Mbete Matiye 10
10
1Kandɔkaw, Zezu ɗi nzuk-dih fal ye a boh falu seɗeri gi ta̧w ye. Ke hi̧ niri ŋgerna ɓay mba tul záh tukalari hi̧ kú ni̧h záhri ké tul nzukri, kú gah sam senari ɓoɗ ɓoɗ pi. Kaŋ mí ke pih niri. 2-4Riŋ gun nzak pihnari ké boh falu seɗe ra mí na-ay : titil ki̧na-u ke tul Simu kú-u ɗi ni ɓa Piyer ke yi̧n ye Andere, Zak gun Zebede ke yi̧n ye Za̧h, Filiɓ ke Bartelemi, Toma ke Matiye nzuk-mbu̧h lampoh, Tade ke Zak gun Alfe, Simu nzuk-ri̧h si̧w ɓay tusiɓa woyri ke Zudas ké Isikariyoɗ a ye ké-e te Zezu.
5Zezu pih gun nzak pihna a boh falu seɗeri ra ke bolnzak ɓahri : « Tusiɓa nzukri ké sa̧w woyri ɓoɗ, í si ri ya. Tusiɓa nzuk Samariri kara í si ya pi. 6Wara le í si ta̧w gun Izarayelri kú-u ɓa sami biri mí ku zi-zi. 7Sina woiri-aw, í ka-kah hi̧ niri ɓahri, “lák mbay a nunmbam ka̧h da.” 8Senari le, í gah. Hulri ba, í tom. Nzuk ndɔɓeri, í gah niri hi̧ saŋna-si gel kani Ŋgerzah ɓá lu ké tul woyri. Í ni̧h záhri ké tul nzukri. Ŋgerna-laɓ fe-ayri, i ya̧ ndikpo le, í laɓ hi̧ nzukri ndikpo pi. 9Í ya̧ lari lɔr ya, í ya̧ lari a puki ya, í ya̧ lari a si̧h-u ya pi. 10Í mbi ɓɔl ɓay goŋ fe ké gel gahru woiri ya. Í ya̧ gar a ɓoru dɔm tul gar ké i ndoh ya, í ya̧ sabɔk a ɓoru dɔm tul sabɔk woiri ya, í ya̧ ka̧wkpuh sina a ɓoru dɔm tul ka̧wkpuh woiri ya pi. Ɓayu ké fe su̧na gun-laɓ pihna ra, ke su̧ ké gel pihna ye mí mah ni seeh.
11Ɓa ra puh a luki mini gun puh mí i si ri le, í fakla nzuk ké ɓay mgba nzak pihna woiri ma law ɓa teh-u, mí í na kerpuh ye ka̧h nam tɔrna woiri. 12Gelke i rih ɓil puh gahru woiri le, í vah nzuk kerpuh-uri ke ɗeŋ. 13Law nzuk puh-uri ɓa law ɗeŋ le, mgbɔkɔ ɗeŋ woiri ɓay kaɓ ziŋ niri. Mí kerpuh-aw mah ya̧ ɗeŋ woiri ya le, mgbɔkɔ woiri ɓay el ƴo ziŋ wuri. 14Kerpuh ké sa mgba wuri gahru ya, puh ké nzukri sa lah nzak pihna woiri ya, mí tɔrna woiri le, í kpoh kasal bɔk woiri sɔk ɓahri, salɓay suya woyri mgbahla wuri ya. 15Ɓa ketina, mi ƴo ɓah ɓayay hi̧ wuri, nam-kuŋ salɓay le, salɓay suya ké ɓay ku̧ tul nzukri ké puh-aw ɓay kpuh mba salɓay suya ké ku̧ tul nzuk a lewsa̧ri ké Sɔdɔm ke Gɔmɔr mba-mba.
16Í ko, a bi mí-i ƴo pih wuri ɓa samiri ma sakra gaykoyri. Dale í si siŋ sina ru̧na kandɔk siŋ sina soy ké ru̧ kaŋ. Í tu suya ya kandɔk mbɔre ké tu suya ya kaŋ. 17Í ru̧ ke mun woiri ɓay nzukri. Ku ɓay mgba wuri si pol ŋgernzuk misoŋri hi̧ ku kuŋ salɓay ku̧ tul woiri. Ké vul misoŋ ku zɔ́r wuri ke ndehdɔŋ. 18Ku ɓay kɔklɔ wuri si pol guvener-ri pi, pol mbay tusiɓari pi ɓayu ké i ƴo tul riŋ bi. Fe-u ɓay laɓ hi̧ wuri í te-teh ɓay bi ké pol ŋgernzuk tusiɓari pi, ké pol sa̧wnzuk a ɓoruri pi.
19Gelku-u mgba wuri ndoh ndɔk nzukri le, í hi̧ law woiri ɓá lu ya. Í nzah ɓay ké i ɓah-u ké pol nzukri ra ya. Ɓayu ké Tem bah woiri Ŋgerzah ɓay hi̧ wuri ɓayri ké i ɓay ɓah-u ke sa̧wseh-u. 20Ɓayri ké ƴo ti̧h ke nzak woiri ta ɓa ɓay woiri ya. Wara le ɓa ɓay Tem bah woiri mí i ɓah hi̧ nzukri-aw. 21-22Nzukri ɓay fu̧y wuri ɓayu ké i ƴo tul riŋ bi. Nzuk ɓay te yi̧n ye hi̧ kú i, bah gun ɓay te gun ye hi̧ kú i. Gun ɓay ur ziŋ nzukri ké mbuŋ ni ɓay i niri. Mí nzuk ké su̧h law ye tul riŋ bi kpu̧ru ka̧h hul ye le, ke ɓay ti̧h ke ndɔk hul. 23Gelke ku faŋ bol woiri ɓil puh mbew le, í ɗuk si puh a ɓoru. Ɓa ketina, mi ƴo ɓah ɓayay hi̧ wuri, se-se ɓay í ka̧h puhri gbam ké tusiɓa gun Izarayelri dara gun nzuk pirmatul ɓá el gi.
24Gun likɔl mba tul metere ye ya. Mgbal kara mba tul gaŋ ye ya pi. 25Mah ɓay gun likɔl ɓá eŋ metere ye. Mgbal kara ɓá eŋ bahgaŋ ye pi. Ku ɗi riŋ mbay záh tukala kan tul nzuk puh ɓahri, “Belzebul” ra wa, ani mí ku ɓay ɗi gun puh-uri ke riŋu ɓáy le wo ? 26Dale í laɓ hȩkme nzuk-laɓ wuri koseh-awri ya, ɓayu ké ɓayri gbam ké mu̧-mu̧h ɓay ti̧h kala. Ɓayri gbam ké mu̧h nun nzukri ra, nzukri ɓay tu-u. 27Ɓay ké mi ɓah hi̧ wuri ké gel a mu̧h-u le, í ɓah ɓayu ké gel a teh-u. Ɓay ké mi ɗakla ké lɔkɔ suk woiri le, í ka-kah ɓayu ma síɓa síɓa. 28Í laɓ hȩkme nzuk-i hulri ya. Ku ta ke ŋgerna ɓay za tem woiri ya. Í laɓ hȩkme Ŋgerzah ma. A ye ke mah zi mun ke tem woiri seɗe mbɔk ké ɓil hɔrɔ. 29Nzukri ƴo yeh ti̧tihri seɗe ke tere gursu, kaŋ ya le ? Ti̧ti̧h mbew mbew gbam ké lih hul le, bah woiri Ŋgerzah tu-tu. 30A woiri ba, Ŋgerzah ki̧ pirmatul woiri mbew mbew gbam dale, 31í laɓ hȩkme ya. I mba tul ti̧tihri le, el mba ra ɓáy. 32Nzak nzuk a suŋ suŋ gbam ké ɓah ketina bi#10.32 Í mgba Mbete Rɔmri 10.9-10 tuh ke gel ki̧na-ay. ké pol nzukri le, nzak bi kara ɓay tu riŋ nzuku ké pol bah bi ké nunmbam pi. 33Nzuk a a̧y ké saŋ riŋ bi ké pol nzukri le, a bi kara mi ɓay saŋ nzuku ké pol bah bi ké nunmbam pi.
34Í lu kerɓay ké ɓahri se, mi gi ɓay hi̧ ɗeŋ ɓá ƴo tusiɓa. Mi gi ke ɗeŋ ya. Wara le mi gi ke mahwu̧y. 35Mi gi kúŋ sal ké sakra gun wo̧ronzuk ke bah ye, ké sakra gun wu̧ynzuk ke mah ye, ké sakra wu̧y wo̧ro ke mahfay ye. 36Nzukbaa nzuk ɓa nzuk ɓil kerpuh yeri. 37Nzuk yih bah ye mini mah ye poŋ mi le, nzuku mah nun bi ya. Nzuk yih gun ye, ɓa ra a wo̧ro-u mini a wu̧yu poŋ mi le, nzuku mah nun bi ya. 38Nzuk sa mbi kpuh vbatay hul ye suk dih fal bi keni ya le, nzuku mah nun bi ya. 39Nzuk ké tu su̧ tukala le, tul ye ɓay zi-u. Nzuk ké poŋ kerɓay tul ye ɓay tul bi le, ke ɓay ziŋ ɔkna.
40Nzuk ké ya̧ wuri le, a bi mí ke ya̧ mi-aw. Nzuk ké ya̧ mi le, ke ya̧ nzuk-pih mi. 41Nzuk ya̧ gun nzak pihna Ŋgerzah ɓayu ké-e tu ni ɓa gun nzak pihna Ŋgerzah le, nzuku ɓay ziŋ kpaŋndɔk a gun nzak pihna Ŋgerzah. Nzuk ya̧ nzuk ké tu Ŋgerzah ɓa záh ye ɓayu ké-e tu ni ɓa nzuk ké tu Ŋgerzah ɓa záh ye le, nzuku ɓay ziŋ kpaŋndɔk a nzuk ké tu Ŋgerzah ɓa záh ye. 42Nzuk a a̧y ké laɓ suki a mah gelu, ɓa ra mbih nzona mí ke kah hi̧ gun a mah gelu ɓayu ké-e ƴo dih fal bi le, ɓa ketina, mi ƴo ɓah ɓayay hi̧ wuri, kpaŋndɔk nzuku ta zi ya. »
Nu markerat:
Mbete Matiye 10: SIAFNK
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Wycliffe Bible Translators, Inc. All rights reserved.
