Matt. 4
4
Timi Küghünamokeu-a lo Jisü Peju keu
1Tipathiu Alhou Ghungu no Jisü sasü küghünamokeu-a lo tüghami pelo ghuju penike pa sasü wuve. 2Jisü ye putho tsalà eno pucho tsalà lhobidi kümvüve kethiu müzüthive. 3Tüghami hu no pa lau ighino pi, “Nono Alhou Nu shi aghí aye, atu hipaqo vilo asho ilhovelo pilo.”
4Jisü no khochile, “Ishi yèpüani: ‘Timi ye achuqupu shou likhi bepe xümlae, ikemu Alhou no pikeu tsa shou bepe xülu nanie.’#4:4 Zaki 8:3”
5Tithiu tüghami hu no akimthe mishighüna lo Jisü sawu no pa pelo achineki kütsüqa lo puthugho pe. 6Tüghami hu no pi, “Nono Alhou Nu shi aghí aye, ilhe iqivelo.” Kughengu ishi yèpüani:
“ ‘Pa no paw kungumi pelo O tucho penike azah tsü nani
eno O pukhu pelo atu shoumu püsüpuku pemo nike ghenguno
panongu no panongu u lono O khapeluve nani.’#4:6 Leshe 91:11,12”
7Jisü no pa khochile, “Hi ghí yèpüani: ‘Ampeu O Lhou theju kevilo.’#4:7 Zaki 6:16”
8Itaghi, tüghami hu no Jisü sasü ighono chuqumghai keu naghuto lakhi lo saiku no ayeghi lo kükaphuqo qhivütsüni akeu kümtsü pa pìye. 9Eno pi, “Nono qhoqhünhe no I mülá aye, I no hi kümtsü O tsüveni.”
10Jisü no pa vilo pi, “I lau no chevelo, Satan! Kughengu ishi yèpüani: ‘Ampeu O Lhou likhi mülá lo eno pa likhi huthu lo.’#4:10 Zaki 6:13”
11Tipathiu tüghami ye Jisü qhive no wuve, eno kungumiqo no ighino pa tucho-hiju luve.
Jisü no Kütsü thuve keu
12Kughou Jisü no John ye akughuki lo süvae ipi chilu keno, pa ye Galilee lo idewove. 13Pa ye Nazareth qhive no Capernaum ipikeu-a lo wu no tile xüacheuve. Capernaum ye Zebulun ngò Naphtali ko-aqha lo Galilee züghi phivilo ke. 14Tiye, Isaiah tungkupuu vechewo kiu pipüa keno shikupu niye ke:
15“Zebulun ngò Naphtali yeghi,
Azüghi Laghi, Jordan nguno hukukuu
Jewkumomiqow Galilee
16àküzǘ lo xü akemiqo no
aküvü kijè lakhi ithuluvae;
akithí yekükhü yeghi lo xü akemiqo shou
aküvü lakhi ipeghivae.”#4:16 Isa 9:1,2
17Tipathiu Jisü no ishi kütsü thuve, “Amlo pebidelo, kughengu kungugha kükaphu ye kupunú ighivae.”
Jisü no Pa Khopemi Atüghimiqo Kulù
18Jisü no Galilee züghi mükü lo alà cheche kelo, Simon, Peter ipi ku chekeu eno pa thiküzüu Andrew ipikeu pama athiazü, pa no ithulu. Pama ye akhakükhami kehu azüghi lo akhame vesü ae. 19Jisü no pi, “Ighilo, I papelo, I no nokujo pelo akha khalu ketoi timi khalu penike puwunie.” 20Pama no akimighi shi akhameqo qhive no Jisü papesü wuve.
21Tile no chesü wu kelo, pa no athiazü kütami kini ithulu, Zebedee nu James eno pa thiküzüu John. Pama ye pama papù Zebedee sasü ashuka lo akhameqo pukho ae. Jisü no pama ku 22ikelo, paikhavi lono pama no ashuka ngò pama papù qhive no Jisü papesü wuve.
Jisü no Aküsümi Shipivi
23Jisü ye Galilee qha kümtsü lo wu no synagogqo#4:23 Synagog ye Jewmiqo kukuhoki ke. lo kütsü, akükaphu sütsa kiviu pesü asheshu eno küsükinimi ngò aküsǜ jeli kümtsü shipivi ae. 24Jisü ghili Syria qha kümtsü külha wove, eno timiqo no aküsǜ jeli sǜ akemi, ighono minheqhi sǜ akemi, tüghaküsa no tsüghape akemi, kilighakipemi, eno aphimpi ithamlave kemiqo kümtsü pa lau saighi; eno Jisü no panongu shipivi tsüe. 25Timi kutomo Galilee, Decapolis,#4:25 Decapolis ipi akeu ye mishighüna chighí pesü no piani. Jerusalem, Judea eno Jordan ko-aqha lono ighi kemiqo no pa pape wuve.
Nu markerat:
Matt. 4: STB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
