudioka manga Puji mawangeoka ahao önanga yoiki o puji matauika de magöronaka yogögeruku. 15O Musa ai Buku deʼ o Nabi-nabi manga Buku yabasa iböto, o tutuda-tutuda o puji matauoka gënanga yähuloko o nyawa yäleha o Paulusika deʼ aidodiawo, ”Roriadodoto nako Riadodotoka okianaga moi o hitiari mangale o nyawa nënanga, ika kania hingahu okia niahitiari gënanga.” 16O Paulusö kawoma oko, daha wohidöaka o nonako de aigiama, ahao wotemo,
”Ahi Roriadodoto o Israeloka manyawa, deʼ mata-mata roriadodoto de mahomoahi nenangoka nitotomoteke ma Jou Madutuika! Beika niihenohi ngohino: 17#Kel. 1:7, 12:51 O Israeloka manyawa manga Jou Madutu wairikoka nangaete de nangatohora, deʼ wahidadi o hoana nënanga o hoana ma amo-amoko maöraha önanga yogogere o Mesiroka, hokä o nyawa maporetino. Maduruino de ma Jou Madutu aikuaha iamo-amoko, önanga waao wahihupu o Mesirino. 18#Bil. 14:34; Ul. 1:31 Unanga wohisabari toönanga manga kalakuanga o tonaka makokakahaka o taongo moruatino madekana. 19#Ul. 7:1; Yos. 14:1 O hoana tumidi Unanga wahohihangoka o Kanaan matonakoka mangale wahi kodoku o tonaka gënanga o Israel manyawaika hupaya o tonaka gënanga idadi katoönanga madutu. 20#Hak. 2:16; 1Sam. 3:20 Mata-mata gënanga itagi gila-gila hiädono o taongo o ratuhu iata de moritoa madekana.
Wahikodoku iböto o Kanaan matonaka gënanga, ma Jou Madutu wahidöaka onangika o haki-hakimi. O hakimi mabobahaka ünanga ganga ma Nabi Samuel. 21#1Sam. 8:5, 10:21 Maduruino önanga yogahoko o koano womatëngo. Ma Jou Madutu wahidöaka onangika o Saul o Kis aingohaka o Benyamin aiahaluku, mangale wodadi toönanga manga koano, o taongo moruatino madekana. 22#1Sam. 13:14, 16:12; Mzm. 89:21 Ma Jou Madutu wihirehenoka ünanga aikoano makuruhioka, ma Jou Madutu wigorakoli o Daud, wodadi toönanga manga koano. Deʼ nenanga ma Jou Madutu wotemoka mangale o Daud, ’Ngohi timäkeoka o Daud o Isai aingohaka gënanga o nyawa moi Ahihininga yadäene. Manyawa ünanga aha wadiai Ahi mau.’ 23De o Daud aidifauku gënanga ma Jou Madutu wasadiaka o Israel manyawaika womatëngo o Koano Wohihohalamati, hokä iwihijajioka. Deʼ o Yesus ganga o Koano Wohihohalamati gënanga. 24#Mark. 1:4; Luk. 3:3 O Yesus womulaenguahi wohidagi Ai manarama, o Yohanis wohiboakoka o Israel manyawaika, hupaya önanga imatoba de manga baradoha deʼ yaohiki. 25#Mat. 3:11; Mark. 1:7; Luk. 3:16; Yoh. 1:20, 27 Deʼ ngade ipaha aimanarama, o Yohanis watemo o nyawaika, ’Imoteke ngini niadamäke, ngohi nënanga o nagona? Ngohiua manyawa ngini niwidodamä. Niohininga, manyawa gënanga aha woböa ipaha de ngohi; tahuputu dika aihapato mangohi topatutua.’
26Roriadodoto o Abraham aidifauku, deʼ mata-mata Roriadodoto mahomoahi nenangokadau nitotomoteke ma Jou Madutuika! Ma Jou Madutu wonahidingotoka ngoneino o abari inahihohalamati gënanga; 27hababu o nyawa yogogogere o Yerusalemoka, deʼ toönanga manga tutuda-tutuda iwinakoua ge Unanga wonahihohalamati. Onanga imamangaratiua o nabi-nabi manga dodötoko ngaro yabasa o Puji mawange ihigetongo, hiädono önanga iwihukumu o Yesus. Mä imadaenika de manga manarama hokogënanga idadi higanapu okia o nabi-nabi ihingahuoka ngaro idadiuahi. 28#Mat. 27:22-23; Mark. 15:13-14; Luk. 23:21-23; Yoh. 19:15 Ngaroka önanga yamäkeua aihowono moiö Unangoka kiani iwihukumu de hukumanga wohonenge, mä onanga yogahoko o Pilatusika hupaya Unanga iwitoma. 29#Mat. 27:57-61; Mark. 15:42-47; Luk. 23:50-56; Yoh. 19:38-42 Deʼ onanga yabötoka yadiai mata-mata Ma Jou Ai Demo ma Buku magoronaka ituli-tulihoka mangale Unanga, önanga ihiguti Ai mayeti o salib magotaka, daha yakelenga o lungunu magoronaka. 30Mä ma Jou Madutu wihiwangokali o honengino. 31#Kis. 1:3 Maduruino kadema wange-wange madekana Unanga waino womahimatoka Ai diri o nyawa yoböa-böainoika, dede Unanga o Galilea de yaino o Yerusalemika. Onanga gënanga örahanënanga yodadi o hakihi-hakihi mangale Unanga o Israel manyawaika. 32Hoʼ, örahanënanga ngomi mihingahu o Abari ma Oa gënanga nginika: Okia ma Jou Madutu wohijajioka tongone nangaete de nangatohoraika, 33#Mzm. 2:7 gënanga Unanga wadiaioka ngoneino, de wihiwangokali o Yesus o honengino. Hababu o Mazmur mahidoku hinoto magoronaka naga itulihi,
’Ngonala Ahi Ngohaka,
o wange nënanga Ngohi todadioka Ani Ama.’
34 #
Yes. 55:3
Ma Jou Madutu wihiwangokali Unanga o honengino. Orahanënanga Unanga aha iwidaenokaua o honenge o lungunu magoronaka. Mangale o hali gënanga ma Jou Madutu wotemo,
’Ngohi aha tonihidöaka Ngonaika o jaji madebi-debini i goungu aha Tohiganapu,
Tohi jäjajioka o Daudika.’
35 #
Mzm. 16:10
Hoko gënangoli o ayat mahomoa magoronaka itemo,
’Tongona anigilaongo wososetia gënanga aha Nimal̄aikaua womela o lungunu magoronaka.’
36O Daud wohonengoka deʼ iwilungunokaö imakinïki de aiete de aitohora, ünanga wadiai iböto okia ma Jou Madutu wihuloko ünanga wadiai. O Daud aimayetiö makoiwaka iwedere mata-mataka. 37Mä o Yesus, ma Jou Madutu wihiwangokali o honengino, o Yesus gënanga wowederua hiädono womata. 38-39Hababu gënanga Roriadodoto, kokiani ngini nihiöriki de o Yesus nënanga o abari mangale o baradoha maapongo inihingahu nginika; ngini kiani nihiöriki moi-moi o nyawa iwingaku Unangika, yahilapahioka hagala o baradohaka yakunua yaehe de ma Jou Madutu ai pareta-pareta o Musa wohingahu-ngahuoka. 40Mangale gënanga ngini kiani niohininga nihidodiai, uha hiädono idadi nginika okia o nabi-nabi yotemoka,
41 #
Hab. 1:5
’Niohininga nihidodiai, hei ngini o nyawa nioigo niahi kokauku!
Ngini aha nihëranga, de ahao nihonenge!
Hababu örahanënanga Ngohi magogiria todiai okianaga moi
ngini mahirete aha niangakua,
ngaroka naga o nyawa inihitararono nginika.’ ”
42Maöraha o Paulus deʼ o Barnabas yamal̄a o puji matau gënanga, o nyawa o puji matauoka gënanga yogahoko önanga yoboali, o Puji mawange yaino, mangale ihitararono iholoi ikurutika mangale o hali-hali gënanga. 43O nyawa yokokihupuoka o puji matauoka gënanga, o Paulus deʼ o Barnabas yanïki o Yahudioka manyawa mangangöe deʼ o nyawa mahomoahi yowoha-wohamoka o Yahudi manga agamaika. O rasul-rasul gënanga yatemo-temo önanga hupaya önanga hokogenangika imahitangono ma Jou Madutu aihininga maoaika.
44O Puji mawange yaino, ngadeke mata-mata o nyawa o kota gënanga yoböa yöihene ma Jou aidemo. 45Maöraha o Yahudioka manyawa yamäke o nyawa mangangöe gënanga, to önanga manga hininga duruhe yohiri. Onanga iwihikauku o Paulus deʼ aidemo mata-mata yöngelo. 46Mä iholoi yobaranioli o Paulus deʼ o Barnabas yotemo ihitotararonika. Onanga yato, ”Ma Jou Madutu aidemo kokiani ihira mihingahu nginika. Mä karana ngini nioluku niatarima, ngini mahirete nihigogeroka ngini ipatutua niatarima o ngango madutu deʼ ikakali. Deʼ orahanënanga ngomi minimal̄a ngini, deʼ mioiki o nyawa mahomoaika. 47#Yes. 42:6, 49:6 Hababu nënanga ma Jou aipareta ngomino; ma Jou wotemo,
’Ngohi tohigogeroka ngini nidadi o dararono moi o nyawa mahomoaika ko o Yahudiokaua,
hupaya ngini nihiädono o halamati o dunia ingodumu.’ ”
48Maöraha o nyawa mahomoaino ko o Yahudiokaua yoihene gënanga, önanga imagarago duru, daha ihigiriri ma Jou aidemo. Deʼ o nyawa wahigogeroka ma Jou Madutu mangale yamäke o ngango madutu deʼ ikakali, o nyawa gënanga yöngaku.
49Ma Jou aidemo yodogerewoto kiaika honanga yakiloliti o daera gënanga. 50Mä o nyawa yolo ago-agomo o kotaka gënanga deʼ o ngongoheka o nyawa yokokurutil̄e manga doomuino iwimodo-modongo ma Jou Madutuika, o Yahudioka manyawa yahingohama o hininga madorou. Onanga yapuda o haturu o Paulus deʼ o Barnabasika, deʼ yaduhu önanga yahinoto o daeraka gënanga. 51#Mat. 10:14; Mark. 6:11; Luk. 9:5, 10:11 O rasul-rasul gënanga yaparihi o kafo manga l̄ouoka o nyawa manga himangoka gënanga, hokä o hohininga moi, daha yoiki o Ikoniumika. 52Yononinïki o Antiokhiaoka duru yomörene deʼ yakuaha ma Jou Madutu ai Womaha.
Nu markerat:
O KISAH RASUL-RASUL 13: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
