O KISAH RASUL-RASUL 12
12
O aniaya i dogo-dogo
1Maöraha genangö ma Koano Herodes womuläenge wätuku o jemaat manyawa. 2Imoteke aipareta, o Yakobus, o Yohanis airiaka iwitoma de o oworo. 3Maöraha o Herodes wamäke aimanarama gënanga o Yahudioka manyawa manga hininga yadäene, ünanga wodiaioli hokogënanga; ünanga wähuloko o nyawa iwitagoko o Petrusohi. O hali gënanga idadi maöraha o Wange ma Amoko o Roti i Ragi-ragi Ua. 4#Kel. 12:1-27 Iwitagoko iböto, o Petrus iwihi ngohama o bui magoronaika. O tentara o rëgu iata yähuloko la iwi göana o Petrus genangoka – o rëgu moi-moi, o tentara manyawa yarua-ruata. Ipaha o Paskah marameanga ibötoka, dahao o Herodes witailako o Petrus o nyawa yowöe-wöe manga himangoka. 5Hoʼ o Petrus iwitumunguku o buioka; mä o jemaat imatogu-togumua imaniata de magoungu ma Jouika mangale o Petrus.
O Petrus iwihilapahi o buino
6Mahutu o Herodes aha wihihimanguahi o nyawa yowöe-wöe manga himangoka, o Petrus womaiduoka iwilikoika de o rante hinoto o tentara iwigöa-göana yahinoto manga hidogoronaka. O bui mangoranoka, yogögöa-göana mahomoaö yogöana o bui manga gogiria. 7Itodokanino ma Jou aimalaekat imaokoino genangoka deʼ maletongo yatararono o bui makamari magoronaka gënanga. O malaekat gënanga iwigiwi-giwi o Petrus hiädono ünanga womomiki. Daha o malaekat gënanga iwitemo, ”Hei, taiti nomomiki!” Oraha gënanga dika itiha o rante o behi o Petrus aigiamoka. 8I böto gënanga o malaekat gënanga iwitemo, ”Nomahinoa anipakeanga deʼ naliko anihapato de maliliko.” O Petrusö womahinoa aipakeanga deʼ womäliko aihapato de maliliko. Aha o malaekat gënanga itemoli, ”Nomahinoa anijuba de nohinïki ngohi.” 9O Petrus wanïki o malaekat gënanga wohupu o buioka. Mä o Petrus womamäoua okia o malaekat magogiriaka i diai gënanga naga okia naga moi igou-goungu idadi. O Petrus watobote gënanga duga-duga o lolega moi. 10Maöraha önanga yatioka o gogöana mangï madodihiraka deʼ mahinoto, önanga yadono o ngorana o behi, mahimanga o kotaika. O ngorana gënanga ënanga mahirete ihelenga, daha önanga yohupu deʼ imadagi yanïki o ngëkomo moi maiteteke. I todokanino o malaekat gënanga iwimal̄aika o Petrus.
11I paha gënanga dahao o Petrus aha wamäo okia idadioka unangika, daha ünanga wotemo, ”Orahanënanga ngohi tohiöriki i gou-goungu ma Jou wohidingotoka Ai malaekat mangale ihihi lapahi ngohi o Herodes aikuahaino deʼ hagala moi-moi aha yodiai o Yahudi manyawa ngohino.”
12Wa mäoka okianaga idödädadioka gënanga, o Petrus woiki o ngo Maria amitauika, o Yohanis ngoi ayoika iwihetongö o Markus. Genangoka o nyawa manga ngöe imatöomuinoka deʼ magogiria imaniata. 13O Petrus watolo o ngorana maporetino, daha momatëngo o ngoheka molöleleani amiromanga o ngo Rode, maino mangale mahelenga o ngorana. 14Gila-gila münanga manako o Petrus ai ilingi. Karana amimörene, münanga momatai-taiti mowohamoli komahelengaua o ngorana, daha mohingahu hagala o nyawaika genangoka o Petrus naga maporetoka. 15”Ngona initogohanga!” önanga yotemo. Mä o ngo Rode momakuata gënanga igou-goungu o Petrus. Onanga yato, ”Gënanga ai malaekat!”
16Kahoko gënanga o Petrus womatogumua watolo o ngorana. Maöraha önanga yahelenga o ngorana, deʼ iwimäke o Petrus, önanga duru yohëranga. 17O Petrus wapoma de aigiama hupaya önanga imarïdi, ahao ünanga wä ade-ade sarakia ma Jou wiaoka ünanga wohupu o buino. Daha ünanga wotemo, ”Niwihi ngahu nënanga o Yakobusika deʼ ahiroriadodoto mahomoahi.” Iböto gënanga o Petrus wamal̄a o ngï gënanga, deʼ woiki o ngï mahomoaika.
18Yarehe mangorumino idadi o gigoro o tentara yogöa-göana manga hidogoronaka. Onanga imahiorikokaua duru mangale okia idadioka de o Petrus. 19Daha o Herodes wähuloko o nyawa iwi lingiri o Petrus, mä onanga iwimäkeua ünanga. Hoʼ o Herodes wapareta hupaya o tentara-tentara yogöa-göana gënanga yäleha daha yatoma.
Ipaha gënanga o Herodes wamal̄a o Yudea deʼ wogogere öraha muruo naga madekana o Kaisariaka.
O Herodes wohonenge
20O Herodes duru wangamo o Tirus deʼ o Sidon manyawaika. Hababu gënanga önanga yoböa imakinïki iwihimanga ünanga. Madodihiraka önanga iwibaja o Blastus, wohihäeke o Herodes aikadato, hiädono ünanga wahiböa önanga. Maduruino önanga yoiki iwihimanga o Herodes, daha yogahoko imakadame, hababu önanga manga berera imahigagao o inomo o Herodes aibereraino.
21O wange moiuku ihitatapuoka, o Herodes womahidero o koano mapakeanga daha wogogeruku o pareta makuruhioka deʼ womuläenge wopidato o kawaha manga himangoka. 22O kawaha magogiriaka yöihene gënanga yopöa-pöaka, ”Nënanga o gomanga mailingi, o nyawaua mailingi!” 23Oraha gënanga dika ma Jou aimalaekat iwipoka o Herodes, hababu ünanga wihoromatiua ma Jou Madutu. O Herodes iwiol̄omo o kulubati daha wohonenge.
24Ma Jou Madutu aidemo i holoi i kerewoto ilamokika deʼ iholoi ikuata.
25O Barnabas deʼ o Saulus yabötoka toönanga manga manarama, önanga imaidulu o Yerusalemino de iwiao o Yohanis Markus imakinïki de önanga.
Nu markerat:
O KISAH RASUL-RASUL 12: TLB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
