Tur. 3
3
Wekaicha wekasamu
1Chíkich tsawantai̱ nantu nuṉkach ajasmatai Pítiur Juaṉja̱i̱, Yusa Uunt Je̱e̱n Yus áujsatai tusar wéarmiayi, Israer shuar tuke túrin armia nútiksaraṉ. 2Tura áishmaṉ ni akiiniamuri̱nia̱ wekaicha amia nu nui̱ a̱a̱ wáitiniam tuke tsawant pujumiayi. Nu áishmaṉnasha ni shuari̱ entsakí̱ júkiar nú wáitiniam apujin ármiayi, nui̱ shuar waya̱n kuítian seat tusar. Nú wáitisha Shiir Waiti tutaiyayi. 3Tura nú shutuapsha Pítrun Juaṉja̱i̱ waya̱n wainkiamiayi. Wainiak kuítian seamiayi. 4Tura Pítiur Juaṉja̱i̱ apajá̱s íisarmiayi. Tura nú aishmaṉnasha chicharuk “Íirsata” tímiayi. 5Áishmaṉsha surustatuapi tu enentáimias iimsamiayi. 6Nuyá̱ Pítiur chichaak “Kuítrusha kurisha atsawai. Antsu kuitji̱a̱i̱ naṉkaamas takakjana nuna amastájai. Wats, Nasarétnumia̱ Jesukrístu kakarmari̱ji̱a̱i̱ wajakím wekasata” tímiayi.
7Tinia iniais Pítiur ni untsuurí̱ni̱ achik awajkimiayi. Túram ni nawe̱sha wanuse̱sha kakaram ajasmiayi. 8Tura nisha wajaki̱ nanten ajakmiayi. Nuya̱sha wekasamiayi. Tura Pítruja̱i̱sha Juáṉja̱i̱sha Yusa Uunt Je̱e̱n waya̱warmiayi. Nuik shutuapka wayá̱ nanten nanten ajak Yusa náari̱n shiir pachimiayi. 9Ashí aents pujuarmia nu, nin wekaan wáinkiarmiayi. Tura ni chichame̱n anturkarmiayi. 10Tura chichainiak “Nuik Yusa Uunt Je̱e̱n wáitiri̱n, Shiir Waiti tutainiam, nú aishmaṉ tuke pujuuya núchakait” tiármiayi. Tura ni túrunamuri̱n nekaawar ti ashamkar nusháa enentáimsarmiayi.
Pítiur ujakma
11Shutuapka péṉker ajasu asa Pítruja̱i̱ Juáṉja̱i̱sha peṉké tsurachmiayi. Tura aents nui̱ pujuarmia nu warinkit tusar je̱a̱shkiri̱ tsékeṉki̱ wéarmiayi. Nuka Saramúṉna tiniu ármiayi. 12Aents káunkarun Pítiur wainiak chicharuk “Israer shuartiram, ¿urukamtai winiasha imiá íirum? ¿Iisha péṉker asarikⁱ tsuarmajⁱ? ¿Ii kakarmari̱ji̱a̱i̱ṉkik ewekámsamajⁱ? 13Atsá. Antsu Yuska ni Uchirí̱n Jesusan ashí naṉkamantu awajsaiti. Ii uuntri̱ Aprajámsha, Isaksha tura Jakupsha enentáimtin armia nú Yusan tajai. Átumka Jesus nakitrarum Piratuí̱ surukmarme. Tura Piratu akupkataj tau atumsha suritkiamarme. 14Jesus péṉker nákak enentáimniuyana nu ‘akupnakchati’ tímiarme. Antsu shuaran main akupnakat tusarum wakerimiarme. 15Túrarum iwiaaku átinian Amaana nu mámarme. Tuma ai̱ṉ Yuska Nin jakamunmaya̱ iniantkímiayi. Nuka iisha neka asar étsereaji. 16Tura ju̱ áishmaṉ wajana nu Yusa Uchirí̱ náari̱n enentáimta asa kakaram ajasuíti. Nisha Jesusa náari̱n enentáimtusu asa átum wáintrumna nuja̱i̱ péṉker ajasuíti.
17Wats, yatsurtiram wi nékajai. Atumsha atumí úuntri̱ji̱a̱i̱ Jesus túramarmena nu nékatsuk túramarme. 18Tura nu túramurmiji̱a̱i̱ Yus yaunchu timia nu tímianak umikiurme. Ni Krísturi̱ wáitsatniuya nuna Yuska ashí ni etserniuri̱n áamtikrarmiayi. 19-20Wats, yamaikia atumí yajauchiri̱ya̱ ené enentáimia ajasrum kanaktiarum. Túrarum tunaarun asakárat tusarum Yusai̱ni̱ apajá̱rtarum. Túrunawakrumni̱ṉkia atumín uwemtikramprarat tusa Yus yaunchu anaikiamia nuna akuptúrmaktatrume. Tura nuka Jesukrístuiti. Tura Nisha enentáim ayamtikrai tusa amastatrume. 21Tura yamaikia Jesukrístu nayaimpiniam pujustiniaiti ashí iwiarnatsa̱i̱ṉ. Yuska ukunam ataksha nuṉkan shiir awajsattawai. Nuna ni etserniuri̱n tsáapin enentái takaku armia nuna yaunchu áamtikramiayi. 22Tuma asa Muisais ii aparí̱n tímiayi ‘Atumí Uunt Yusri̱ ukunam etserniun akuptúrmaktatrume, winia akuptúkmia núnisaṉ. Nuamtaktirminia̱ achik akuptúrmaktatrume. Tura ni títiatna nu umirkatarum’ tímiayi. 23Náṉkamas aents nu etserniun chichame̱n umíachkuṉka emesnartatui. Tura Israer shuarnum páchitkia áchattawai” tímiayi.Muis. 18:15,18-19
24Pítiur tuke chichaak “Iimiata, Yúsnan etserin Samuir ju̱ tsawantin túratniuri̱ etserkamiayi. Nuyá̱ ashí Yúsnan etserniusha tuke nuna etseriarmiayi. 25Etseriarmia nuka atumín túramprume. Tuma asa átum péṉker pujustinian Yuska ii uuntri̱ Aprajáman ju̱ chichaman susamiayi. ‘Nekas tájame, ame shuarum akiiniattana nuja̱i̱ ashí aentsnasha shiir awajsattajai.’ Tura ii úuntri̱n timia núnaka iincha túramji, tímiayi.Naṉ. 22:18 26Iimiata, Yus ni Uchirí̱n iniantkímia nui̱ atumín emka akuptúrmakmiarme. Atumsha atumí tunaarí̱ya̱ kanaktiarum tusa tura atumín shiir awajtámsatniun wakerak túramiayi.” Nunak tímiayi Pítiur.
Trenutno izabrano:
Tur. 3: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.