MARKUS 16
16
Dayta-kulota hiɗi kalta-kulota vi Yesu hay wuralawna
Mat 28:1-8; Luk 24:1-8; Yoh 20:1-2
1Hay li ma sabatna vatawa, Mariya Madelen, hiɗi Mariya sum Yakub hiɗi Salome gus aromatna kay tuɗ yamam kay tuw Yesu. 2Graw culumta, kayn min di ala hay buurta jewta, buurta vi dimasta, nisi co vun zulda, kayni hay li ma fatta dayaya. 3Nisi di jar-tuwsi ala: Sa ma ligatay hiɗiyn goy vun zulda ɗawn mi gige? 4Nisi poŋ irsi kulo nala kayni, hiɗiy ma ŋol namna ka ligatay goy vun zulla. 5Hay li ma nisi jik gaa hay zulda, nisi wi sa ma joriyo dam', cuki hiɗi sligar ma haɓ talam ca', nala nisi muɗ nari. 6Nam disiya: Ligi narɗi, nigi garam kayn mi Yesu ma Nasaretna, ma nisi ɓalam kat gu-ma-grakŋa; nam dayay kulo'o, nam may tanɗi, ɗuwgi liyn ma nisi burum hayamna tige. 7May tuɗgiya di tam sa hatayna valamu hiɗi Peter ala nam kalays vokgi hay Galileya, ɗawni nigi ma wumu, ki nam kay tuwamu di tigi nala. 8Nisi cukay goy hay zulda pa, kalay goy jaŋi hiɗi tuwsi visi bat-bat'; ŋalda visi tay tisi loɗi, may nisi min di kayn mi sa noŋɗi kuɗ narta.
9May hay li ma Yesu day kulo'o hay buurta jewta vi lumuta,#16:9 Buurta jewta vi lumuta kayn min di ala hay dimasta. nam vul tuwam jewe kir Mariya Madelen, na'a ta nam digiɗ fuliyan siɗiya goy ka'ta,#16:9 Fi kayni hay Yoh 20:11-18. 10Na' kaliya, tuɗ labara tam nisi sa ay hiɗi namu, nisi sa ka ti do'olo ka tiya kaw. 11hay li ma na' disi ala Yesu ka iriya, na' kaw wum hiɗi ira'a, nisi min vi kaynɗi.
12Bugol kayni nam vul tuwam ir jafam valam lo kir segen jarsi ma', sa ka hay hagata kay tuɗ goy hay sinena. 13Nisi hotay bugolsiya vi labar namna mi segena, nisi min vi dita visiɗi kaw.
14Bugolda nam vul tuwam kir sa doogo yam kepna hay li ma nisi lakay ti'e, nam lawsiya kay bay-vida visiya hiɗi so'otta vi diksiya, kay nisi min vi kuɗ sum sa disi kay dayta-kulota valamnaɗi. 15Bugol kayni nam disiya: Tuɗgi hay nagat kuɗulu, kusgi labara ma firina tam sum sa Lawn kotsin kaf. 16sa ma vi'e, fi baptisma kaw, nam ma fi su'da. May sa ma viɗina, kitata ma tun kalamu. 17Kayni ti ɗekka ta tap kuɗsit ɗawni: Hay semda vanu nisi ma digiɗ fuliyan goyo, nisi ma di hiɗi vun ma wuliya, 18nisi ma yaw guyn hay ɓisiya, la nisi ci gu ma ci san mati kaw, nam ma lisi joo'o noŋɗi, nisi ma bar ɓisi kay sa moyna, sa moyna ma yer goyo may.
19Wulini Bum-Sumuna Yesu, bugol nam kus yoboyn tisi kusna, slumis kulo'o hay wuralawna, musi hay gal ɓam ma jufna vi Lawna. 20Nisi kalay goyo kus yoboyn hay liyn kaf. Bum-Sumuna ka li lop hiɗi nisiya, nam ka hob vun dita valam tisiya hiɗi ɗekka ta nisi ka li'e.
Trenutno izabrano:
MARKUS 16: Massana
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
BIBALDA TA PELDETTA © L'Alliance Biblique du Cameroun, 2001
