Luk 19

Yesu bo na Dzakayi

1Yesu bu kakoto wataba Yeriko. 2Na mono, muutu mosi, nkuumbu yaandi Dzakayi, waba mukuutu batori ba mpaku, na waba kisina. 3Nde wasaka mu kumono Yesu bunu bu kari, ngo waba wahele kubangisina mu ntoono mpuumbu, na bukuri nde mutele waba wamukufi. 4Bu kadzumuna ku mankula, wanwaata mu muti sikomore, mpisi kamumono, bukuri Yesu haho kaba lutila. 5Yesu, bu katubuka ha kibeendu kikyo, watala ku yulu na wamuleele ti: «Dzakayi, sunduka mu mawasu, bukuri lolo di, me nyelemini mu kudzakala mu nzo ya ye.» 6Dzakayi wasunduka mu mawasu, wataambula Yesu mu nzo yaandi, na wakeembe. 7Baatu bobanso bu bamono bubwo, bamunguta, baleele ti: «Nde weedzakala mu nzo ngaa-masumu!» 8Dzakayi katelemaa, leeriri kuri Mfumu ti: «Mono, me nkaburi bitotolo bwaami ha kakati, na mpeeri ndaambu yakaka kuri bawelu; na mbuti me nyaholo kitotolo kya muutu mu makwa, lo bina me nyimubvutukila.» 9Yesu waleele kuri nde ti: «Lolo di mvuukulu yikotiri mu nzo yimayi, bukuri wu se mosi mu baala ba Abalaami. 10Mukwongo, Mwaana muutu wayisa mu kusaka na kubvuukisa wadziimbila.»

Nkuma ya mipata mya woolo

(Mat 25.14-30)

11Baatu bu baba yukaa mamo, Yesu wabweese kuta nkuma, bukuri nde waba weki bebele na Yerusalemi, na baatu baba kutsima ti, Kimfumu kya Nzaambi bweekimonikini, mu kilookolo kikyo. 12Hango, nde waleele ti: «Muutu mosi walukiinsu wayende ku nsi ya la, mu kwetaambula bumbyaasi nde-meene na kwiisa bvutuka. 13Bu kateele bisari byaandi kuumi, wabakabula mipata kuumi mya woolo na waleele kuri bo ti: "Seenee mumbungu mu ntaangu yi nyeensi me." 14Baatu babari bula bumosi baba bamubele; bo baheeke bamonikisi ha lumbisa lwa nde mu kweleele ti: "Beetu tutiiri ko, ti muutu wu kaba mbyaasi beetu." 15Bu kamana kutaambula bumbyaasi wayisa bvutuka. Nde watumisa bisari bi kaheeri mboongo, mpisi kayaaba bi babakirye mu mumbungu. 16Watete wayisa, waleele ti: "Mfumu, mu mupata ye wa woolo, me mbakirye mimpata kuumi. 17Mbyaasi waleele kuri nde ti: "Bwabubwe, ye kisari kyakibwe; ngo bukuri ye wabeeri wakwiikama mu byantele, me nyikuheeri lutumu ha yulu mabvula kuumi." 18Waboolo se wayisa, waleele ti: "Mu mupata ye wa woolo me mbakirye mipata mitaanu." 19Mbyaasi waleele se kuri wunde ti: "Ye se nyikuheeri lutumu ha yulu mabvula mataanu." 20Wakaka se wayisa, na waleele ti: "Mfumu, mupata waaku wa woolo, wu nyabee nyasweeke kunsa nsaanda, ndewu. 21Mukwongo, me nyabee na boomo bwa ye, bukuri ye muutu wuri na mutima wakuba, wunaangunaa biri wahele kusuusa, na wutolaa biri wahele kukuna." 22Mbyaasi waleele kuri nde ti: "Mu nzoonsulu dza ye-meene, me nyimono ti ye wuri kisari kyakibi. Ye nkati wabeeri wayaaba ti, me muutu nyiri na mutima wakuba, nyinaangunaa biri nyahele kusuusa, na nyitolaa biri nyahele kukuna? 23Ngo buri ye waheriri kwesuusa mboongo dza me ku nzo-mboongo? Na me bu nyikwiisa, mbaka ndaandu mu dzo." 24Nde waleele kuri baba haho ti: "Yisilee mupata wa woolo wu kari na nde, na luha kuri wunde wuri na mipata kuumi mya woolo." 25Bo baleele kuri nde ti: "Mfumu, nde mwaatekesele kubaka mipata kuumi mya woolo." 26Me nyiluleele ti: "Kuri wunde wuri na kitotolo, sa babweese kumuha; ngo kasi wunde wahele na kitotolo, sa bayisila na ki kari na kyo. 27Ha yulu haho se, bataatu ba me, bari basii tya ko ti me ba mbyaasi bo, batwaalee hamaha, na bakekeenu ha busu bwa me."»

Yesu wayende ku Yerusalemi

(Mat 21.1-11; Mal 11.1-11; Yow 12.12-19)

28Yesu bu kamana kuleele mamo, wayende ku mankula mu kwetoomboko ku Yerusalemi. 29Bu katubuka bebele na Betefange na Betanya, nkati-nsi na mulaandu wa Mi-olive, nde waheeke boolo mu bayiki, 30wabaleele ti: «Yendeenu ha bula buri ha mankula, bu lukoto mu bwo, beenu sa lwamono mwaana mpuunda wakaangu, wuri muutu ti mosi kadzakiri ha yulu nde ko; nyangunee nde na twaalee. 31Mbuti muutu wulufuuriri ti: "Buri lumunyaanguna?" Lo leelee bumabu ti: "Mfumu wuri na nzala nde."» 32Bantumu bu bayende, bamono misamu bunu bu kaba baleele. 33Bu baba mu kunyanguna mwaana mpuunda, bangaa-nde babafuula ti: «Buri lunyanguna mwaana mpuunda?» 34Bo baleele ti: «Mfumu wuri na nzala nde.» 35Tumi bo bamunata kuri Yesu; bo bayala biyuungu byaaku ha yulu mwaana mpuunda, na badzakisa Yesu ha yulu nde. 36Bu baba mu kweyende, baatu babeke mu kweyala biyuungu byaaku mu nzila. 37Babaanaa beke bebele na nkulumusu ya mulaandu wa Mi-olive, mpuumbu yoyinso ya bayiki yabeke mu kukeembe, na kudumusa Nzaambi mu mbeembu yadzaangama, mu ntoono bimaangu byobinso bi bamwiini. 38Bo baleele ti: «Kaba wasakumunu, wunde wukwiisa mu nkuumbu Mfumu; kiyeengi ku yulu na nkeembu kunu kinsongi-yulu!»

39Bamosi mu Bafarisi baba mu mpuumbu baleele kuri nde ti: «Muyikisi, ŋaŋina bayiki baaku.» 40Nde wabvutula waleele ti: «Me nyiluleele ti, mbuti bo bawuriri, lo matari sa mafula misaakulu.»

Yesu wadila mu ntoono Yerusalemi

41Bu kakokosolo wamono bvula, na wadila mu dyo, 42waleele ti: «Mbuti ngo ye se, mu kiluumbu ki, bee wayaaba bwa kubakula kiyeengi! Kasi mu lumalu, kyasweeku ha miisu mya ye. 43Mukwongo, biluumbu sa biisa kuri ye, biri bataatu ba ye sa batuunga mpaangu, mu kukudyengekele na kukuswetekese mpele na mpele. 44Sa batsaamuna bvula dyodinso, na kudzusa ye na baatu baaku bobanso; ka basiisa ti tari ha yulu tari ko kuri ye, bukuri ye wasii yaba ntaangu, yi baba kwiisa mu kumono ye ko.»

Yesu wakoto mu Nzo-nzaambi

(Mat 21.12-17; Mal 11.15-19; Yow 2.13-22)

45Yesu bu kakoto mu Nzo-Nzaambi, wabeke kubingisa baba yarikaana, 46waleele kuri bo ti: «Diri dyatinu: "Nzo yaami sa yaba nzo lusaambulu, ngo kasi beenu lumwaasa yo, ntari bangaa-bumfuna.»

47Nde waba yikisaana mpisi kiluumbu mu Nzo-Nzaambi. Bakuutu ba bangaanga-nzaambi, batini ba mangisi na baatu balukiinsu baba kwesakaana bu bamudzusila, 48ngo baba bahele kubaka bwa kusiila, bukuri baatu bobanso baba batiiri kuyuka mi kaleele nde.

Trenutno izabrano:

Luk 19: MW2013

Istaknuto

Podijeli

Kopiraj