मत्ती 2
2
ज्योतिषीओन येशूला ठेत वाबाते बात
1येशू यहूदिये अञ्चलते बेथलेहेम सिरसादु केबा ओतान। थेजीन थे अञ्चलदु हेरोद गेल्बो राज्य खिन ओतान। येशू केनामेकी टिक्पी तिरी च्यि ओङसुङा सासीन पूर्वे छ्य्वापे लुङबे नाङपेई कोई कोई ज्योतिषी यहूदिये अञ्चल यरूशलेम सारदु लेप्सुङ। 2थेमे थेबेकी थेरू मिओनला “ङ्योकोनचेन ख्योकोन यहूदीओन गेल्बो ओङाला केबाते फिजाला छोलाला वाबाप। च्यिला सासीन थे केसुङ सिन छ्या स्ये ज्युत्च्येते कार्मा थेन्दाते ङ्योकोनगी ङेराङ लुङबापेकी थोङसुङ। थोगी थेला ठेत्ला मान खिताप सिन ङ्योकोन दुरू वाबाते ईन। थे फिजा खापा दुका सिन ङ्योकोनला लाःप्ला नाङ,” सिन सासुङ। 3थे खोरोङ राज्यदु गेल्बो ओङाला फिजाज्यीक केबा ओत सिन थोनामेई हेरोद गेल्बो सेमला ठङगे स्यूसुङ। थेमे थेत्ताङ यरूशलेम मि गाङेराङ ज्यीबेकी थरावरी गाल्सुङ। 4थेमे ईन्सीन हेरोद गेल्बोकी थेरू छ्ये छ्ये पूजारीताङ धर्मे गुरू गाङेला काताङगीन “परमेश्वरगी तोङगो साबाते ख्रीष्ट खाङ ठाउँदु केइओ साबा ओते?” सिन ठिसुङ। 5ठिजीन थेबेकी “ख्रीष्टनी यहूदिये अञ्चलते बेथलेहेमदु केइओ। च्यिला सासीन परमेश्वरगी थे खोरोङ बात खित्कान्ते मिला दोक सिन टिक च्युता ओतान। 6चुक सासीन
‘बेथलेहेमला यहूदिये लुङबे नाङ ओताते ज्येन ज्येन सार भन्दा टेक्टेते सिन सुङगीङ सिरा मेङगो। च्यिला सासीन थेरू गेल्बोज्यीक केइओ।
थेमे थेकीराङ ङाराङगी छाने खाबाते इस्राएलीओनला लेमु खाला राज्य खिओ,’ सिन साबा ओत,” सिन सासुङ।#मीका ५:२
7थेबेकी थोक सानामेकी गेल्बो हेरोदकी थे ज्योतिषीओनला सुटुक्क थे खोरोङ ओत्सादु काताङसुङ। थेमे थेकी थेबाला “ख्योकोनगी थोङाते थे कार्मा नाम थेन्दा ओताने?” सिन ठिकीन थे कार्मा थेन्दाते ठीक समय पत्ता लै खासुङ। 8थेमे थेकी थेबाला “लो था ख्योकोन गाल्ला थे फिजा खापा दुका, थेते च्यि च्यि बात दुका गाङे लेमु खाला ताला छ्या स्येबा खि। थेमे ङा ओत्सापा लोन खोरच्योक। थेरूई ङाङ गाल्ला थेला ठेत्ला मान खितामीन,” सिन थेरूकी बेथलेहेमपा ताङसुङ।
9गेल्बो हेरोदकी थोक सानामेकी थेबा थेरूई बेथलेहेमपा ड्वाप्ला ख्याम्सुङ। लामला डुइन डुइनला थेबेकी गोमा पूर्वपेकी थोङाते कार्माला लोईन थोङसुङ। थेबा येशू देता ओताते खाम्बादु मालेपथुप थे कार्मा थेबे गोमा गोमा लाम तेन्गीन गाल्सुङ। 10थोक ओङजीन थेबा आउदी खाईन गा खासुङ। 11थेमे थे खाम्बादु लेप्ला नाङने स्यूला ताजीन थेबेकी थेरू थे फिजाताङ आमाते मरियमला थोङसुङ। थेरूई थेबेकी गुर्बु खाईन मान खिन थे फिजाला से खासुङ। से खाईन च्याकीन थे फिजाला सिन खुलाबाते सेर, धूप थेमे आउदी स्यीम्बुज्यीक बास्ना चले खित्च्येते मूर्र सिराते केकातेबा खुर्बुदुई थेन्गीन थेला बिन्सुङ। 12थेमे परमेश्वरगी मिलामला थेबाला गेल्बो हेरोद ओत्सापा मोन्डोबा खाला खोपरोङ लुङबापा ग्युरला ग्युक साबेकी थेबा ज्येन लामलेई खाईन ग्युरगीन गाल्सुङ।
येशूला मिश्रे लुङबामा खेराते
13थोक खाईन थे ज्योतिषीओन गाल्नामेकी थे छोमु ग्वासेराङ यूसुफकी मिलामला प्रभु परमेश्वर दूतज्यीकला थोङसुङ। थेमे थे दूतकी थेला “यूसुफ, खोक ल्वा थेमे दि फिजाताङ आमातेला टीला दुरूकी छिटो मिश्रे लुङबामा ग्युक। लोईन ङे छ्याःङ मासाथुपचेन थेमाराङ देत। च्यिला सासीन हेरोद गेल्बोकी दि फिजाला सेता चाल्ला दुक,” सिन बात खासुङ। 14थेमे यूसुफ ङिक छेत्कीन खोक लाकीन नुपलाराङ थे फिजाताङ आमातेला टीकीन मिश्रे लुङबामा गाल्सुङ। 15हेरोद गेल्बो मास्यिथुप थेबा मिश्रे लुङबादुराङ देत्सुङ। थोक खाईन प्रभु परमेश्वरगी थे खोरोङ बात खित्कान्ते मिला थाङबोका सिर च्युताते बात साबा च्योकराङ ओङसुङ। थेला चुक सिर च्युता ओताने सासीन “ङे ङाराङ फुज्युङला मिश्रे लुङबादुई काताङा ओत,” सिन सिर च्युता ओतान।#होशे ११:१
हेरोदकी बेथलेहेमदु फिजाओन सेत च्युताते
16थेमे थे खोरोङला सिसा साबाते बात छ्याःङ मिसिरा खाईन ज्योतिषीओन खोपरोङ लुङबापा ग्युरगीन गालाते बात छ्या स्येनामेई हेरोद गेल्बोला स्येदाङगी मे बारसुङ। दोक ओङनामेकी थेकी थे फिजाला मासेताला मेङगो सिन बेथलेहेमताङ थे फेरोला ओताते युलगी नाङला लो ङि छाङातेताङ थे चावादु ख्योओ फिजाबरी गाङे सेत च्युत्सुङ। ज्योतिषीओनगी येशू केबाते छ्या स्ये ज्युत्च्येते कार्मा थेन्दाते समय गोमाका थेला लाःप्कीन बिन्दा ओतेकी हेरोद गेल्बोकी येशूचेन कि लो ङिकी नाङ कि थे चावादु ओङा फाप्क्यो सिन थोक खाईन थे फिजाओन सेत च्युता ओतान। 17थेकी थोक खानामेई परमेश्वर बात खित्कान्ते यर्मियेकी दोक सिन थाङबोका साबाते बात साबा च्योकराङ ओङसुङ। 18थेकी चुक साबा ओताने सासीन
“रामादु खालि दुङाल खाबातेताङ छेरा वारा खाबातेकामा थोक्यो। राहेल थे मोरोङ फिजा गाङे स्यिसुङ सिन
आउदी खाला ङुइओ। थेला सुङगीङ लुला ल्वा मुथुबो,” सिन साबा ओतान।#यर्मिया ३१:१५
येशूला मिश्रे लुङबादुकी ग्युरगीन खेराते
19तिरी हेरोद गेल्बो स्यिनामेकी यूसुफकी ग्वामाई मिलामला याङराङ प्रभु परमेश्वर दूतज्यीकला थोङसुङ। 20थेमे थे दूतकी थेला “यूसुफ, थानी दि फिजाला सेता छोल्कान्ते मिओन स्यिइन सिन्सुङ। थोगी था खो लाला दि फिजाताङ फिजे आमाला टीला दुरूकी इस्राएल लुङबानेराङ ग्युरला ग्युक,” सिन सिदुक। 21थोक ओङनामेकी थे दूतकी साबा च्योकराङ खाईन लाकीन थेबाला टीकीन यूसुफ इस्राएल लुङबाने ग्युरसुङ। 22तर यहूदिये अञ्चलदु हेरोद फुज्युङ अर्खिलाउस गेल्बो ओङला दुक सिरा थोकीन यूसुफ थे अञ्चलपा ड्वाप्ला ज्यीबा खासुङ। थेमे परमेश्वरगी थेला थेपा मान्डो सिन मिलामला सल्लाह बिन्सुङ। थे सल्लाह ङेन्गीन थे गालील अञ्चलपा गाल्गीन 23नासरत सिराते सारदु देत्सुङ। थोक खाईन मिओनगी तिरी थे फिजाला चुक सिते सिन परमेश्वर बात खित्कान्ते मिओनगी साबाते बात साबा च्योकराङ ओङसुङ। थेबेकी चुक साबा ओताने सासीन “थेला मिओनगी नासरी सिन सिओ,” साबा ओतान।
Trenutno izabrano:
मत्ती 2: JUL
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 1992 Wycliffe Bible Translators Inc. All rights reserved.
