मत्ती 3
3
यूहन्नेकी थे खोरोङ काम खिताला स्यूबाते
(मर्कूस १:१-८; लूका ३:१-१८; यूहन्ना १:१९-२८)
1येशू नासरतदु देता ओत्जीनराङ बप्तिस्मा तेरकान्ते यूहन्नेकी मिओनला यहूदिये अञ्चल री नाङला परमेश्वर बात लोपाला स्यूसुङ। 2थेरू ओङकान्ते मिओनला थेकी “मिवे, था स्वर्गे राज्य दुरू ओङा खाबा ओत। थोगी ख्योकोनगी खेराङ पापी दुका सिन छ्या स्येला परमेश्वर छ्य्वापा लै खि,” सिन लोप्कीन ओतान। 3तिरी मिज्यीक वाला री नाङला थोक खाला बात खिओ सिन परमेश्वर बात खित्कान्ते यशैयेकी थाङबोका दोक सिन साबा ओतान। चुक सासीन
“रीला मिज्यीगी छेरा खिनकामा ‘था प्रभु परमेश्वर दुरू ओङे बेला लेप्सुङ। थोगी मिवे, थे ओङगो सिन लेमु खाला लाम जो।
थे ख्याम्बाला लाम सम्म जो सिन सिओ,’ सिन सिओ,” सिन टिबा ओतान।#यशैया ४०:३
यशैयेकी थोक खिताला ओङगो साबाते मिचेन यूहन्नाराङ ओतान। 4यूहन्नेकी ऊँटकी पुज्येकी ल्हाबाते खोलाक खोन्दा ओतान। थेमे कोक्तेन पेटी च्यिबा ओतान। थेकी छ्युच्युपेताङ ठाःगी राङ सेइन ओतान।
5यरूशलेम सारगी नाङलेई, यहूदिये अञ्चलते गाङेपेकी थेमे यर्दन चाङबो फेरो नाङलेकीङ गाङेपेकी यूहन्ने बात ङेन्दाला मि काल्बेई थेरू वाबा ओतान। 6थेमे थेबाबरीकी ङ्योकोनगी दोक दोक पाप खाबाप, थोक खाबाते लेमु मेन्दाक्वा सिन सानामेई यूहन्नेकी थेबाला यर्दन चाङबोदुराङ छ्युला लुगीन बप्तिस्मा बिन्सुङ।
7फरिसी पाटीताङ सदुकी पाटी मिङ काल्बेई थे ओत्सादु वाबा ओतान। थेबेकीङ खोपरोङला छ्युला लुक्ला बप्तिस्मा नाङ सिरजीन यूहन्नेकी थेबाला “छ्यि ख्योकोन ङोचा क्ये मेतातेबा, छ्युला स्यूला बप्तिस्मा लालाकामा परमेश्वरगी था तिरी स्येदाङगी चूर गाल्ला तेरच्येते सजायदुकी थारग्यो सिन खेल्ला सुई सिका? थोक सजिलो खाला थे सजायदुकी माथारो। 8ख्योकोनगी खेराङ पापी दुका सिन छ्या स्येकीन परमेश्वर छ्य्वापा लै खाबाते बात थेकी खि साबाते ङेन्ला कामगीराङ खाला तेन्दा फाप्क्यो। 9ख्योकोनचेन ङ्योकोननी अब्राहाम सन्तान ईन्देकी सजाय भोगेराङ खिता माफाबो सिराच्योक खाला छ्ये खिदुक। दि बात ङेन। परमेश्वरगी खिता चाल्सीन ख्योकोन साटोलानी उदेङला ओताते दोईतेराङ अब्राहाम सन्तान ज्वा थुप्क्यो। 10बरू च्याङबो खि, फलफूल मोगोन्च्येते दोङबो चाप्रेनपाराङ टिलाला था परमेश्वरगी तरी मच्चे खाईन सिन्दा ओत। होथोक्ते दोङबो था गाङे टिल्ला स्येइओ। 11थेमे ङाचेन खालि खोपरोङ पापी दुका सिन छ्या स्येकीन परमेश्वर छ्य्वापा लै खाबाते मिओनला छ्युलाकामा लुक्ला बप्तिस्मा तेरग्यो। था ङे तिरी मिज्यीक ओङगो। थेचेन ङा भन्दा खापान खापान छ्ये ईन। सिइराङ सासीन ङानी थेते योक्पो ओङला काचाप खुरला थे तिरी ख्याम्बालाङ सोई मिक्किओ। थेकीचेन ख्योकोनला परमेश्वर आत्मा तेरच्येतेताङ मेला लुक्ला न्याय खित्च्येते काम ङिकाराङ खिओ। 12थेत्ताङ ग्यालोक ओत। था थेकी ठा टाप्ला गेडा जति जोतनामा ज्य्वाक्यो। फुङमाचेन नोमुङ सेता मुथुप्च्येते मे नाङमा लुक्ला स्येइओ,” सिन सिदुक।
येशूकी बप्तिस्मा लाबाते
(मर्कूस १:९-११; लूका ३:२१-२२)
13यूहन्ना दोक खिन ओते बेलाला येशूकीङ गालील अञ्चलपेकी यर्दन चाङबोदु थे ओत्सादु लेप्कीन बप्तिस्मा नाङ सिन सासुङ। 14थेकी थोक सिरजीन यूहन्नेकी “ङेनी हजूरला दोक खाला बप्तिस्मा तेरा सोईराङ मिक्किओ। बरू खुईका ङाला बप्तिस्मा तेरा डिक्च्येते ईन,” सिन बप्तिस्मा तेरा माङेन्सुङ। 15थेकी थोक खित्जीन येशूकी “मेन, जे ईन्सीनोङ खुई ङाला बप्तिस्मा नाङ। च्यिला सासीन परमेश्वरगी खि साबातेबरी ङेन्दाला ङुरूङगी दोकराङ खाला काम खिता फाप्क्यो,” सिन सिदुक। थेमे यूहन्नेकी थेला छ्युला लुगीन बप्तिस्मा बिन्सुङ। 16थोक खाईन सिन्दाईताङ येशू छ्युदुई पाङला थेन्सुङ। थेमे चुक ओङसुङा सासीन स्वर्गे गो फेत्कीन थेनेकी परमेश्वर आत्मा गन्दीमा च्य्वाबेई गाल्गीन थे ओत्सामा वाकीन थे खोरोङ लाक देताते येशूकी थोङसुङ। 17थेमे स्वर्गनेईराङ “दि ङे फुज्युङ ईन। ङा दिला आउदी ङिङज्ये खिओ। दित्ताङ ङा आउदी खुशी ओत,” सिन परमेश्वरगी साबाते बातज्यीक ज्येनतेबेकीङ थोसुङ।
Trenutno izabrano:
मत्ती 3: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
