MARKUS 15

Sa ɗiger-lawta ŋra vun-tuwsiya hay graw culumta

Mat 27:1-2; Luk 22:66-71

1Hay graw culum culum, muliyan ŋulo sa-ɗifinna ŋra vunsi hiɗi sa maariyana, hiɗi sa wi-ɗota hiɗi sa ɗiger-lawta kafe. Nisi jun Yesu, kalam goyo, vulum hay ɓam Pilatus.

Yesu vok Pilatus, nisi watamu

Mat 27:11-31; Luk 23:1-4, 13-25; Yoh 18:28-40

2Pilatus jobomu: Naŋu mi mulla vi Yudiyana su? Yesu hotom dit ala: Naŋ di hay liyamu. 3Muliyan ŋulo sa-ɗifinna tun lawt kalam ŋolo. 4Pilatus ka jobom lo ala: Naŋ hot dit noŋɗi su? Law ma nisi pum kaŋŋa kaf kayn naŋ ka wum su? 5May Yesu min hot dit noŋɗi, nala Pilatus muɗ ɦuyum'.

6May hay buura vi yulden kaf, Pilatus gisi sa ma nisi siɗawam kalamna goy kep kep. 7Hay na'ta sa mara ay hay daŋgayn kep yum Barabas. Nam ay giy daŋgay hiɗi sum segena, kay mige nisi fok lawta, hay law na'ta nisi ci sa kep goy mati. 8Sumun jik kulo'o, kalay talamu kay nam vulsi va ma nam ka lum tisi dok-dokŋa. 9Pilatus hotsi dita: Nigi min ala nan ma gigi mulla vi Yudiyan su? 10Kay nam wi ala muliyan ŋulo sa-ɗifinna vul Yesu goy hay ɓalam kayn kuɗ hunayta. 11May muliyan ŋulo sa-ɗifinna gi yam sumuna, kay nisi siɗawamu kay nam ma vulsit goy mi Barabas. 12Pilatus hot dit tisi lo di'e: Nigi min ala nan ma lum mi mige hiɗi nam ma nigi yum ala mulla vi Yudiyana? 13Nisi siwel lo ala: Ɓalam kat gu-ma-grakŋa. 14Pilatus disiya: Kay mige? Nam lum joon mi mige? May nisi siwel ŋolo suwa ala: Ɓalam kat gu-ma-grakŋa. 15kay Pilatus min sleɗ hay sumuna, nala nam gisi Barabas goyo; bugolda nam vul hagata kay nisi wat Yesu, nam vulum kay nisi tuɗ ɓalam kat gu-ma-grakŋa.

16Sojena kal Yesu kalafi hay wur-daŋŋa, kayn di ala Pretoriyum, nisi dak sa gardena kafe. 17Nisi cukum sligara purpel talamu, nisi cil bogoray ma zigiyna, tunumti kalamu. 18Nisi tun caw gum deɓe, dum ala: Gaŋ deɓawa, mulla vi Yudiyana. 19Nisi watam kalam hiɗi libetna, tuf nenen kalamu, cuk ŋulofsi gaa'a kay girif gaa vokomu. 20Bugol nisi ŋulum ŋulla, nisi fok sligar purpella goy talamu, cukum sligara valamu, kalam goyo kay ɓalam kat gu-ma-grakŋa.

Yesu ɓalay kat gu-ma-grakŋa

Mat 27:32-56; Luk 23:26-49; Yoh 19:17-37

21Nisi ŋaf hiɗi sa ma may goy hay sinen pa, Simon ma Sirene, bum Aleksander hiɗi Rufus, namu nisi vum hiɗi dono'o kay ziy gu-ma-grakŋa vi Yesu. 22Nisi kal Yesu hay liyn ma yum ala Golgata, kayn min di ala liyn ma zok-ta'ara. 23Nisi vulum vinna a ci'e, rigasay hiɗi miir, may nam min cumɗi. 24Nisi ɓalam kat gu-ma-grakŋa, sligara valamu nisi ɓurawam jarsiya, ŋaɓam kuɗ ɦayta, kay wi va ma san gigekaw as yawa. 25Nisi ɓalam kat gu-ma-grakŋ kayni hay leer ma ɦidina. 26Va ma nisi ɓalam kat gu-ma-grakŋa kalamna ka ɗo'ay ala: MULLA VI YUDIYANA. 27Nisi ɓal sum sa coŋcoloŋ ma' hiɗi namu, kep hay galam ma jufna, kep hay galam ma gulla may. 28Nala ɗota ta diy ala nam ŋaɓay jar sa jiw-zlata vuna' hobawa.

29Sum sa jik hay hagata ŋulumu, gila yisi talam kaw, nisi di ala: Haha! Waŋŋi mi naŋ sa ma di ala naŋ min ɦo Tempella gaa'a, hot inim kulo'o hay buur ɦidin ɗisu? 30Suɗaŋ tuwaŋ kay tuwaŋu, jikaŋay gaa kay gu-ma-grakŋa pa yoge! 31Muliyan ŋulo sa-ɗifinna kaw hiɗi sa wi-ɗota ka buraham jar-tuwsi ala: Nam suɗ sum segen goyo, may nam asay a suɗ tuwam namɗi may su? 32Hin Kristu mulla vi Israyel jikay gaa'a pa wulini, kay nay fi wumu, vi hayamu kaw. Nisi sa ɓalay kat grakŋa hiɗi namu ŋulumu.

33Hay leer ma karkiyana, jufunda li gaa kay nagata ta-ta hay leer ma zleeŋena. 34hay leer ma zleeŋena, Yesu siwel hiɗi delem kulo ŋolo ala: Eloy, Eloy, lama sabaktani? Min di ala: Lawna vanu, Lawna vanu, naŋ noyonawa goyo kay mige? 35May sara'a jar nisi sa lakay goboy lakŋa, hay li ma nisi hum kayni, nisi di'e: Humgiya, nam ka yi Eliyas. 36sa kep kal jaŋi, nam yaw sligara, jiyobom hay vinegrena, junum vun zugulla, vulum mi Yesu a ci'e. Nisi di'e: Hinim tuwa haw', la Eliyas as co'o kay jikimay gaa'a klasige. 37May Yesu siwel ŋolo, bugolda sukam sa'ata.

38Sligar ma hay Tempella iram jet gaa ma', kulo pa ta-ta gaa'a. 39Hay li ma mul ma sojen kalam kisna ma ka colay goy ɗiger vok Yesu wi ala sukam sa'atawa, nam di'e: Gasiya, san kayni mi goora vi Lawna. 40Boyna kaw ka ɗuway goy gine'e pa. Jarsiya ay Mariya Madelen, Mariya sum Yakub ma goora hiɗi Yoses, hiɗi Salome, 41nisi sa ay tapay kuɗumu sunum kaw hay li ma nam ay hay Galileya, hiɗi segena ŋolo sa jik kulo hiɗi namu hay Yerusalem.

Nisi kal Yesu gaa hay zulla

Mat 27:57-61; Luk 23:50-55; Yoh 19:38-42

42Hay li ma vulatita liyawa, kay kayni mi liyn ma kotta, kayn di ala buurta ta jew sabatna, 43Yosef ma Arimatena, sa ma sumun tiyim selem ŋolo jar sa sa ɗiger-lawta, namu mi sa ma ka cub mulda-Lawna kaw, nam co'o. Nam tos iramu, kal kalaf tam Pilatus, jobom kay tuw Yesu. 44Pilatus muɗ ɦuyum' kay Yesu miti gosoyo, nam yi mul ma sojen kalam kisna, jobom ala Yesu mit kayn musi ŋol su? 45Hay li ma nam vi labara vun mul ma sojen kalam kisna vina, nam vul tuw Yesu mi Yosef. 46Yosef gus sligara ma haɓna, nam sli tuw Yesu ay gaa'a kay gu-ma-grakŋa pa, ɗutum hiɗi sligara, burum gaa'a hay zulda ta nisi jugoɗa goy jar hiɗiyna pa, nisi ligat hiɗiyn vun zul na'ta. 47Mariya Madelen hiɗi Mariya sum Yakub ka ɗuw liyn ma nisi burum hayna.

Trenutno izabrano:

MARKUS 15: Massana

Istaknuto

Podijeli

Kopiraj