MARKUS 14

Nisi pi lawt kay Yesu

Mat 26:1-5; Luk 22:1-2

1Yuldeta vi paskata hiɗi fun-bay-kufna ka li hay buur ma' bugolda. Muliyan ŋulo sa-ɗifinna hiɗi sa wi-ɗota gar yali kay vi Yesu hiɗi nilamda kay cum goyo kaw. 2May nisi di'e: vum hay buura vi yuldetɗi, kay sumun ɗawn ma ɦilay kulo jar-tuwsiya.

Doŋdoloŋ ma hiɗi mul-urdina

Mat 26:6-13; Yoh 12:1-8; Luk 7:36-50

3Hay li ma Yesu ay hay Betaniya, hay ziyna vi Simon ma kuturuna, hay li ma nam mus ti'e, cata kep kalay kalafi hay li ma nam ka ti'e, na' ka hiɗi urdina nard ma ŋaana ma gusta valam lop ŋolo, na' malam vunam goyo, ɦok urdina kay Yesu. 4May segen jarsiya muɗ ɦiya di'e: ɦok mula goy nala kay mige? 5Urdin kayni gusum gusi goy ir denariyus kis-ɦidi kay vulum mi sa hawna kayni may asɗi su? Nisi law cat ŋolo. 6May Yesu di'e: Hingi cat hinge. Nigi muɗa' bisi kay mige? Na' li lop ma ŋaanawa tanu. 7Kay sa hawna ka hiɗi nigi dok-doko, hay li ma nigi mina, nigi fi lisi ŋaa'a, may nanu nan may hiɗi nigi dok-dokɗi. 8Na'a li va ma na' as a lumna, na'a setan tuwanawa kay pita vanu. 9Nan digi gasita, hay nagata pet, arigekaw ma labara ma firina ma kusis hayana, va ma cat kayni li'e labaram ma diys goyo, kay sumuna humsi ma gisi ka'a.

Yudas di newta kay Yesu

Mat 26:4-16; Luk 22:3-6

10Yudas Iskariyot kep jar sa doogo yam ma'na kalay tam muliyan ŋulo sa-ɗifinna kay di newt kay Yesu. 11Hay li a nisi hum kayni, diksi li firiya, nisi dum ala nisi min vulum gurju'u kaw. Yudas gar hagata kay vulsi Yesu.

Tun cawta vi ɓuraw-funa

Mat 26:17-26; Luk 22:7-18, 21-39; 1 Kor 11:23-25

12Hay buurta jewta hay yuldeta vi fun-bay-kufna, hay li ma nisi ŋat goor ɦu-dimin paskana, sa hatayna valamu dumu: Naŋ min ala numa ma tuɗ kay kot liyn kay naŋ fi ti goor ɦu-dimi paskana arige? 13Nam cuk sa hatayna valam ma' sunu disiya: Tuɗgis hay hoyok-ziyna, ɗawni nigi ma ŋaf hiɗi sa ma ziy genda niyna kepe, tapgi kuɗ sa namna. 14Hay li ma nam kalawa vo hay ziyna, nigi ma job tam bum-ziy namna ala: Bum-yalla ka job ala ziyda ta nam ma ti goor ɦu-dimi paskana hiɗi sa hatayna valamu haya'ta ka arige? 15Nala nam ma ɗekgi kay ziyda-ŋolda ta kulota, ta ka koti kot, nigi ma kotay tin ma paskana hay ziy na'ta. 16Sa hatayna kaliya, nisi co hay hoyok-ziyna, nisi fi slen ki bum-ziyna visi disi nala, nisi kot tin ma paskana.

17Hay li ma vulatita coowa, nam cooya hiɗi sa doogo yam ma'na. 18Hay li ma nisi lak gaa kay ti'e, Yesu disiya: Nan digi gasita, kep jargiya ma di newt kanu, nam mi ma ka ti hiɗi nan damni kaw, 19nisi tun caw yor tuwsiya, gigekaw ala mi nan su mi nan su. 20Nam disiya: Mi san kep jar sa doogo yam ma'na, namu mi ma ka do fun hiɗi nan hay tasat kep damni. 21Kay goora vi sana ma vulis goyo ki ɗot ɗo'ay kalam nala, may joot kay sa ma di newt kay goora vi sana, san kayni lali vuɗ vuɗi goyɗin ŋaa suwa.

22hay li ma nisi ka ti'e, nam sli fun kepe, gi bolo, ɓurawamu vulsiya di'e: Yawgita, kay kayni mi tuwanu. 23nam sli kaway-ma-cina, gi deɓe vulsiya, nisi kaf ci hayamu. 24Nam disiya: kayni mi busuwanu, busuwna vi bonota ma ɦokay goyo kay sumun ŋolo. 25Nan digi gasita, tun cawis wulin pa nan ma ci vuɗ gulda-guldan loɗi, ta-ta hay buur ma nay ma cum kuɗ tuwaya hay mulda-Lawna. 26Hay li ma nisi gi nul ma gi-deɓta gina, nisi koray gal hiɗiyta Olive.

27Yesu disiya: Nigi kaf ma hora, kay ɗot di ala:

Nan min ci sa ma ŋomda goyo, fok-dimina ma mera may.#14:27 Fi kayni hay Zak 13:7.

28May hay li ma nan dayawa kulo'o, nan ma kalays vokgi hay Galileya. 29May Peter di'e: La segen kaf hora, nan hayɗin as hor noŋɗi. 30Yesu dumu: Nan daŋ gasita, vaydi hay henjet zawni, jew a slek-gulokŋ hel sem ma', naŋ ma puw vunaŋ kan sem hiɗi. 31May Peter so vunam goy ba' di'e: La nan mit man hiɗi naŋ kaw, nan as puw vunan kaŋɗi. Nisi kaf ka di kayn nala.

Getsemani

Mat 26:36-46; Luk 22:40-46

32Hay li ma nisi co tam liyn ma yum Getsemani, nam di tam sa hatayna valamu: lakgi gaa tani, nan min tuɗ goyo kay siɗaw Lawna. 33nam yaw Peter hiɗi Yakub hiɗi Yohana kuɗumu, tuwam tun caw li nari, nam tun caw yor tuwam ŋolo. 34Nam disiya: Ciwta vanu ka yor ŋolo ta-ta hay mitta, lakgi tani jigere. 35Bugolda nam ɦur vokom neeɗa, gi tuwam gaa kay nagata, ka siɗaw ala: La van fi li'e, hin leera namna jik goy kalamu. 36Nam di'e: Baba bunu, slen pet naŋ as kalamu, kaway-ma-cina namna naŋ hinim raw goy kan rawge, may nir na'ta kep kuɗ minda vanɗi, may kuɗ minda vaŋu. 37Nam ma'a fisi cuki sene. Nam di tam Peter: Simon, naŋ kal sen su? Naŋ as mus iri ir leer kep noŋɗi su? 38Lakgi jigere siɗawgiya, kay nigi ma kal hay nemdaɗi, ŋusta mina, may sliwna maŋaya.

39Nam kal goyo, siɗaw lo, dum mi yoboy ma nam dum jewna lo. 40Nam hotay lo fisi buri sene, kay irsi muɗi nek zil'; nisi wi va ma nisi hot dit talam hiɗi namnaɗi. 41Nam hotay tisi selem ɦidita lo, fisi buri sene. Nam disiya, kalgi sen migi wulin yo, wulini goora vi sana ma vulis goy hay ɓam sa sulukŋa. 42Yawgi kulo'o, tuɗaya; nam ma min di newt kanu ka tuɗay ɗaw.

Nisi vi Yesu

Mat 26:47-56; Luk 22:47-53; Yoh 18:2-12

43Wulini wulini hay li ma nam ka di yoboyn tuwa, Yudas, kep jar sa doogo yam ma'na, coowa hiɗi sumun kuɗum ŋolo, nisi ka hiɗi kew-gaferaŋa hiɗi zugulayna, nisi may goy vi muliyan ŋulo sa-ɗifinna hiɗi sa wi-ɗota hiɗi sa maariyani pa. 44nam ma di newti kalamna disi goy jew ala: Nam ma nan ŋaf vunan hiɗi namna ɗawni mi namu, nigi ma vumu, tuɗgi hiɗi namu, ŋomom ŋaa'a. 45Hay li ma nam coowa kayni, nam ma goboy tam Yesu, ka dum ala: Rabbi. Nam bow Yesu. 46ki kayni nala nisi ŋuy Yesu, nisi vumu. 47Kep jar nisi sa ay kuɗumna pat kew-gaferaŋa valamu goyo cal sa ma sunda vi mul-ma-ɗifinna hay humamu, puratam humam goyo. 48Yesu sli ditiya disiya: Nigi ki nigi min vi sa ma coŋcoloŋŋa, nigi ka hiɗi kew-gaferaŋa hiɗi zugulayna kay vanu kayn litige? 49Fatta kaf nan ka musi hiɗi hay Tempella kay li hatta, may nigi vanɗi, may kayni li'e kay ɗota vuna' ma hoba. 50Nisi kaf hinimu, piriya may. 51sa ma joriyona kep tuɗ kuɗumu, bari talam mi ladarana ɦawa'a, nisi vumu; 52may nam hinsi ladarana, piri jaŋ goyo nala'a.

Yesu vok sa ɗiger-lawta

Mat 26:57-68; Luk 22:54, 63-65; Yoh 18:13-24

53Nisi tuɗ Yesu tam mul ŋol ma-ɗifinna, hay li namna muliyan ŋulo sa-ɗifinna, sa maariyana hiɗi sa wi-ɗota kaf tok tuwsiya, 54Peter ka tuɗis goyo bugolomu gine'e, ta-ta kalaf hay wur-daŋŋa vi mul ŋol ma-ɗifinna, nam ka musi gaa'a hiɗi sa ŋomda, nam ka hol tuwam vun kuta.

55Muliyana ŋulo sa-ɗifinna hiɗi sa ɗiger-lawta kaf gar di-goyta ta sinda kay Yesu kay cum goyo, may nisi fi va noŋɗi. 56Kay sumuna ŋolo ka ka sinda kalamu, may di-goyta visiya may tap kuɗ tuwamɗi. 57segena yaw kulo'o li di-goyta ta sinda kalam ala: 58Numa humum law ala: Tempella ma ini hiɗi ɓam san zawni nam min ɦom gaa'a, hay buur hiɗi nam min in Tempel mara'a kulo'o, ma may koti hiɗi ɓam saɗi. 59Nir na'ta kepe di-goyta visiya may tap kuɗ tuwa'ɗi. 60Mul ŋol ma-ɗifinna fok kulo'o jar tokŋa, ka job Yesu ala: Naŋ may hot dit kay va ma sumun ka dum kaŋŋaɗi su? Va ma sumun ka dum kaŋŋa kayn mi mige? 61Yesu col ŋal kiliŋ, min di va noŋɗi. Mul ŋol ma-ɗifinna ka job Yesu lo ala: Naŋ mi Kristu Goora vi Bum-Bolda su? 62Yesu hot dita: Nanu mi namu. Nigi ma wi goora vi sana musi hay gal ɓam ma jufna vi Ma gaŋeraŋ-Petna, nam ma co'o jar ɗugulla ma dukalawna kaw. 63Wulini mul ŋol ma-ɗifinna jet sligara valam goyo di'e: Nay gar sa di-goyta lo kay lum hiɗi nisi mi mige? 64Nigi kay tuwgi hum ŋolda valamawa. Nigi var anige? Nisi kaf ka kitat kalam ala nam nagay mitta. 65Segena tun caw tufum nene kalamu, kusuɓum iramu, cum kutopoŋŋa kaw, dum ala: daŋay tige. Sa sunda cum geliyamu.

Peter puw vunamu kay Yesu

Mat 26:59-75; Luk 22:55-62; Yoh 18:15-18

66Hay li ma Peter ka gaa hay wur-daŋŋa, goota ta vo vi mul ŋol ma-ɗifinna kep ma'a. 67Na' wi Peter hol tuwam vun kut zaw, na' cuk ira' kiram ŋiresl' ka dum ala: Naŋ kaw, naŋ ay hiɗi Yesu ma Nasaretna. 68Nam puw vunamu ka di ala: Nan may wiɗi, va ma nak dumna zawni nan may humum cawamɗi. Bugolda nam kalay goyo kuɗ diɓira. 69Goot-cat na'ta wum mara lo, na' tun caw di kayni mi sa tokayna ala, zawni mi sa ma kuɗ sum nisina. 70Nam puw vunam kay kayn lo. Mus neeɗa bugolda sa tokayna di mi Peter ala: Gasiya, naŋ kaw jar sum nisina. Kay naŋ mi sa ma Galileyana, naŋ law kisi nisi nala. 71May nam tun caw beɗ tuwamu, sumal tuwam kaw ala: Sa ma nigi di kalamna kayn nan may wumɗi. 72Wulini wulini slek-gulokŋ hel sem ma', Peter humam gum kay dita vi Yesu ta ala: Jew a slek-gulokŋ hel sem ma', naŋ ma puw vunaŋ kanu sem ɦidi. Hay li ma nam var kay kayni, nam tun caw tiya.

Trenutno izabrano:

MARKUS 14: Massana

Istaknuto

Podijeli

Kopiraj