Kuyamba 29
29
Jakobho anfika m'muyi mwa Labhani
1Pamwepo Jakobho adayenda ulendo wake, nkufika mudziko lawanthu wakumabveladzuwa. 2Paadanyangana adawona n'chela m'munda, adawona mititi mitatu yamabila yakhadagona pambali, pakuti pan'chela umwewo ndipo pakamwela mabila. Koma mwala wachilemela ukhadafunga pamulomo wan'chelawo ukhali ukulu. 3Anyakabusa paakhakocheza mabila yawo pan'chelawo, ndipo paakhachosa mwalawo achimwesa mabila yawo, achibwezela mwalawo pomwe pan'chela. 4Jakobho adati kwayiwo, “Abale wangu mukuchoka kuponi?” Iwo adati, “Tikuchoka ku Harani.”
5Jakobho adazati kwayiwo, “Ko mungadziweko Labhani mwana wa Nahori?” Anyakabusawo adati, “Tinimudziwa.”
6Jakobho adazati, “Ko iye ali bwino.” Iwo adati, “Yinde iye ali bwino, wonani mwana wake Rakelo ndiye uyo ali kubwela namabila!” 7Jakobho adati, “Wonani, pakuti yachali masikati, nthawe yakukocheza bzifuwo inati yakwana, mwesani mabila yanu muyende mukayadyese.” 8Koma iwo adati, “Tingakwanise lini kufikila mabila yentse yakochela pabodzi, mwala wakungulusiwa pamulomo wan'chela; pamwepo tingamwese mabila.”
9Jakobho paakhali kulewa-lewa naanyakabusawo, Rakelo adafika namabila yaapayi wake, pakuti ndiye akhali nyakabusa wayene. 10Tsapano Jakobho paadawona Rakelo mwana wachikazi wa Labhani, mano waamayi wake namabila ya Labhani, Jakobho adayenda kakungulusa mwala ukhali pan'chela nkumwesa mabila ya Labhani mano waamayi wake. 11Pamwepo Jakobho adam'psoda Rakelo nkuyamba kulila kwakukondwa. 12Jakobho adati kwa Rakelo, “Ndine mwana wa Rabheka nana waapayi wako.”
Rakelo adathamanga kunyumba achikawuza apayi wake, Labhani. 13Labhani paadandobva mpfeso za Jakobho, mwana wanana wake, adathamanga kachungulana naye. Labhani paadafika pakhana nz'ukulu wake Jakobho adamukumbatila achimuphsoda. Adatola Jakobho achiyenda naye kunyumba kwake. Pamwepo Jakobho adalongosolela Labhani bzikhadachitika, 14Labhani adati kwayiye, “N'chadidi, iwe ndiwe wabondo langu nawanyama yangu!” Jakobho adakhala na Labhani kwamwezi.
Jakobho am'phata basa kuti apasiwe Rakelo na Liya
15Labhani adati kwa Jakobho, “Pakuti ndiwe m'bale wangu, ko ungandiphatile basa palibe mpagalo? Ndiwuze mpagalo wawungafune?” 16Tsapano Labhani akhana wana awili wachikazi; dzina lankulu likhali Liya, dzina lamung'ono likhali Rakelo. 17Maso ya Liya yakhali yakuthima, koma Rakelo akhadakoma wathupi labwino.
18Jakobho adafuna Rakelo; iye adati, “Ninkuphatilani basa kwamagole manomwe muchizandipasa Rakelo mwana wanu mung'ono.”
19Pamwepo Labhani adati, “Bzili bwino kuti ndimpeleke kwayiwe pana kuti ndimpeleke kwamunangombo munthu bzake, tsapano iwe khala nayine pano.” 20Nakutenepo Jakobho adaphata basa kwamagole manomwe kuti apasiwe Rakelo, kwayiye magole manomweyo yakhadandolingana nantsiku zing'ono-ng'ono pakuti akhafuna Rakelo kwene-kwene.
21Pamwepo Jakobho adati kwa Labhani, “Ndipaseni nkazi wangu ndipite naye panyumba pakuti ntsiku zatidabvana zakwana.” 22Labhani adazakocheza wanthu wentse akhali pafupi naye, achichita feshita. 23Usiku umwewo Labhani adapeleka Liya kwa Jakobho, Jakobho nkudziwana naye. 24Labhani adapeleka mulanda wake Zilipa kwa Liya kuti akhale nyabasa wake. 25Machibese Jakobho adazadziwa kuti wagona na Liya, iye adati kwa Labhani, “N'chinyi chamwachita kwayine? Ko ine sindidaphatila basa Rakelo? Ko thangwe lanyi mwandinamiza tenepa?”
26Labhani adati kwayiye, “Ntemo wathu ise tiniyamba lini kulooza mung'ono nkulu anati waloodwa. 27Maliza sondo yawuyu, nin'zakupasa pomwe munango wache, wawun'azaphatila basa kwamagole yanango manomwe.”
28Jakobho adachita tenepo, adamaliza sondo ya Liya; pamwepo Labhani adampasa mwana wake Rakelo kuti akhale nkazi wake. 29Labhani adapeleka mulanda wake Bhiliha kwa Rakelo kuti ambam'phatila basa. 30Nakutenepo Jakobho adazadziwana na Rakelo, adamufuna kuposa Liya. Adazaphatila pomwe basa Labhani kwamagole yanango manomwe.
Jakobho am'baliliwa wana
31Chawuta paadawona kuti Liya akhafuniwa lini, adafungula mimba yake; koma Rakelo akhalibe mbeleko. 32Liya adaphata pathupi achibala mwana wachimuna achimpasa dzina lakuti Rubheni, pakuti iye adati, “Pakuti Chawuta wawona kushupika kwangu; chadidi mwamuna wangu ati andifunembo.” 33Liya adaphata pathupi nkubala pomwe munango mwana wachimuna, iye adati, “Chawuta wandipasa pomwe munango mwana, pakuti adabva kuti nin'zondewa, wandipasa pomwe mwana uyu, achimpasa dzina lakuti Simiyoni.” 34Adazaphata pathupi pomwe, iye adati, “Ulendo uno mwamuna wangu ati andifunembo, pakuti ndam'balila wana atatu, mwanayo adampasa dzina lakuti Levi.” 35Liya adaphata pathupi pomwe nkubala mwana wachimuna, iye nkuti, “Ulendo uno nin'zadumbiza Chawuta.” Nakutenepo mwanayo adampasa dzina lakuti Judha, pamwepo adayima kubala.
Nu markerat:
Kuyamba 29: KUNDA
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bhaibheri reChikunda © Bible Society of Zimbabwe