THILTHAWHAI 23
23
1Chun, Paula chun rorêltuhai chu a en zing a, “Unauhai, vawisûn chen hin Pathien mithmua ṭha tienga ka hriet taphawt chu thawin ka um hlak,” a ta.
2Chun, thiempu Laltak Anania chun, Paula kâwla ngîrhai kuomah, a baua benpêk ding a ta.
3 #
Mt 23.27-28
Paula chun a kuomah, “Nang lung bang nâlvârpa, Pathienin ben lem a ti che; nang Dân anga mi ngai- tuo dingin i ṭhung a, Dân naw anga mi ben ding i ti vei a ni maw?” a ta.
4Chun, a kâwla mihaiin, “Pathien thiempu Laltak i hal vei maw?” an ta.
5 #
Ex 22.28
Chun, Paulain, “Unauhai, thiem- pu Laltak a ni ti ka hriet nawa a nih, ‘I chipuihai hotu chungah thu ṭhanaw hril naw’ ti khawm ziek a ni sih a,” a ta.
6 #
Tt 26.5; Phil 3.5 Chun, Paulain a ṭhen Saddukai, a ṭhen Pharisaihai an nih ti a lo hrietin rorêltuhai lai chun a khêk a, “Unauhai, Pharisai ka nih, Pharisai naupa khawm ka nih; beiseina le mithi thonâwkna thuah suosalin ka um a ni hi,” a ta.
7Chun, chu chu a hril phingleh, Pharisaihai le Saddukaihai an lo insêl a, rorêltuhai chu an inkhing tah a.
8(Saddukaihaiin, “Mithi thonâwk- na hrim a um nawh, vântirkohai, thlarauhai khawm an um bawk nawh,” an ti hlak; Pharisaihai ruok chun chu kawng pahni chu a um an awi sih a.)
9Chuongchun, nasatakin an buoi tah a; Pharisai tienga mi Dân inchûktirtu ṭhenkhat an ngîr a, an sêl a, “Hi mipa hi a suolna iengkhawm kan hriet nawh ie; thlarau khawmin, vântirko khawmin ama hi be sienla ieng am pawi a ta?” an ta.
10Chun, an insêl nasa deu deu leiin, sipai hotu laltak chun Paula an kei nâwi a ṭih a, sipaihai kuomah, zu fea anni laia inthawka kulbînga hung ṭhuoi lût el dingin a ta.
11Chun, zâna chun Lalpa chu Paula kâwlah a ngîr a, “Thlamuong- takin um rawh, Jerusalema ka thu în hriettir ang bawkin Roma khawm în hriettir ding a nih,” a ta.
Paula chunga Judahai thu phierrûk
12Chun, nisa a suok chun Judahai an ṭhang ruol a, Paula an that hmakhat chu iengkhawm faa dâwn lo dingin an inkhâm a.
13Chu thu phierrutuhai chu sâwmli nêka tam lem an nih.
14Anni chu thiempu lalhai le upahai kuomah an feh a, “Paula kan that hmakhat chu iengkhawm intem lo dingin kan inkhâm tah a nih.
15Chuleiin, nangnîn, rorêltuhai le a thu fel nâwkzuola ngaituo tum angin, in kuoma ṭhuoi thla dingin sipai hotu laltak kuomah pehêl deuin hang hril ro; in kâwl hnai a tlung hma khawmin keini ama that dingin kan inpei zing a nih,” an ta.
16Nisienlakhawm, Paula farnu naupa chun an inchân thu chu a lo hriet a, kulbînga chun a va lût a, Paula a va hril a.
17Chun, Paula chun sipai za hotu pakhat a ko a, “Hi tlangvâl hi hotu laltak kuoma chun ṭhuoi rawh; a kuomah thu ieng amanih hril ding a nei a ni âwm ie,” a ta.
18Chuongchun, sipai hotu laltak kuoma chun a va ṭhuoi a, “Paula intâng khan a mi ko a, hi tlangvâl hi i kuoma hung ṭhuoi dingin a mi tir a, i kuomah thu ieng amanih hril ding a nei a ni âwm ie,” a ta.
19Sipai hotu laltak chun, a kutah a chel a, a fe hranpui a, inrûkin, “Ieng am mi hril ding i nei chu?” a ta, ân dawn a.
20Chun, ama chun, “Paula thu fel nâwk zuola i ngaituo ding angin, zîngah rorêltuhai kuoma ṭhuoi thlâk dingin Judahaiin hni che an remti tlâng a.
21Nisienlakhawm, an thu lo awi naw rawh; anni laia mi sâwmli nêka tam lemin an inchân zing a, chuonghai chun ama an that hmakhat chu iengkhawm faa dâwn lo dingin an inkhâm a; tuhin i thu nghâkin inpei sa zingin an um a nih,” a ta.
22Chun, sipai hotu laltak chun tlangvâl chu ân fetir a, “Hieng thu hi i mîn hriettir tah ti tukhawm hril naw rawh,” a ta.
Felik hmaah Paula tirin a um
23Chun, sipai za hotu pahni a ko a, “Zân, zâl hun pha, Kaisari chena fe ding sipai za hni leh, sakawr chung chuong mi sâwmsari leh, fei chawi mi za hni leh siem ro,” a ta.
24Chun, Bawrsâp Felik kuoma chun, himtaka ân tlun theina dingin, Paula an inchuongtirna dingin sahai lo siem ding a ti bawk a.
25Chun, hieng ang hin lekha a ziek a;
26“Klaudi Lusiain Felik Bawrsâp ṭhatak chibai a bûk.
27“Hi mipa hi Judahaiin an man a, an that ding laiin an kuomah sipaihai ṭhuoiin ka feh a, Rom mi a nih ti ka hriet a, ka san suok tah a.
28Chun, an hêkna san hriet ka nuom a, an rorêltuhai kuomah ka ṭhuoi thlâk a.
29Chuongchun, an dân thu ieng ienga manih hêk a nih ti ka hriet a, nisienlakhawm, an hêkna thuah thina le khuopna khawp rau dingin iengkhawm ka hriet si nawh.
30Chun, Judahaiin ama an inchân ti miin an mîn hriettir phingleh, i kuomah ama hi ka hung tir nghâl ta a nih, a hêktuhai khawm, a chunga thupawi an nei taphawt chu i hmaa hril dingin thu ka pêk bawk a,” tiin.
31Chuongchun, sipaihai chun a thupêk ang chun, Paula chu a zân a zânin an ṭhuoi a, Antipatri an tlungpui a.
32A zînga chun sakawr chung chuong mihai chu, ama le fe pei dingin an kîr san a, kulbînga chun an fe nâwk tah a.
33Chun, anni chu Kaisari khuo chu an tlung a, Bawrsâp kuomah lekha chu an pêk a, Paula khawm a hmaah an inngîrtir a.
34Bawrsâp chun a tiem zoin Paula umna ram ân dawn a. Chun, Kiliki ram mi a nih ti a hriet phingleh,
35“A hêktuhai che an hung tlung phingleh, i thupawi ngaituong ka tih,” a ta. Chun, Herod inah vêng ding thu a pêk a.
Nu markerat:
THILTHAWHAI 23: HMARCLBSI
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
