Tur. 2
2
Yusa Wakaní̱ taramu
1Pintikiustís náartin tsawant jeamtai chikichík je̱a̱nmaṉ nuiṉ Yus shuar tu̱á̱karmiayi. 2Tumai̱ aya aneachma nayaimpinmaya̱ násea áintsaṉ téter ajakí̱ winian antukarmiayi. Ashí mash je̱á̱ pujuarmia nuka antukarmiayi. 3Tura nui̱ pujuiniai̱ ji wajái̱ keá ániun wáinkiarmiayi. Túruna aṉkant aṉkant puunak tarurarmiayi. 4Tuma asamtai Yusa Wakaní̱ ashí ni enentái̱n pimiutkarmiayi. Túram chichasarat tusa Yusa Wakaní̱ ni nekatairi̱ súsarmiayi. Tuma asamtai nuja̱i̱ nisha chíkich chichaman chichasarmiayi.
5Nui̱ Jerusaréṉnum Yus táman umirin Israer shuar ármiayi. Ashí nuṉkanmaya̱ Jerusaréṉnum taar matsamármiayi. 6Tura túrunamia nuna antukar káunkarmiayi. Tura ashí shuar ni chichame̱ja̱i̱ṉ chichaamun antukarmiayi. Tuma ásar warinkit tu enentáimsarmiayi. 7Nekaachar ashamkarmiayi. “Wariṉkit tunaim ajarmiayi. Ju̱ aents chíkich chíkich chichaman chichainia nu ashí Kariréanmaya̱nchakait. 8Tura iisha aṉkant aṉkant ii chichame̱ṉka ántatsjik. Ausha urukainiakua nunak chichainiawa. 9Ju̱i̱ ashí nuṉkanmaya̱ aents pujuiniatsjik. Partianmaya̱, Mítianmaya̱sha, Eramnumia̱sha, Misiuputámianmaya̱sha, Jutanmaya̱sha, Kapatúseanmaya̱sha, Púntunmaya̱sha tura Asia nuṉkanmaya̱sha, 10Príjianmaya̱sha, Pampirianmaya̱sha, Ejiptunmaya̱ tura Aprikianmaya̱ Serinia nú naṉkaamasnumia̱sha pujuiniatsjik, tiármiayi. Nuya̱sha ii shuarsha Rúmanmaya̱ yaunchu taar ju̱i̱ matsatainiawai. Chikitcha tuke Israer shuar áiniawai. Tura chikitcha Israer shuar ajastaj tusa Israer túrutairi̱n mash túruiniawai. 11Krítianmaya̱sha Arapianmaya̱ pujuiniaji. Tura ashí mash ii chichame̱ja̱i̱sha Yusa péṉker túramuri̱ ántaji” tiármiayi. 12Ashí aents nuna nékachu ásar ashamkarmiayi. Tura nuamtak aniniaisarmiayi “¿Ju̱ warinminiait?” 13Tura chikitcha wishikiarmiayi. “Nampeku áiniatsuash” tiármiayi.
Pítiur ujakma
14Nuiṉkia Pítiur chíkich aunse Jesusa akatrámuri̱ji̱a̱i̱ wajaki̱ kakantar chichasmiayi. Chichaak “Jutanmaya̱ shuartiram Jerusaréṉnumia̱tirmesha antuktarum. Wi títiatjana nu antukrum péṉker enentáimpratarum. 15Ju̱ áishmaṉ nampekarai tárumna nu, nampekcharai. Warí, nantu imiá ishichik takuni̱. ¿Ai̱sha itiurak? 16Antsu Yúsnan etserin ni naari̱ Juir yaunchu aarmia nu yamái túrunayi tímiayi.
17 ‘Yus tawai “Jú̱ nuṉka amuukatin jeatémamtai winia Wakantrun yumi yaranua áintsaṉ ashí aentsnum akupkáttajai. Atumí uchirí̱ atumí nawantri̱sha Yusa Chichame̱n áujmatiartatui. Tura nátsaka íimiarartatui. Tura uuntka mesekramiartatui. 18Tura áishmaṉsha nuwa̱sha winia takartin ainia núnaka winia Wakantrun akuptúkartatjai. Túram nisha Wí túramun áujmatiartatui. 19Yakí̱ nayaimpiniam aents túrachminian iniakmastatjai. Tura nuṉkanmasha winia kakarmarun iniakmastaj tusan numpancha, jiniasha, mukuintiuncha yuraṉmia áintsaṉ akupkáttajai. 20Tura etsa̱sha kajinkiattawai. Tura nantusha mushatmar numpa núniktatui. Uunt tsawantan achikmiajna nu jeatsa̱i̱ṉ túrunattawai. Nú tsawantcha imiá nekas uunt átatui. 21Nuiṉkia ashí shuar nekas winia kakarmarun seana nuka uwemprartatui” tímiayi Yus.’ Núnis JuirJuir 2:28-32 áarmiayi” tímiayi Pítiur.
22Tura Pítiur tuke chichaak “Israernumia̱ shuartiram, wi títiatjana nu antuktarum. Nasarétnumia̱ Jesusnan tajai. Nú Jesusan Yus shiir enentáimtawai. Yuska átum ti enentáimprarum ni kakarmari̱n paant nekaatarum tusa nú Jesusan ti ikiaká̱rmiayi. Tura Jesusja̱i̱ aentsti túrachminian átum íimmianum Yus túramiayi. Nuka ti paant nékarme. 23Tura Jesus surunkamia nuna Yus yaunchu túmatsa̱i̱ṉ paant nekaamiayi. Túrasha Yus enentáimmia nuja̱i̱ métek túrawarmiayi. Tura atumek emetarum Jesus jukimiarme. Nú arant krúsnum mátarum tunáa shuar tímiarme. 24Kame jatai̱ nupetkam tuke jákachmin asamtai jatai̱ najaimiatai̱nkia nupetak Niṉkia Yus iniantkímiayi. 25Iimiata, ii uuntri̱ Tawit Jesusnan kantamprua ju̱na áarmiayi
‘Uunt tuke pujurtan wáinmiajai.
Winia pujurtakui awakkamu áchattajai.
26 Tuma asamtai winia enentái̱rja̱i̱sha Niin shiir enentáimtusmiajai.
Tura wenurja̱i̱sha shiir chichaman chichamiajai.
Jáaknasha shiir enentáimsan jakattajai, aneantiniapitjia tusan.
27 Warí, winia wakantrusha jaka matsamtai̱niam tuke ikiurtuschattame.
Tura Áminiu naka wekáa Tunaarincha aya̱shi̱nkia káurtin tsaṉkatkashtatme.
28 Tura iwiaaku átin jintia jintintrutamame.
Tura tuke pujurtakum waramtikrustatme.’ YKan. 16:8-11
29Yatsurtirmesha páantchakait. Ii uuntri̱ Tawit yaunchu jákaiti. Tura iwiarsamuiti. Ni iwiarsamuri̱ iiní̱ pujatsuk. 30Túrasha Tawitkia Yúsnan etserniuyayi. Tuma asa Yus timia nuna nekaamiayi. Yus Tawitian chicharuk ‘Ame akupniuitme. Nekas tájame ukunam ame iniaṉnamurminian Kristu akiiniattawai. Nisha Akupin anainiaktatui, amea áintsaṉ.’ YKan. 132:11 Nuna Yus táman Tawit nekaamiayi. 31Neka asa túruntsa̱i̱ṉ Tawit wainkia nútiksaṉ Kristu nantaktintri̱n áarmiayi. Kristu túrunatniuri̱n chicharuk ‘Ni wakaní̱ncha jákatniunam ikiukchatniuyi. Aya̱shí̱ncha káurtinian tsaṉkatkashtiniuyi.’ YKan. 16:10 32Au Krístun timia nu Jesusaiti. Nu Jesusnak Yus iniantkímiayi. Nuka iisha neka asar étsereaji. 33Yuska Jesus naṉkamantuiti tusa ni untsuurí̱ni̱ apujsaiti. Tura ni Wakaní̱n Jesusan súsaiti Ni yaunchu timia nútiksaṉ. Tuma asamtai ju̱sha átum antukurmena nuna tura íisurmena nunasha Yus suramsaiti. 34Tawitkia aya̱shtiuk nayaimpiniam wákachmiayi. Tura nú Tawitiak ju̱na áarmiayi
‘Uunt Yus winia Úuntrun tímiayi “akupin pujutai̱nium, winia untsuurui̱ni̱ pujusta.
35 Ame nemasrumin nupetkattajai. Nu túruntsa̱i̱ṉ ju̱i̱ pujusta” tímiayi.’ YKan. 110:1 36Tura ii Israer shuarti Jesus krúsnum maitji. Jú̱ Jesus mámjinia nuna Yuska Úunt Akupin anaikiamiayi. Túrasha Jesussha iin uwemtikkiartin Krístuiti. Ashí aentstiram nu péṉker nekaatarum” tímiayi Pítiur.
37Nuna antukar wake mesekarmiayi. Tura Pítruncha chíkich akatrámuncha aniasarmiayi “Yatsuru, ¿nuiṉkia itiurkatjik?” tiármiayi. 38Tutai Pítrusha chichaak “Atumí tunaarí̱ ené enentáimia ajasjai tusarum Yus nekas enentáimtustarum. Tura ashí shuartiram Jesukrístu naari̱ pachisrum imiantiarum. Nuiṉkia atumí tunaari̱n Yus tsaṉkurtámprattarme. Túrunawakrumin Yuska ni Wakaní̱n suramsattarme. 39Yus timia nuka atumín túramprume. Atumí uchirí̱ncha tura ashí arant matsatainia nunasha tawai. Kame ii Yusri̱ aentsun untsuktaj tusa wakerana nuna tawai” tímiayi.
40Nú chichamja̱i̱ tura nuya̱sha Pítiur tuke jintintiuk chichaak “Yajauch shuara asutiátniuri̱ átatna nuyá̱ uwempratarum” tímiayi. 41Tuma asamtai nuna antukarmia nuka imianiarmiayi. Nú tsawantai̱ menaintiú mir aents Yus shuar ajasármiayi. 42Ashí nu shuar Jesusa akatrámuri̱ jintintiármia nuna tímiatrusaṉ antukarmiayi. Tura irunar shiir enentáimtunaisar yurumin ármiayi. Túrawar Kristu enentáimtustin namperi̱n najanin ármiayi. Túrawar Yusan áujiarmiayi.
Yus shuar pamparma
43Tura Yuska aentsti túrachminian Jesusa akatrámuri̱ji̱a̱i̱ túramiayi ni kakarmari̱n iniakmastaj tusa. Tuma asamtai ashí aents nuna wáinkiar ashamkarmiayi. 44Krístun nekasaiti tu enentáimtuiniaka Niniu ajasár ashí métekrak pujuarmiayi. Tura ashí niniu armia nuna sunaisarmiayi. 45Ni nuṉke̱n surukar ni takakmari̱ncha surukar atsumainia nuna suármiayi. 46Tuke tsawant Yusa Uunt Je̱e̱n kauniarmiayi. Tura ni je̱e̱ncha iruntrar warainiak Kristu enentáimtustin námper najanin ármiayi. Tura naṉkamantu enentáimtumatsuk yurumkan ajamnainiarmiayi. 47Túrawar Yuska tí uuntaiti tu wéarmiayi. Tura ashí aents Nin shiir enentáimtiarmiayi. Tura Uunt Yus tuke tsawant shuaran uwemtikiar Yus shuar írunmanum ikiauṉki̱ wémiayi.
Trenutno izabrano:
Tur. 2: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.