Mbete Matiye 9
9
1Kaŋ mí Zezuri poŋ nzuk Gadarari. Ku hil ɓil kumbon el gi fál gini, mí ke si puh#9.1 Puh-u ɓa Kapernayum. Í mgba Mbete Matiye 4.13 tuh ke gel ki̧na-ay.. 2Í ko. Nzukri suk nzuk sena ke hih nam ye gi keni hi̧ Zezu. Mun nzuk ra hu yɔh. Zezu ɓá ko law woyri kú-u kan tul ye bale, ke ɓah hi̧ nzuk ké mun ye hu yɔh ra ɓahri : « Gun bi, mú su̧h law. Salɓay suya lu ké tul wo. »
3Nzuk-sɔk mbete bolkusol Ŋgerzah a haniri ƴo gelu pi. Ku lah ɓay ké Zezu ɓah ra bale, í ko, ku ŋgu̧hru ɓay ɓahri : « Gunwo̧ro-ay leh tul ye ke Ŋgerzah. »
4Zezu tu kerɓay woyri tu-tu, mí ke ɓahri : « Sa̧w ɓay fe mí na kerɓay woiri nduŋ le ? 5Sakra ɓáh hi̧ nzuk ɓahri, ké ur si sina ke ɓáh hi̧ nzuk ɓahri, salɓay suya ye lu, a suŋ mí kpuh le ? 6Mí ɓay í tu ɓahri se, gun nzuk pirmatul ɓa mbay mí ƴo ke ŋgerna ké tusiɓa ɓay lu salɓay suya ké tul nzukri le ... »
Zezu poŋ nzak ɓay ye, ke el sɔɓ nun ma tul nzuk ké mun ye hu yɔh ra bale, ke ɓahri : « Mú ur síɓa, mú mbi hih wo, mú el si puh. »
7Nzuk ra ur, mí ke mbi hih nam ye el si puh. 8Daɓa nzukri ko fe ké-e laɓ, mí hȩkme se niri. Ku el dim Ŋgerzah záh ké ndoh ŋgerna mbay a kandɔkaw ndɔk nzuk pirmatulri.
9Zezu ba, kal ma pol bale, ke ko Matiye#9.9 Matiye ƴo ke riŋ seɗe. Riŋ ye a ɓoru ɓa Levi. Í mgba Mbete Marki 2.13-22 ke Mbete Luk 5.27-39 tuh ke gel ki̧na-ay. Matiye-ay ɓa nzuk-vbeh mbete-ay. nzuk-mbu̧h lampoh ké gel pihna ye. Mí Zezu ɗi ni : « Mú dih fal bi-ay. »
Matiye ur ba, mí ke dih fal ye.
10Seh a hani Zezu kaɓ nzak fe su̧na ké puh Matiye. Í ko. Daɓa nzuk-mbu̧h lampohri ke nzuk suya a ɓoruri ti̧h gi kaɓ nzak fe su̧na ziŋ Zezu ke nzuk-dih fal yeri pi. 11Fariziri ɓá ko fe-u kaŋ dale, ku ɓah ɓay hi̧ nzuk-dih fal yeri kandɔkay : « Ɓay fe mí metere woiri ƴo su̧ fe ziŋ nzuk-mbu̧h lampohri ke sam nzuk suya a ɓoruri-aw le ? »
12Zezu lah ɓay kú-u ɓah ra bale, ke ɓahri : « Nzuk mun gahnari si seh dɔkta ya. Nzuk senari mí si seh dɔkta. 13Í si likɔl, í hi̧ tul woiri ɓay tu ɓayay ké Ŋgerzah ɓah, láɓ law in mí ke yih ɓayu, Láɓ pihna hi̧ ni ndikpoh le, ke sa-a#9.13 Sa̧w nzak vbeh ɓahri, a Mi yih ɓay í laɓ law in ziŋ nzuk, ɓo puh fe le, mi sa-a. Puh fe ké ta̧w ziɓri mah hani ke puh fe ké ta̧w karaŋri ya. Ziɓri puh fe kandɔk bolkusol Ŋgerzah sɔk niri. Ɓa fe a suki ké ta̧w woyri. Ɓa pihna kú-u laɓ hi̧ Ŋgerzah. Sa̧wu mí nah vbeh ɓahri, láɓ pihna hi̧ ni ɓay hi̧ karaŋri ɓá lah kerɓay ɓay fe puhna ɓa gah-u.#9.13 Ɓayay na ɓil Mbete Osée 6.6..
Kandɔkaw mí-i gi ɓay ɗi nzukri ké ƴo tul mbete bolkusol Ŋgerzah ya. Wara le mi gi ɓay ɗi nzuk suyari. »
14Wara mí nzuk-dih fal Za̧h batisiri gi ta̧w Zezu ɓahri : « A wah ke fariziri nah toŋ saŋ mbih ba, ɓay fe mí nzuk-dih fal wori, saŋ mbih ya le ? »
15Zezu ɓah hi̧ niri ɓahri : « Nzukri ké gi gel ti̧hmbih nzuk-ya̧ wu̧y a foyu#9.15 Ŋgerzah ɗi mun ye ɓa nzuk-ya̧ wu̧y. Í ki̧ Mbete Esaïe 62.4-5 ke 54.5-6 ke Mbete Osée 2.16-20 ɓay tu ɓayu. ɓay laɓ mun ɓa seh lo ? Mí nam ƴo gina ɓay hi̧ nzuk wu̧y a foyu ra ɓá ta-a. Namuri-aw dara ku sáŋ mbih ɓáy. 16Nzuk ké ɓay mbi nzak gar a foyu sa̧h keni nun ta̧w gar ta-a. Gar a foyu-aw ɓay gɔh ta̧w gar ra tir ma pol hi̧ garu suya mba a pol. 17Nzuk ta aŋ yim a pa̧wu ku̧ ta̧w ɓɔl ho̧ko ya. Yimu yi̧ŋ le, ɓɔl ho̧ko ra ɓay fur kpum dale, yim a pa̧wu ra ɓay ku̧ kpah. Ta̧w ɓɔlu kara ɓay ɓe-ɓeɓ pi. Kaŋ dale ku aŋ yim a pa̧wu ku̧ ɓil ɓɔl ho̧ko a foyu ma. Mí yim ke ɓɔl ho̧ko seɗe mbɔk ɓay na ɓa suki. »
18Zezu ƴo ɓah ɓay ra ɓáy bale, í ko, ŋgernzuk mbew gi ta̧w ye. Ke huk siɓa goŋ ni ɓahri : « Gun bi a wu̧yu hu aŋay. Keni-aw kara mu si ɓaŋ ndɔk kan tul ye le, ke él kaɓ ke nun ɓáy. »
19Zezu mbi mahful ƴo sina fal ŋgernzuk ra. Nzuk-dih fal yeri si pi. 20Mí í ko, wu̧y si ke fal Zezu mí za nzak gar ye. Wu̧y ra, sem ƴo ti̧h ke ɓil ye laɓ mbihmbam boh falu seɗe kari da#9.20 Í mgba Mbete Lévitique 15.25-27 tuh ke gel ki̧na-ay.. 21Ke ɓahri se : « Ɓa ra nzak gar ye kaŋto mí-i za kara mi tí̧h ke ndɔk hul. »
22Zezu sɔɓ nun, ke ko wu̧y ra dale, ke ɓahri : « Gun bi, mú su̧h law. Law wo ké te sa tul bi-ay ya̧ mu ke ndɔk hul ya̧-ya̧. »
Kaŋaw mí wu̧y ra ziŋ mun gahna ke sa̧wseh-u-aw.
23-24Zezu ka̧h kerpuh ŋgernzuk ra. Ke ko nzuk-ɗi siŋ rew hulri ke nzuk-vba̧ munri, mí ke ɓah hi̧ niri ɓahri : « Í el wuri ma puh wara. Gun tikla-ay hu ya. Wara le ke na nam kaŋto. »
Mí ku sak ni gbaw. 25Ke ni̧h nzukri-aw bale, ke rih ɓil vul. Ke mgba ndɔk hul ra, ke tom ni. Tem gun tikla ra el gi, ke ur síɓa. 26Kandɔkaw mí mberem ɓayu ya̧ gelri riw ké tusiɓa-aw.
27Zezu poŋ kerpuh ŋgernzuk ra ƴo tɔrna. Ra̧wri seɗe dih bol ye ƴo vba̧ nzak ɓeleŋ ɓeleŋ. Ku ƴo ɓahri : « Gun zih ŋgermbay Daviɗ, mú laɓ law in ziŋ na ge. »
28Zezu rih vul, mí ra̧wri ké seɗe ra rih si tul ye. Zezu vbi niri ɓahri : « Law woiri te tul bi ɓahri, ŋgerna bi mah so wuri le ? »
Ku ɓahri : « Kandɔkaw. Ŋgermbay, mu ma-mah. »
29Wara mí ke ndar ndɔk za nun woyri, ke ɓahri : « Nun woiri ɓá mgbur mah ke kanlaw woiri. »
30Kaŋ mí nun woyri mgbur, mí Zezu bak niri ɓahri : « Ko-ko í ɓah ɓayu hi̧ nzuk mbew. »
31Ti̧hna woyri ke vul bale, ku si ɓah ɓayu par par hi̧ mberemu ya̧ gelri riw ké tusiɓa-aw.
32Zezu ke nzuk-dih fal yeri ti̧h ke vul ƴo tɔrna bale, í ko, nzukri maŋ mbiki ké záh mbih kusol ye gi keni hi̧ Zezu. 33Zezu ni̧h záh ké tul mbiki ra, mí mbiki-u el ɓah ɓay. Fe-u na daɓa nzukri yer. Ku ɓahri : « Fe saŋ a kandɔkaw ti̧h nun gun Izarayelri bɔk mbew ya ɓáy. »
34Fariziri ba, ƴo ɓahri : « Ke ŋgerna mbay záh tukala mí ke ƴo ni̧h záhri ké tul nzukri-aw. »
35Zezu si ke puh puh, puh a lukiri ke gun puhri pi. Ke ƴo firma ziɓri ɓay lák mbay Ŋgerzah ɓil vul misoŋ woyri. Ke ka-kah ɓaysuki lák mbay a nunmbam. Ke gah sam senari ɓoɗ ɓoɗ. 36Ké-e ko daɓa nzukri-aw dale, ku baseh ké nun ye ɓay fe le, fe zɔklɔ kal tul woyri pi, kal law woyri pi. Ke ko niri kandɔk sami ké nzuk-kɔr niri ta-a. 37Wara mí Zezu ɓah ɓayay hi̧ nzuk-dih fal yeri : « Naŋ na ndekle ké waka mah vbehna, mí nzuk-vbeh naŋuri ŋgi̧ ya. 38Dale í goŋ nzuk waka ɓá pih nzuk-vbeh naŋ a ɓoruri gi dɔm tul nzuk a polri ɓáy. »
Nu markerat:
Mbete Matiye 9: SIAFNK
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Wycliffe Bible Translators, Inc. All rights reserved.
