Лука 16
16
ЯПШӀЫКӀУХЭНЭРЭШЪХЬ
ЛӀы баим имылъкугъэзекӀо тхьагъэпцӀым ехьылӀэгъэ гъэсэпэтхыдэр
1– ЛӀы бай горэм мылъкугъэзекӀо иӀагъ, – ариӀуагъ Исус игъогу рыкӀохэрэм. – «Мы лӀым уимылъку пшӀуегъэкӀоды» аӀуи, цӀыфхэм лӀы баим раӀуагъ. 2Арыти, лӀы баир имылъкугъэзекӀо къеджи, риӀуагъ: «О къыохьылӀагъэу сыд зэхэсхырэр? Симылъку зэрэбгъэзекӀорэ шӀыкӀэр сэгъэлъэгъу. Джыкъынэуж симылъку о бгъэзекӀо хъущтэп».
3МылъкугъэзекӀом ышъхьэ фиӀожьыгъ: «Сыда сэ сшӀэщтыр? Ситхьэматэ сиӀоф сӀехыжьы. ЧӀыгур стӀынэу кӀуачӀэ икъун сиӀэп, сылъэӀонкӀи сэукӀытэ. 4СиӀоф сӀихыжьмэ, сшӀэщтыр джы сэшӀэ, цӀыфхэм яунэхэм сырагъэблэгъэным пае». 5Аущтэу мылъкугъэзекӀор цӀыфхэу итхьэматэ ичӀыфэ зытелъхэм зырызэу къяджи, ахэмэ ащыщэу апэрэм риӀуагъ: «Ситхьэматэ ичӀыфэу сыд фэдиза птелъыр?» 6ЧӀыфэр зытелъ лӀым къыӀуагъ: «Дэгъэ къошынишъэ стелъ». Адрэм риӀожьыгъ: «Мары, уичӀыфэ тхылъ штэжьи, тӀыси, псынкӀэу шъэныкъо итх». 7ЕтӀанэ мылъкугъэзекӀом нэмыкӀ горэми риӀуагъ: «О чӀыфэу сыд фэдиза птелъыр?» Ащ къыӀуагъ: «Коц дзыуишъэ стелъ». Адрэм риӀожьыгъ: «УичӀыфэ тхылъ штэжьи, тӀокӀиплӀ итх».
8Аущтэу зэхъум, тхьэматэр имылъкугъэзекӀо тхьагъэпцӀым щытхъужьыгъ, акъыл хэлъэу зэрэзекӀуагъэм пае, сыда пӀомэ, мы дунаим ицӀыфхэр ежьхэр зэрэзэдэзекӀохэрэмкӀэ нэфынэ шъыпкъэм щызекӀорэ цӀыфхэм анахьи нахь Ӏушых. 9Ау сэ шъосэӀо, дунэе мылъкумкӀэ ныбджэгъухэр зэжъугъэгъотых, а мылъкур зышъуухыкӀэ, мыкӀодыжьын псэупӀэм шъурагъэблэгъэным пае.
10Ӏоф макӀэхэмкӀэ узщыгугъын цӀыфым ӀофыбэхэмкӀи ущыгугъыщт, Ӏоф макӀэхэмкӀи узщымыгугъын цӀыфым ӀофыбэхэмкӀи ущыгугъыщтэп. 11Аущтэу зыхъукӀэ, дунэе мылъкур зешъухьанэу зыщыгугъынхэ цӀыфхэу шъущымытыгъэмэ, ащыгъум мылъку шъыпкъэр хэта шъо шъуӀэ къизылъхьащтыр? 12НэмыкӀхэм ямылъкукӀэ зыщыгугъынхэ цӀыфхэу шъущымытыгъэмэ, шъо шъуимылъку шъыпкъэр зешъухьанэу хэта къышъозытыщтыр?
13Зы унэӀутыр тхьэмэтитӀум афэлэжьэн ылъэкӀыщтэп; сыда пӀомэ, е зыр ыуджэгъунышъ, адрэр шӀу ылъэгъущт, е зым шъыпкъэу фыщытынышъ, адрэр зэрипэсыщтэп. Шъо Тхьэми ахъщэми шъуафэлэжьэн шъулъэкӀыщтэп.
Тэурат хабзэмрэ Тхьэм и Тетыгъошхорэ
(Маттэ 11:12-13)
14Ахъщэр шӀу дэдэ зылъэгъурэ фарисейхэм а пстэур зызэхахым, Исус дэхьащхыгъэх. 15Ау Исус ахэмэ ариӀуагъ: – Шъорыба шъыпкъагъэ зиӀэ цӀыфхэм зафэзгъадэхэу, цӀыфмэ апашъхьэ зафэу зыщызыгъэлъагъохэрэр, ау Тхьэм шъо шъугухэм арылъыр ешӀэ; сыда пӀомэ, цӀыфмэ агъэлъэпӀэрэ Ӏофхэр Тхьэм дэжькӀэ лъэшэу пыутых.
16– Пегъымбар Мусэ и Тэурат хабзэ итхэмрэ пегъымбархэм атхыгъэхэм арытхэмрэ Тхьэм фэлэжьэрэ цӀыфхэм агъэӀугъэх, умэхъэкӀо Иуан имафэхэм анэсыфэ. Ащ къыщегъэжьагъэу Тхьэм и Тетыгъошхо ехьылӀэгъэ къэбарышӀур агъэӀу, хэти а Тетыгъошхом ыӀэчӀэгъ чӀэхьаным гузэжъогъукӀи ыуж ит. 17Ау пегъымбар Мусэ и Тэурат хабзэ ит хьарыфхэм анахь цӀыкӀур хэкӀодыкӀыным нахьи, уашъори чӀылъэри нахь кӀодыжьыщтых.
Шъхьэгъусэ тӀупщыжьыным ехьылӀагъ
(Маттэ 5:32; 19:9; Марк 10:11, 12)
18– Хэтми зишъуз зытӀупщыжьэу, нэмыкӀ бзылъфыгъэ къэзыщэжьырэм зинэ ышӀагъэу мэхъу. Ащ фэдэу хэтми лӀы горэм ытӀупщыжьыгъэ шъуз къэзыщэжьырэм зинэ ышӀагъэу мэхъу.
ЛӀы баимрэ Лазарырэ
19– ЛӀы бай горэ щыӀагъ. Ар щыгъынхэм анахь лъапӀэхэмкӀэ фэпагъэу, мафэ къэси ешхэ-ешъошхо ышӀыщтыгъ. 20ЛӀы баим икъэлапчъэ дэжь лӀы тхьамыкӀэ горэ, Лазар ыцӀэу, ыкӀышъо бэгухэр тетэу щылъыгъ. 21А лӀы тхьамыкӀэм лӀы баим иӀанэ къетэкъохыгъэхэмкӀэ имэлэкӀалӀэ ыгъэуцу шӀоигъуагъ. Хьэхэри къекӀуалӀэхэти, ибэгухэр абзэихьащтыгъэх. 22ЛӀы тхьамыкӀэр дунаим ехыжьыгъ, мэлэӀичхэми ар Ибрахьимэ дэжь ахьыгъ. ЛӀы баири дунаим ехыжьи, чӀалъхьажьыгъ. 23А лӀы баир гугъушхо хэтэу, лӀагъэхэм ячӀыпӀэ щыӀэу къыдэплъыий, Лазари бгъодэсэу Ибрахьимэ ылъэгъугъ. 24Ар зелъэгъум, джагъэ: «Тятэ Ибрахьим, гукӀэгъу къысфэшӀи, Лазар къысфэгъакӀуи, ащ ыӀэхъомбапэ псым херэгъауи, сыбзэгу ерэгъэучъыӀ, сыда пӀомэ, мы машӀом сыхэтэу къинышхо сэлъэгъу». 25Ау Ибрахьимэ къыӀуагъ: «СикӀал, угу къэгъэкӀыжь дунаим узытетым, уиӀахьышӀу зэрэщыбгъотыщтыгъэр, ау Лазар ащ фэдэу къин ыхьэу зэрэпсэущтыгъэр. Ау джы ащ ыгу зыгъэрэзэн Ӏофхэр егъотыжьы, о къинышхом ухэт. 26Ащ нэмыкӀэуи шъоррэ тэррэ тазыфагу тауташышхо#16:26 тауташ – къушъхьэ тӀокӀэ куу. дэлъ, мыщ дэжьым икӀыхэу шъуадэжь кӀонхэу фаехэр мыкӀошъунхэм пае. Ащ фэдэу шъуадэжь къикӀэу тадэжьи зи къэкӀошъурэп». 27Аущтэу зеӀом, лӀы баим къыӀуагъ: «Ащыгъум, тят, сыолъэӀу, сятэ иунэ Лазар гъакӀо, 28сыда пӀомэ, сэ шитф сиӀ. Мы къинышхо щэчыпӀэм ахэри къэмыкӀонхэм пае, зыфэсакъыжьынхэу агурерэгъаӀу». 29Ау Ибрахьимэ къыриӀожьыгъ: «Пегъымбар Мусэ ытхыгъэмрэ адрэ пегъымбархэм атхыгъэхэмрэ яӀэх, ахэмэ ярэдэӀух». 30Ау лӀы баим къыӀуагъ: «Хьау, тятэ Ибрахьим, ау лӀагъэхэм къахэтэджыкӀыжьыгъэу зыгорэм ыгъэзэжьмэ, ахэр япсэкӀодшӀагъэхэм афыкӀэгъожьыщтых». 31Ибрахьимэ къыриӀожьыгъ: «Пегъымбар Мусэмрэ адрэ пегъымбархэмрэ ямыдэӀухэмэ, зыгорэ лӀагъэхэм къахэтэджыкӀыжьыщтми, ашӀошъ хъущтэп».
Nu markerat:
Лука 16: AdgNT14
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 1991, 1992, 2014. Стокгольм
