Matt. 3
3
John Baptiz Kishiu no Alaghi Ghephe tsü
1Tipau ghuloki lo John Baptiz kishiu ighino Judea lo küghünamokeu-a lo kütsüsü ighi 2eno ishi pi, “Amlo pebidelo kughengu kungugha kükaphu ye kupunú ighivae.” 3John ye tungkupuu Isaiah vechewo ishi pipüa keu hu ke:
“Küghünamokeu-a lono asütsa lakhi no ishi ighamuku anie,
‘Ampeu ghenguno alaghi ghepe qhitsülo,
pa no wu kepu laghi müzüchoi shitsülo.’ ”#3:3 Isa 40:3
4John’w tiphimini ye sayeshi mhi no mülà keu, eno pa ye ashiyiko pokha no pa chita khapu eno pa ye tülhaqu ngò aghasa lo akhingozü chuche. 5Jerusalem, Judea qhalo eno Jordan ko-aqha kümtsü lono timiqo no John lau ighie. 6Panongu no pütüta xinéqo piphe püzü John no Jordan Ghoki lono panongu baptiz shitsüe.
7Ikemu kughou Phariseemi ngò Sadduceemiqo kutomo no pa no baptiz shi akeu-a küdau chekeu ithulu keno, pa no ishi panongu vilo pi: “Nongu apighitiqo! Khuu no nongu pelo Alhou loghukighide chekeu lono polu penike pikichive kea? 8Amlo pebideve keu toi xüpe pìyelo. 9Eno nongu ye nolikhi no vilo, ‘Ningu ye Abraham no ningu papù ke,’ ipi pilu nani küghashi kümsü kevilo. I no nongu vilo pìní, Alhou ye atu hipaqo pesü Abraham ghenguno anuli kughulhopheve tsülu nani. 10Amghü ye asüboqo kuhu phivilo kutò pe ani, eno asübo khijehi no axathi kivi pithímoni keno yeqhive no ami lo vesüve nani.
11“Nongu mlo pebide penike ghenguno ni ye azü pesü nongu baptiz shitsü ani. Ikemu khuu I shelo cheni keno pa ye I nguno akumtou ke, ni ye pa pukhukuqhomu pe küzü kumoe. Pa no Aghungu Kimthe eno ami pesü nongu baptiz shitsü nani. 12Paw fuleve kepu thigha ye pa u lo ani, eno pa no pa niqa shikimtheve püzü pa thì pekütsü pesü ale lo sǘ nani ikemu amuu ye khilemu ghapinhe müla keu mi lono pitive nani.”
Jisü Baptiz Shikeu
13Ikelo Jisü ye John pelo baptiz shitsü peniye Galilee lono Jordan ghoki lo ighi. 14Ikemu John no pa lakha ghi pi, “Nono ni baptiz shitsü moayesa ani püzü, nou no I lau ighi ani keshea?”
15Jisü no khochile, “Itehi ghengu ye ishi aghivelo; achipiumikucho kümtsü shikupu nike ghenguno hipau shikeu no achipi ke.” Tile no John no pulove tsü.
16Jisü ye baptiz shive kemtsa, pa ye azü lono khalau ipeghive. Tipa mtsa no kungugha khaqhive, eno Alhou Ghungu no miqhedu lakhi toi pa shou ikughi akeu pa no ithulu. 17Eno kungugha lono asütsa lakhi ishi pi, “Hiye I no qhuivü chekeu I nu ke; ni ye pa shou I mlokiqi achenie.”
Nu markerat:
Matt. 3: STB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
