Tur. 1
1
Yusa Wakaní̱n nákasarma
1Amikiur Tiúpiru, nuik akupkámiaj nú papinium ashí Jesus túramia nuna áatramiajme. Tura unuitiampramiaj nunasha áatramiajme. Yámankamtaikniumia̱ 2nayaimpiniam wétsuk ashí Ni túramia nuna tímiajme. Jesuska nayaimpiniam wakettsuk Yusa Wakaní̱ kakarmari̱ji̱a̱i̱ túratniua nuna ni akatrámuri̱n jintintiáwarmiayi. 3Tura Jesus jaka nantaki̱ ni akatrámuri̱n tímiaja̱i̱k wantintiukmiayi. Tura kuaraintia tsawant nin wantintiukarmiayi. Nuna tura nekas iwiaakjai tusa nekaawarat tusa iniakmasmiayi. Tura Yusa akupeamuri̱ urukuit nuna mash ujakmiayi.
4Jesuska ni akatrámuri̱ji̱a̱i̱ pujus nin chicharuk “Jerusaréṉnumia̱ wérap. Winia Apar ‘amastatjai’ timia nuna, paant ujakchamkajrum. Nu túrunat tusarum Jerusaréṉnum nákastarum. 5Tuke enentáimsatarum. Juaṉ entsaja̱i̱ atumí aya̱shi̱n imiatmimiarme. Túrasha wárik Yusa Wakaní̱sha atumniasha tarutmar atumí enentái̱n eṉkemprutmattarme. Nusha enentái̱ imiantinia áintsaṉkete” tímiayi.
Jesus nayaimpiniam waka
6Tura Jesusja̱i̱ irunar matsamás anintriarmiayi “Uuntá, Israer shuar ájinia nu, aṉkant ajasákrin íiniuk Akupin atak náamkatin yamái jeayash” tiármiayi. 7Jesus áimiuk “Winia Apar túrattana nu warí tsawantini̱ṉ túrunat nu nekaatniusha atumniachuiti. Apar Niṉki neka asa ni kakarmari̱ji̱a̱i̱ṉ túrattawai. 8Tura atumsha Yusa Wakaní̱ kakarmari̱ sunastatrume. Ni taa eṉkemprutmamtai kakaram ajasrum Wí túramu etserkattarme. Emka ju̱i̱ Jerusaréṉnum etserkattarme. Nuyá̱ ashí Jutanam tura arant Samarianmasha tura nú arant ashí nuṉkanam werum Wí túramu etserkattarme” tímiayi Jesus.
9Nuyá̱ chichas amir ni akatrámuri̱ ii wajainiai̱ Jesus nayaimpinmaani̱ junakmiayi. Wéa wéakui yuraṉkim mash Nin amuamiayi. Tuma asamtai ni akatrámuri̱ Nin wáinkiacharmiayi. 10Tura Jesus wakkui ni akatrámuri̱sha yakí̱ ii wajainiai̱, jimiará aishmaṉ puju entsaru wantintiukarmiayi. Tura ayamach wajattsarmiayi. 11Nu áishmaṉsha Jesusa akatrámuri̱n chicharainiak “Kariréanmaya̱ áishmaṉtirmesha ¿urukamtai nayaimpinmaani̱ imiá íimprum? Ju̱ Jesusak atumíya̱ nayaimpiniam wea wáinkiarumna núnisaṉ ataksha winittiawai” tiármiayi.
Matías anaikiamu
12Tuasua amikmatai Jesusa akatrámuri̱ Uriwiu náinniumia̱ akaikiar Jerusaréṉnum waketkiarmiayi. Uriwiu naintcha Jerusaréṉnumsha tíjiu̱chiti, chikichík kirumitrua núniskete. 13Tura Jerusaréṉnum jeawarmiayi. Nui̱ jeawar je̱á̱ waya̱war yakí̱ wákarmiayi. Nui̱ Pítrusha, Jakupusha, Juaṉsha, Antressha, Jiripsha, Tumassha, Parturumísha, Mateusha, tura Arpeu uchirí̱ Jakupusha, nuyá̱ Ásump Semuṉsha, Jakupu yachi̱ Jútassha, tímian waya̱warmiayi. 14Ju̱sha mash tuke iruniarmiayi Jesusa yachi̱ji̱a̱i̱. Tura Jesusa nukurí̱ Mariji̱a̱i̱, nuyá̱ chíkich nuwa̱ja̱i̱sha Yus áujsatai tusar tuke iruniarmiayi. 15Nui̱ siantu painti aents iruntrarmia nui̱ Pítiur chichastaj tusa wajakmiayi.
16Pítiur ju̱na chichaak “Yatsurtirmesha umarutirmesha antuktarum. Yuska yaunchu ni Papiri̱i̱n Jútasnan áamtikramiayi. Jútaska akiintsa̱i̱ṉ Tawitkia, Yusa Wakaní̱ jintintiam Jútasnan áarmiayi. Jesusan ju̱i̱ti tusa nekapruamia núiti. Kame Tawitia áarmari̱ Yus Chicham asa tímiatrusaṉ uminkiatniuyi. 17Nú Jutaska ii írutramuitiat ii takaamuri̱n páchitkiaitiat, 18yajauchin tura nuja̱i̱ kuítian achik nuṉkan sumakmiayi. Tura piniakum iniaaṉ tantane̱ pátimiayi. 19Tuma asamtai ashí Jerusaréṉnum pujuarmia nu, nuna nekaawar nú nuṉkan ‘Numpa Nuṉka’ anaikiarmiayi. 20Kame Yus Kanta papinium Tawitkia ju̱na áarchamkia. ‘Ni je̱e̱sha itiarak atí. Nu je̱a̱nmaṉka peṉké pujuscharti.’ YKan. 69:25 Tura ‘Ni takatri̱ chíkich atankiti.’ YKan. 109:8
21Tuma asamtai yamaikia chíkich anaikiatniuitji. Tura náṉkamas achikchatniuitji. Antsu ii nemartamka atí. Uunt Jesus iiji̱a̱i̱ pujumia nui̱ tuke Nin nemarsamia nu atí. 22Juaṉ Jesusan imiaimia nú tsawantnumia̱ jukí̱ Jesus nayaimpiniam wemia nú tsawantan tímianu ejé tuke Niji̱a̱i̱ wekaimia nu atí. Nu shuar enentáimtusar chikichik achiktai. Iisha iruntrar Jesusa nantakmiari̱ etserkamí tusar túrami” tímiayi Pítiur.
23Tura nuyá̱ jimiará shuaran anaikiarmiayi. Matíasan anaikiarmiayi. Tura chikichnasha Jusen ni chíkich naari̱ Parsapas, tura apach náari̱ṉkia Justu anaikiarmiayi.
24-25Tura nuyá̱ Yus shuar Yusan áujainiak ju̱na chichainiak “Ii Uuntri̱, Amesha ashí shuara enentái̱ nékame. Ju̱i̱ awai jimiará áishmaṉ. Jútas yajauchin tura jákatniunam wéak akatrámu takatan ikiukmiayi. Yamaikia Jútasa takatri̱ achikiat tusam ¿túa achikium, Uuntá? Paant iniakmasta.” Tu áujsarmiayi.
26Tura Israer shuara nekapas nakurús wats yaki nupetmakat tusar túrawarmiayi. Tura Matías nupetmakmiayi. Túrunamtai Matíasnak pachikiarmiayi.
Trenutno izabrano:
Tur. 1: jiv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2009 Avant Ministries in cooperation with Wycliffe Bible Translators, Inc. All rights reserved.