Luk 18
18
Nkuma ya mularimi na mukyeetu wa mufwiiri
1Yesu wata nkuma kuri bo, mu kubasoongo ti bayelemini kusaambila mu mpisi ntaangu, na kuhele kuholo-bito. 2Waleele ti: «Kwaba mularimi mosi ha bvula dimosi; nde kaba bataa Nzaambi ko, na kaba bvuminaa muutu ko. 3Mu bvula dinidyo se kwaba mukyeetu mosi wa mufwiiri, waba kwiisa kumuleele ti: "Lalima musamu wuri ha kakati dya me na mbaasi yi turi twabakana." 4Mantaangu malaka mularimi wunde waba wahele kutya, ngo ha mambisa haho, nde watsima kunsa mutima ti: "Lu ti hayuku me nkoobata Nzaambi ko, na bvumina se muutu ko, 5ngo bukuri mufwiiri wu wuri mu kunkwaamisa, me nyimulalimina musamu wunde, mpisi kahele kusiila me ndungusu kwahele manunu. 6Mfumu waleele ti: "Yukeenu mamo ma leeriri mularimi wunde wuri na bubayi!"» 7Heki Nzaambi lo wahele kulalama misamu mya ba baandi ba kari kasoolo, bari mu kufuula butsuku na mwiini kuri nde wubakiingisaa? 8Me nyiluleele ti, «nde sa kalalama musamu bo mu mawasu. Ngo kasi, Mwaana muutu, ha kakwiisa nde tumi mbasi-tsuku kamono kanyi ha butoto hamaha?»
Nkuma ya Mufarisi na mutori-mpaku
9Yesu wata se nkuma yimayi mu ntoono babamosi bakwetsimaana ti, bo basuunguma kwaaku na bakwenyaafuna bambaasi: 10«Baatu boolo bayende ku nzo Nzaambi mu kwesaambila. Mosi waba Mufarisi, wakaka mutori-mpaku. 11Mufarisi bu kateleme wasaambila kunsa mutima ti: "Ho! Nzaambi, me mvutiri matoondo kuri ye, bukuri me nyahele kuba bunu baatu bakaka bari bangaa-kwiibi, bangaa-bubayi, bangaa-kimpala, bunu pe, buri mutori-mpaku wumawu. 12Me nyikotaana loomi mbala dzoolo mu lumiingu, me nyihaanaana se kikuuku kya kuumi mu byobinso bya mbakulu yaami." 13Ngo kasi, mutori-mpaku, bu kaba wateleme mwaa-lutaki, waba wahele kutya ti kusyeetele miisu ku yulu, ngo waba yalaa myooko myaandi na kuleele ti: "Ho! Nzaambi, bakila me ngebe, me nyiri ngaa-masumu." 14Me nyiluleele ti: mutori-mpaku wunde, bu kaba bvutuka ku nzo yaandi, lo wasuunguka mabuungu maandi; ngo Mufarisi ti bele pe. Bukuri mpisi wunde wudzaangamaa mu nde-meene, lo sa bamukulula, ngo wunde wakuluka mu nde-meene sa bamudzaangisa.»
Yesu wasakumuna mwaa-baala bansoombo
(Mat 19.13-15; Mal 10.13-16)
15Baatu batwaala mwaa-baala bansoombo kuri nde, mpisi kababelemene. Ngo bayiki baandi baŋaŋina baba batwaala. 16Kasi Yesu waloombo bamutwaalikila mwaa-bo, na waleele ti: «Hemesee mwaa-baala bansoombo biisa kuri me, na yaa lubadika ko; bukuri Kimfumu kya Nzaambi kiri kya bari bunu bo. 17Mu ngwanwa me nyiluleele ti: Mpisi wunde wuhele kutaambula Kimfumu kya Nzaambi, buni mwaa-mwaana wansoombo, lo ka kakoto mu kyo ko.»
Muutu wa kisina
(Mat 19.16-30; Mal 10.17-31)
18Mukuutu mosi wafuula Yesu, waleele ti: «Muyikisi wamubwete, nki me nyisa mu kutaambula kidziingu kyahele manunu?» 19Yesu wabvutula kuri nde ti: «Bukuri nki ye wuteele me ti wamubwete? Kuri muutu ti mosi wamubwete ko, mbuti ka wuni Nzaambi kitsu ko. 20Ye yaari ntumu: "Yaa ta kimpala ko, yaa dzusa ko, yaa yiba ko, yaa leele kimbaangi kyampya ko, kiinsa taayi na nguri yaaku."» 21Mukuutu wunde wabvutula ti: «Me nyabvumina momanso mamo, kuholosono bulesi bwaami.» 22Yesu bu kayuka bubwo, waleele kuri nde ti: «Kwakiri kitotolo kimosi, kiheriri kuri ye: byobinso bi wuri byo, yarika na kabula mboongo kuri bawelu, ye sa baka busina mu mayulu, na wasa nama me.» 23Ngo nde bu kayuka mamo, wakoto mu kunyoongo; bukuri, waba nkati kisina kyakinene. 24Yesu bu kamumono [kunsa ngebe dzamakwa], waleele ti: «Diri nkati dya mpasi kuri bisina mu kukoto mu Kimfumu kya Nzaambi; 25mukwongo, dibvuriri kuba dyaleenge kuri ngoombo mu lutila ha wuri dya noongo, ti wa kisina mu kukoto mu Kimfumu kya Nzaambi.» 26Babo bayukiri mamo, baleele ti: «Na wubangisina kubvuuka?» 27Yesu wabvutula ti: «Diri baatu bahele kubangisina, Nzaambi lo wubangisina.» 28Petelo waleele ti: «Mono, beetu twasiisiri bitotolo byeetu na twanemi ye.» 29Yesu waleele kuri bo ti: «Mu ngwanwa me nyiluleele ti: Kuri muutu ko wasiisaa nzo, bunu pe mukasi, bunu pe bampaangi, bunu pe taayi na nguri, bunu pe baala, mu ntoono Kimfumu kya Nzaambi, 30wuri lo heriri kutaambula mu ntaangu yimayi, bibyo bibvuriri, na mu ntaangu yikwiisa, kidziingu kyahele manunu.»
Yesu wayaabisa lwatatu mfwiilu na mfulukulu yaandi
(Mat 20.17-19; Mal 10.32-34)
31Yesu, kaholaa bo kuumi na boolo, wabaleele ti: «Mono, tweki toombokeenu ku Yerusalemi, na momanso matinini babikiri mu ntoono Mwaana muutu, sa meende mu mana. 32Bukuri, nde sa bamuyekele kuri bangooyi, sa bamusaana, sa bamufulula mante. 33Bu bameeni kumulata nkwaasulu, sa bamudzusa; na mu kiluumbu kyabitatu nde sa kafuluka. 34Ngo bayiki baandi, baba bahele kubakula, ntoono ti mosi mu mamo; mambangukulu ma maampu mamo, maba mabasweekele, na bo basii bakula ma babaleeriri ko.»
Yesu watsinikisa wafwa miisu
(Mat 20.29-34; Mal 10.46-52)
35Mu ntaangu yaba kokosolo Yesu bebele na Yeriko, muutu mosi wafwa miisu waba wadzakala mu teke nzila wuri mu kusaa luloombo. 36Bu kayuka mpuumbu baatu yiri mu kuluta, nde wasaka kuyaaba kari nki bibyo? 37Bamuleele ti, Yesu wa ku Nadzareti wuri mu kuyooko. 38Nde wafula musaakulu, waleele ti: «Yesu, mwaana Davidi, bakila me ngebe.» 39Baba kweyendaa ku mankula, bamuŋaŋina mpisi kawura; ngo nde wahamisa kufula misaakulu ti: «Yesu, mwaana Davidi, bakila me ngebe.» 40Yesu bu kateleme, watuma ti bamutwaala kuri nde. Bu kakokosolo kuri nde, Yesu wamufuula ti: 41«Nki tiiri ti me nsa mu ye?» Nde wabvutula ti: «Mfumu, me ntiiri kubweese kwemono.» 42Yesu waleele kuri nde ti: «Bweese kwemono, kanyi dyaaku dikubvuukisiri.» 43Ha nsi na nsi, nde wabweese kumono, na wanama Yesu kuri wukwekeembese Nzaambi. Baatu bobanso bamwiini mamo, badumusu Nzaambi.
Trenutno izabrano:
Luk 18: MW2013
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Nouveau Testament Beembe © Bible Society of the Republic of Congo, 2013.
