Лука 15
15
ЯПШӀЫКӀУТФЭНЭРЭШЪХЬ
КӀодыгъэ мэлым ехьылӀэгъэ гъэсэпэтхыдэр
(Маттэ 18:12-14)
1Хьакъулахь ахъщэр хэзыххэрэмрэ псэкӀод зышӀэхэрэмрэ зэкӀэ Исус едэӀунхэу къекӀолӀагъэх. 2Ау фарисейхэмрэ Тэурат егъэджэкӀо пащэхэмрэ агу емыӀоу аӀуагъ: – Мы лӀым псэкӀодышӀэ цӀыфхэр гъусэ зыфешӀых, адэшхэ.
3Аущтэу къызаӀом, Исус мы гъэсэпэтхыдэр афиӀотагъ:
4– Шъуащыщэу зыгорэм мэлишъэ иӀэу тӀон. Ахэмэ ащыщэу зыр шӀокӀодмэ, адрэ тӀокӀиплӀырэ пшӀыкӀубгъурэр губгъом къыринэнхэшъ, кӀодыгъэр къегъотыжьыфэ лъыхъонба? 5Ар къызигъотыжькӀэ, гушӀоу къеӀэтышъ, ытамэ къытырелъхьэ. 6Ядэжь къызыкӀожькӀэ, иныбджэгъухэмрэ игъунэгъухэмрэ къяджэшъ, ареӀо: «ШъукъыздэгушӀу, симэлэу сшӀокӀодыгъэр къэзгъотыжьыгъ». 7Сэ шъосэӀо, ащ фэдэу шъыпкъагъэ зиӀэ нэбгырэ тӀокӀиплӀырэ пшӀыкӀубгъурэу псэкӀод фыкӀэгъожьыныр зимыщыкӀагъэу зылъытэхэрэм апае, гушӀуагъоу уашъом щыхъурэм нахьи, псэкӀод зышӀэрэ цӀыф закъоу зипсэкӀодхэм афыкӀэгъожьырэм пае, уашъом нахь гушӀогъошхо щыхъущт.
Тыжьын ахъщэу кӀодыгъэм ехьылӀэгъэ гъэсэпэтхыдэр
8– Ащ фэдэуи бзылъфыгъэ горэм тыжьын ахъщипшӀ иӀэу тӀон. Ахэмэ ащыщэу зыр шӀокӀодмэ, остыгъэ хигъанэу, ахъщэр къегъотыжьыфэ, фэсакъыпэу лъыхъузэ, унэр зэкӀэ къыпхъэнкӀынба? 9Ар къызигъотыжькӀэ, иныбджэгъухэмрэ игъунэгъухэмрэ къяджэшъ, ареӀо: «ШъукъыздэгушӀу, сшӀокӀодыгъэ ахъщэр къэзгъотыжьыгъ». 10Сэ шъосэӀо, ащ фэдэ къабзэу псэкӀод зышӀэрэ цӀыфэу кӀэгъожьырэм Тхьэм имэлэӀичхэр фэгушӀощтых.
КӀодыгъэ кӀалэм ехьылӀэгъэ гъэсэпэтхыдэр
11– ЛӀы горэм къуитӀу иӀагъ, – къыӀуагъ Исус. 12– Къо нахьыкӀэм ятэ риӀуагъ: «Сят, мылъкум щыщэу къыстефэщт Ӏахьыр къысэт». Арыти, тым мылъкур къуитӀумэ афигощыгъ. 13Мэфэ заулэ зытешӀэм, къо нахьыкӀэм иӀэр зэкӀэ зэкӀиугъуаий, хымэ хэгъэгу горэм кӀуагъэ. А хэгъэгум мыхъо-мышӀэ псэукӀэкӀэ имылъку щигъэкӀодыгъ. 14ЗэкӀэри зегъэкӀодым, гъэблэшхо а хэгъэгум къыщыхъуи, щыкӀэгъэшхо иӀэ хъугъэ. 15Аущтэу зэхъум, а хэгъэгум щыпсэурэ лӀы горэм дэжь кӀуи, Ӏоф къыӀихыгъ. А лӀым икъохэр губгъом щигъэхъунхэу ыгъэкӀуагъ. 16Къохэм яӀус щыщ ыныбэ из ышӀынэу ехъуапсэщтыгъ, ау а Ӏусым щыщ хэти къыритыгъэп.
17КӀалэм итхьамыкӀагъо зыздешӀэжьым, ышъхьэ фиӀожьыгъ: «Сэ сятэ илэжьакӀохэр сыд фэдиз хъухэми, шхын афикъуни къялыжьыни яӀ, ау сэ гъаблэм сигъалӀэу мыщ сыщыӀ! 18Сятэ дэжь сыкӀожьынышъ, есӀощт: Сят, уашъомкӀи оркӀи псэкӀод сшӀагъэ. 19О сэ скъо къысэпӀонэу сифэшъуашэп. О уилэжьакӀохэм ащыщэу зым фэдэу сэри сышт». 20ЕтӀанэ тэджи, ятэ дэжь кӀожьынэу ежьагъ. Ыкъо чыжьэкӀэ къэкӀожьэу ятэ къызелъэгъум, ыгу егъуи, пэгъочъи, ӀаплӀ рищэкӀи, ебэоу ыублагъ. 21Ыкъо ятэ риӀуагъ: «Сят, уашъомкӀи оркӀи псэкӀод сшӀагъэ. О сэ скъо къысэпӀоныр сифэшъуашэп». 22Ау ятэ иунэӀутхэм ариӀуагъ: «Щыгъынхэм анахь дэгъур псынкӀэу къыфэшъухьи щышъулъ. Зы Ӏэлъыни Ӏэрышъулъхь, цуакъэхэри щышъулъэх. 23Тэнэ гъэшхагъэр къашъущи, шӀошъубз. Тыжъугъашх, тыжъугъэгушӀу. 24Мы сэ скъо лӀэгъагъэ, ау къэхъужьыгъ, кӀодыгъэу щытыгъ, ау къэдгъотыжьыгъ». Аущтэу гухэхъо Ӏанэ къашыгъ.
25Ау тым ыкъо нахьыжъ губгъом итыгъ. КъэкӀожьызэ, унэм игъунэгъу къызэхъум, орэд макъэрэ Ӏэгу тео макъэрэ зэхихыгъ. 26УнэӀутхэм ащыщэу зыгорэм еджи, «Сыда къэхъугъэр?» ыӀуи, еупчӀыгъ. 27УнэӀутым къыриӀуагъ: «ПшынахьыкӀэ къэкӀожьыгъ. Уятэ ар псаоу къызэригъотыжьыгъэм пае, тэнэ гъэшхагъэр шӀуаригъэбзыгъ». 28Къо нахьыжъым ар зызэхехым, къэгубжи, унэм ихьажьынэу фэягъэп. Ау ятэ унэм къикӀи, ихьажьынэу къелъэӀоу ыублагъ. 29Къо нахьыжъым ятэ пэгъокӀ ритыгъ: «КъэдаӀу! Сэ мыщ фэдиз илъэс хъугъэу сыпфэлажьэ, о уиунашъохэми зыкӀи сатекӀыгъэп. Сэ синыбджэгъухэми гухэхъо Ӏанэ афэсшыным пае, зы чэцӀи къысэптыгъэп. 30Ау джы о пкъо зыфапӀоу уимылъку бзылъфыгъэ хэтакӀохэм атезгъэкӀодагъэр къэкӀожьыгъэшъ, тэнэ гъэшхагъэр фышӀуябгъэбзыгъ!»
31Ау тым къыриӀуагъ: «Скъо, о сыдигъуи садэжь ущыӀ, сиӀэ пстэури оуий. 32Ау тэ тыгушӀон, тытхъэжьын фаеба? Мы пшынахьыкӀэ лӀэгъагъэ, ау къэхъужьыгъ, кӀодыгъагъэ, ау къэдгъотыжьыгъ».
Nu markerat:
Лука 15: AdgNT14
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
© Институт перевода Библии, 1991, 1992, 2014. Стокгольм
